Mark 10
10
Jesus Iḣpekiċiyapi Eċiyataƞhan Waunspewiċakiye
1Hehaƞl Jesus Judea makoce etkiya iyaye, na Jordan wakpa el k̇owakataƞhaƞ wicoṫa ki ake atayapi ċa waunspewiċakiye.
2Pharisees eya Jesus el hipi na gnaye waċiƞpi, “Wooṗe uƞkiṫawapi ki hel wiċaṡa waƞji wiiḣpeya okihi ki unkokiyakapo.”
3Jesus wowiyuƞġe waƞ wiċakʹu, “Moses wiiḣpeyapi eciyataƞhaƞ tokel wooṗe ki eya hwo?”
4Jesus ayuptapi ki he leċetu, “Moses leye, tuwa wiiḣpeyiƞ kta ċaƞ wowapi waƞji heċuƞ kta uƞ kaġe, nahaƞ ṫawicu ki kigleyiƞ kte.”
5Jesus ake hewiċakiye, “Moses le wooṗe ki niċaġapelo, iċiƞ lila wauƞspekiye niṡicapelo. 6Eyaṡ oṫokahe hehaƞ, taku ki iyuha kaġe hehaƞ, Wak̇aƞṫaƞka wiċaṡa ki na wiƞyaƞ ki wiċakaġe, Wowapi-wak̇aƞ el owapi ċa heċetu. 7Heċauƞ wiċaṡa ki huƞku na atkuku awiċayuṡtaƞ na e ṫawicu ki kiċi uƞ. 8Heċuƞpi ki uƞ he waƞjilapi kte, ho ċa heuƞ nupapi ṡni eyaṡ waƞjilapi. 9Wak̇aƞṫaƞka lena wiċayuwanjila ki heun wiċaṡa na wiƞyaƞ ki kakiniyuk̇aƞ iyayapi okihipi ṡni.”
10Tipi tima kiglapi hehaƞ ihakab-uƞpi hena takuwe leye ki he Jesus iyuƞġanpi. 11Jesus awiċayupte, "wiċaṡa waƞ wiḣpekiya haƞtaƞnaṡ na wiƞyaƞ ṫokc̄a waƞji yuza haƞtaƞṡ ipeyaḣ wiyuha ṡkaƞ iyeċeca kte. 12Inṡʹeyaƞ lecetu, wiƞyaƞ ki hignaku ki iḣpekiya haƞtaƞnaṡ ipeyaḣ wiċaṡa yuha ṡkaƞ iyeċeca kte.
Jesus Wak̇anyeja Ki Wiċayawaṡte
13Oyate ki huƞḣ wak̇aƞyeja wiċagluhipi hena Jesus wiċayawaṡte na ewiċakaṫaƞ kta ċa, eyaṡ Jesus ihakab-uƞpi ki oyate ki iyoṗewiċayapi. 14Jesus le ableze ċa iyokipi ṡni, ċa ihakab-uƞpi ki lena hewiċakiye, “Wak̇aƞyeja ki lena el maupi kta ċa kuṡʹeya uƞpi ṡni yo. Iċiƞ maḣpiya wokiċuƞze ki he lena iyowajapi. 15Le kiksuyapo. Tuweke eyaṡ maḣpiya wokiċuƞze el wak̇aƞyeja sʹe uƞ ṡni ehaƞtaƞṡ, tuweni maḣpiyata ya okihi kte ṡni.” 16Hehaƞl Jesus wak̇aƞyeja ki iwiċacu na ewiċakaṫaƞ na wiċayawaṡte.
Le Wicaṡa Ki Wijiċa
17Jesus ake ye ehaƞl wiċaṡa waƞ iyaƞgyaƞg el ihuƞni na iṫokab iḣpeicʹiya na hekiye, “Iṫaƞċaƞ niwaṡte yelo! Tokeṡke eċamu ki wiċoni oihaƞke wanica ki ohiwayiƞ kta hwo?”
18Hehaƞl Jesus leye, “Takuwe itaƞċaƞ niwaṡte emayakiya hwo? Wak̇aƞṫaƞka ecela waṡte yelo. 19Wooṗe ṫaƞka ki hena slolyaya hwo?: Tiwiċakte ṡni yo. Wiƞyaƞ wiċaki ṡni yo. Wamanu ṡni yo. Tuwa owekiwak̇an ṡni yo. Wiċagnaye ṡni yo. Nihuƞ na niyate ohowiċakila yo.”
20“Iṫaƞċaƞ!” wiċaṡa ki eye, “Maṫeca kʹuƞ hehaƞni wooṗe ki lena ohowala yelo.”
21Jesus owoṫaƞla uƞṡilaka ognayaƞ ayuta na hekiye, “Taku waƞjila yaċiƞ yelo. Iyayiƞ na taku luha ki hena wiyoṗeyiƞ na uƞṡika ki hena mazaska ki wiċakʹu wo, kihaƞ maḣpiyata woohiye nicʹiċaġiƞ ktelo. Na hehaƞl mihakab yau ktelo.” 22Wiċaṡa ki le naḣʹuƞ na lila ite ekta ċaƞteṡiċe iyaye, iċiƞ lila wijiċa ċa.
23Jesus ihakab-unpi ki awiċagluta na hewiċakiye, “Wijiċa ki lena maḣpiya wokiċuƞze ekta ipi kte ki he oteḣi yuhapi ktelo.”
24Ihakab-unpi ki lila inihaƞpi. Le Jesus waeye ki uƞ, eyaṡ Jesus heċena ake leye, “Wak̇aƞyeja miṫawa, maḣpiya wokiċuƞze ekta yapi kte ki he oteḣike yelo. 25Maḣpiya wokiċuƞze ekta wijiċa ki yapi kte ki he ihaƞkeya oṫeḣi kte, iƞṡʹeya iṫo ċuwinuġa waƞji ṫahiƞṡpa oḣloke ogna iyaya okihi ṡni ki he iyeċa yelo.” 26Ho heuƞ ihakab-unpi ki lila uƞ inihaƞpi na ikiċiyuƞġapi, “Ċa tuweḣca ċa nikta hwo?”
27Jesus lila awiċayuta na heye, “Wiċaṡa ki okihipi ṡni eyaṡ Wak̇aƞṫaƞka eċela okihi. Taku keyaṡ okihi yelo.”
28Hehaƞl Peter hoṫaƞiƞ, “Waƞyaƞka yo! Taku ki iyuha ena uƞkayuṡtaƞpi nihakab uƞyaƞpelo.”
29“Ohaƞ!” Jesus eye, “Na heċiyiƞ ktelo. Tuwa ti agluṡtaƞ naiƞṡ titakuye naiƞṡ wakaƞyeja naiƞṡ owoju lena ayuṡtaƞpi ki lena miye na Wotaƞiƞ Waste ki uƞ heċuƞpi, 30hena wiċoni ki lel isam wayuhapi ktelo: Tipi ki ota kte na titakuye ota kte naiƞṡ oblaye ota kte iƞṡ nakuƞ wiċoṫawaċiƞ ṡiċe ki hena nakuƞ. Wiċouƞ waƞ u kte ki lel wiċoni oihaƞke wanica ċa yuha kte. 31Eyaṡ tona lehaƞl wana ṫokahepi ki hena ehakelapi kte na ehakepi ki hena ṫokahepi kte.”
Jesus Kte Pi Ki Iċiyamni Ihakab-uƞpi Ki Iwoiċ'iglake
32Jerusalem takiya wana Jesus ihakab-uƞpi ki ob ye. Jesus wiċiṫokab ye; lena nihiƞċiyapi, uƞma ki lila ik̇okṗapi. Yuƞk̇aƞ ake Jesus wiċayuwitaya na wowiċakiyake, tokel ṡicaya eċakiċuƞpi kte ki he owiċakiyake. 33Anaġoptaƞpo, lewicakiye, "Waƞna Jerusalem ekta unyaƞpi, hetu ċa Wicasa-Cinkṡitku ki waċekiya-wak̇an-oiṫaċaƞpi na Moses ṫawooṗe eċiyataƞhaƞ waunspewicakiyapi ki napiyuzapi kte. 34Ċa Gentiles ki Jesus iḣaḣapi, nakun aṫaṡoṡa na yusaksakapi na ktepi; tk̇a aƞpetu yamni ki ake kini kte."
James Ena John Waċiƞyaƞpi
35Jesus ihakab-uƞpi ki ob Jerusalem etkiya mani yahaƞpi. Zebedee ċihiƞtku eya, James e na John Jesus isakib hinajiƞpi na leċel wiyuƞġapi, “Wauƞspekiya, taku waƞ iwaċiƞuƞniyaƞpelo,” eyapi.
36Yuƞk̇aƞ Jesus awiċayupte, “Taku ċa iwaċiƞmayaƞyaƞpi kta hwo?” eye.
37Yuƞk̇aƞ leyapi, “Tohaƞl tuwe ki iyuha wiċaṡa-yataƞpi slolniyaƞpi ki niṫanum yaƞke uƞkiyapo,” eyapi. Heċel oyate ki Jesus oġeya wiċayuonihaƞpi kta ċa heċel ċiƞpi.
38Eyaṡ Jesus awiċayupte, “Taku yalapi ki ayakiblezapi ṡni yelo. Lila oteḣi ota slolwaye. Niṡʹeyaƞ leċeḣci wokakije ki lena yuha mayanipi oyakihipi hwo?” eye.
39Yuƞk̇aƞ leyapi, “Haƞ, hena uƞkokihipelo,” eyapi.
Ċa Jesus hehaƞl leye, “Oteḣi slolwaye ki lena niṡʹeyaƞ waƞlakapi ktelo. 40Eyaṡ miyuƞk̇ala tuwa misakib yaƞkiƞ kte ki ċiciyuṡtaƞpi owakihi ṡni yelo. Taku ki lena Wak̇aƞṫaƞka, Atewaye ki yuṡtaƞ ktelo,” eye.
41Ihakab-uƞpi wikcemna ki James ena John nawiċaḣ'uƞpi hehaƞ awiċaċaƞzekapi. 42Jesus wiċayuwita na hewiċakiye, “Iyuha slolyayapelo, huƞḣ enagnakiya oyate ki oiṫaċaƞpi eyaṡ ṫaoyate ki lena iƞṡiƞkċiƞyaƞ owiċakuwapi na kakiṡ wiċakiyapelo. 43Eyaṡ niye heċuƞpi ṡni yo. Tuwe waƞji oyate ki oiṫaƞċaƞ niċʹiyapi haƞtaƞṡ, uƞṡiicʹiya awaƞwiċaglakapo. 44Na tuwe waƞji iniṫaƞċaƞ yaċiƞpi haƞtaƞṡ he uƞṡiicʹiya waokiyiƞ ktelo. 45Heċeḣci, oyate ki mayataƞpi kta ċa wahi ṡni eyaṡ oyate ki etkiya micʹicʹu kta uƞ Ikce Wiċaṡaya wahi. Ṫawowaḣtani wokakije hetaƞhaƞ niwiċawayiƞ kta uƞ wahi yelo,” eye.
Jesus Isṫaġuƞġa Wan Bartimaeus Eċiyapi Ċa Apiye
46Jericho oṫuƞwahe ki hel hipi na wana ake ihakab-unpi ki ena wiċota ob iyaye, yuƞk̇aƞ wiċaṡa waƞ Bartimaeus eċiyapi ċa ċaƞku ki aglagla woċin yaƞke, Timaeus eċiyapi ċa he le ċiƞca. 47Le iṡtaġuƞġe ki le Jesus Nazareth etaƞhaƞ heċa slolye ċa waƞċok kipaƞ, “Jesus! David ċiƞhiƞtku! Uƞṡimala yo!” eye.
48Oyate huƞḣ lila iyoṗeyapi na inila yaƞke ṡipi, eyaṡ isam lila hoṫaƞka ake heye, “David ċiƞhiƞtku! Uƞṡimala yo!”
49Jesus paṫag inajiƞ na kiċo wiċaṡi, “Uṡipo!”
Ċa iṡtaġuƞġe ki kiċopi na, “Ċaƞtewaṡte yo!” ekiyapi. “Ikpanajiƞ yo. Niċo welo.”
50Ċa, ogle ki kaslogyekiƞyiƞ na el inajiƞ.
51“Takuƞl eċaċiċuƞ yaċiƞ hwo?” Jesus ekiye.
“Iṫaƞċaƞ! Iṡtamaġuƞġa ki le amakisni waċiƞ yelo,” ekiye.
52“Gla yo!” Jesus ekiye. “Wowicala nitawa uƞ anicisni yelo.”
Waƞċok tuƞwiƞ na waƞyaƞke ċa Jesus ihakab mani ye.
Currently Selected:
Mark 10: LKTNT20
Highlight
Share
Copy
Want to have your highlights saved across all your devices? Sign up or sign in
© American Bible Society
