Lukas 18
18
1Unkan wicaśta kin ohinnian wocekiye eyapi kta, qa iyakicunnipi kte śni e on wiyacinpi wan owicakiyaka;
2Qa heya; Otonwe wan en wiyukcan wanji Wakantanka kokipe śni, qa nakun wicaśta wicakinihan śni.
3Unkan otonwe kin he en wiwazica wan, he wiyukcan kin ekta hi qa, Makipajin kin he tomicic̣on ye, eya.
4Unkan tokaheya econ wacin śni; tuka ocim cante mahen heya; Wakantanka kowakipe śni, qa nakun wicaśta kin wicawakinihan śni qeyaś;
5Wiwazica kin de nagiyemaye cin on etanhan ito towecic̣on kta; okinni ohinni hecetu u kinhan wacin iyokiśinmaye kta naceca ce.
6Unkan Itancan kin heya; Wiyukcan owotanna śni ie cin he naḣon po.
7Unkan Wakantanka tona wicakaḣnige, c̣a anpetu hanyetu ko cekiyapi kin, hena tehan towicakicic̣on śni qeyaś, ocim econ kte śni he.
8Ihnuhanna towicakicic̣on kta, eciciyapi ce. Tuka Wicaśta Cinhintku kin he tohan hi kinhan, maka akan wacinyanpi iyeye kta he.
9Unkan apa iye oḣan owotanna ic̣idapi, qa tokan kin waḣtewicadapi śni kin, hena wiyacinpi kin de owicakiyaka.
10Wicaśta nonpa tipi wakan kin ekta cekiya ipi; unma kin Pharisee heca, qa unma iś wamnayanpi kin heca.
11Unkan Pharisee kin iśnana najin, qa kaken wocekiye eya; Wakantanka, wicaśta tokeca iyemacece śni, wawicakipi sa, oḣan owotanpidan śni, wawiciḣaḣapi econpi sa, qa wamnaye cin dee kaeś iyemacece śni heon wopida eciciya.
12Anpetu wakan okitahedan nonpa akiḣanmic̣iye c̣a taku mduhe cin owasin etanhan iwikcemnamna kin wicawaqu ece.
13Unkan wamnaye cin iś itehanyan inajin, qa iśta ee kaeś wankan maḣpiya kin ekta ikikcu śni; tuka maku kin ohna aic̣ipe, ca heya; Wakantanka onśimakida wo, wawaḣtani sa.
14Wicaśta kin de yuowotanpidan tiyata kihda, qa unma qon hee śni, eciciyapi ce: Qa tuwe ihduwankantuya kinhan, he yuhukun iyeyapi kta: qa tuwe ihduhukuye cinhan, hee yuwankan ayapi kta ce.
15Unkan hokśiyoqopa kin nakun wicayutan kta e en awicahipi tuka waonspewicakiye cin he wanyakapi qehan, wicakiśicapi.
16Tuka Jesus wicakico, qa heya; Hoksiyoqopa kin ekta mahipi kte cin iyowinwicakiya po, qa teḣindapi śni po; Wakantanka tokiconze kin he hececapi etanhan ece.
17Wowicake eciyatanhan heciciyapi; Tuwe hokśiyoqopa iyececa Wakantanka tokiconze kin icu śni kinhan, he tokadan en ope kte śni ce.
18Unkan wicaśta ihdawa wanji wiwange c̣a heya; Waonspekiyo waśte, token ecamon, qa owihanke wanin wiconi ohimic̣iye kta he.
19Unkan Jesus heciya; Tokeca e waśte emayakiya he; tuwedan waśte śni; Wakantanka hecedan waśte.
20Woahope kin hena onnispe; Wawiciḣaḣapi ecanon kte śni; Tin wicayakte kte śni; Wamayanon kte śni; Woitonśniyan wodake kte śni; Niyate ninun kici wicahduonihan wo.
21Unkan heya; Macistina ehantanhan hena owasin ahowapa ce.
22Unkan Jesus hena naḣon qehan heciya; Nahanḣin taku wanji iyotpani yaun; taku yaton kin owasin wiyopekiye c̣a waḣpanicapi kin wicakipamni wo, kinhan maḣpiya ekta woyuha duhe kta ce; hehan u qa mihakam un wo.
23Unkan he naḣon qehan nina iyokiśica; wijice ḣinca nakaeś.
24Unkan nina wacin iyokiśice cin he Jesus wanyake c̣ehan, heya; Wowijice tonpi kin hena Wakantanka tokiconze kin en yapi kte cin he teḣike ḣinca.
25Wicaśta wijica wan Wakantanka tokiconze kin en ye kte cin he teḣika, qa kamel heca wanji tahinśpaciqadan oḣdoka kin ohna ye kte cin hee kaeś aoptetu ce.
26Unkan tona he naḣonpi kin hena heyapi; Hehan tuwe ni kta he.
27Unkan heya; Wicaśta kin ekta taku econpica śni kin, he Wakantanka ekta econpica ece.
28Unkan Inyan heya; Iho, unkiś taku owasin untpaganpi, qa niyahna unyakonpi ce.
29Unkan hewicakiya; Awicakehan heciciyapi ce, Wicaśta kin tuwe ti kin, qa hunkakewicaye cin, qa hunkawanjitku, qa tawicu, qa cinca, hena wanji Wakantanka tokiconze kin on kpagan kinhan,
30Hee dehan nakaha taku sanpa ota yuhe kta, qa wiconi u kte cin he en wiconi owihanke wanica yuhe kta ce.
31Unkan akenonpapi kin ewicayaku qa hewicakiya; Iho, Jerusalem ekta unyanpi, qa wicaśta wokcan Wicaśta Cinhintku kin on token owapi qon owasin yuecetupi kta.
32Oyate tokeca napepi kin en wicaqupi kta; hecen iśtenyapi, qa wawicanksiya kuwapi, qa atagośapi kta;
33Qa kapsinpsintapi qa ṭeyapi kte; unkan anpetu iyamni kinhan kini kta ce, eya.
34Unkan ecaca okaḣnigapi śni, qa oie kin de anawicakiḣmanpi, qa taku oyakapi kin sdonyapi śni.
35Unkan Jeriko ikiyedan wanna u qehan, wicaśta waniśtagonge canku icahda wada yanka.
36Unkan wicota ahiyaye cin he naḣon qehan, he token kapi hecinhan he iwicawanga.
37Unkan, Jesus Nazareth etanhan kin he hiyaya ce, eya okiyakapi.
38Unkan hotankakiya heya; Jesus Dawid Cinhintku kin onśimakida wo.
39Unkan tokahanpi kin hena iyokipi śni, inina yanke kta; tuka heon iyotan, hotankakiya heya; Jesus Dawid Cinhintku kin onśimakida wo.
40Unkan Jesus inajin qa aupi kta kewicakiya. Unkan wanna kiyedan u qehan, wiwange c̣a,
41Token ecacicon kta yacin he, eya. Unkan iye, Itancan, watonwe kta, eya.
42Unkan Jesus heciya; Tonwan wo, wacinyaye cin he niniyan ce.
43Unkan wancake tonwe c̣a iyahna hiyu, qa Wakantanka yaonihan: unkan oyate kin he wanyakapi qehan, owasin Wakantanka yatanpi.
Currently Selected:
Lukas 18: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
