1 BATHESALONIKA 4
4
Botshelo jo bo itumedisang Modimo
1Jaana, sa bofelo, bagaetsho, ra re re a lo rapela, re lo laya mo go Morena Jesu, gore jaaka lo amogetse mo go rona ka fa lo tshwanetseng go tsamaya le go kgatlha Modimo ka teng, fela jaaka lo ntse lo tsamaya, ra re: Lo nne lo tote segolo bogolo. 2Gonne lo a itse ka fa re lo laileng ka teng, ka Morena Jesu. 3Gonne mo ke go rata ga Modimo, e bong boitshepiso jwa lona, ke gore, lo ithibe mo boakeng; 4gore mongwe le mongwe wa lona a itse go ikgapa mmele, gore o nne mo boitshepong le mo tlotlong. 5E seng mo dithatong tse di maswe, fela jaaka Baditšhaba ba ba sa itseng Modimo. 6Gore ope motho a se ka a tlola, mme a ferekanela wa ga gabo mo selong se, gonne Morena ke ene mmusolosi mo dilong tsotlhe tse, jaaka re kile ra lo tlhagisa gale, ra ba ra supa. 7Gonne Modimo ga o a re biletsa bomaswe; o re bileditse mo boitshepisong fela. 8Ke gone yo o ganang, ga a gane motho, fa e se Modimo, o o lo nayang Mowa wa one o o Boitshepo.
9Ka ga go rata bakaulengwe, ga go batlwe gore motho a lo kwalele, gonne lona ka losi lo rutilwe ke Modimo go ratana; 10gonne ruri lo a bo lo ntse lo go direla bakaulengwe botlhe ba ba mo lefatsheng lotlhe la Maketonia. Re lo laya, bagaetsho, gore lo tote bogolo bogolo; 11le gore lo leke go nna mo tidimalong, le go dira e e leng tiro ya lona, le go dira ka diatla tsa lona, fela jaaka re lo laotse; 12gore lo tsamaye ka go tlhoka maitsoketso mo go ba ba kwa ntle, le gore lo se tlhoke sepe.
Baswi le batshedi mo go tleng ga Morena
13Ga re rate lwa tlhoka go itse, bagaetsho, ka ga ba ba robalang; gore lo se hutsafale, jaaka ba bangwe ba ba se nang tsholofelo. 14Gonne fa re dumela gore Jesu o ne a sule mme a ba a tsoga, fela jalo ba ba swetseng mo go Jesu, Modimo o tlaa ba lere nae.
15 Gonne se, re se bua le lona ka lefoko la Morena, gore rona ba re tlaa bong re tshedile, ba e tlaa reng mo go tleng ga Morena re fitlhelwa re setse, ga re ketla re etelela ba ba suleng pele. 16Gonne Morena ka esi o tlaa fologa kwa legodimong, ka lošalaba, le ka lentswe la moengele yo mogolo, le ka go galaotega ga lonaka lwa Modimo; mme baswi ba ba swetseng mo go Keresete ba tlaa tsoga pele: 17Foo rona ba re tlaa bong re tshedile re tlogetswe, re tlaa tsholediwa mmogo nabo mo marung, re ya go kgatlhantsha Morena mo loaping; jalo re tlaa nnela ruri le Morena.
18Ke gone, gomotsanyang ka mafoko a.
Currently Selected:
1 BATHESALONIKA 4: TSW08NO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1992. Used with permission. All rights reserved.
