MALAKI 2
2
1“Jaana lona baperesiti, taolo e, ke e e laoletsweng lona. 2Fa lo gana go utlwa, mme lo gana go e tsaya ka pelo, go tla lo galaletsa leina la me,” go bua Jehofa wa masomosomo, “foo ke tlaa lo tsosetsa phutso, mme ke tlaa hutsa matshego a lona. Ee, ke setse ke a hutsitse le gompieno, ka lo sa tseye ka pelo.
3“Ke tlaa kgalemela peo ka ntlha ya lona, ke tlaa matha moswang mo difatlhogong tsa lona; e bong moswang wa ditlhabelo tsa lona; mme lo tlaa tlosiwa nao. 4Lo tlaa itse fa ke romile taolo e mo go lona, gore kgolagano ya me e tle e nne le Lefi.” Go bua Jehofa wa masomosomo.
5“Kgolagano ya me nae e ne e le ya botshelo le kagiso; mme ka di mo naya gore a tle a boife; mme a mpoifa, a sisimoga leina la me. 6Molao wa boammaaruri o ne o le mo molomong wa gagwe, mme tshiamololo e ne e se ka e fitlhelwa mo dipounameng tsa gagwe; a tsamaya le nna mo kagisong le mo thokgamong, a sokolola batho ba le bantsi mo boikepong.
7“Gonne dipounama tsa moperesiti di tshwanetse go tshegetsa kitso, mme batho ba tshwanetse go botsa molao mo molomong wa gagwe; gonne ke ene morongwa wa ga Jehofa wa masomosomo. 8Mme lona lo fapogile tsela; lo kgopisitse batho ba le bantsi mo molaong; lo bodisitse kgolagano ya ga Lefi.” Go bua Jehofa wa masomosomo. 9“Ke gone ka moo le nna ke lo dirileng batho ba ba nyatsegileng, le ba ba maswe fa pele ga batho botlhe, ka fa lo se kang lwa tshegetsa ditsela tsa me ka gone, mme lo tlhokometse sebele sa batho mo molaong.”
Go tlhoka boikanyego ga batho mo Modimong
10A rra wa rona rotlhe ga a mongwe fela? A Modimo o le mongwe fela ga o a re tlhola? Ana rona mongwe le mongwe re direlelang morwa rraagwe ka bonongwane, re tlhapatsa kgolagano ya borraetsho? 11Juta o dirile ka bonongwane, go dirilwe selo se se makgapha mo Iseraele le mo Jerusalema; gonne Juta o tlhapaditse boitshepo jwa ga Jehofa jo o bo ratang, o nyetse morwadia modimo wa seeng. 12Motho yo o dirang jalo, Modimo o tlaa mo kgaolela ba gagwe go bo go tantsetsega, a tswa mo megopeng ya ga Jakobe, le ene yo o isetsang Jehofa wa masomosomo tshupelo.
13Gape le se, lo a se dira: Lo khurumetsa sebeso sa ga Jehofa ka dikeledi, le ka selelo, le ka phegelo, go tsamaya a sa tlhole a tlhokomela tshupelo, le fa e le go e amogela ka pelo e e monate mo diatleng tsa lona. 14Le fa go ntse jalo lo tle lo re: “Ka ntlha yang?” Ke ka go bo Jehofa o ne a le mosupi gare ga gago le mosadi wa bokau jwa gago, yo o mo diretseng ka bonongwane, le fa a le selekane sa gago, le mosadi wa kgolagano ya gago.
15A o ne a se ka a dira a le mongwe fela, le fa a ne a na le mo go setseng ga mowa? Mme e ne e le a le mongwe fela ka ntlha yang? O ne a batla losika lwa semodimo. Ke gone lo itise mo moweng wa ona, a go se nne ope yo o direlang mosadi wa bokau jwa gagwe ka bonongwane.
16“Gonne ke ila tlhalo,” go bua Jehofa Modimo wa Iseraele, “le ene yo o khurumetsang seaparo sa gagwe ka thubakanyo,” go bua Jehofa wa masomosomo; ke gone lo itise mo moweng, gore lo se dire ka bonongwane.
Letsatsi la katlholo le gaufi
17Lo lapisitse Jehofa ka mafoko a lona. Le fa go ntse jalo lo tle lo re: “Re mo lapisitse mo go eng?” Ke ka lo tle lo re: “Mongwe le mongwe yo o dirang bosula o molemo mo ponong ya ga Jehofa, mme o itumela mo go bone;” kgotsa lo re: “Modimo wa tshiamiso o kae?”
Currently Selected:
MALAKI 2: TSW08NO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1992. Used with permission. All rights reserved.
