ପ୍ରେରିତ 3
3
ଅରେନ୍ ସଟା ବିକାରି ନେଗେନ୍ଆତାନ୍
1ଅର୍ଲେନ୍ ପିତର ନି ଜୋହନ ପାର୍ତାନା ସମୟ ୱେଡ଼ାରେନି ତିନ୍ଟାଦୁ ମନ୍ଦିର୍ତୁ ସଲ୍ସିମାର୍ହାର୍ । 2ଆବେନ୍ “ସୁନ୍ଦର୍” ଦର୍ତି ଦୁଆର୍ ଲାକ୍ତୁ ଅରେନ୍ ଲୋକୁ ମାର୍ହାନ୍ । ୱାନ୍ ଜନମ୍ତାନ୍ ସଟା । ମନ୍ଦିର୍ତୁ ସଲ୍ସିମାନି ଲୋକାମାଣ୍କୁ ଭିକିୟା ଲସ୍ତେଙ୍ଗ୍ ଇଜି ସବୁଦିନ୍ ୱାନ୍ ଦୁଆର୍ ଲାକ୍ତୁ ପିଣ୍ତାୟ୍ଆଜି ସଲ୍ସିମାର୍ହାନ୍ । 3ପିତର ନି ଜୋହନତିଙ୍ଗ୍ ମନ୍ଦିର ଲୋଇ ସନିକା ସୁଡ଼ୁଜି ୱାନ୍ ୱାରିଙ୍ଗ୍ ଭିକିୟା ଲସ୍ତାନ୍ । 4ପିତର ନି ଜୋହନ ୱାନିଙ୍ଗ୍ ସିଦା ବେସ୍ତାର୍ ମାରି ପିତର୍ ଇର୍ହାନ୍, “ମା ତରିନ୍ ସୁଡ଼୍ଆ !” 5ଆବେଟ୍ ୱାନ୍ ୱାରିମାଣ୍କୁ ଏସ ପୟ୍ନି ଆସାଦାନ୍ ୱାରି ତରିନ୍ ବେସ୍ତାନ୍ । 6ମାତର୍ ପିତର୍ ୱାନିଙ୍ଗ୍ ଇର୍ହାନ୍, “ନା ଲାକ୍ତୁ ବାଙ୍ଗାଁରାମ୍ ମାରି ୱେଣ୍ତି ସିଲେତ୍, ମାତର୍ ଆମାକା ମାନାତ୍, ନାନ୍ ନିଙ୍ଗିଁ ସିଜିନା : ନାଜରିୟତିୟ ଜିସୁ କ୍ରିସ୍ତଦି ଦର୍ତାନ୍ ନାନ୍ ଆଦେସ୍ ସିଜିନା, ନିଙ୍ଗଁଜ ବୁଲାଆ ।” 7ଇକା ଇଜି ୱାନ୍ ୱାନି ଉଣେରି କିୟୁ ଆସ୍ସି ନିକ୍ତାନ୍ । ଆୟାଦାପ୍ରେ ଲୋକ୍ତି ପାଦାମ୍ ନି ସିରାଗାଟିଙ୍ଗ୍ ୱିଜୁ ବପୁ ଆତେ । 8ୱାନ୍ ତୁଲ୍ଜି ନିଙ୍ଗିଁଜି ନିର୍ଆନ୍ ମାରି ବୁଲାଦେଙ୍ଗ୍ ଆସ୍ତାନ୍ । ତାନିୱେନ୍କା ୱାନ୍ ବୁଲାବୁ ବୁଲାବୁ, ତୁଲ୍ବୁ ତୁଲ୍ବୁ ମାରି ମାପୁରୁଦି ଦନ୍ୟବାଦ୍ କିବୁ କିବୁ ୱାରି ୱାଲେ ମନ୍ଦିର୍ତୁ ସର୍ହାନ୍ । 9ଆବେଣି ଲୋକୁ ୱାନିଙ୍ଗ୍ ବୁଲାନିକା ନି ମାପୁରୁଦି ପ୍ରସଂସା କିନିକା ସୁଡ଼ୁତାର୍, 10ୱାନିଙ୍ଗ୍ ମନ୍ଦିର୍ ଦୁଆର୍ ଲାକ୍ତୁ ବାସ୍ତିମାର୍ଇ ଭିକାରି ଇଜି ସିନିସ୍କିତାର୍ ମାରି ୱାନି ଉଣ୍ତିଙ୍ଗ୍ ଇନିକା ଗଟାତାମାର୍ହାତ୍, ୱିଜୁ ନେସ୍ସି ୱାର୍ କାବାନି ବେମ୍ରି ଆତାର୍ ।
ପାର୍ତନା ମନ୍ଦିର୍ତୁ ପିତର୍ତି ପ୍ରଚାର୍
11ଆୟାକାନ୍ ପିତର୍ ନି ଜୋହନତି ୱାଲେ ସଲମନ୍ତି ଗୁଡିକାଲ୍ତୁ ମାନିକା ସୁଡ଼୍ଜି ଲୋକୁ କାବାଆଜି ଲାକ୍ତୁ ଉରୁକ୍ତାର୍ । 12ପିତର୍ ୱାରିଙ୍ଗ୍ ସୁଡ଼ୁଜି ଇର୍ହାନ୍, ଏ ଇସ୍ରାଏଲ୍ତି ଲୋକୁ, ମିର୍ ଏନ୍ଦା ଇବେନୁ କାବାଆଜି ମା ତରିନ୍ ଇୟାୱାଜା ବେସ୍ସି ମାନିଦେର୍ ? ମିର୍ ଇନିକା ଅଡ଼୍ବିଜିନିଦେର୍ ଜେ ମା ନିଜେ ସାକ୍ତିଦାନ୍ ନି ମା ଦାର୍ମୁ ଉଣ୍ତିଙ୍ଗ୍ ମାପ୍ ଇୟା ଲୋକ୍ତି ବୁଲାନି ସାକ୍ତି ସିତାମାନାପ୍ ? 13ଅବ୍ରାହାମ, ଇସ୍ହାକ୍ ମାରି ଜାକୁବଦି ମାପୁରୁ, ମା ଡକ୍ରାଦାଦାରି ମାପୁରୁ, ୱାନି ଦାସ୍ ଜିସୁଙ୍ଗୁଁ ମାପୁରୁଦି ଦନ୍ୟବାଦ୍ ସିତାମାନାନ୍ । ମାତର୍ ମିର୍ ୱାନିଙ୍ଗ୍ ଅଦିକାରିରି କିୟୁଦୁ ସର୍ପେ କିତିଦେର୍ । ଇୟାୱାଜାକି ପିଲାତ୍ ରାଜା ୱାନିଙ୍ଗ୍ ଡ଼ିସିସ୍ କିଦେଙ୍ଗ୍ ତିର୍ କିତିମାରିଙ୍ଗ୍ ବା, ୱାନିଙ୍ଗ୍ ପିଲାତ୍ ରାଜା ଆଗ୍ଡ଼ି ଅମାନ୍ୟ କିତିଦେର୍ । 14#ମାତିଉ ୨୭:୧୫-୨୩; ମାର୍କ ୧୫:୬-୧୪; ଲୁକ ୨୩:୧୩-୨୩; ଜୋହନ ୧୯:୧୨-୧୫.ୱାନ୍ ଅରେନ୍ ପବିତ୍ର ମାରି ଦାର୍ମୁ ଲୋକୁ, ମାତର୍ ମିର୍ ୱାନିଙ୍ଗ୍ ଅମାନ୍ୟ କିତିଦେର୍ ମାରି ୱାନି ବାଦ୍ଲୁ ମିଙ୍ଗିଁ ଦୟା ତର୍ସି ଅରେନ୍ ନର୍କାତ୍ନିୱାନିଙ୍ଗ୍ ଡ଼ିସିସ୍ କିଦେଙ୍ଗ୍ ଇଜି ପିଲାତ୍ ରାଜେଙ୍ଗ୍ ଇର୍ଇଦେର୍ । 15ଏନ୍ ଜିବନ୍ତି ସାରି ତର୍ନିକାନ୍, ମିର୍ ୱାନିଙ୍ଗ୍ ଡାକ୍ତିଦେର୍; ମାତର୍ ମାପୁରୁ ୱାନିଙ୍ଗ୍ ସାତିମାଣାନ୍ ମାରିଡ଼େସି ନିକ୍ତାନ୍ । ମାପ୍ ତାନି ସାକି । 16ୱାନି ଦର୍ତି ସାକ୍ତି ନେ ଇୟା ସଟେଙ୍ଗ୍ ନେଗେନ୍ କିତାମାନାତ୍ । ଏମେ ଗଟନା ଇଲେଇ ମିର୍ ନିଜେ ସୁଡ଼୍ଜି ସତ୍ ଇଜି ନେସ୍ତିମାନିଦେର୍, ଆକା କେବଲ୍ ୱାନି ଦର୍ତାନ୍ ବିସ୍ବାସ୍ କିନି ଉଣ୍ତିଙ୍ଗ୍ ଆତାମାନାତ୍ । ଜିସୁମାନୁ ବିସ୍ବାସ୍ କିନି ଉଣ୍ତିଙ୍ଗ୍ ୱାନ୍ ଜେ ନେଗେନ୍ ଆତାମାନାନ୍, ଇକା ମିର୍ ସୁଡ଼ୁତିମାନିଦେର୍ । 17“ମାରି ଇଲେଇ, ଏ ଇସ୍ରାଏଲ୍ତି ତଡ଼ାନ୍କୁ ନି ତାଙ୍ଗିଁକ୍, ମିର୍ ମାରି ମି ନେତାର୍ ଜିସୁଦି ଉଣ୍ତିଙ୍ଗ୍ ଆମାକା କିତିଦେର୍, ଆକା ନେସ୍ଏଣ୍ତା କିତିମାନିଦେର୍, ଇକା ନାନ୍ ନେସ୍ନା । 18ନାଣ୍ତ ବାର୍ସେକ୍ ଆଗ୍ଡ଼ି ୱିଜେରେ ବାବବାଦି ୱେୟୁଦୁ ମାପୁରୁ ୱେର୍ତା ମାର୍ହାନ୍ ଜେ, କ୍ରିସ୍ତଙ୍ଗ୍ ଦୁକ୍ବଗାଦେଙ୍ଗ୍ ଆନାତ୍ । ଇୟାୱାଜା ଇଲେଇ ଆକା ସତ୍ ଆତାମାନାତ୍ । 19ମାରି ଅନୁତାପ୍ କିଜି ମାପୁରୁ ତରିନ୍ ଡ଼େସି ରାଦୁ । ଆରିଙ୍ଗ୍ ୱାନ୍ ମି ପାପ୍ କେମା କିନାନ୍ । 20ମାରି ପ୍ରବୁଦି ମାଣାନ୍ ମିର୍ ଆତ୍ମିକ ସାକ୍ତି ପୟ୍ନିଦେର୍ । ମାପୁରୁ ମି ଉଣ୍ତିଙ୍ଗ୍ ଆଗ୍ଡ଼ିରାନ୍ ବାସେଆତିମାନି ମସିହ ଜିସୁଙ୍ଗୁଁ ପକ୍ନାନ୍ । 21ପୁର୍ବେକାଡ଼ାଦି ପବିତ୍ର ବାବବାଦି ମାଣ୍କୁ ମାପୁରୁ ୱେର୍ତି ଇସାବ୍ତାନ୍ ୱିଜୁ ବିସୟ୍ତି ପୁନିକା ଆନି ସାନ୍ଦି ୱାନ୍ ମୁସ୍କୁପୁର୍ତୁ ତେବାନାନ୍ । 22ଇୟା ବିସୟ୍ତାନ୍ ମୋସା ଇର୍ହାମାର୍ହାନ୍, ମି ପ୍ରବୁ ମାପୁରୁ ମି ତଡ଼ାନ୍କା ମାଣୁକୁ ମି ଲାକ୍ତୁ ନା ନାନି ଅରେନ୍ ବାବବାଦିଙ୍ଗ୍ ପକ୍ନାନ୍ । ୱାନ୍ ମି ନିଜେ ଲୋକା ଲୋଇରାନ୍ ଅରେନ୍ ଆନାନ୍ । ୱାନ୍ ମିଙ୍ଗିଁ ଆମାକା ଇନାନ୍, ଆୟାୱିଜୁ ବିସୟ୍ ମିର୍ ମାନାନିକା ମାନାତ୍ । 23ଏନ୍ ଆୟା ବାବବାଦିଦି ବାକ୍ୟ ମାନାଏନ୍, ୱାନିଙ୍ଗ୍ ମାପୁରୁଦି ଲୋକାମାଣ୍କୁ ୱେର୍ଏ କିଜି ନାସ୍ଟୁ କିଆୟ୍ଆନାନ୍ । 24ଇଲେଇ ଆମାକା ଗଟାଜିନାତ୍, ଆୟା ବିସୟ୍ତାନ୍ ସାମୁଏଲ୍ତି ୱାଲେ ୱିଜେରେ ବାବବାଦିର୍ ମାଟା ପ୍ରଚାର୍ କିଜି ଇର୍ହାମାର୍ହାନ୍ ମାରି ୱାରି ୱେନ୍କାରି ବାବବାଦିର୍ ବା ଇୟା ବିସୟ୍ତାନ୍ ୱେର୍ତା ମାର୍ହାନ୍ । 25ବାବବାଦିରି ୱେୟୁଦୁ ମାପୁରୁ ଏମେ ୱିଜୁ ପ୍ରତିଜ୍ଞା କିତାମାନାନ୍, ଆକା ମି ଉଣ୍ତିଙ୍ଗ୍ ଟିକ୍, ମାରି ମାପୁରୁ ମି ପୁର୍ବେଦିଡକ୍ରାଦାଦାରି ୱାଲେ ଏମେ ନିୟମ୍ କିତାମାନାନ୍, ମିର୍ ଆବେଣି ବାଗ୍ତିକାର୍ । ମାପୁରୁ ଅବ୍ରାହାମ୍ତିଙ୍ଗ୍ ଇର୍ହାମାର୍ହାନ୍, ମି କୁଟୁମ୍ତି ମାଣାନ୍ ନାନ୍ ଦୁନିଆଦି ୱିଜୁ ବାସାଦି ଲୋକାଙ୍ଗ୍ ଆସିର୍ବାଦ୍ କିନାପ୍ । 26ଆଦେଙ୍ଗ୍ ମାପୁରୁ ୱାନି ଦାସ୍ତିଙ୍ଗ୍ ବାସେକିତାନ୍ ମାରି ମି ୱିଜେରିଙ୍ଗ୍ ତାଗ୍ଇ ସାରିଦାନ୍ ଡ଼େସିୱାନି ଆସିର୍ବାଦ୍ ସିଦେଙ୍ଗ୍ ଇଜି ଆଗ୍ଡ଼ି ୱାନିଙ୍ଗ୍ ମି ଲାକ୍ତୁ ପକ୍ତାନ୍ ।”
Currently Selected:
ପ୍ରେରିତ 3: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
