1 SAMUELE 8

Baiseraele ba lopa kgosi

1Ga dirala, e rile Samuele a tsofetse, a baya bomorwawe baatlhodi ba Iseraele. 2Leina la motsalwapele wa gagwe e ne e le Joele, leina la wa bobedi Abia; ba bo ba le baatlhodi mo Beerešeba. 3Mme bomorwawe ga ba a ka ba sepela mo ditseleng tsa gagwe, ba fapogela papading, ba amogela dituelelo tsa phaposo, ba sokamisa katlholo.

4Foo bagolwane botlhe ba Iseraele ba phuthega, ba tla kwa go Samuele kwa Rama. 5 Ba mo raya ba re: “Bona, o tsofetse, bomorwao ga ba sepele mo ditseleng tsa gago; jaana ra re: Re direle kgosi, gore e re atlhole jaaka merafe yotlhe.” 6Mme lefoko leo la hutsafatsa Samuele, ka ba re: “Re neye kgosi go re atlhola.” Mme Samuele a rapela Jehofa. 7Jehofa a raya Samuele a re: “Reetsa lentswe la batho mo go tsotlhe tse ba di buang nao; gonne ga ba a gana wena, ba ganne nna, gore ke se ka ka nna kgosi ya bone. 8Fela ka fa ditirong tsotlhe tse ba ntseng ba di dira, e sa le ka tsatsi le ke ba ntshitseng mo Egepeto ka lone nako ke eno, jaaka ba ntatlhile, ba direla medimo e sele, le wena ba go direla jalo. 9Ke gone, reetsa lentswe la bone; le fa go ntse jalo o tlaa bua nabo ka go ganela ka mo go masisi, o ba kaela mokgwa wa kgosi e e tlaa ba busang, ka fa o tlaa nnang ka gone.”

10Samuele a bolelela batho botlhe ba ba mo lopileng kgosi, mafoko otlhe a ga Jehofa. 11A re: “Mokgwa wa kgosi e e tlaa lo busang o tlaa nna jaana, e tlaa tsaya bomorwaa lona, e ba itaolela, e ba neela dikara tsa yone, le go nna bapalama dipitse ba yone; ba tlaa siana fa pele ga dikara tsa yone. 12E tlaa ba itaolela e ba dira balaodi ba sekete, le balaodi ba 50; bangwe ba tlaa e lemela masotla, ba tlaa e robela mabele, ba tlaa e thulela dibolao tsa ntwa, le dibolao tsa dikara tsa yone tsa tlhabano. 13E tlaa tsaya bomorwadia lona go nna badira dinkgisa monate, le go nna baapei, le babesi ba dijo. 14E tlaa tsaya matlhagare a lona, le masimo a lona a mafine, le masimo a lona a matlhware, e bong one a a molemo bogolo, e a neye batlhanka ba yone. 15E tlaa kgaoganya peo ya lona e tsaya sa bosome, le sa masimo a mafine, e se naya maotlana a yone le batlhanka ba yone. 16E tlaa tsaya batlhanka ba lona, le malata a lona, le makau a lona a mantlentle, le diesela tsa lona, e di tsenya mo tirong ya yone. 17E tlaa tsaya sa bosome sa matsomane a lona; mme lo tlaa nna batlhanka ba yone. 18Lo tlaa lela mo tsatsing leo ka ntlha ya kgosi ya lona e lo tlaa bong lo e itshenketse; mme Jehofa ga a ketla a lo araba mo tsatsing leo.”

19Mme batho ba gana go reetsa lentswe la ga Samuele, ba re: “Nnyaa, re rata ra nna le kgosi; 20gore le rona re tshwane le merafe yotlhe, le gore kgosi ya rona e re atlhole, e tswe e re etelele pele e re tlhabanele dintwa tsa rona.” 21Samuele a utlwa mafoko otlhe a batho, mme a a kakanya mo ditsebeng tsa ga Jehofa. 22Jehofa a raya Samuele a re: “Reetsa lentswe la bone, o ba direle kgosi.” Samuele a raya banna ba Iseraele a re: “A monna mongwe le mongwe wa lona a ye motseng wa ga gabo.”

Currently Selected:

1 SAMUELE 8: TSW08NO

Highlight

Copy