Lukas 17
17
1Hehan waonspewicakiye cin hewicakiya; Waḣtaniyapi kin u kte śni pica śni; tuka tuwe eciyatanhan hena u kinhan, hee woteḣi kiciyanka ece.
2Dena cikcistinpidan kin tuwe wanji waḣtaniye cinhan he inyan wiyukpan wanji tahu kin en napinkiyapi, qa miniyowanca kin oiyoḣpeyapi unkanś, eeś waśte kta tuka.
3Iwanihdaka po. Nisunka śicaya ecanicon kinhan kiśica wo, qa iye iyopeic̣iye cinhan, kicicajuju wo.
4Qa śakowin akihde anpetu wanjidan śicaya ecanicon, qa śakowin akihde anpetu wanjidan niye ekta ihduhomni, qa, Iyopemiciya ce, eniciye cinhan, hecen yecicajuju kta ce, eya.
5Unkan wahośiyapi kin Itancan kin heciyapi; Wacinunyanpi kin unkiciyusanpa miye.
6Unkan Itancan kin heya; Sinape sukaza wan iyecen wacinyayapi kinhan, eukamin can kin de, Hute ihdamna qa miniwanca kin en huic̣ihde wo, eyakiyapi kta, kinhan ananigoptanpi kta tuka.
7Tuka niyepi kin wanji tukte taokiye wan yuha, maḣyumdu qa iś wanunyanpi wiḣanwicakiya un, qa tokeśta maga kin eciyatanhan hdi kinhan, Iho wo, ye c̣a wota iyotanka wo, eciye kta he.
8Qa iś kaken, Woyute wiyeya rnicihnake c̣a, ipiyagkiton qa omakiya wo; qa miś tohan wawate c̣a wamdatke cinhan, iyohakam niś ito wayate c̣a wadatke kta ce, eciye kte śni he.
9Hecen ookiye kin he taku econ śipi kin ecen econ kin, on etanhan wopida eciye kta he. Hepce śni ce.
10Niś eya iyecen taku token econ niśipi kin, owasin ecen duśtanpi kinhan, heya po; Ookiye wakamna śni kin heuncapi; taku econkupi kta iyecece cin heceedan econkupi ece.
11Unkan Jerusalem ekta ye c̣ehan, Samaria qa Galile cokaya iyoopta iyaya.
12Qa otonwe wan en i qehan, wicaśta wikcemna lepros ececapi itkokipapi, qa itehan hinajinpi:
13Qa ho wankan iyeyapi qa heyapi; Jesus, Itancan, onśiunkida miye.
14Unkan wanwicayake c̣ehan, hewicakiya; Wawayuśnapi kin ekta wicayo po, qa wanyagic̣iya po. Unkan ekta yapi icunhan akisnipi.
15Unkan wanji wanna asni sdotkiye c̣ehan, ihdamna, qa hotankakiya Wakantanka yaonihan;
16Qa siha kin en ite makipuskin eḣpeic̣iye c̣a, wopida eciya: unkan he Samaria wicaśta kin heca.
17Unkan Jesus waayupte c̣a heya; Wikcemna asniwicayapi śni he: tuka napcinwanka kin hena tokiya unpi he.
18Wakantanka yaonihan kta hdipi kin tuwedan iyeyapi śni, oyate tokeca etanhan kin de iśnana ce.
19Hehan heciya; Najin qa hda wo; wicayada kin he asniniyan ce.
20Unkan Pharisee kin iś Wakantanka tokiconze kin he tohan hiyohi kta hecinhan, he iwangapi qehan, waayupte c̣a hewicakiya; Wakantanka tokiconze kin he wowanyake on hi kte śni.
21Nakun, iho, dee ce, qa iho, kae ce, eyapi kte śni: Wanyaka po, Wakantanka tokiconze kin he mahen niunpi ece.
22Hehan waonspewicakiye cin hewicakiya; Anpetu wan hiyohi kta, Wicaśta Cinhintku kin anpetu tawa kin wanji wandakapi kta yacinpi kta, tuka wandakapi kte śni.
23Qa, Iho dee, qa iho kae ce, eniciyapi kta; tuka wiciyahna yapi śni po, qa owicapapi śni po.
24Wakanhdi maḣpiya ihukuya tokiyatanhan wiyatpa u, qa maḣpiya ihukuya unma ekta iyahde ece kin he Wicaśta Cinhintku anpetu tawa kin en iyecece kta.
25Tuka ito tokaheya taku ota on iyotanhan iyekiye kta, qa wicoicage kin de on ḣeyata iyeyapi kta ce.
26Unkan Nowa taanpetu qon en token unpi qon, Wicaśta Cinhintku taanpetu kin en he iyecece kta.
27Nowa wata kin en okipe ciqon anpetu kin hehanyan wotapi, qa wayatkanpi, tawicutonpi, qa hihnatonpi ece; unkan minitan u, qa owasin owihankewicaya.
28Qa nakun Lot anpetu tawa qon en iś eya iyececa, wotapi, qa wayatkanpi, wopetonpi qa wiyopeyapi, wojupi qa ticagapi ece:
29Tuka Lot Sodom etanhan tankan hinape ciqon anpetu kin hee ḣinca en maḣpiya kin eciyatanhan peta, mazakan noge iyuwintapi kin ahna hinhe, c̣a owasin owihankewicaya.
30Wicaśta Cinhintku kin yuotaninpi kte cin he iyecece kta ce.
31Anpetu kin he en tuwe tipi akan yanke c̣a tawaḣpaya timahen hiyeye cinhan, kun ku qa ehdaku kte śni; qa tuwe magata un kinhan, iś eya taku hekta un kin ekta ihdamna kte śni.
32Lot tawicu qon he kiksuya po.
33Tuwe wiconi tawa kpatan cin kinhan, he toki eḣpekiye kta; qa tuwe wiconi tawa toki eḣpekiye cinhan, hee hduhe kta.
34Heciciyapi ce; Hanyetu kin he en wicaśta nom owinja wanjidan akan wankapi kta; wanji icupi kta, qa unma kin iś eḣpeyapi kta.
35Winyan nonpa akiptan wotpan unpi kta: wanji icupi kta, qa unma kin iś eḣpeyapi kta.
36Wicaśta nom magata unpi kta; wanji icupi kta, qa unma kin iś eḣpeyapi kta ce.
37Unkan waayuptapi qa heciyapi; Itancan, tukte etu he. Unkan hewicakiya; Tukten wicatancan wanka eca, hen wamdi kin kawitaya imniciyapi ece e kta.
Currently Selected:
Lukas 17: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
