मरकुस 1

यहुन्ना बप्तिसमा देणै वाल़ै रौ परचार

(मत्ती 3:1-12; लुका 3:1-18; यहुन्ना 1:19-28)

1एज़ी खुशी री खौबर यीशु मसीहा रै बारै दी आ, ज़ुण परमेश्‍वरा रौ छ़ोहरु आ। एज़ी खुशी री खौबर इणी शुरु हुई। 2ज़िणौ भविष्यवक्ता री किताबी दी आ लिखौ औन्दौ कि परमेश्‍वरै आपणै छ़ोहरु लै इणौ बोलौ आ कि, “शुण! हाऊं ताऊं कु औगाड़िऐ आपणौ एक दूत भेज़ाऊ। सेऊ ताऊं कालै बाट त्यार कौरा सा।” 3यशायाह भविष्यवक्तै इणौ थौ लिखौ औन्दौ कि, “शुनशान ज़ागाह दी एक आदमी री हाकै ई लागी औन्दी शुणिदै, ‘प्रभु रै स्वागता लै आपणै ज़िऊ त्यार कौरौ, और आपु सुधरौ।’ ” 4तिऐं भविष्यवाणी पुरी कौरीयौ एक आदमी आशौ ज़ासरौ नाऊं यहुन्ना थौ। सेऊ यरदन नौईं पारभिलै बंज़र ज़मीना दी आशौ। और परचार कौरदै लागौ कि, “सारै लोग आपणै-आपणै पापा कु माफी पाइणा लै बुरै कामा कु मन बौदल़ौ और बपतिस्मौ निऔं।” 5सारै यहुदा परदेशा रै लोग और यरुशलेम शहरा दी रौइणै वाल़ै सारै लोग यहुन्ना काऐ आशै, और आपणै-आपणै पाप मानियौ यरदन नौईं दी यहुन्ना कु बपतिस्मौ नियौं। 6यहुन्ना ऊंटा रै बाल़ा रै चाणै औन्दै जुड़कै भीड़ा थौ, और कमरा दी भीड़ा थौ च़ामड़ा री गाची। यहुन्ना सिरफ थाड़ै और बौणा री माक्खी रौ मौ खा थौ। 7यहुन्ना बोला थौ, “मुं बासिऐ ज़ुण आशणै वाल़ौ आ, ज़ो मुकु ज़ादौ शक्ति वाल़ौ आ। हाऊं ता एस लायक भी नाईं कि धौनी झ़ुकियौ दासा ज़िणौ तेसरै बुटा रै तौसमै खोलु। 8हाऊं दिआऊ तुमुलै पाणी कौरीऐ बपतिस्मौ, पर सेऊ दिया तुमुलै पवित्र आत्मा कौरी बपतिस्मौ।”

यीशु रौ बपतिस्मौ और परिक्षा

(मत्ती 3:13; 4:11; लुका 3:21-22; 4:1-13)

9सेज़ै बौगतै यीशु गलील परदेशा रै नासरत गांवा कु आशीयौ यरदन नौईं काऐ डैऔ। तिऐ यहुन्ना लोगु लै बपतिस्मौ दैंदै थौ लागौ औन्दै। यीशुऐ भी यहुन्ना काऐ डेइयौ बपतिस्मौ निऔं। 10ज़िणी ई यीशु पाणी मांझ़िआ कु खौड़ौ उठौ तिणी ई यीशुऐ सौरग दुई भिलै च़ीरिंदै देखौ और आपु माथै पवित्र आत्मा कबुतरा ज़िणौ उतुरदै देखी। 11और सौरगा कु परमेश्‍वरा री हाक शुणुई कि, “तू मैरौ गौरतौ छ़ोहरु ई। हाऊं ताऊं देखीयौ भौरी खुश ऊ।”

12खरकच़ार पवित्र आत्मै यीशु शुनशान ज़ागाह दी नियौं। 13तिऐ यीशु खतरनाक छ़ोटै-छ़ोटै ज़ीव-जन्तु मांझ़िऐ चालिस दिना झ़ांऊ रौऔ। तिऐ शैतानै यीशु बुशु शुणाइयौ फसाउणौं और परखुणौ च़ाऔ, पर यीशुऐ तेसरी एक बूश भी नाईं मानी। तैबै प्रभु रै दूत सौरगा कु आशीयौ यीशु री सेवा कौरदै लागौ।

यीशु रै सेवा रै कामा री शुरुआत

(मत्ती 4:12-17; लुका 4:14,15)

14दख बौगतै बासिऐ राज़ै हेरोदेस अंतिपासै यहुन्ना पाकड़ियौ ज़ेला दी टाल़ौ, तैबै यीशु गलील परदेशा दी आशीयौ, परमेश्‍वरा री खुश-खौबरी शुणाउंदै लागौ। 15यीशुऐ बोलौ, “बौगत पुरौ हुऔ परमेश्‍वरा रौ राज़ नज़दीक आशी गौ आ। आबै आपणै मन बौदल़ौ, और इंऐ खुशी री खौबरी माथै विश्वास कौरौ।”

झ़ींवर औटाउणै

(मत्ती 4:18-22; लुका 5:1-11)

16ज़ेबी यीशु गलीला रै झ़िला रै डिका बाटीऐ थै डेउंदै लागौ औन्दै, तेबी यीशु कै शमौन और तेसरौ भाई आन्द्रियास दिशै। सै झ़ींवर थै। सै थै झ़िला दी ज़ाल़ा टाल़दै लागै औन्दै। 17और यीशुऐ तिउंलै बोलौ, “मुं पिछ़ु आशौ। हाऊं तुमु लोगु मुं काऐ आणनै वाल़ै चाणाऊ।” 18तैबै खरकच़ार तिऊं दुई भाईउऐ ज़ाल़ छ़ाड़ौ पोरु, आपु डेवै यीशु पिछ़ु।

19यीशु तिदरा कु दख दूर डैऔ, तिऐ दिशै यीशु कै जबदी रै दुई छ़ोहरु याकूब और यहुन्ना। सै भी झ़ींवर थै। सै थै लागै औन्दै ज़ाल़ा गांठदै। 20यीशुऐ सै खरकच़ार औटाऐ। तिंउऐ आपणौ बाब छ़ाड़ौ किश्ती दी मुंज़ुरदारु आइलै, और आपु डेवै यीशु पिछ़ु।

बुरी आत्मा वाल़ौ आदमी च़ांगौ कौरणौ

(लुका 4:31-37)

21तेत बासिऐ यीशु आपणै च़ेलेऊ आइलै कफरनहूम गांवा दी आशौ। तिऐ आशीयौ एक आराधनालय दी डैऔ, आरामा वाल़ै दिना दी। तिऐ शिक्षा दैंदै लागौ। 22ज़ेती भी लोग थै तिऐ बोशै औन्दै, यीशु री शिक्षा शुणियौ सारै हैरान हुऐ। कैलैकि यीशु शिक्षा हक्‍का कौरीऐ दिया थौ। यीशु री शिक्षा यहुदी शास्त्री लोगु ज़िणी नाईं थी। 23तिंया ताकै तिंया आराधनालय दी एक आदमी थौ, ज़ासदी बुरी आत्मा थी। तिऐं बुरी आत्मै हाकै मारीयौ बोलौ, 24“ओ, नासरता रै यीशु! हाऊं ज़ाणाऊ कि तू कुण ई। तू परमेश्‍वरा री तौरफा कु भेज़ौ औन्दौ पवित्र ज़ौणौ ई। आमुकै ताऊं कु का काम आ? का तू आमु नाश कौरदै ई आशौ औन्दौ?” 25यीशुऐ तिऐं बुरी आत्मा लै डांटियौ बोलौ, “च़ुटुक थाक! एस आदमी कु बाइरै निकुल़।” 26तिऐं बुरी आत्मै सेऊ आदमी छ़ाटौ-बिछ़ांडौ और राड़ी मारीयौ, तेस आदमी छ़ाड़ियौ बाइरै निकल़ी। 27ज़ेती भी तिऐ लोग थै सै हैरान हुऐ और आपु मांझ़िऐ चौपड़िंदै लागै कि “इऐ का बूश आ? इयौ यीशु हक्‍का कौरीऐ किणी शिक्षा दिया? इदरा झ़ांऊ कि बुरी आत्माऐं भी एसरौ हुकम पोरु माना ई।” 28यीशु रै बारै दी खरकच़ार पुरै गलील परदेशा रै सारै मुलखा दी आगी बाशीऐ फैअली।

भौरी रोगिऊ ठीक कौरणै

(मत्ती 8:14-17; लुका 4:38-41)

29यीशु खरकच़ार आराधनालय कु निकल़ियौ याकूब और यहुन्ना आइलै शमौन और आन्द्रियासा सै घौरा दी डैऔ। 30तिऐ शमौन री शाशु च़ाता ई बुखारा कौरीऐ भौरी बिमार थी। तिऊं घौरा रै लोगुऐ इऐ बूश खरकच़ार यीशु काऐ बोली। 31यीशु शमौना री शाशु काऐ डैऔ, तियांरौ हाथ पाकड़ौ और सै खौड़ी उठाई। तियांरौ बुखार तेबी ठीक हुऔ। तेत बासिऐ सै तिउंरी सेवा कौरदै लागी। 32आरामा रौ दीन खातम हुइयौ ब्याल़कै लोग बिमार और ज़ासदी बुरी आत्मा थी लागी औन्दी यीशु काऐ आणदै लागै। 33गांवा रै भौरी लोग शमौना रै दारा काऐ भौरुऐ। 34यीशुऐ भौरी लोग ज़ासदी कई रौंगा री बिमारी थी लागी औन्दी च़ांगै कियै। और बुरी आत्मा ज़ासदी लागी औन्दी थी तिऊंकु सै आत्माऐं भी गाड़ी पोरु। तिणीऐ बुरी आत्माऐं लै बोलणै रौ कोई मौकौ ना दैऔ। कैलैकि बुरी आत्माऐं ज़ाणा थी कि यीशु कुण आ।

एखुलै दी यीशु रै प्राथना कौरणी

(लुका 4:42-44)

35आगली दोउती यीशु दोत राची सुतियौ उठौ। और बाइरै निकल़ियौ एखुलै ज़ागाह दी डैऔ और तिऐ प्राथना कौरदै लागौ। 36तैबै शमौन और तेसरै साथी यीशु लोड़दै लागै, कि सेऊ केशी डैऔ औलौ। 37तेत बासिऐ तिउंकै यीशु मिलौ और सै तेसलै बोलदै लागै कि, “भौरी लोग ई तुमु लोड़दै लागै औन्दै।” 38यीशुऐ तिउंलै बोलौ, “ओरु आशौ! आमै नीज़ुका रै गांवा दी डेई। हाऊं धौतरी दी एथीलै ऊ आशौ औन्दौ कि लोगु कै परचार कौरु।” 39तेत बासिऐ यीशु गलील परदेशा री भौरी ज़ागाह दी आराधनालय दी डेइऔ परचार कौरदै लागौ और ज़ासदी बुरी आत्मा थी तिऊंकु बुरी आत्मा गाड़दै लागौ।

कोढ़ा वाल़ौ आदमी ठीक कौरणौ

(मत्ती 8:1-4; लुका 5:12-16)

40एकी दिनै यीशु काऐ एक कोढ़ी आशौ। सौ यीशु रै बांगणै बौंधियौ औरज़ कौरदै लागौ, “अगर तुमै मुं च़ांगौ कौरणै च़ाहा लै ता च़ांगौ कौरी बौल़ा ई।” 41यीशुऐ दया कौरीयौ आपणै हाथा बड़ाइयौ सेऊ छ़ुंऔ और तेसलै बोलौ, “हाऊं च़ाहा ऊ कि तू च़ांगौ च़ांई हुऔ।” 42तेबी ई तेसरौ कोढ़ दूर हुऔ और सेऊ च़ांगौ हुऔ। 43यीशुऐ सेऊ सख्ता ई कौरीऐ बोलीऔ भेज़ौ, 44“इऐं बूश कासी काऐ ना बोलै। तू सिधौ याजका काऐ डेऊ। परमेश्‍वरा रै आपणै सेवक मुसा रै ज़ौरिऐ ज़ेज़ै नियम ई दैऔ औन्दै तिऊं अपणाइयौ बौल़ी च़ौड़ाऊ ताकी सै तैरै बारै दी लोगु काऐ बोला कि तू च़ांगौ और शुद्ध हुई गौ आ।” 45पर सेज़ौ आदमी लोगु काऐ डेइऔ इऐं बुशा फैलाउंदै लागौ कि, “यीशुऐ हाऊं च़ांगौ कियौ ऊ।” एज़ै कारण यीशु कै गांव-गांवा दी नाईं डेउवौ। तैबै यीशु बंज़र ज़मीना दी रौउंदै लागौ। तेती माथै भी लोग गांव-गांवा कु यीशु काऐ तिऐ आशा थै।

Currently Selected:

मरकुस 1: BFZ-NT

Highlight

Copy