मत्ती 28

यीशु रौ दुजी बारै ज़िउंदौ हुणौ

(मरकुस 16:1-10; लुका 24:1-12; यहुन्ना 20:1-10)

1आरामा रै दिना बासिऐ हौफ्तै रै पैहलै दिनै दोअती कांडै प्याशिदैं ई मरियम मगदलीनी और दुजी मरियम ओडाच़ी देखदै आशी। 2और देखौ, एक बौड़ौ भूइंच़ल़ आशौ, कैलैकि प्रभु रौ एक दूत सौरगा कु उतरौ और तिऐ आशीयौ सेऊ पात्थर तिदरा कु पोरु घिसराऔ, और तेथ माथै बोशी गौ। 3तेस दूतै रौ रूप बिज़ल़ी ज़िणौ और तेसरै जुड़कै च़ौमकिलै थै। 4तेसरै डौरा कु पैहरैदार कांबदै लागै, और धौनी लोटै ज़िणै मौरै औन्दै ई। 5सौरगदूतै तिऊं छ़ेउड़ी लै बोलौ, “नाईं डौरौ, हाऊं ज़ाणाऊ कि तुमै यीशु लोड़दै ई लागै औन्दै ज़ो क्रुसा माथै थौ च़ड़ाऔ औन्दौ। 6सेऊ इदै नाईं आ, पर तेसरै वचना रै मुताबिक ज़िउंदौ हुई ऐरौ आ। आशौ, इऐं ज़ागाह देखौ, ज़िऐ प्रभु थौ छ़ाड़ौ औन्दौ, 7और तुमै फेटी डैऔ यीशु रै च़ेलेउलै बोलौ कि यीशु मौरै औन्दै मांझ़िआ कु मानदौ हुई ऐरौ आ, और सेऊ तुमु कु पैहलै गलीला दी डेई ऐरौ सा, तिऐ तुमै तेस देखा ई! शुणौ, मुंइऐ तुमुलै बोली ऐरौ आ।” 8सै घबराइयौ और बौड़ी खुशी आइलै तिदरा कु फेटी डेइयौ तेसरै च़ेलेउलै एज़ी बुशै बोलणै लै दौड़ी गोई। 9तैबै यीशु तिउंकै मिलौ। और बोलौ, “ढाल”। तिंउऐ यीशु काऐ आशीयौ और तेसरै लात पाकड़ियौ ढाल की। 10तैबै यीशुऐ तिउंलै बोलौ, “नाईं डौरौ। मैरै च़ेलेऊ कै डेइयौ बोलौ कि गलीला परदेशा लै डैऔ, तिऐ मुं देखाल़ै”

पैहरै देणै वाल़ै खुशी री खौबर

11सै छ़ेउड़ी डेउंदै ई थै लागी ऐन्दी कि पैहरैदार मांझ़िऊ कु कुछ़ इलाकै दी आशीयौ पुरौ हाल बौड़ै याजकै कै शुणाऔ। 12तैबै सै बौड़ै याजक स्याणै गुरु आइलै कौठै हुइयौ चौपड़ुऐ और सिपाईउ लै भौरी च़ांदी देइयौ बोलौ, 13“सारेऊ कै इणौ बोलणौ कि राची ज़ैबै आमै सुतै औन्दै थै, ता तेसरै च़ेलेउऐ सेऊ च़ोरिऐ नियौं। 14और अगर तुमारै सुतणै री बुशै पिलातुस आफसरा रै कौन्थु झ़ांऊ पौउंच़ाली, ता आमै तेस सौमझ़ाई और आमै तुमु मुश्कल़ा कु बौच़ाई।” 15तैबै तिंउऐ रुपाऐ देइयौ ज़िणौ तिउंकै शिखाऔ औन्दौ थौ, तिणी ई कियौ। एज़ी बुशै आज़ा झ़ांऊ यहुदिऊ दी मशूर आ।

यीशु दिशणौ और यीशु मसीहा रौ आखरी हुकम

(मरकुस 16:14-18; लुका 24:36-49; यहुन्ना 20:19-23; प्रेरित 1:6-8)

16ग्यारह च़ेलै गलीला री तिंया टिरा माथै डेवै, ज़ो यीशुऐ तिउंकै बोलौ थौ। 17तिंउऐ यीशु देखीयौ तेसलै ढाल की, पर कोइयै तेस माथै विश्वास नाईं कियौ कि सेऊ ज़िउंदौ हुई गौ आ। 18यीशुऐ तिऊं काऐ आशीयौ बोलौ, “सौरग और धौतरी रौ सारौ हक्क मुकै आ दैऔ औन्दौ। 19एथीलै तुमै डैऔ, सारी ज़ाती रै लोगु च़ेलै चाणौ। और तिउंलै बाब, छ़ोहरु, और पवित्र आत्मा रै नावां कौरी बपतिस्मौ दैऔ, 20और तिउंकै सारी बुशै ज़ो मुंइऐ तुमुलै हुकम दैऔ आ, मानणौ शिखाऔ और शुणौ, हाऊं धौतरी रै आखरी झ़ांऊ तुमु आइलै सौदा रौआऊ।”

Currently Selected:

मत्ती 28: BFZ-NT

Highlight

Copy