Mark 11
11
Jesus Jerusalem Ohiyapi El Timahel Hiyupi
(Matthew 21.1-11; Luke 19.28-40; John 12.12-19)
1Jerusalem el ihuƞni pi, Bethphage na Bethany oṫuƞwahe ki k̇aƞyela K̇aƞta Paha el hipi. Jesus ihakab-uƞpi num kaiṫokab iyayewiċaye 2na wawiċaṡi: "Wiċoti el iyayiƞ na waƞc̄agya ṡuƞṡuƞla makiċima waṫogla ki kiyuska na auwiċakiye. 3Nakun takuwe heċuƞ he ki he iyuƞġapi, lecel eyapi, le Iṫaċaƞḣc̄a ki ilagyiƞ na hektakiya waƞċagya kigleyiƞ kte."
4Ho ċa uƞkiyayapi na ki ċaƞku el uƞ ċa iyeyapi, ṡuƞṡuƞla makiċima waṫogla waƞ tiyopa el kaṡka najiƞ. Yuƞkaƞ kiyuṡkapi ecuƞhaƞ, 5huƞḣ oyate ki iwic̄ayuƞġapi, ċa le takuwe hecanupi hwo, ṡuƞṡuƞla makiċima waṫogla ki yakiyuṡkapi hwo?"
6Jesus taku eye ki iyecel oyakapi na wiċota ki awiċayustaƞpi. 7Ṡuƞṡuƞla makiċima waṫogla ki Jesus el ahipi na ṫaoglepi ki uƞ wamak̇aṡkaƞ ki akaḣpapi na Jesus akaƞl iyotake. 8Wiċota iyuha ṫaoglepi ki ċank̇u el iḣpeyapi, eċuƞhaƞ oma ki oblaya etaƞhaƞ ċaƞaletka kaksaksapi na caƞk̇u akaƞ iḣpeyapi. 9Oyate ki iṫokab iyayapi na ihakab iyayapi hena k̇o hoṫaƞiƞpi "Wak̇aƞṫaƞka yataƞpi ki yuonihaƞpo! Wak̇aƞṫaƞka Jesus yuwak̇an le heċel u welo!" 10Yuonihaƞpo! David Yataƞpi ki ate uƞyaƞpi ki ṫawokiċuƞze yataƞpo!
11Jesus Jerusalem ekta i, Tipi-wak̇an el timahel iyaye na takuku ki iyuha okṡan yaƞke ki ableze. Eyaṡ aƞpetu ḣtayet̄u aye ċa Jesus na ihakab-uƞpi ki Bethany oṫuƞwahe etkiya iyayapi.
Jesus Ṫamnioḣpe Ċaƞ ki Wayaṡic̄e
(Matthew 21.18, 19)
12Ihihaƞni aƞpetu ki, iyeċel Bethany oṫuƞwahe ki het̄aƞ iyuha kupi yuƞk̇aƞ Jesus loċiƞ. 13Itohaƞ Jesus ṫamnioḣpe ċaƞ waƞ ċaƞwape akaḣpe ċa waƞyaƞke, heċel iyayiƞ na ṫamnioḣpe etaƞhaƞ yuk̇e ki ewaƞyaƞk̇e. Ekta i eyaṡ ċaƞwape iċela iyeyiƞ eċiƞ ṫamnioḣpe ki iyehaƞtu ṡni. 14Jesus ċaƞ ki lekiye, "Tuwe keyaṡ ṫamnioḣpe ki tohaƞni niyutapi kte ṡni!"
Na ihakab-uƞpi ki naḣuƞpi.
Jesus Tipi-Wak̇an Waċekiya Ekta I
(Matthew 21.12-17; Luke 19.45-48; John 2.13-22)
15Jerusalem el hihuƞnipi, yuk̇aƞ Jesus Tipi-wak̇an el waċekiya hi na tuweki wiyoṗeya na opeṫun ṡkaƞ hena k̇aḣeyab iyayewiċaye. Waglewotapi kiƞ yuptaƞtaƞ iḣpeyiƞ na wakinyela wiyoṗeya yaƞkapi hena nakuƞ wiċayuptaƞye. 16Na tuweni taku yuha yakʹiƞpi hena tipi-wakan oyanke hoċoka opta iyayewiċakiye ṡni. 17Hehaƞl oyate ki waunspewiċakiye: "Wowapi-Wak̇aƞ ki hel owayaƞke, Wak̇aƞṫaƞka leye, 'Tipi-Wak̇aƞ miṫawa ki onaḣ'uƞpo, le waċekiya oti eċela heċa kte na oyate ki iyuha unpi ktelo.' Keyaṡ miṫaoti ki le wamanu-wiċaṡa ki inaḣma uƞpi yakaġapelo!"
18Waċekiye-wiċaṡa na Moses-ṫawooṗe waunṡpewiċakiye ki le onaḣ'uƞpi, ċa waƞcagna huƞḣ Jesus ktepi kta ognayaƞ awaċiƞpi. Lena Jesus k̇̇okipapi, heun oyate iyuha ki waunspewiċakiye ki inihaƞpi.
19Ḣṫayetu ahi hehaƞ, iċuhaƞ Jesus na ihakab-uƞpi ki oṫuƞwahe etaƞhaƞ eyayapi.
Ṫamnioḣpe Ċan Ki Hetaƞhaƞ Wounspewiċakiye
(Matthew 21.20-22)
20Ihihaƞni ḣċi, ṫamniopḣpi ċaƞ wan he hute hehanyan ṡnija ċa waƞyakapi. Ċan ki kultakiya hute etkiya ata tʹe. 21Peter eċa taku tok̇a ki kiksuye na Jesus lekiye, "waƞyaƞkatu, Waunspekiye wiċaṡa, le ṫamniopḣe ċaƞ ki yaṡiċa ċa wana tʹe!"
22Jesus awiċayupte, "Wak̇aƞṫaƞka wiċalapo!" 23Miṫaƞtaƞhaƞ uƞ tuwe ċa le paha ki inajiƞ kiye na mniowaƞċa ekta gliyopṡiċe okihi na nakuƞ ċanṫe mahel ċetʹuƞglapi kte. Eyaṡ iċʹiċʹupi heuƞ wiċalapi kte, eyaṡ taku eye ki iyuha wiċalapi na taku tok̇a he, heuƞ eċuƞpi kte. 24Le heċauƞ, owiċakiyake: Hehaƞl waċekiyapi na takuƞl ċa ċiċila kʹuƞ, heuƞ wiċalapi na taku lapi ki iċupi kte. 25-26#Mt 6.14, 15. Na waċekiya nayajiƞ ki eċuƞhaƞ wowaḣtani eċuƞniċiyapi hena iṡiƞya wowaḣtani awiċayakiċiktuƞjiƞ kte, heċel Ate Wak̇aƞṫaƞka wowaḣtani hena aniċiktuƞjiƞ kte.#11.25-26 your sins: Wowapi kaġapi ki leċel owapi, “Eyeṡ wowaḣtani eċuƞniċiyapi hena ewiċayakiċiktuƞje ṡni hantaƞnaṡ, Ate Wak̇aƞṫaƞka wowaḣtani hena aniċiktuƞjiƞ kte.”
Jesus Ṫawowaṡʹake Ki
(Matthew 21.23-27; Luke 20.1-8)
27Jerusalem oṫuƞwahe ki ake uƞkihuƞnipi. Jesus Tipi-wak̇an el opta mani ye yuƞk̇aƞ waċekiye-wiċaṡa-oiṫaƞċaƞ na Moses-ṫawooṗe wauƞspewiċakiye ki na wiċaṡa-ṫaƞkake ki el hipi. 28Na iyunġapi, "Tuwa wowaṡʹake niċʹu ċa leċanuƞ hwo? Tuwe ṫawowaṡʹake ki le etaƞhaƞ iyaċu hwo?"
29Jesus leċel awiċayupte, "tuwa wowaṡʹake makʹu ki he oċiċiyakapi ktelo. 30Ċa omakiyakapo, tuktetaƞhaƞ ċa John wowaṡʹaka yuha mnianic̄aṡtaƞpi hwo? Wak̇aƞtaƞka naiṡ ikċe-wiċaṡa ki etaƞhaƞ hwo?"
31Iwiċiohaƞ ahoyekiċiyapi: "taku uƞkokiyakapi kta hwo? Uƞgnaiƞṡ, Wak̇aƞṫaƞka etaƞhaƞ uƞkeyapi ki eyaṡ leyiƞ kte, 'ċa takuwe John wiċayalapi ṡni hwo?' 32Keyaṡ ake leyapi, 'Ikċe-wiċaṡa etaƞhaƞ...'" (Oyate ki k̇owiċakiṗapi eċiƞ John le wiċaṡa-wak̇aƞ-waayaṫaƞiƞ heċa keċiƞpi.) 33Ċa Jesus leċel ayuptapi, "Sloluƞyapi ṡni," eyapi.
Jesus awiċayupte, "ċa miṡʹeya le tuwe ċa wowaṡʹake makʹu ki he oċiċiyakapi owakihi ṡni."
Currently Selected:
Mark 11: LKTNT20
Highlight
Share
Copy
Want to have your highlights saved across all your devices? Sign up or sign in
© American Bible Society
