ପ୍ରେରିତ 2
2
ପବିତ୍ର ଆତ୍ମାଦି ୱାନିକା
1ପେଣ୍ଟିକଷ୍ଟ ପଣ୍ତତି ନାଣ୍ଡିଙ୍ଗ୍ କ୍ରିସ୍ଟାନ୍ ଲୋକୁ ୱିଜେରେ ଉଣ୍ତ୍ରେ ବାଡିଦୁ ଉଣ୍ତାତା ମାର୍ହାର୍ । 2ଆୟାଦାପ୍ରେନେ ନାଣ୍ତ ଗାଲି ୱାନି ଆଉଲି ୱାଜା ବାଦଡ଼୍ତାନ୍ ଉଣ୍ତ୍ରି ବାଦଡ଼ତାନ୍ ଆଉଲି ଆତାତ୍ ମାରି ଏମେ ଇଲ୍ତୁ ୱାର୍ ବାସ୍ତାମାର୍ହାର୍, ଆକା ଆୟା ଆଉଲିଦାନ୍ ପୁରା ଆତାତ୍ । 3ତାନିୱେନ୍କା ୱାର୍ ସୁଡ଼ୁତାର୍, ଏସୋ ସିସୁ ୱେତଲ୍ ସାର୍ଜି ଆବେ ମାର୍ହି ୱିଜେରିଙ୍ଗ୍ ମୁଟ୍ତାତ୍ । 4ୱାର୍ ୱିଜେରେ ପବିତ୍ର ଆତ୍ମାଦୁ ପୁରା ଆତାର୍ ମାରି ଆତ୍ମାଦାନ୍ ସାଲାଜି ଆଇ ଆଇ ବାସାଦାନ୍ ମାଟା ଇଣ୍ତ୍ରେଙ୍ଗ୍ ଆସ୍ତାର୍ ।
5ଦୁନିଆଦି ୱିଜୁ ଦେସ୍ତାନ୍ ୱାତିମାନି ଜିହୁଦି ଦାର୍ମୁ ଲୋକୁ ୱିଜେରେ ଜିରୁସାଲାମ୍ତୁ ଉଣ୍ତାତା ମାର୍ହାର୍ । 6କୁଟୁମ୍ତୁ ଆଜିମାନି ଆଉଲି ୱେନ୍ଜି, ନାଣ୍ତ ଲୋକ୍ ଆବେ ଉଣ୍ତାତାର୍ । କ୍ରିସ୍ତ ବିସ୍ବାସ୍ସିର୍ ଆବେ ଉଣ୍ତାତିମାନି ୱିଜେରି ବାସାଦାନ୍ ମାଟା ଇଜିମାନିକା ୱେନ୍ଜି ୱାରି ମନ୍ତୁ କାବାନିକା ୱାତାତ୍ । 7ମାରି, ୱାର୍ କାବାଆଜି ମାରି ବେମ୍ରିଆଜି ଇନ୍ଡ୍ରେଙ୍ଗ୍ ଆସ୍ତାର୍, “ଇୟାୱାଜା ୱାର୍ଗିଜିମାନି ଇୟା ଲୋକୁ ଇନିକା ଗାଲିଲିୟତିକାର୍ ଆଏର୍ ? 8ଆରିଙ୍ଗ୍ ମାଡ୍ ୱିଜୁ ଏଣ୍ତେସ୍ ୱାରିଙ୍ଗ୍ ମା ନିଜେଦି ଜନମ୍ତି ବାସାଦାନ୍ ୱାର୍ଗିଜିମାନିକା ୱେନ୍ଜିନାପ୍ ? 9ମାଡ୍ ପାର୍ତିୟ, ମାଦିୟ ମାରି ଏଲାମିୟ, ମାରି ମେସପଟାମିଆ, ଜିହୁଦା ଦେସ୍ ମାରି କାପ୍ପାଦକିଆ, ପନ୍ତ ମାରି ଆସିଆ, 10ପ୍ରୁଗିଆ ମାରି ପାମ୍ଫିଲିଆ, ମିସର୍ ମାରି କୁରିଣି ଲାକ୍ତୁରି ଲିବିୟା ରାଜିଦୁମାନିକାର୍ । ମାବାଣ୍କୁ ଏସୋ ଲୋକୁ ରୋମ୍ତାନ୍ ୱାତିମାନି ଜିହୁଦିର୍ 11ମାରି ଜିହୁଦି ଦାର୍ମୁ ଆତିମାର୍ଇ ଲୋକୁ; ମାରି ଏସୋ କ୍ରିତି ନି ଆରବିୟ ଦେସ୍ତି ଲୋକୁ । ମାରିବା ମାପୁରୁ ଏମେ କାବାଆନି ବିସୟ୍ ୱିଜୁ କିତାମାନାନ୍, ଆୟା ବିସୟ୍ତାନ୍ ମାପ୍ ୱିଜେରେ ୱାରିମାଣ୍କୁ ମା ନିଜେ ନିଜେଦି ବାସାଦାନ୍ ୱେନ୍ଡ୍ରେଙ୍ଗ୍ ଆଟ୍ସିନାପ୍ ।” 12କାବାନି ବେମ୍ରିଆଜି ୱାର୍ ନିଜେ ନିଜେଦିମାନୁ ୱେନ୍ବାଦେଙ୍ଗ୍ ଆସ୍ତାର୍, “ତେନି ଅର୍ତ ଇନିକା ?”
13ମାତର୍ ଆଇକାର୍ ବିସ୍ବାସିରିଙ୍ଗ୍ ୱେକ୍ରିସ୍ କିଜି ଇର୍ହାର୍, “ଇୟା ଲୋକୁ ଅଙ୍ଗୁର୍ରସ୍ ଉଣୁଜି ସସ୍ତା ମାନାର୍ ।”
ପିତରତି ପ୍ରଚାର୍
14ତାନିୱେନ୍କା ଆଇ ଏଗାର୍ ଲୋକୁ ପ୍ରେରିତ ସିସୁରି ୱାଲେ ପିତର୍ ନିଙ୍ଗ୍ଜି ନାଣ୍ତ ଆଉଲି ଆଜି ଇର୍ହାନ୍, ଏ ଜିହୁଦି ତଡ଼ାନ୍କୁ ତାଙ୍ଗିଁକ୍ ମାରି ଜିରୁସାଲାମ୍ତୁ ବାସାତିମାନି ମଣ୍ତଲି, ନା ମାଟା ନେଗେନ୍ତାନ୍ ୱେନ୍ଡ୍ରୁ, ନାନ୍ ଇୟା ବିସୟ୍ତାନ୍ ବୁଜାକିଜି ଇନା । 15ମିର୍ ଅଡ଼୍ବିଜିନିଦେର୍, ଇୟାକାର୍ ସହସ୍ତିକାର୍ । ସିଲେ, ଇୟାକାର୍ ସହସ୍ତିକାର୍ ଆଏର୍ । ଇରିଙ୍ଗ୍ ଇଲେଇ ୱେଡ଼ା ସାଲ୍ଦି ନୋ ଗଣ୍ଟା । 16ମାତର୍ ବାବବାଦି ଜୟେଲ୍ ଏମେ ଗଟାନା ବିସୟ୍ତାନ୍ ବବିସତ୍ବାଣି ଇର୍ହାମାର୍ହାନ୍, ଆକା ଆୟାୱାଜା ଉନ୍ଡ୍ରି ଗଟନା;
17ମାପୁରୁ ଇନାନ୍; ୱିଜ୍ନି ଦିନ୍କାଙ୍ଗ୍ଁ ଇକା ୱିଜୁ ଗଟାନାତ୍,
ନାନ୍ ୱିଜେରି ମୁସ୍କୁ ନା ଆତ୍ମା ୱାକ୍ନା ସିନା ।
ମି କଡ଼ର୍ ନି ଆଇଲିକ୍ ବାବବାଦି କିନାର୍ ।
ମି ମୁରୁଲିର୍ ଦର୍ସନ ସୁଣାର୍,
ମାରି ନେତାର୍ ଲବେର୍ ସୁଣାର୍ ।
18ହୁଁ ନା ଦାସ୍କୁ ଅର୍ସେ ମେମାରି ନି ଆଇମେକା ମୁସ୍କୁ,
ଆୟା ଦିନ୍ତୁ ନା ଆତ୍ମା ୱାକ୍ନା ସିନା,
ମାରି ୱାର୍ ନା ବାକ୍ୟ ୱେର୍ନାର୍ ।
19ନାନ୍ ବାଦଡ଼୍ ମୁସ୍କୁ କାବାଆନି ପାଣି
ମାରି ଆଡ୍ଗିରି ଦୁନିଆଦୁ କାବାଆନି ପାଣିତର୍ନା ।
ନେତେର୍, ସିସୁ ମାରି ନାଣ୍ତ ଗଇଦାନ୍ ଦୁନିଆ ବର୍ତି ଆନାତ୍;
20ପ୍ରବୁଦି ପେରି ଗୌରବ୍ ଦିନ୍ତି ୱାନି ଆଗ୍ଡ଼ି
ୱେଡ଼ା ସିକାଟି ଆନାତ୍
ମାରି ଲେଞ୍ଜୁ ନେତେର୍ ୱାଜା ଆନାତ୍ ।
21ନାସ୍ତିୱାଲେ ଏନ୍ ପ୍ରବୁଦି ଦର୍ତାନ୍ ପାର୍ତନା କିନାନ୍, ୱାନ୍ ରକିୟା ପୟ୍ନାନ୍ ।
22ଏ ଇସ୍ରାଏଲ୍ତି ଲୋକୁ, ଇୟାୱିଜୁ ମାଟା ୱେନ୍ଡ୍ରୁ ! ନାଣ୍ତ ସାକ୍ତିଦି ପାଣି ମାରି କାବାନି ସିନା ଦାନ୍ ନାଜରିୟତିୟ ଜିସୁ ଜେ ମାପୁରୁ ପକ୍ତିକାନ୍ ଇଜି ପାର୍ମାଣ୍ କିଆୟ୍ ଆତାମାନାନ୍ ମାରି ମାପୁରୁ ସାକ୍ତି ପୁରାକିତିକାନ୍, ଇକା ମି ଲାକ୍ତୁ ସତ୍ ଆତାମାନାତ୍ । ମି ଲୋଇ ଇୟା ଇୟାୱିଜୁ ଗଟନା ଗଟାତାତ୍, ଆଦେଙ୍ଗ୍ ଇୟା ବିସୟ୍ତାନ୍ ମିର୍ ନେଗେନ୍କିଜି ନେସ୍ତିମାନିଦେର୍ । 23#ମାତିଉ ୨୭:୩୫; ମାର୍କ ୧୫:୨୪; ଲୁକ ୨୩:୩୩; ଜୋହନ ୧୯:୧୮.ମାପୁରୁ ୱାନି ଉପାୟ୍ ଇସାବ୍ତାନ୍ ଜିସୁଙ୍ଗୁଁ ମି କିୟୁଦୁ ସର୍ପେ କିଦେଙ୍ଗ୍ ତିର୍ କିତାମାର୍ହାନ୍ । ମାରି ମିର୍ ୱାନିଙ୍ଗ୍ ପାପିଲୋକା ମାଣାନ୍ କ୍ରୁସଦୁ ଏକିସ୍କିଜି ଡାକ୍ତି ମାର୍ଇଦେର୍ । 24#ମାତିଉ ୨୮:୫,୬; ମାର୍କ ୧୬:୬; ଲୁକ ୨୪:୫.ମାତର୍ ମାପୁରୁ ୱାନିଙ୍ଗ୍ ସାନି ମାଣ୍କୁ ଡ଼ିସିସ୍କିଜି ମାରିଡ଼େସି ନିକ୍ତାନ୍, ଇରିଙ୍ଗ୍ ୱାନ୍ ସାତି ମାନୁ ତରାୟ୍ଆଜି ତେବାନିକା ଅସମ୍ଭବ । 25ଦାଉଦ ୱାନି ବିସୟ୍ତାନ୍ ଇନାନ୍,
“ୱିଜୁ ସମୟ୍ତୁ ନାନ୍ ପ୍ରବୁଙ୍ଗୁଁ ନା ଆଗ୍ଡ଼ି ସୁଡ଼ୁତାମାନା,
ୱାନ୍ ନା ତରିନ୍ ତେବାତାମାନାନ୍ । ଏନ୍ ନାଙ୍ଗିଁ ତିଲିସ୍ କିଦେଙ୍ଗ୍ ଆଟ୍ଏନ୍ ।”
26ଆଦେଙ୍ଗ୍ ନା ଜିବନ୍ ୱେଡ଼ିକାଦୁ ପୁରାଆତାମାନା,
ନା ୱେତଲ ୱେଡ଼ିକାଆଜି ନିଙ୍ଗିଁଜିନାତ୍ ।
ମାରିବା ନାନ୍ ସାନିକିନ୍ଦା,
ନା ପୁରା ମେନ୍ଦଲ୍ ଆସାଦୁ ତିର୍ତେବାନା,
27ଇରିଙ୍ଗ୍ ନିନ୍ ନାଙ୍ଗିଁ ସାନି ଦୁନିଆଦୁ ଡ଼ିସ୍ଇ;
ନିନ୍ ନି ବିସ୍ବାସ୍ତି ଦାସ୍ତିଙ୍ଗ୍ ଦୁକିଗୁଟା ଲୋଇ ସାବ୍ଦେଙ୍ଗ୍ ଇଜି ଡ଼ିସ୍ସୋ ସିଇ ।
28ନିନ୍ ନାଙ୍ଗିଁ ଜିବନ୍ତି ସାରି ତର୍ତିମାନି
ମାରି ନି ଲାକ୍ତୁତେବାନିକା ନାଙ୍ଗିଁ ୱେଡ଼ିକାଦୁ ପୁରାକିନାତ୍ ।
29ଏ ନା ଇସ୍ରାଏଲତି ତଡ଼ାନ୍କୁ ନି ତାଙ୍ଗିଁକ୍, ବୁଜାନିୱାଜା ନାନ୍ ମିଙ୍ଗିଁ ମା ଡକ୍ରାଦାଦା ରାଜା ଦାଉଦତି ବିସୟ୍ତାନ୍ ଏସ ଇନ୍ଡ୍ରେଙ୍ଗ୍ ଦର୍କାର୍ ମାନାତ୍ ଇଜି ଅଡ଼୍ବିଜିନା । ୱାନ୍ ସିତିଙ୍ଗ୍ ମୁସ୍ତାର୍, ମାରି ୱାନି ଦୁକିଗୁଟା ନେର୍ ସାନ୍ଦି ଇବେ ମା ଲୋଇ ମାନାତ୍ । 30ୱାନ୍ ଅରେନ୍ ବାବବାଦି ମାର୍ହାନ୍, ଆଦେଙ୍ଗ୍ ୱାନି ଉଣ୍ତିଙ୍ଗ୍ ମାପୁରୁଦି ଜିଦ୍ ମାଟା ନେସ୍ତାମାର୍ହାନ୍ । ଦାଉଦତି କୁଟୁମ୍ତି ଲୋଇ ଅରେନ୍ ୱାନିଙ୍ଗ୍ ରାଜା କିନାନ୍ ଇଜି ମାପୁରୁ ପାର୍ମାଣ୍ କିତାମାର୍ହାନ୍ । 31ମାପୁରୁ ୱାନିଦିନ୍ତୁ ଇନିକା କିଦେଙ୍ଗ୍ ସଲ୍ସିନାନ୍, ଦାଉଦ ଆକା ନେସ୍ସି, କ୍ରିସ୍ତ ଅର୍ତାତ୍ ମସିହଦି ମାରିଡ଼େସି ନିଙ୍ଗିଁନି ବିସୟ୍ତାନ୍ ଇର୍ହାମାନାନ୍;
ୱାନ୍ ସାନି ଦୁନିଆଦୁ ଡ଼ିସାୟ୍ ଆଏତାନ୍ ।
ୱାନି ମେନ୍ଧଲ୍ ଦୁକିଗୁଟା ଲୋଇ ସାବ୍ଏତାତ୍ ।
32ମାପୁରୁ ଇୟା ଜିସୁଙ୍ଗୁଁ ସାତିମାଣାନ୍ ମାରିଡ଼େସି ନିକ୍ତାମାନାନ୍ । ମାପ୍ ୱିଜେରେ ତେନି ସାକି । 33ଜିସୁ ୱାନି ବୁବା ମାପୁରୁଦି ଉଣେରି ତରିନ୍ ପେରାୟ୍ ଆତାମାନାନ୍ ମାରି ବୁବାଦି ଜିଦ୍ ଇସାବ୍ତାନ୍ ୱାନିମାଣ୍କୁ ପବିତ୍ର ଆତ୍ମା ପୟ୍ତାମାନାନ୍ । ଇଲେଇ ମିର୍ ଆମାକା ସୁଡ଼ୁଜିନିଦେର୍ ମାରି ୱେନ୍ଜିନିଦେର୍, ଆକା ୱାନି ଦାନ୍ । ଆକା ୱାନ୍ ମା ମୁସ୍କୁ ୱାକ୍ତା ସିତାମାନାନ୍ । 34ଦାଉଦ ନିଜେ ମୁସ୍କୁପୁର୍ତୁ ସଲ୍ଏନ୍ ମାର୍ହାନ୍, ମାତର୍ ୱାନ୍ ଇର୍ହାନ୍,
ପ୍ରବୁ ନା ପ୍ରବୁଙ୍ଗୁଁ ଇର୍ହାନ୍,
35ନାନ୍ ନି ସାତ୍ରୁରିଙ୍ଗ୍ ନି ପାଦାମ୍ ଆଡ୍ଗି କିଇ ସାନ୍ଦି ।
ନା ଉଣେରି ତରିନ୍ ବାସ୍ସ ମାନ୍ଆ ।
36“ମାରି ଇସ୍ରାଏଲ୍ତି ଲୋକୁ ୱିଜେରେ ସତ୍ତାନ୍ ନେସିର୍ ଜେ, ଇୟା ଏମେ ଜିସୁଙ୍ଗୁଁ ମିର୍ କ୍ରୁସଦୁ ଏକିସ୍ କିତିଦେର୍, ମାପୁରୁ ୱାନିଙ୍ଗ୍ ନେ ପ୍ରବୁ ନି କ୍ରିସ୍ତ ଅର୍ତାତ୍ ମସିହ କିତାମାନାନ୍ ।”
37ଇୟାୱିଜୁ ମାଟା ୱେନ୍ଜି ୱାରି ଜିବନ୍ ନାଣ୍ତ କିଲିବିଲି ଆତାତ୍ ମାରି ପିତର୍ ନି ଆଇ ପ୍ରେରିତ ସିସୁରିଙ୍ଗ୍ ୱେନ୍ବାତାର୍, “ତଡ଼ାନ୍କୁ ମାପ୍ ଇନିକା କିନାପ୍ ?”
38ପିତର ୱାରିଙ୍ଗ୍ ଇର୍ହାନ୍, “ମିର୍ ୱିଜେରେ ପାପ୍ତାନ୍ ଡ଼େସିୱାଜି ମି ପାପ୍ କେମା ଆନି ଉଣ୍ତିଙ୍ଗ୍ ଜିସୁ କ୍ରିସ୍ତଦି ଦର୍ତାନ୍ ଡୁବନ୍ ଅତୁ; ଆର୍ତିଙ୍ଗ୍ ମିର୍ ମାପୁରୁଦି ଦାନ୍ ପବିତ୍ର ଆତ୍ମା ପୟ୍ନିଦେର୍ । 39ଇରିଙ୍ଗ୍ ମାପୁରୁଦି ପାର୍ମାଣ୍ ମି ଉଣ୍ତିଙ୍ଗ୍, ମି କଡ଼ରି ଉଣ୍ତିଙ୍ଗ୍ ମାରି ପ୍ରବୁ, ମାପୁରୁଦି ମାଣାନ୍ କୁକାୟ୍ଆତି ଆକ ତେବାଜିମାନି ୱିଜେରି ଉଣ୍ତିଙ୍ଗ୍ ଟିକ୍ ।”
40ପିତର ୱାରିଙ୍ଗ୍ ମାଡ଼ିସ୍କିଜି ମାରି ନାଣ୍ତ ମାଟେଣାନ୍ ୱାରିଙ୍ଗ୍ ସାକି ସିଜି ଇର୍ହାନ୍, “ଇୟା ତାଗ୍ଇ ଲୋକା ମୁସ୍କୁ ୱାନି ସାସ୍ତିଦାନ୍ ନିଜେ ନିଜେଦିଙ୍ଗ୍ ରକିୟା କିଦୁ ।” 41ୱାରି ଲୋଇ ନାଣ୍ତ ଲୋକୁ ୱାନି ମାଟାଦୁ ବିସ୍ବାସ୍ କିଜି ଡୁବନ୍ ଅତାର୍ । ଆୟା ନାଣ୍ତିଙ୍ଗ୍ ତିନି ହାଜାର୍ ଲୋକୁ ଦଲ୍ତୁ ମିସାତାର୍ । 42ଆୟାନାଣ୍ତିରାନ୍ ସିସୁର୍ ୱାରିଙ୍ଗ୍ ସିକିୟା ସିତାର୍ । ମାରି ୱାର୍ ମିସାବିଡ଼୍ ଆତାର୍, ରୁଟି ରୁକ୍ତେଙ୍ଗ୍ ମାରି ପାର୍ତାନା କିଦେଙ୍ଗ୍ ମୋନ୍ସିଜି ତେବାତାର୍ ।
ବିସ୍ବାସି ଲୋକା ଲୋଇ ଜିନିକା
43ପ୍ରେରିତ ସିସୁର୍ ନାଣ୍ତ କାବାଆନି ସିନେଙ୍ଗ୍ ମାରି କାବାଆନି ବିସୟ୍ କିତାନ୍ । ମାରି ୱିଜେରେ ଆବେନୁ ତିଲାତା ସର୍ହାର୍ । 44#ପ୍ରେରିତ ୪:୩୨-୩୫.ବିସ୍ବାସ୍ସିର୍ ଆପ୍ଣା ଆପ୍ଣାଦି ୱାଲେ ଉନ୍ଡ୍ରେମାନୁ ମିସାତାର୍ ମାରି ମିସାଜି ୱାରି ୱିଜୁ ଦନ୍ ସିଜିସାଜି ଆତାର୍ । 45ୱାର୍ ଆପ୍ଣା ଆପ୍ଣାଦି ମାନି ଦନ୍ତିଙ୍ଗ୍ ପର୍ଜି, ଡାବୁଙ୍ଗୁଁ ୱିଜେରି ଦର୍କାର୍ ଇସାବ୍ତାନ୍ ନିଜେନିଜେ ଲୋଇ ବାଟା କିତାର୍ । 46ୱାର୍ ୱିଜୁଦିନ୍ ପାର୍ତନାକିନି ମନ୍ଦିର୍ତୁ ଉନ୍ଡ୍ରେ ଦଲ୍ ୱାଜା ଉଣ୍ତାଜି ମାର୍ହାର୍ ମାରି ଇଲ୍କାଙ୍ଗ୍ ଇଲ୍କାଙ୍ଗ୍ ରୁଟି ରୁକ୍ସି ୱେଡ଼ିକା ମନ୍ତାନ୍ ମାରି ନେଗି ଜିବନ୍ତାନ୍ ଉଣିତିନିକା କିଜି, 47ମାପୁରୁଦି ଦନ୍ୟବାଦ୍ କିଜି ୱିଜେରେ ଲୋକା ୱାଲେ ନେଗି ୱେଡ଼ିକା କିତାର୍ । ମାରି ପ୍ରବୁ ରକିୟା ପୟ୍ନି ଲୋକାଙ୍ଗ୍ ୱିଜୁଦିନ୍ ୱାରି ଦଲ୍ତୁ ମିସା କିଦେଙ୍ଗ୍ ଆସ୍ତାନ୍ ।
Currently Selected:
ପ୍ରେରିତ 2: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
