Ŋitic. 16

Torukosi Timoteo ka Paulo ta Silas

1Todol Paulo tari Derube ka Listra. Ayai nen Ekristoit ŋolo anyaritae Timoteo, ŋolo arae toto keŋ Ayudayat ŋina anupit Yesu, nai arae papa keŋ Egirik. 2Etojokito ŋikanupak daadaŋ ŋulu alo Listra ka Ikonio Timoteo. 3Acamit Paulo arukor ka iŋes; abu iŋes ya Timoteo kileŋer aŋuna a Ŋiyudayan a ŋulu ayakasi nakwapin ŋun, anerae ayenete ikes daadaŋ atemar arae papa a Timoteo Egirik. 4Ani irimorete ikes lotaunio, tolimonokis ikes ŋikanupak akiwuap ŋakiro ŋuna apotu Ŋikiyakia ka ŋikatukok totubut alo Yerusalem. 5Aŋun, kitogogoŋoi ŋatukon a ŋikanupak ananupit ka kiyatas ŋikanupak a ŋinakoloŋit.

Toanyuwa Paulo atakanikinet alo Toroas

6Kirimosi ikes nakwapin ŋuna a Pirigia ka Galatia, kedau Etau ŋolo Asegan awoun ikes akisera ŋakiro ŋuna ka Akuj alo Asia. 7Ani edolete ikes lokukoru ŋolo a Misia, kikatakis ikes alosit nakwap ŋina anyaritae Bisinia; nai nyecamak ikes Etau ŋolo a Yesu. 8Aŋun, kitoro ikes Misia, totiyaaros Toroas. 9Akoloŋit ŋin nakwaare, bu atakanikinet neni a Paulo: awoi ekile ŋolo alo Makedonia edyekit iŋes ebala, “Bua Makedonia, ikiŋarak isua!” 10Ani keanyuwa Paulo atakanikinet ŋin, kiitanae isua atipei alosit Makedonia, anerae ikipotu oyenutu atemar kikinyar Akuj isua alimonokin Ŋakiro ŋuna Ajokak neni kec.

Toruwor Lidia akanupan

11Todokae isua ameeli alo Toroas tocorotae tari Samosirake, akoloŋit ŋina atupakini todoloi Neapolis. 12Torotokinoe a nen a ŋakejen tolotoi Pilipi, etaun ŋolo apolon anakwap a Makedonia ŋolo eboiyoto Ŋiromanin. Kiriyae isua ŋirwa ŋidi alotaun a ŋol. 13Ani edoli akoloŋit ŋina a Sabato, tolotoi isua kiŋa etaun diyete aŋolol, neni atamakinitae isua atemar kori etukonokin Ŋiyudayan akilip. Kiboikinetei isua, kirworoe neni a ŋaberu a ŋuna atukokina nen. 14Apei alokidiŋ ŋuna ikipupete isua, arae aberu ŋina anyaritae Lidia ŋina alotaun a ŋolo a Tyatira, ŋina agyelanari ŋilowi ŋulu kipura areŋak. Arae iŋes aberu ŋina ainakina neni ka Akuj. Abu Ekapolon toŋaa etau keŋ akiirar tocamu ŋakiro ŋuna erworo Paulo. 15Ani kibatisae iŋes kaapei ka ŋituŋa ŋulu ke ekal keŋ, itodyek isua tema, “Ani kire kitamete iyes atemar arae ayoŋ akanupan ŋina ke Ekapolon, potu kiboiyoto alokai kaŋ.” Abu iŋes ikitacamu isua alosit ka iŋes.

Toenae Paulo ka Silas alo Pilipi

16Apeikoloŋit elosyo isua neni elipeneneere, kiryamunetei ka apese ŋina arae apito, ŋina ayakar ekipye ŋolo ainakinit iŋes akidwar ŋakiro ŋuna eponito alokiŋaren. Aryamianakini iŋes ŋikapolok keŋ ŋisiliŋa ŋulu alalak anakidwar keŋ. 17Kiwuapu iŋes Paulo ka isua ecela ebala, “Erae ŋikilyok lu ŋiketiyak ŋulu ka Akuj a ŋina alokidiama nooi! Iseraete ikes epite ŋolo ipedoryata iyes aiuno!” 18Kitiya iŋes nu ŋirwa ŋulu alalak, akitodol ŋina aŋoya Paulo, ido toboboŋ tolimok ekipye tema, “Akalimokini ayoŋ iyoŋ alokiro a Yesu Kristo atemar tolomu aneni keŋ!” Tolomu ekipye aneni keŋ esaa ŋolopei ŋol.

19Nai ani eyenunete ŋikapolok keŋ atemar adaun epite ŋolo sek aryamununiata ikes ŋisiliŋa, aŋuna eritarere ekipye, kikamut ikes Paulo ka Silas, torikosi ikes lokepukak ŋulu ayakasi neni iikiikere. 20Ani kedaut ikes ayaun ikes lokatubok, temasi, “Erae ŋikilyok lu Ŋiyudayan, isiguryaete ikes etaun yok. 21Itatamete ikes ŋitalyo ŋulu italeo iwon Ŋiromanin akiwuap ka akitiya.” 22Toloma asepic a ŋituŋa daŋ nakiro ŋuna esitakinitere ikes.

Tociliciliyasi ŋikatubok ŋilowi a Paulo ka Silas, tolimokis ŋituŋa akibuŋa ikes a ŋadase. 23Ani kibuŋae ikes nooi, kiwuakinae mabus, kicikakinae ekapolokiniton mabus akiyok ikes ejok. 24Ani iirari ekapolokiniton mabus ŋuna ecikakinio iŋes, togolok ikes nagule ŋina alotooma nooi, toen ŋakejen kec nakito ŋuna apotyok.

25Ani eapikini kidiŋ akuwar, elipete Paulo ka Silas toeos ŋieosyo neni ka Akuj, topupete ŋimabus ŋuluce ikes. 26Ŋinapeipaki, tomaranik akwap nooi, kiukok ejera ameun alokwap. Atipei toŋaaros ŋikekya daadaŋ, tolacaros ŋiriko aneni a ŋimabus a daadaŋ. 27Ani ekyenyuni ekapolokiniton mabus, kiŋolik ŋikekya ŋulu ke ejera daadaŋ eŋaara, totamak atemar keema ŋimabus; aŋun tolemu atum keŋ ecamit akicumakin bon. 28Nai kiworou Paulo ke etoil a ŋolo apolon tema, “Nyiwan akonikuwan! Ikiya isua daadaŋ ne!”

29Tonyarau ekapolokiniton mabus ituŋanan ayaun etaa, kipumar tooma, toramakin kiŋaren Paulo ka Silas emarani. 30Ya nai iŋes ikes kiŋa, kiŋit ikes tema, “Ŋikapolok, nyo itemokino ayoŋ etiya, ikotere oiun?”

31Temasi ikes, “Tonup Ekapolon Yesu, ido toiun kaapei ka ekonikal.” 32Tolimonokis nai ikes ŋakiro ŋuna ka Akuj neni keŋ ka lotuŋa ŋulu alokai keŋ. 33Ya iŋes ikes nakwaare esaa ŋolopei ŋol, kilot ŋajemei kec. Aponi kibatisae iŋes atipei kaapei ka ekal keŋ. 34Ya iŋes Paulo ka Silas kai keŋ, inak ikes akimuj. Tolakaros iŋes ka ŋituŋa keŋ, aŋuna aponiata ikes tonupa Akuj.

35Ani iwalari akwap, kiyakuut ŋikatubok ŋipoliso atemar, “Kimyekisi ŋikilyok ŋul toloto.”

36Tosodi ekapolokiniton mabus tolimok Paulo ŋakiro ŋun tema, “Eyakuut ŋikatubok akirot atemar ikilacakin iyes. Tonyoutu nai, toloto a ekisil.”

37Nai tolimok Paulo ikes tema, “Aponi ikibuŋae isua alokiŋaren ŋituŋa pa ikitubokinitae--isua ŋituŋa ŋulu a Roma! Apotu ikes ikiwuakis isua mabus. Ecamito nai tokona ikes alacakin isua pa eyenete ŋituŋa a? Nyepedor jik! Itemokino potu ikes pei ŋilopeyek ikilacakis isua.”

38Yaasi ŋipoliso ŋakiro ŋun lokatubok. Ani iirarete ikes atemar arae Paulo ka Silas ŋituŋa a Roma, tobul ikes. 39A ŋun, potu ikes adyekit Paulo ka Silas akisyon ikes. Toŋaut nai ikes alomabus, kiŋitakis ikes alosit alotaun. 40Tolomut Paulo ka Silas alomabus, toloto neni a Lidia. Kiryamun ikes aina ka ŋikanupak, tolimokis ikes ŋakiro ŋuna kisimukekinet, torotokis nai alotaun.

Currently Selected:

Ŋitic. 16: NIB2008

Highlight

Copy