Marako 15

1Drañano dribise koani dridri dii e, maligae e, dia tatišilepi dii e, dia rukebelepi vura ta dii be adreki ta ta aiiki kofulana, dreki Yesuni lambezo, dreki lizo fe adi Pilato vuna. 2Pilato dre ta lizizo adi ti, ki di, Mi Maleke Yudakia di e ya? Adi dre ta akozo, dre taza adidri, Mi adre ta. 3Koani dridri dii dreki tai lodzazo adiru bi. 4Pilato dre ta lizizo adi ti todi, ki di, Mi akota tale ko ya? Mi no ka, ta be we aii dre lodzale miru dii. 5Yesu go ta ako tejia ko; kadre nitini Pilateni lindri gada.

6Nga ñale murungu na tu adi go bagodia alo di tri aiidri, akodi aii dreki zile adi ti di. 7Dia anda alo, runa Baraba alambelambe ayile dia la̱buandu solepi kiono dii be, dia dia fulepi drale ajua dii. 8Dialezolepi dii dreki ngazo tandu ba zile adi ti adi ko’o ngoro i dre adrele ole aiidri di tini. 9Pilato dre ta akozo, ki di, Mì le ma kotri Maleke Yudakia di amidri ya? 10Adi dre atogiale dise koani dridri dii feki akodi aiiki togo dre asuale akodiru dise. 11Koani dridri dii gaki dialezolepi niiki a ni, amba ta nidi adi dre Barabani trizo aiidri di. 12Pilato dre ta akozo todia, dre taza aiidri, Ma ko’o ado ya akodidri mi zi Maleke Yudakia di? 13Aii dreki trezo todia, ki di, Mi kokipa akodi fe atipatipadri. 14Pilato dre taza aiidri, Adose ya? Akodi o ado ya konji di? Aii dreki trezo ambani, ki di, Mi kokipa akodi fe atipatipadri. 15Pilato dre lezo dialezolepi niiki togo kokini, a tri Baraba aiidri, dra i coa Yesu kinise di, i dre akodia fezo kipale fe atipatipadri.

16Tukutuku dreki adini sezo maraṅana, a zi runa Pretorio; aii dreki kopañi ruzizo o̱ei. 17Aii dreki bongo keka di ašozo adiru, dre kuci lesezo pa̱ripa̱riru asole adi dri. 18Aii dreki ta zi adi ti, ki di, Ari be, Maleke Yudakia di. 19Aii dreki adi dri coazo lomise, dre tušu fuzo adiru, dre aiki kaya̱ti tira’a ta̱ndiki adidri. 20Aii ko ta̱bi adi di, aii ngi bongo keka di adi ruse, aii dreki adini bongo tošozo adiru. Aii dreki adini sezo lile kipale fe atipatipadri.

21Aii dreki dia alo lavulepi di ozo lile aii be, runa Simona dia Kurenea di, alilepi la’uase di, ata Alesandura adea e Rufu adea be, akodi kodoro fe adini kipazo di. 22Aii dreki alizo adi be vo Gologotaa, ala nidi tale di, vo drifa adea. 23Aii dreki biño fezo aidri mvule akudu ngialo mure be: adi do mvule ko. 24Aii dreki adini kipazo fe atipatipadri, dreki adini bongo la̱njizo aiiki kofulease, gumari bera’a adi o do ni ya. 25Saa na dise, aii dreki adini kipazo fe atipatipadri. 26A tiši ta lodzale adiru di bale adi drile, ki di, Maleke Yudakia di. 27Aii kipa kugu iri dii fe atipatipadri adi be, alo di adini drigualese, alo di adini lijialese. 28Ta tišilepi di talepi di, ki di, A la akodi dre ta konjiolepi dii be, i dre tai nidi ozo akele dre. 29Dia lavulepi dii dreki adini aizezo aii dreki aiki dri kayara’a, dreki taza, Ha! Mi yekaluni tizalepi di, yekaluni šilepi kitu na di, 30mi kotedri mi, mi kaši fe atipatipadrise. 31Koani dridri dii ta̱bi adi aiiki kofulea nitini, dia tatišilepi dii be, ki di, Adi tedri dia aziadii, kicoa i tedri ko. 32Kristu Maleke Yisaraelikia di kaši fe atipatipa drise ñanomvano, mà konoro ka’ile. Dia kipale fe atipatipadri adi be dii dreki adini voazo.

33Saa njikazia di kaca di vo o̱ei di go adrele tinimvaro saa nji‐dri‐su di acazo. 34Saa nji‐dri‐su dise Yesu dre trezo kuli be dradra, ki di, Eloi, Eloi, lama sabakitani, ta alale tale di, Ama Nzambe, ama Nzambe, mi ta’i ma adose ya? 35Dia arukaba adrelepi lagana dii ko yi ta nidi di, ki di, Mi no ka, adi ara Eliyani zi. 36Dia alo di dre razo, dre mamalia ozo kolosu be bi, dre soza lomidri, dre fezo adidri mvule, ki di, Kota’i; mà kono Eliya kali adini do vudri ki. 37Yesu dre trezo kuli be dradra, dre ai lindri fezo lile. 38Bongo kacua yekalu adea a ši ana iri, kurulese cale tabuna. 39Kendurioni adrelepi adi laga di ko no adi o ai lindri lile nitini di, ki di, Ago nidi Nzambeni Mva e pati. 40Toko koangia dreki adrezo ta no rararo, adreki aiki kofulena Maria Magadala e Maria e andra Yakobo camva di adea Yose adea be, Salome be; 41toko alilepi adi vuse dii, adi kadre Galilayana di, dreki ta ozo adidri, toko azina ambalepi bi Yerusalemina adi be dii.

42Ñano nga ka̱ni dre di, kadre nitini di kitu nidi nga ledezo di kitu sabiti adea dri dridri. 43Yosefa Arimatayalese di’a di ali, ago di togilii ta olepi piri di, akodia tandi dre mi bazo Nzambeni matayase; dre šizo Pilato vuna tiri ako, dre Yesuni rumva zizo adi ti. 44Pilatoni lindri dre gazo akodi dradre di se: dre kendurionini zizo i vuna, i dre ta lizizo adi ti akodi dradre trokiono ya di. 45Adi ko yi kenduriono tise di, i ka’i Yosefadri avo dozo. 46Akodi gi gotono‐bongo, dre adini adozo vudri, dre adini ndrazo gotono‐bongose, dre adini bazo buna, a̱ di kirana kiono; dre kira lilizo butise. 47Maria Magadale e, Maria Yoseni andra be aii dreki adini bara nozo.

Currently Selected:

Marako 15: LOG

Highlight

Copy