Ŋitic. 15

Eikiiko alo Yerusalem

1Apotu ŋikilyok ŋice potu alo Yudaya tari Antiokio togeut akitatam ŋikanupak temasi, “Nyipedorete iyes aryamun aiuno, mati kikileŋeri ikwaŋina ecamakinitotor Ŋikisila a Moses.” 2Apotu ŋakiro nu inakis Paulo ka Baranaba ebura ka apeganakin ka ikes. Toseunae nai Paulo ka Baranaba ta ŋikanupak ŋice alosit Yerusalem aanyun Ŋikiyakia kaapei ka ŋikatukok a Ŋikristo aŋuna a ŋakiro a ŋun.

3Aŋun, kiyaki atukot a Ŋikristo ikes. Ani etubete ikes neni anyaritae Poenikia ka Samaria, kitatamikis ikes ŋituŋa ŋul epite ŋolo anupyata ŋituŋa ŋulu nyerae Ŋiyudayan Akuj. Kitelelyana ŋakiro ŋun ŋikanupak daadaŋ. 4Ani edolunete ikes Yerusalem, kijau atukot ŋina a Ŋikristo ka Ŋikiyakia ta ŋikatukok ikes. Tolimokis Paulo ka Baranaba ikes ŋakiro daadaŋ ŋuna abu Akuj kitiya aneni kec. 5Nai temasi ŋikanupak ŋice ŋulu ka atukot a ŋina a Ŋiparisayon, “Itemokino ŋikanupak ŋulu nyerae Ŋiyudayan kileŋerae ka kitatamae kiwuapa Ŋikisila a Moses.”

6Totukokin nai Ŋikiyakia ka ŋikatukok aripirip ŋakiro ŋun. 7Ani kepeganakinosi ikes apaki ŋina aoyan, tonyou Petero tema, “Ŋikaitotoi kaŋ, iyenete iyes atemar abu koloŋ Akuj okoseu ayoŋ alokidiŋ kus alimonokin Ŋakiro ŋuna Ajokak lotuŋa ŋulu nyerae Ŋiyudayan, ikotere iirarete, tonupa. 8Abu Akuj ŋina eyeni ŋitai a ŋituŋa kiteyenu atemar ecamunit iŋes ŋulu nyerae Ŋiyudayan aŋuna ainakinia ikes Etau ŋolo Asegan, ikwaŋinapei ikiinakinia iwon. 9Abu nyiwuak atyaketait kidiŋ yok ka ikes, nai abu kitesegu ŋitai kec anakisyon ŋasecisya, anerae apotu tonupa. 10Aŋun, kaanukiro nai ikatakinitotor iyes akitoŋo Akuj alotooma akisiwuok ŋikanupak ŋigogoso ŋulu pa apedorito atapapaa yok kori iwon daŋ akiwuok. 11Nyepedor! Ikinupit iwon atemar ikiiun iwon aŋuna ka ajokis a ŋina ke Ekapolon Yesu, ikwa ikes daŋ.”

12Kililiŋa ŋituŋa ŋulu ka atukot daadaŋ, topupokis daŋ Baranaba ka Paulo elimonorete ŋuna a ŋaumonokineta ka ŋakujuwuanisya daadaŋ ŋuna kitiyat Akuj aneni kec alokidiŋ ŋituŋa ŋulu pa arae Ŋiyudayan. 13Ani kedaut ikes erwor, kirworik Yakobo tema, “Ŋikaitotoi, topupokinae ayoŋ! 14Adau Simoni Petero alimun epite ŋolo esyaunia Akuj alemun ateker keŋ alotooma ŋituŋa ŋulu nyerae Ŋiyudayan, kituruwo ŋulu keŋ. 15Ecamuna ŋakiro nu ka ŋuna a ŋikadwarak ŋuna igiritae ikona: ebala Akuj,

16‘Ekaku a nu aboŋuni ayoŋ,

ka etonyouni akai a Daudi ŋina aŋopiya.

Etonyouni ayoŋ ŋakinyasunet keŋ,

ka etowuoi iŋes.

17Tosodo ŋituŋa ŋuluce--ŋituŋa daadaŋ ŋulu nyerae Ŋiyudayan

ŋulu anyarau ayoŋ aruwor ŋulu kaŋ,

ekewara ayoŋ.

18Ayoŋ Ekapolon, ŋolo aberakin koloŋ sek akiteyenun

ŋakiro nu ŋuna etiyakini.’

19Aŋun, atami ayoŋ atemar nyitemokino iwon akicanit ŋituŋa ŋulu nyerae Ŋiyudayan ŋulu ebelekinosi neni ka Akuj. 20Nai itemokino akigirakin ikes abaruwa, ikotere toesikis akinyam ŋamuja ŋuna nyitesegunitae, anerae einakinitae sek nakujo; toesikis daŋ amalao ka nyenyamete ediotyaŋ ŋolo emyeditae kori ŋaokot. 21Anerae elimonokinio Ŋikisila a Moses lotaunio daadaŋ ŋinapei koloŋ ka esyomeneneo alosinagogae a ŋinakoloŋit a Sabato.”

Abaruwa ŋina egirakinitae ŋikanupak ŋulu pa arae Ŋiyudayan

22Tosodo nai Ŋikiyakia ka ŋikatukok kaapei ka ŋikanupak daadaŋ totyakut atemar, kejoikinit toseunae ŋikilyok ŋidi alokidiŋ kec, ido kiyakiyarae Antiokio kaapei ka Paulo ta Baranaba. Toseut ikes Silas ka Yuda ŋolo anyaritae Barasaba, ŋikilyok ŋulu akerer nooi alokanupak. 23Inakinae ikes akiya abaruwa ŋina abala ne: “Isua Ŋikiyakia ka ŋikatukok ŋulu ikirae ŋikaitotoi kus, ikimalat iyes ŋikanupak daadaŋ ŋulu nyirae Ŋiyudayan ŋulu iyakasi Antiokio, Siria ka Cilicia.

24“Eirar isua atemar kepotu ŋituŋa ŋice ŋulu anatukot kosi potu inaa akican ka akisigurya ŋatameta kus aŋuna kirworito ikes; nai pa alimokinitae isua ikes akitiya ŋun. 25Aŋun, aponi isua totukokinetei ka tocamunetei aseun ŋituŋa ŋidi kiyakuunae neni kus. Erukunete ikes ka ŋikonei kosi ŋuluminan, Baranaba ka Paulo, 26ŋulu ajal akiyar kec aŋuna ke Ekapolon yok Yesu Kristo. 27Ikiyaku nai isua neni kus Yuda ka Silas, ŋulu ikilimokinete iyes alorwor kec a ŋilopeyek ŋakiro ŋunapei ikigirit isua. 28Acamu Etau ŋolo Asegan kaapei ka isua atemar nyikiinakin iyes ŋatyokisyo ŋace adepar Ŋikisila lu, ŋulu iitana:

29itemokino iyes toesikis akinyam ŋamuja ŋuna einakinitae nakujo, ŋaokot, ediotyaŋ ŋolo emyeditae ka akitiya amalao. Ani kicoikis iyes ŋun, itiyaete ejok. Ikianyun.”

30Aŋun, kiyakiyarae ikes etiŋito abaruwa ŋin, toloto Antiokio. Kedaut acunakin ŋikanupak, inakis abaruwa neni kec. 31Ani kesyoma ŋituŋa abaruwa, tolakaros aŋuna a ŋakiro a ŋuna esimukekinak. 32Apotu Yuda ka Silas ikwapei araakatar ŋikadwarak, kisimukekis ŋikanupak a ŋakiro a ŋuna alalak, kitogogoŋo ikes. 33Ani kiboiyoto ikes a nen ŋirwa ŋidi, kitoloto ŋikanupak ikes ke ekisil, toboŋosi neni a ŋulu eyakuunito ikes. [ 34Nai totyaku Silas akidoŋ nen.]

35Kiboiyoto Paulo ka Baranaba alo Antiokio, itatamete ka elimonokinete ŋakiro ŋuna ke Ekapolon, kaapei ka ŋice daŋ ŋulu alalak.

Totyakas Paulo ka Baranaba

36Kelunyar ŋirwa ŋidi, tolimok Paulo Baranaba tema, “Bua oboŋosi eŋoliasi ŋikanupak, ŋikaitotoi yok alotaunio a daadaŋ a ŋulu eseratere iwon ŋakiro ŋuna ke Ekapolon, oanyutu epite ŋolo eyakatar ikes.” 37Acamit Baranaba atemar torukosi ikes ka Yoana Mariko. 38Nai atami Paulo atemar pa etemokino ikes arukor ka ituŋanan ŋini abu toboŋo toesik ikes alo Pampilia, ŋini abu nyerukosi ka ikes lotic. 39Tolomu ebura ŋolo amwanan, totyakas ikes. Ya Baranaba Mariko, toloto ka ameeli tari loculat Kupuro; 40nai toseu Paulo Silas, ido toloto, kedaut ŋikanupak akicikakin ikes anajokis a ŋina ke Ekapolon. 41Kirimo iŋes Siria ka Cilicia, kitogogoŋ ŋatukon ŋuna a ŋikanupak.

Currently Selected:

Ŋitic. 15: NIB2008

Highlight

Copy