Matayo 18

1Saa nadise dia tayilepi dii aliki Yesu vuna dre, dre tazo, ki di, Amba adi mataya bu adea na ya? 2Adi dre mva camva di zizo i vuna, dre akodi bazo aiiki ketona, 3dre tazo, ki di, Ma ta amidre pati, Mi kala amiki togo gozo adrele mva camva dii tini ko di, mi kosi mataya bu adea na tejia ko. 4Tandu nidise, dia angodi ya ta buṅa ozo di drolepi i togo ase di mva camva nidi tini, dia anda adre ambani mataya bu adea na. 5Dia angodi ya mva camva di ngoro nitini drilepi ama ruse di, kodri ma; 6dia angodi ya ko’o mva camva alo di dele di, amba ta tani akodidre, a ko’iro kira andre murungu di akodi kembe kariro yi talina. 7Tiza kadre mundia o ni tai dezo diise, su tai nii dreki alizo; tiza kadre dia anda o ni akodi dreka tai nidi are alile. 8Ami dreka, ami pa o mi dele di, mi koga: amba ta tani midre, mi dre sizo adrele lidriru dreka tali be di, siale siasia, ta i dre ami bezo ami dreka iri dii be, ami pa iri dii be acina kona vuse kolia di ruse. 9Ami mikisia o mi dele di, mi kongi dre bezoa mi vulese: amba ta tani mi dre, mi dre sizo adrele lidriru mikisia alo di be, ta i dre ami bezo mikisia iri dii be aci geyena adeana kona vuse kolia di ruse. 10Mi kolama ta, mi kozero mva camva alo di zeze ko; ma dre tale amidre dise, aiiki malaika adreki ama Ata buna di ni mibale no kolia. 11Adamuni Mva dre alile dia avilepi dii tedri dise. 12Mi tusu angini ya? dia alo di adre kabiliki ñadinji dii be, kabiliki alo di lapa adi drekase dre di, adi ta’i kabiliki ñabasu‐dri‐mudri‐dri‐nji‐dri‐su ko ya, dre lizo kira palese, dre kabiliki lapalepi di ndazo. 13Adi kusu vele ya di, ma ta amidre pati adi lenze amba kabiliki nadi kabiliki ñabasu‐dri‐mudri‐dri‐nji‐dri‐su lapalepi ko dii ruse. 14Kadre nitini amiki Ata buna di le ko mva camva alo di kotiza.

15Ami adrupi dre takonji ozo mi ru di, mi koli ami iri mi kota adidre adini takonji; akodi yi ami tai di, i adre arupiro mi be ami tai se. 16Adi dre ami tai yizo ko di, mi kodo dia alo di, dia iri dii ami be, mundia iri, mundia na, tandu ngilepi sibalese dii a ko’oro tai o̱ei adrele. 17Adi dre aiiki tai gazo yise re di, mi kota kopaiñidre: adi dre kopaiñi gazo yise re indi di, mi koka’i adi adre mi mise dia‐suru tini, ateloni tini. 18Ma ta amidre pati, Ado nga ya mi kolambe vudri di, a kolambe buna; ado nga ya mi kotri vudri di a kotri buna. 19Ma ta amidre todia, dia iri amiki kofulena koka’i vudri di ado taise ya aii kozi, ama Ata buna di ko’o tai nidi aiise. 20Vura dia iri, dia na dre atonazo di ama ruse dise, ma be aiiki kofulena nale.

21Dra Petero alida, dre tazo adidre, ki di, Miri, ama adrupi ko’o takonji maru vese angopi ya, ma dre akodia takonji trizo? cale vese nji‐dri‐iri ya? 22Yesu dre tazo adidre, ki di, Ma ta midre cale vese nji‐dri‐iri ko, cale ñabana‐dri‐mudri vese nji‐dri‐iri. 23Kadre nitini mataya bu adea ngoro mokonzi anda di tini, akodi le ai nga adrelepi ai adremakandrae dreka di nale. 24Adi koba anduna nale di, a dri dia alo di adi vuna akodi lutu mari iru talenta kutu mudri. 25Adini nga dre adrele fele marise yokodo dise, adini Miri ta togi aii kogi adi, adini toko be, adini mva be, adini nga be o̱ei fele marise. 26Tandu nidise adremakandra de vudri dre tandizo adi kandra dre tazo, ki di, Miri mi kadre kiri, ma kofero ami mari midre o̱ei. 27Adremakandrani Mirini togo dre tile adise dise, adi tri adi, dre tazo mari landeda. 28Adremakandra nidi dre afozo, dre ai bapi adremakandraro di kusuzo, akodia mari iru makuta ñadinji: adi dre akodi ruzo, dre akodi ruzo a’ole’a, dre tazo, ki di, Mi kofe ama mari mi vule di. 29Kadre nitini adini bapi adremakandraro di de vudri, adi ti zi, adi ki di, Mi kadre kiri, ma kofero midre. 30Adi dre lezo ko, dre lizo adini bazo bagojona, adi kofe adi mari ka. 31Kadre nitini di adini bapi adremakandraro dii konoki tai i dre ole dii dre di, tiza are aiiki o ni we, aii dreki alizo dreki ta o̱ei i dre ole dii tazo aiiki Miridre. 32Dra adini Miri zi adi i vuna, dre tazo adidre, ki di Mi adremakandra konji di, ma ta ama mari landeda, mi dre ama ti zile dise: 33su ami togo dre tizo ami bapi adremakandraro dise ko ya? ngoro ama togo dre tile mise di tini ya? 34Adini Miri o kumba, dre adini fezo dia adrelepi dia o asuale diidre, adi kofero adi mari ka. 35Ngoro nitini ama Ata buna di ko’o amiru indi, ami tri amiki adrupi kaloma kaloma aiiki takonji ase ko di, amiki togose o̱ei.

Currently Selected:

Matayo 18: LOG

Highlight

Copy