लुका 13

मन फिराऔ या नाश हुऔ

1सेज़ै बौगतै कुछ़ लोगुऐ यीशु कै एज़ी खुशी री खौबर शुणाई कि ज़ेबी गलील परदेशा रै कुछ़ लोग यरुशलेम दी परमेश्‍वरा रै घौरा दी बौल़ी च़ड़ावा थै, तेबी पिलातुसै ज़ुण रोमी सरकारा रौ आफसर थौ, सै पोरु झ़ौंगाऐ। 2इणै शुणियौ यीशुऐ बोलौ, “का तुमै ज़ाणाई कि इऐ गलीली लोग, ओरी गलीली लोगु कु ज़ादै पापी थै? का एज़ी तांइऐ तिऊं माथै एज़ी मुसीबत आशी आ? 3हाऊं तुमुलै बोलाऊ, इणौ नाईं भी नाईं, पर, अगर तुमै आपणौ मन ना बौदल़ा लै ता तुमै सारै भी इणै कौरीऐ नाश हुआई। 4या तुमै तिऊं ठाहरा लोगु रै बारै दी का सौमझ़ा ई ज़ास माथै शिलोहा रौ गुम्मट ढौल़ौ थौ और सै सारै दाबुइयौ मौरी गौऐ। का सै यरुशलेम शहर दी रौइणै वाल़ेऊ मांझ़िया कु ज़ादै पापी थै? 5हाऊं तुमुलै बोलाऊ कि, इणौ नाईं भी नाईं, पर, अगर तुमै आपणौ मन पापा कु ना बौदल़ा लै ता तुमै सारै भी इणै कौरीऐ नाश हुआई।”

बिणा फौल़ा रौ फेड़ु रै पेड़ा रौ औनैणौ

6तैबै यीशुऐ तिउंलै एज़ौ औनैणौ भी दैऔ। “एकी आदमी रै अंगुरा रै बौगिच़ै दी फेड़ु रौ पेड़ थौ लागौ औन्दौ और सेऊ आदमी हर साल तेस फेड़ु रै पेड़ा दी फौल़ा लोड़दै आशा थौ, पर तेसकै फल़ नाईं मिलै।” 7तैबै तिणीऐ बौगिच़ै रै च़ोकीदारा कै बोलौ, “देख चिआ साला ओउलै एस फेड़ु रै पेड़ा दी हाऊं फौल़ा लोड़दै आशाऊ पर फल़ नाईं मिलदै एस पोरु काट, एसरै फाल़तू आ आच़्छ़ी ज़बीन घेरी ऐन्दी। 8च़ोकीदारै बोलौ, ‘ओ मालिक! एज़ी सालै भी एस रौअणै दै कि हाऊं एथरै च़ारौ तौरफा दी खोदियौ खाद पा आ ऊ।’ 9अगर आगली बारै फौल़ा लौ ता ठीक आ नाईं ता काटाऊ एस पोरु (फेड़ु रै पेड़ा रौ मतलब इस्राइली लोग)।”

आरामा रै दिना दी कुबड़ी छ़ेउड़ी ठीक कौरणी

10आरामा वाल़ै दिना दी यीशु आराधनालय दी परचारा कौरदै थौ लागौ औन्दौ। 11तिऐ एक छ़ेउड़ी थी ज़ासदी कमज़ोर कौरणै वाल़ी बुरी आत्मा थी लागी ऐन्दी, और सै ठाहरा बौरशा ओउलै कुबड़ी थी, तिआंकै सिधौ नाईं हुइया थौ। 12ज़ैबै यीशुऐ सै देखी, “तिंआलै औटाइयौ बोलौ, ‘ओ बौइण तू आपणी बिमारी कु ठीक हुई गोई आ।’ 13इणै बोलीयौ यीशुऐ तिंआ माथै हाथ छ़ाड़ौ सै खरकच़ार सिधी हुई गोई और परमेश्‍वरा री बौड़ाई कौरदै लागी 14एथीलै कि यीशुऐ सै आरामा रै दिना दी ठीक की थी, आराधनालय रौ मुख्यौ यीशु लै रोशुऔ और लोगु आइलै बोलदै लागौ, छ़ौ दीन ई ज़ेज़े दिना दी काम च़ांई कौरणौ और सेज़ै दिना दी आशीयौ ठीक भी हुऔ, पर आरामा रै दिना दी इणौ नाईं च़ांई कौरणौ।” 15इणै शुणियौ प्रभुऐ ज़वाब दैऔ, “ओ कौपटीउओ का तुमैं आरामा रै दिना दी आपणै बौल़दा या गादै खुंटे कु खोलियौ पाणी पिआउणा लै नाईं निंदै? 16का ठीक नाईं थौ कि इऐ छ़ेउड़ी ज़ुण अब्राहमा रै वंशा री छ़ोटूड़ आ, ज़ुण शैताना रै अठाराह बौरशा ओ लै बिमार थी की ऐन्दी, आरामा रै दिना दी इऐं बिमारी कु ठीक हुई आ? 17ज़ैबै यीशुऐ एज़ी बुशै बोली, ता तेसरै सारै विरोधी रै शरम पौड़ी और सारी भीड़ तिऊं हैरानी वाल़ै कामा कु ज़ो यीशु कौरा थौ खुश हुऐ।”

राई रै बीजा रौ औनैणौ

(मत्ती 13:31-32; मरकुस 4:30-32)

18तैबै यीशुऐ तौंइऐ बोलौ, “परमेश्‍वरा रौ राज़ कास ज़िणौ आ? हाऊं परमेश्‍वरा रै राज़ा री बराबरी कास आइलै कौरु? 19परमेश्‍वरा रौ राज़ एक राई रै गुल़ै ज़िणौ आ। बौइयौ सेऊ बौड़ा सा और पेड़ बौणा आ, और आसमाना रै च़ौड़कु आशीयौ तेसरी डाल़ी दी वास कौरा ई।”

संज़ेड़ा रौ औनैणौ

(मत्ती 13:33)

20यीशुऐ तौंइऐ बोलौ, “परमेश्‍वरा रै राज़ा री बराबरी कास आइलै कौरु? 21परमेश्‍वरा रौ राज़ एक संज़ेड़ै ज़िणौ आ, ज़ो एकी छ़ेउड़ीऐ चीन पाथै पिठै मांझ़िऐ मुछ़ौ आ, और देखदै-देखदै सारौ पिठौ ओसरी गौ आ।”

सांगड़ौ दार

(मत्ती 7:13-14,21-23)

22यीशु इलाकै-इलाकै और गांवा-गांवा बाटीऐ परचार कौरदै-कौरदै यरुशलेम लै थौ डेउंदै लागौ औन्दौ आपणै च़ेलेऊ आइलै। 23तैबै बाटा दी एकी आदमीऐ यीशु कु पुछ़ौ, “ओ प्रभु का सौदा री सौज़ा कु भौरी कम लोग बौच़णै ई? तिणीऐ ज़वाब दैऔ, 24‘परमेश्‍वरा रै राज़्य दी सांगड़ै दारा बाटीऐ डेउणौ भौरी कठिण आ कैलैकि हाऊं तुमुलै बोलाऊ कि भौरी लोग सांगड़ै दारा बाटीऐ डेउणै री कोशिश कौरा ई पर डेई नाईं बौल़दै’ 25ज़ैबै परमेश्‍वर ज़ुण घौरा रौ मालिक आ उठीयौ दार उढ़ी एरा लौ और तुमै बाइरी भिलै दार खटखटाइयौ औरज़ कौरीयौ बोलदै लागा लै, ‘ओ प्रभु आमुलै दार खोल और सेऊ मालिक ज़वाब दिआ लौ कि, हाऊं तुमु नाईं ज़ाणदौ कि तुमै किदले ई?’ 26तैबै तुमै बोलदै लागा लै कि, ‘आमुऐ ताऊं काऐ खाऔ-पिऔ और ताऐं आमारै बज़ारा दी परचार कियौ।’ 27पर सेऊ बोलालौ कि, ‘हाऊं तुमुलै बोलाऊ कि हाऊं तुमु नाईं ज़ाणदौ कि तुमै किदले ई? ओ बुरै काम कौरणै वाल़ै लोगुओ तुमै सारै मुकाऐ कु दूर डैऔ।’ 28तिऐ लेरणौ और दांद चाकणौ औणौ आ। तुमै तिऐ अब्राहम, इसहाक, याकूब और सारै पुराणै भविष्यवक्ता परमेश्‍वरा रै राज़ा दी देखाल़ै और आपु दिशा लै बाइरी गाड़ै औन्दै। 29तैबै पुरी दुनिया कु दुजी ज़ाती रै लोग आशीयौ परमेश्‍वरा रै राज़ा दी रोटी खान्दै बोशा ई, 30और देखौ ज़ुण आपुलै बौड़ै बौणा ई। ज़ेबी हाऊं राज़ौ बौणीयौ आशु लै तेबी सै लोग छ़ोटै हुआई। ज़ुण आपुलै छ़ोटै सौमझ़ा ई सै हुआई बौड़ै।”

हेरोदेसा री दुश्मनी

31तेबी कुछ़ फरीसीउऐ आशीयौ यीशु लै बोलौ, “इदरा कु पोरु भाग कैलैकि हेरोदेस ताऊं झ़ागणौ च़ाहा सा।” 32यीशुऐ तिउंलै बोलौ, “डैऔ तेस शाल़टै ज़िणै च़लाक आदमी लै बोलौ, ‘कि हाऊं आज़ और कालै बुरी आत्मा गाड़ाऊ और बिमार आदमी च़ांगै कौराऊ और चिजै दिनै आपणौ काम पुरौ कौराऊ।’ 33तैबै भी आज़, कालै और पौरशी हांडणौ ज़ुरुरी आ, कैलैकि इणौ नाईं हुन्दौ कि कोई भी भविष्यवक्ता यरुशलेम कु बाइरै झ़ांगा,”

यरुशलेम लै लेरणौ

(मत्ती 23:37-39)

34“ओ यरुशलेम रै लोगुओ! ओ यरुशलेमा रै लोगुओ! तू एक इणौ इलाकौ ई कि तांइऐ पुराणै भौरी भविष्यवक्ता झ़ांगै ई, और ज़ो लोग परमेश्‍वरा रै खुशी री खौबर शुणाउवाई सै तांइऐ ढोल़ियाऐ ई! मुंइऐ कई बारै सुंच़ौ कि ज़िणी कुखड़ी आपणै टैऐणु आपणै पांखै थालै च़ोरा तिणी ई मुंइऐ भी तैरै छ़ोहरु बौच़ाउणा लै कौठै कौरणै च़ाऐ, पर तांऐ हाऊं इणौ नाईं दैऔ कौरणै। 35और आबै देखौ तुमारौ घौर तुमुलै शुनौ छ़ाड़ाऊ, और हाऊं तुमुलै बोलाऊ, ज़ेबी झ़ांऊ तुमै नाईं बोलालै कि, ‘भौलौ सेऊ ज़ुण परमेश्‍वरा रै नावां कौरी आशा सा, और तेबी झ़ांऊ मुं तुमै केबी ना देखाल़ै।’ ”

Currently Selected:

लुका 13: BFZ-NT

Highlight

Copy