Matayo 19

1Kadre nitini Yesu ko’o tai nii akele di, adi nji Galilaya lese, dre alizo kofula Yudaya a di a Yoradeneni ta’ana. 2Dia lezolepi bi dii dreki lizo adi vuse; adi dre aiiki tedrizo nale. 3Farusii dreki alizo adi vuna, aii dre adini litira’a, dre tazo, ki di, Togi e ya ago adre tokona ta’i, tai o̱ei diise ya? 4Adi dre ta akozo, dre tazo, ki di, Mi ladre ko ya, akodi aii balepi ta kayuro di, ba aii agoro, tokoro. 5Dre tazo, ki di, Tandu nidise ago kota’i atana, andrena be, kotroro tokona ru; aii iri niiki za go adrele alo? 6Kadre nitini aii go adrele dia iri diiro todia ko, aiiki za alo. Kadre nitini za angodi ya Nzambe atona dre, dia kolanjiro ko. 7Aii ta adidre, ki di, Kadre nitini Mose ta togi waraga toko ta’izo di fele akodi ta’izo adose ya? 8Adi ta aiidre, ki di, Mose ka’i amidre, mi kota’iro amiki toko, amiki togo dre adrele mbamba dise: ta kayuro di tai adre ngoro nitini ko. 9Ma dre tazo amidre, ki di, Dia angodi ya ta’i tokona tai dia mo ako di kamvole dise kodia, dre toko azina di mozo, dre ta toko kamvozo di ozo adiru; dia angodi ya akodi molepi di, a kota’i akodi di, o ta toko kamvozo di. 10Dia tayilepi dii taki adidre, ki di, Tai ago adea ai toko be adre ngoro nitini di su mole ko. 11Adi dre tazo aiidre, ki di, Mundia o̱ei kicoa tai nidi do ko, i dre fele di aii kicoa dona. 12Kondo arukaba be, aii dreki afole andrelese kondoro dise: kondo arukaba be, ago dreki aiini ozo adrele kondoro: kondo arukaba be, aii oki aii tandini kondoro mataya bu adease. Akodi kicoa ta nidi ni do, akodi kodo ni.

13Dra i dri anjimva adi vuna, adi kobaro ai dreka aiidre, dre ngozo Nzambedre: dia tayilepi dii dre aiiki ndrizo. 14Yesu dre tazo, ki di, Mi koka’i anjimva kaliki ma vuna, dre aiiki logazo ko: mataya bu adea dre adrele aii tini dise. 15Adi dre ai dreka bazo aiidri, dre lizo nalese.

16Mi no ka, dia alo di dre alizo adi vuna, dre tazo, ki di, Dia ta‐tadalepi di, ado tai tani di ma ko’o ya, ma kadrero lidri kona vuse kolia di be. 17Adi dre tazo akodidre, ki di, Mi zi tandu ta tani adea ma ti adose ya? Dia alo tani e: mi le sile adrele lidriru di mi ko’o togi. 18Adi ta adidre, ki di, Togi angodi ya? Yesu dre tazo, ki di, Mi kofu dia drale ko, mi kokamvo dia ko, Mi ko’o kugu ko, Mi kota tandu kinzose dia ru ko. 19Mi koba ami atani kañi, ami andre be: mi kole ami bapi ngoro ami tandi tini. 20Ago kaduraro di ta adidre, ki di, Tai nii o̱ei ma dre ole kiono di, Ado tai ya ma dre ole ko di? 21Yesu ta adidre, ki di, Mi le tai o̱ei ole di, mi koli, ado nga ya mi dreka dii, mi kogi, dre fezo dia lemerero diidre, mi kadrero nga be buna; mi kali, dre alizo ma vuse. 22Ago kaduraro di koyi tai nidi dre di, adi njida tiza be: akodi dre adrele ngae be we dise.

23Yesu dre tazo dia ai tayilepi dii dre, Ma ta amidre pati, Ngaliyini sisi mataya Nzambe adea lena di kokoroko kania. 24Ma dre tazo amidre todia, ki di, Amba ta añi kamile lavu sindani mi ase, ta ngaliyi dre sile mataya Nzambe adea lena di ruse. 25Dia tayilepi dii koyiki tai nidi dre di, aiiki lindri gaga we, dre tara’a, ki di, Dia angodi ya kicoa tedrile ni ya? 26Yesu dre mi bara’a aiiru, ta aiidre, ki di, Ta nidi pi dia vele; ta alo di pi Nzambe ko. 27Dra Petero ako ta, dre tazo adidre, Mi no ka, mà ta’i amaki ngae o̱ei, mà dre alizo mi vuse; kadre nitini di, mà kado ado nga ya? 28Yesu dre tazo aiidre, ki di, Ma ta amidre pati, mi dia alilepi ma vuse dii, vese nga bazo todi di, Adamuni Mva koliri indi kiti‐mokonzi dri di, ai utukufu adea na di, mi koliri indi kiti‐mokonzi mudri‐dri‐iri dii dri, ba suru mudri‐dri‐iri Yisarele diikia tavo tara’a. 29Dia o̱ei jo ta’ilepi dii, adrupii ta’ilepi dii, amvupii ta’ilepi dii, ata ta’ilepi dii, andre ta’ilepi dii, mva ta’ilepi dii, la’u ta’ilepi ama ruse dii, akodi kodo ta lezolepi ñadinji alo di, dre lidri dozo kolia. 30Dia be dridri dii kadrero dia velero diiro, dia velero dii kadrero dia dridri diiro.

Currently Selected:

Matayo 19: LOG

Highlight

Copy