ପ୍ରେରିତ 4
4
ଜିହୁଦିର୍ ପେରି ମିଟିଙ୍ଗ୍ତୁ ପିତର ନି ଜୋହନ
1ପିତର୍ ନି ଜୋହନ ଲୋକାଙ୍ଗ୍ ଇୟାୱାଜା ସିକିୟା ସିଜିମାନି ୱାଲେ ମନ୍ଦିର୍ତି ଏସ ଜାଜକର୍, ମନ୍ଦିର୍ତି କାପ୍କିନିୱାରି ପେରିକାନ୍ ମାରି ଏସ ସାଦୁକିର୍ ୱାଜି ଇତାର୍ । 2ୱାର୍ ରିସା ଆତାମାର୍ହାର୍, ଇରିଙ୍ଗ୍ ଜିସୁ ସାତିମାଣାନ୍ ମାରିଡ଼େସି ନିଙ୍ଗିଁନି ଇଜି ରିଏର୍ ପ୍ରେରିତର୍ ଲୋକାଙ୍ଗ୍ ସିକିୟା ସିଜି, ଇବେଣାନ୍ ସାତିକାର୍ ମାରିଡ଼େସି ନିଙ୍ଗ୍ନାର୍ ଇଜି ପାର୍ମାଣ୍ କିଜିମାର୍ହାର୍ । 3ମାରି ୱାର୍ ୱାରିଙ୍ଗ୍ ତର୍ତାର୍ ମାରି ଆୟାନାଣ୍ତିଙ୍ଗ୍ ନାଣ୍ତ ୱେଡ଼ା ଆତାମାର୍ହାତ୍ଆକା ମାରିନାଣ୍ତିଙ୍ଗ୍ ସାନ୍ଦି ୱାରିଙ୍ଗ୍ ଜଇଲ୍ତୁ ଇଟ୍ତାର୍ । 4ମାତର୍ ୱାରି ସିକିୟା ୱେର୍ଇମାର୍ହି ନାଣ୍ତ ଲୋକୁ ଆବେନୁ ବିସ୍ବାସ୍ କିତାର୍ ମାରି ୱାରି ସଂଖ୍ୟା ପିର୍ଜି ପାସ୍ ହାଜାର୍ ଆତାତ୍ ।
5ମାର୍ନାଣ୍ତିଙ୍ଗ୍ ଜିହୁଦି ନେତାର୍, ମନ୍ଦିର୍ତି ଆଇନେତାର୍ ମାରି ଦାର୍ମୁଗୁରୁର୍ ଜିରୁସାଲାମ୍ତୁ ଉଣ୍ତ୍ରେମାନୁ ଉଣ୍ତାତାର୍ । 6ଆବେନୁ ୱିଜେରିଙ୍ଗ୍ ପେରି ଜାଜକ ହାନାନା, କୟାପା, ଜୋହନ, ଆଲେକ୍ଜାଣ୍ତର୍ ମାରି ୱିଜେରିଙ୍ଗ୍ପେରି ଜାଜକରି ଇଲ୍ତି ଆଇ ଲୋକାଙ୍ଗ୍ ମିସାତାର୍ । 7ସିସୁରିଙ୍ଗ୍ ୱାରି ଆଗ୍ଡ଼ି ତାପିସ୍ କିଜି ୱେନ୍ବାତାର୍, “ମିର୍ ଇୟାୱିଜୁ ଏଣ୍ତେସ୍ କିଜିନିଦେର୍ ? ଏ ସାକ୍ତିଦାନ୍ ବା ଏ ଦର୍ତାନ୍ ଇକା କିଜିନିଦେର୍ ?”
8ଆବେଟ୍ ପିତର ପବିତ୍ର ଆତ୍ମାଦୁ ପୁରା ଆଜି ୱାରିଙ୍ଗ୍ ଇର୍ହାନ୍, “ଏ ଲୋକା ନେତାର୍ ମାରି ପେରିକାର୍ : 9ଜଦି ନେର୍ ମାଙ୍ଗିଁ ଇୟା ସଟା ଉଣ୍ତିଙ୍ଗ୍ କିତିମାନି ନେଗି ପାଣି ବିସୟ୍ତାନ୍ ମିର୍ ୱେନ୍ବାଜିନିଦେର୍ ମାରି ୱାନ୍ ଏଣ୍ତେସ୍ ନେଗେନ୍ ଆତାନ୍ ଇଜି ନେସ୍ତେଙ୍ଗ୍ ବଦାକିଜିନିଦେର୍ । 10ଆବେଟ୍ ମିର୍ ମାରି ଇସ୍ରାଏଲ୍ତି ୱିଜେରେ ନେସ୍ନିକା ମାନାତ୍ ଜେ, ମି ଆଗ୍ଡ଼ି ନିର୍ଇ ମାନି ଇୟା ଲୋକୁ କେବଲ୍ ନାଜରିୟତିୟ ଜିସୁ କ୍ରିସ୍ତଦି ଦର୍ତି ସାକ୍ତିଦାନ୍ ପୁରା ନେଗେନ୍ ଆତାମାନାନ୍ । ଆୟା ଜିସୁଙ୍ଗୁଁ ମିର୍ କ୍ରୁସଦୁ ଏକିସ୍କିତି ମାରିଇଦେର୍ । ମାତର୍ ମାପୁରୁ ୱାନିଙ୍ଗ୍ ସାତିମାଣାନ୍ ମାରିଡ଼େସି ନିକ୍ତାନ୍ । 11ଜିସୁଦି ବିସୟ୍ତାନ୍ ନେ ଦାର୍ମୁସାସ୍ତ୍ରଦୁ ରାସାତାମାନାତ୍,
“ଏମେ କାଲୁଦିଙ୍ଗ୍ ଇଲୁ ତିଆର୍ କିନିକାର୍ ଡ଼ିସ୍ତାର୍,
ମାତର୍ ଆୟା କାଲୁ ନେ କନାଦି ମୁଲ୍ କାଲୁ ଆତାତ୍ ।
12କେବଲ୍ ୱାନି ମାଣାନ୍ ରକିୟା ପୟ୍ନିକା ଆନାତ୍ । ସାରା ଦୁନିଆଦୁ ମାନି ଆଇ ଇନି ଦର୍ ମାଣାନ୍ ଲୋକୁ ରକିୟା ପୟ୍ଦେଙ୍ଗ୍ ଆଟ୍ଏନ୍ ।”
13ପିତର ନି ଜୋହନ ପଡ଼ାଇକାର୍ ମାରି ସାମାନ୍ତି ଲୋକୁ ଇଜି ପେରି ମିଟିଙ୍ଗ୍ତି ଜିହୁଦି ନେତାର୍ ନେସ୍ତାମାର୍ହାର୍ । ଆଦେଙ୍ଗ୍ ୱାରି ସାସ୍ ସୁଡ଼ୁଜି ୱାର୍ କାବାଆତାର୍ । ମାରି ୱାର୍ ନେସ୍ତାମାର୍ହାର୍, ଆୟା ରିଏର୍ ଜିସୁଦି ୱାଲେ ମାର୍ହାର୍ । 14ମାତର୍ ୱାର୍ ବିରୁଦ୍ କିଜି ଇନିକା ଇନ୍ଡ୍ରେଙ୍ଗ୍ ଆଟ୍ଏତାର୍; ଇରିଙ୍ଗ୍ ୱାର୍ ନେଗେନ୍ ଆତିମାର୍ଇ ଲୋକ୍ତିଙ୍ଗ୍ ପିତର ନି ଜୋହନତି ୱାଲେ ନିର୍ଇ ମାରିଇକା ସୁଡ଼ୁତାର୍ । 15ଆବେଟ୍ ୱାର୍ ସିସୁରିଙ୍ଗ୍ ମିଟିଙ୍ଗ୍ ଇଲ୍ତାନ୍ ସପ୍ସି ସିଜି ୱାରି ବିସୟ୍ତାନ୍ ନିଜେ ନିଜେମାନୁ ୱାର୍ଗିଦେଙ୍ଗ୍ ଆସ୍ତାର୍ । 16ୱାର୍ ଇର୍ହାର୍, “ମାଡ୍ ୱେରି ଉଣ୍ତିଙ୍ଗ୍ ଇନିକା କିନାଟ୍ ?” ଇକାର୍ କିତିମାନି ଇୟା କାବାଆନି ପାଣି ବିସୟ୍ତାନ୍ ଜିରୁସାଲାମ୍ତି ୱିଜେରେ ନେସ୍ତା ମାନାର୍ । ତେନି ସତ୍ ମାଡ୍ ମାରି ସିଲେ ଇନ୍ଡ୍ରେଙ୍ଗ୍ ଆଟ୍ଇକା । 17ମାତର୍ ଇୟା ମାଟା ଏଣ୍ତେସ୍ ଲୋକା ଲୋଇ ନାଣ୍ତ ୱେଙ୍ଗ୍ଁଏତ୍, ଜିସୁଦି ଦର୍ତାନ୍ ମାରି ଏସାଙ୍ଗ୍ ଆମାୱାରି ଆଗ୍ଡ଼ି ଇନିକା ଇନ୍ଇ ଉଣ୍ତିଙ୍ଗ୍ ଇୟାୱାରିଙ୍ଗ୍ ମାପ୍ ଜାଗାର୍ତା କିନା ସିନାଟ୍ ।
18ଆବେଟ୍ ୱାର୍ ପିତର୍ ନି ଜୋହନତିଙ୍ଗ୍ ମାରିଡ଼େସି ଲୋଇ କୁକିସ୍ କିତାର୍ ମାରି ଏସାଙ୍ଗ୍ ବା ଜିସୁଦି ଦର୍ତାନ୍ ଇନି ମାଟା ଇନ୍ଇ ଉଣ୍ତିଙ୍ଗ୍ ମାରି ସିକିୟା ସିଇ ଉଣ୍ତିଙ୍ଗ୍ ଜାଗାର୍ତା କିତା ସିତାର୍ । 19ମାତର୍ ପିତର ନି ଜୋହନ ଇର୍ହାର୍, “ମିଙ୍ଗିଁ ମାନାନିକା, ଅବା ମାପୁରୁଦିଙ୍ଗ୍ ମାନାନିକା ଏମେ ବିସୟ୍ ମାପୁରୁଦି ଆଗ୍ଡ଼ି ଟିକ୍, ଆକା ମିର୍ ବିସାର୍ କିଦୁ । 20ଇରିଙ୍ଗ୍ ମାପ୍ ଆମାକା ସୁଡ଼ୁତାମାନାପ୍, ମାରି ୱେର୍ଆମାନାପ୍, ଆୟା ବିସୟ୍ ଇନ୍ଏଣ୍ତା ତେବାଦେଙ୍ଗ୍ ଆଟ୍ଏପ୍ ।” 21ମାତର୍ ଜିହୁଦିର୍ ପେରି ମିଟିଙ୍ଗ୍ତୁ ଲୋକୁ ୱାରିଙ୍ଗ୍ ମାରି ଡାଟ୍ତାନ୍ ଆଦ୍ରିସ୍କିଜି ଡ଼ିସ୍ତା ସିତାର୍ । ୱାରିଙ୍ଗ୍ ଦଣ୍ଡ୍ ସିନିକା ଆଏତ୍ ଇଜି ୱାର୍ ନେସ୍ତେଙ୍ଗ୍ ଆଟ୍ତାର୍, ଇରିଙ୍ଗ୍ ଆୟାଗଟନା ଉଣ୍ତିଙ୍ଗ୍ ଲୋକୁ ୱିଜେରେ ମାପୁରୁଦି ଦନ୍ୟବାଦ୍ କିଜିମାର୍ହାର୍ । 22ଏମେ ଲୋକୁ କାବା ଇସାବ୍ତାନ୍ ନେଗେନ୍ ଆତାମାର୍ହାନ୍, ୱାନି ବୟସ୍ ସାଲିସ୍ ବାର୍ସେକ୍ତାନ୍ ନାଣ୍ତ ମାର୍ହାତ୍ ।
ବିସ୍ବାସିର୍ ସାହାସ୍ ପୟ୍ନି ଉଣ୍ତିଙ୍ଗ୍ ପାର୍ତନା କିତାର୍
23ପିତର ନି ଜୋହନ ମୁକ୍ଡ଼ାତି ଦାପେ ଦାପେ ୱାରି ଦଲ୍ତୁ ଡ଼େସି ସର୍ହାର୍ ମାରି ପେରି ଜାଜକର୍ ମାରି ନେତାର୍ ଆମାକା ଇର୍ହାମାର୍ହାର୍, ଆକା ୱାରିଙ୍ଗ୍ ୱେର୍ତାନ୍ । 24ବିସ୍ବାସିର୍ ୱିଜୁ ମାଟା ୱେର୍ଇ ୱେନ୍କା ୱିଜେରେ ଉଣ୍ତାଜି ମାପୁରୁଦି ଲାକ୍ତୁ ଇୟା ପାର୍ତନା କିତାର୍, “ଏ ପ୍ରବୁ ! ମୁସ୍କୁପୁର୍, ଦୁନିଆଦୁ, ସାମ୍ଦୁର୍ ମାରି ଆବେମାନି ୱିଜୁ ବିସୟ୍ତି ତିଆର୍କିତିକିନ୍ଦା ! 25ପବିତ୍ର ଆତ୍ମାଦି ମାଣାନ୍ ନିନ୍ ମା ଡକ୍ରାଦାଦା ମାରି ନି ଦାସ୍ ଦାଉଦତି ୱେୟୁଦାନ୍ ଇୟା ମାଟା ୱେର୍ତିମାର୍ହି,
“ଅଣଜିହୁଦିର୍ ଏନ୍ଦା ରିସା ଆତାର୍;
ଲୋକୁ ଏନ୍ଦା ଆର୍ତିତାନିଙ୍ଗ୍ ଉପାୟ୍କିତାର୍ ?
26ପ୍ରବୁଦି ବିରଦ୍ତାନ୍ ମାରି ୱାନି କ୍ରିସ୍ତ ଅର୍ତାତ୍ ମସିହଦି ବିରଦ୍ତାନ୍
ଦୁନିଆଦି ରାଜାର୍ ନିଜେଦିଙ୍ଗ୍ ତିଆର୍ କିତାର୍
ମାରି ସାସନ୍ କିନି ନେତାର୍ ଉଣ୍ତାତାର୍,
27 #
ଲୁକ ୨୩:୭-୧୧;
ମାତିଉ ୨୭:୧,୨; ମାର୍କ ୧୫:୧; ଲୁକ ୨୩:୧; ଜୋହନ ୧୮:୨୮,୨୯. ସତ୍ତାନ୍ ଇୟା ଗାଡ଼୍ତୁ ହେରୋଦ ନି ପନ୍ତିୟ ପିଲାତ୍ ରାଜା ଅଣଜିହୁଦି ମାରି ଇସ୍ରାଏଲ୍ତି ଲୋକା ୱାଲେ ମିସାଜି ମି ମାଣାନ୍ ବାସେଆତି କ୍ରିସ୍ତ ଅର୍ତାତ୍ ମସିହ, ମି ପବିତ୍ର ଦାସ୍ ଜିସୁଙ୍ଗୁଁ ବିରଦ୍ କିତାର୍ । 28ମି ସାକ୍ତି ମାରି ବଦା ଇସାବ୍ତାନ୍ ଆମାକା ୱିଜୁ ଗଟେଆନି ଉଣ୍ତିଙ୍ଗ୍ ମିର୍ ଆସା କିତିମାର୍ଇଦେର୍, ୱାର୍ ଉଣ୍ତାଜି ଆୟାୱିଜୁ କିନି ଉଣ୍ତିଙ୍ଗ୍ ଲାଗେ ପଡ଼େଆତାର୍ । 29ପ୍ରବୁ, ଇଲେଇ ୱାର୍ ମାଙ୍ଗିଁ ଏମେ ଆଦ୍ରିସ୍ କିତାମାନାର୍, ନିନ୍ ଆୟା ବିସୟ୍ତାନ୍ ମନ୍ ସିଆ ମାରି ସାହାସ୍ତାନ୍ ନି ବାକ୍ୟ ପ୍ରଚାର୍ କିଦେଙ୍ଗ୍ ଇଜି, ନି ଇୟା ଦାସ୍ରିଙ୍ଗ୍ ସାକ୍ତି କିଆ । 30ମାରି ନେଗେନ୍ କିଦେଙ୍ଗ୍ ଇଜି ନି କିୟୁ ପେର୍ଆ ମାରି ନି ପବିତ୍ର ଦାସ୍ ଜିସୁଦି ଦର୍ତାନ୍ କାବାଆନିକା ମାରି କାବାଆନି ପାଣି କିଦେଙ୍ଗ୍ ମାଙ୍ଗିଁ ସାକ୍ତି ସିଦା ।”
31ୱାର୍ ପାର୍ତନା ୱିସ୍ତି ୱେନ୍କା ଏମେ ବାଡିଦୁ ଉଣ୍ତାତା ମାର୍ହାର୍, ଆକା ଦୁଙ୍ଗିଁତା ସର୍ହାତ୍ । ୱାର୍ ୱିଜେରେ ପବିତ୍ରଆତ୍ମାଦୁ ପୁରା ଆତାର୍ ମାରି ସାହାସ୍ତାନ୍ ମାପୁରୁଦି ବାକ୍ୟ ପ୍ରଚାର୍ କିଦେଙ୍ଗ୍ ଆସ୍ତାର୍ ।
ବିସ୍ବାସିର୍ ନିଜେନିଜେଦି ଦନ୍ତୁ ମିସାତାର୍
32 #
ପ୍ରେରିତ ୨:୪୪,୪୫. ବିସ୍ବାସ୍ସି ଦଲ୍ ଉନ୍ଡ୍ରି ଜିବନ୍ ମାରି ଉନ୍ଡ୍ରି ମନ୍ ଆତାର୍ । ଏନ୍ ନିଜେଦି ଦନ୍ତିଙ୍ଗ୍ ନିଜେଦିକା ଇଜି ଦାବି କିଏଜିମାର୍ହାର୍, ମାତର୍ ୱିଜେରି ଦନ୍ତିଙ୍ଗ୍ ୱାର୍ ସାମାନ୍ତାନ୍ ବାଟାକିଜି ସିଜିସାତାର୍ । 33ନାଣ୍ତ ସାକ୍ତିଦାନ୍ ପ୍ରେରିତ୍ର ସିସୁର୍ ପ୍ରବୁ ଜିସୁଦି ମାରିଡ଼େସି ନିଙ୍ଗିଁନି ବିସୟ୍ତାନ୍ ସାକିୟ ସିତାର୍ ମାରି ମାପୁରୁ ୱାରି ମୁସ୍କୁ ନାଣ୍ତ ଆସିର୍ବାଦ୍ ସିତାନ୍ । 34ୱାରି ଦଲ୍ତୁ ଆମା ଲୋକୁ କାକୁର୍ତି ସିଲେତାନ୍ । ଏମେୱାରି ବୁମି ମାରି ଇଲୁ ମାର୍ହାତ୍, ୱାର୍ ଆକା ପର୍ସି ପର୍ତି ଦନ୍ତି ଡାବୁଙ୍ଗୁଁ ତାସି, 35ୱାର୍ ସିସୁରି ପାଦାମ୍ ଆଡ୍ଗି ଇଡ୍ଜିମାର୍ହାର୍ । ମାରି ଆୟା ଡାବୁଙ୍ଗୁଁ ୱାରି ଲୋଇ ଲୋକା ଦର୍କାର୍ ଇସାବ୍ତାନ୍ ବାଟା କିଜିମାର୍ହାର୍ ।
36ସାଇପ୍ରସ୍ ଦର୍ତି ବାଡିଦୁ ଜନମ୍ ଆତିମାର୍ଇ ଲେବି କଟୁମ୍ତି ଜସେପ୍, ଆମାୱାନିଙ୍ଗ୍ ପ୍ରେରିତ ସିସୁର୍ ବର୍ଣ୍ଣବା ଇଜି ଦର୍ ଇଟ୍ତାମାର୍ହାର୍, ବର୍ଣ୍ଣବାଦି ଅର୍ତ “ଦୁଃକ୍ତୁ ୱେଡ଼ିକାସିନି ମାରିନ୍” 37ୱାନି ବୁମି ପର୍ସି ଆବେଣି ଡାବୁଙ୍ଗୁଁ ତାସି ପ୍ରେରିତ ସିସୁରିଙ୍ଗ୍ ସିତାନ୍ ।
Currently Selected:
ପ୍ରେରିତ 4: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
