लुका 12
12
बुरै और पाखण्डी लोगु कु च़ितलाउणै
(मत्ती 10:26-27)
1सेज़ै बौगतै तिऐ कई हज़ार लोग कौठै हुई गौऐ और लोगु री भीड़ एती बौड़ी गोई कि, एकी दुजै माथै लागै लोटदै। यीशु सौभी कु पैहलै आपणै च़ेलेऊ भिलै मुड़ियौ बोलदै लागौ, फरीसी रै कौपटी संज़ेड़ै कु बौच़ियौ रौएऊ। 2सेऊ बौगत आशदै लागौ औन्दौ, ज़ेबी सारी बुशै पौगड़ौ हुआई। और ज़ो कुछ़ गुप्त आ सेऊ सामनै आशणौ आ। 3ज़ो बुशै तुमुऐ पीठी पिछ़ु बोली आ सै बुशै छ़ापरा माथै खौड़ी हुइयौ हाके मारीयौ परचार कौरा ई, ताकी सारै लोग तिऊं बुशै शुणी बौल़ा।
कासकु डौरी लै
(मत्ती 10:28-31)
4यीशुऐ आपणै च़ेलेउलै बोलौ, मैरै प्यारै गोश्टणो, तुमै तिऊंकु ना डौरौ ज़ो सिरफ तुमारौ शरीर झ़ांगी बौल़ा ई तेथकु ज़ादौ सै कुछ़ नाईं कौरी बौल़दै। 5पर हाऊं तुमुलै बोलाऊ, कि कासकु डौरनौ च़ांई, परमेश्वरा कु डौरौ ज़ासकै लोगु झ़ांगणै और नौरका दी पाइणै रौ हक्क आ। 6का पांज़ च़ौड़की दुई रुपाऐ दी ना बिकदी? तैबै भी परमेश्वर तिऊं मांझ़िया कु एक भी ना बिसुरदौ। 7और तुमारै मुंडा रै बाल़ भी गौणै औन्दै ई, तुमै डौरौ नाईं कैलैकि तुमै परमेश्वरा लै तिऊं च़ौड़की रै बालरा कु भी ज़ादै किमत्ती ई।
यीशु मानणौ या नाईं मानणौ
(मत्ती 10:32-33; 12:32; 10:19-20)
8हाऊं तुमुलै बोलाऊ, “कि ज़ुण-कुण मुं लोगु मांझ़िऐ माना लौ, ता हाऊं आदमी रौ छ़ोहरु तेस आदमी परमेश्वरा रै सौरगदूता रै सामनै माना ऊ। 9पर अगर कुण, लोगु काऐ मैरौ इनकार कौरालौ, ता हाऊं तेस आदमी रौ परमेश्वरा रै सौरगदूता रै सामनै इनकार कौराऊ 10ज़ुण कुण आदमी रै छ़ोहरु रै विरोधा ई बोलालौ तेसलै ता माफी मिला सा। पर ज़ुण कुण पवित्र आत्मा री बुराई कौरालौ तेसलै केबी भी माफी नाईं मिलदी। 11ज़ैबै तुमु आराधनालय दी राज़ च़लाउणै वाल़ै, बाकी अधिकारी लोगु काऐ तुमारौ मुकदमौ च़लावा लै ता तुमुऐ फिकर नाईं कौरणी, कि आपु बौच़णा लै आमु का और किणौ जा बोलणौ? 12कैलैकि ज़ैबै तुमै तिऐ खौड़ै औलै, सेज़ै बौगतै पवित्र आत्मा तुमु कु शिखावा कि तुमु का ज़वाब जा दैणौ।”
एक सेठ मुर्खा रौ औनैणौ
13तैबै भीड़ा मांझ़िऐ कु एकी आदमीऐ यीशु लै बोलौ, ओ गुरु, “मैरै भाई लै बोल एरी कि आमै आपणै बाबा री ज़यदाद बांटी। 14यीशुऐ तेसलै बोलौ, ‘ओ गोश्टण, हाऊं कुण औआ ऊ तुमारौ फैसलौ कौरणै वाल़ौ और तुमारी ज़यदाद बांडणै वाल़ौ?’ 15यीशुऐ तिउंलै तौंइऐ बोलौ, ‘च़ोकस रौ और सारै लोभ लाल़च़ा कु आपु बौच़ी थाकौ। कैलैकि कासी री भी ज़िन्दगी धन-ज़यदादा कौरीऐ नाईं काटींदी।’ 16यीशुऐ तिंउलै एक औनैणौ दैऔ, ‘एकी सेठा री ज़मीना दी भौरी नाज़ हुऔ। 17तैबै सेऊ सेठ आपणै मौना दी विच़ार कौरदै लागौ कि आबै हाऊं किणौ कौरुलौ कैलैकि मुकै इऐं फौसली छ़ाड़ना लै भौरी ज़ागाह नाईं आसती।’ 18तैबै तिणी सेठै बोलौ कि हाऊं ज़ाणाऊ कि मुंइऐ का जा सा कौरणौ इऊं छ़ोटै कुठार ढाल़ीयौ बौड़ै चाणाऊ, और इऐं फसल तेथ भितै छ़ाड़ाऊ। 19तैबै हाऊं आपुलै लै बोलाऊ, ‘ओ मैरै प्राण ताऊं कालै भौरी साला लै धन-ज़यदाद और नाज़ कौठै कियौ औन्दौ, खाऊ-पिऊ और मौज़ कर।’ 20पर परमेश्वरै तेस सेठा लै बोलौ, ‘आज़ ई राचीऐ तैरौ प्राण ताऊं कु पोरु निंईआ ई, तैबै ज़ो कुछ़ तैरै कौठै कौरीयौ आ छ़ाड़ौ औन्दौ सेऊ कासरौ हुआ आ?’ 21तिणौ सेऊ आदमी भी आ ज़ुण आपु कालै ज़यदाद कौठै कौरा सा, सेऊ आदमी परमेश्वरा री नौज़रीऐ सेठ नाईं आसतौ।”
परमेश्वर माथी भरोसौ छ़ाड़ौ
(मत्ती 6:25-34)
22तैबै यीशुऐ आपणै च़ेलेऊ लै बोलौ, “आबै हाऊं तुमुलै बोलाऊ आपणै ज़िन्दगी री फिकर नाईं कौरौ कि, आमै का खाऊ लै। और ना आपणै शरीरा री फिकर कौरौ कि आमै का भिड़ु लै। 23कैलैकि रोटी कु ज़िन्दगी और जुड़कै कु शरीर बौड़ीऔ आ। 24कौअगै माथै ध्यान दैऔ। सै ना बौइंदै, ना लौइंदै, और ना तिंउरै कुठार औन्दै, और ना तिंउरै खातै औन्दै, तैबै भी परमेश्वर तिऊं धाचा सा। पर तुमारी किम्मत ता च़ौड़किउ कु भी काफी ज़ादी आ। 25तुमु मांझ़िऐ इणौ कुण आ, ज़ो फिकर कौरीयौ आपणी उमर थोड़ी भी बड़ाई बौल़ा आ। 26अगर तुमै छ़ोटै कु छ़ोटौ काम नाईं कौरी बौल़दै तैबै बौड़ी बुशेऊ लै फिकर कैलै कौरा ई? 27ज़ांगल़ी फुला दी ध्यान दैऔ कि सै किणै बौड़ा ई सै ना ता मैहनत कौरदै और ना आपु कालै जुड़कै चाणदै तैबै भी केती बांठणै ई पर हाऊं तुमुलै बोलाऊ कि सुलेमान राज़ै भी आपणी सुखी ज़िन्दगी दी इऊं फुलु ज़िणै बांठणै जुड़कै नाईं भिड़ै 28अगर परमेश्वर इऐं धौतरी दी घास ज़मावा सा ज़ो घास आज़ औआ और बासिऐ ज़ौल़ा पोरु तैबै। ओ अविश्वासी लोगुओ तुमुकै सेऊ परमेश्वर जुड़कै कैलै ना भिड़ाऊंदौ। 29और ना तुमै एज़ी बुशेऊ री फिकर कौरौ कि आमै का खाऊ लै और का पिऊ लै और ना शक कौरौ। 30कैलैकि पुरी धौतरी री ज़ाती इऊं सारी च़िज़ा लै फिकर कौरदै थाका ई लागी पर तुमारौ बाब परमेश्वर ज़ाणा सा कि तुमुकै इऊं च़िज़ा री ज़ुरत आ। 31पर हाऊं तुमुलै बोलाऊ कि परमेश्वरा रौ राज़ लोड़ौ तैबै सारी च़िज़ै तुमुकै मिला सा।”
सौरगा रौ धन
(मत्ती 6:19-21)
32ओ छ़ोटी खुंबल़ी रै लोगुओ, “डौरौ नाईं कैलैकि तुमारौ बाब परमेश्वरा कै इणौ आच़्छ़ौ लागा कि सेऊ तुमारै ज़िवा दी राज़ कौरा। 33आपणी ज़यदाद बेच़ीयौ गरीबु लै दाण दैऔ और आपु कालै इणै बटुऐ चाणौ ज़ो केबी ना च़ीरिंदै और आपु कालै सौरगा दी इणी धन-ज़यदाद सांज़ौ ज़ो कादी ना घौटदी ज़िऐ ना ता च़ोर च़ोरदौ और ना किड़ौ लागदौ। 34कैलैकि ज़ियै तुमारौ धन औलौ तिऐ तुमारौ मन भी लागा।”
उज़ीई रौएऊ
35“परमेश्वरा रै कामा लै सौदा तैयार थाकौ, ज़िणै कामा कौरना लै लोग कौमर कौशा ई और पुरी राचीऐ मशाल ज़ाल़ियौ तैयार रौआ ई। 36तिऊं लोगु बाशीऐ बौणौ, ज़ुण आपणै मालिका ज़ागदै थाका ई लागी कि मैरौ मालिक शादी ब्याह कु वापिस केबड़ी आशा। और ज़िणी सेऊ मालिक दार खटखटावा लौ और सेऊ तेसलै खरकच़ार दार उगाड़ा और तेसरै स्वागत कौरना लै तैयार रौआ। 37भौलै ई सै ज़ो तेस पौखदै ई लागै औन्दै, और सेज़ै बौगता लै तैयार ई, हाऊं तुमुलै सौच़्च़ौ बोलाऊ सेऊ मालिक तेस आपणौ नुकुर धौनी बोशाल़ा आ, रोटी खान्दै। और आपणी कमर कौशीयौ आपु तेस दासा री सेवा कौरा आ। 38अगर सेऊ मालिक आधी राची, दोउत राची ई आशीयौ आपणौ दास उज़ीई देखा लौ ता सेऊ भौलौ आ। 39और एज़ी बुशु माथै ध्यान दैऔ कि, अगर घौरा रौ मालिक ज़ाणालौ कि च़ोर केज़ै बौगतै आशा आ, तैबै सेऊ मालिक तेस च़ोर भितरै आशणै नाईं दैंदौ। 40तुमुऐ हर बौगतै तैयार रौइणौ च़ांई, कैलैकि हाऊं आदमी रौ छ़ोहरु तेबी आशाऊ ज़ेबी तुमै सुंच़ा भी नाईं लै।”
विश्वासा वाल़ौ या बिण विश्वासा वाल़ौ सेवक
(मत्ती 24:45-51)
41पतरसै यीशु कु पुछ़ौ, “ओ प्रभु का एऊ औनैणौ आमुलै आ या सारेऊ लै आ?” 42प्रभुऐ तेसलै ज़वाब दैऔ, “हाऊं केज़ै भी विश्वास वाल़ै, और बुद्धी वाल़ै लोगु रै बारै दी ऊ बोलदै लागौ औन्दौ, ज़ासकै तिऊंरौ मालिक आपणै घर-परिवारा री देखभाल़ कौरना री और रोटी दैणै री ज़िमैबारी दिआ लौ। 43अगर सेऊ मालिक आशीयौ देखाल़ौ कि तेसरै दासै आच़्छ़ा कौरीऐ ज़िमैबारी सौम्भाल़ी आ ता सेऊ भौलौ आ। 44हाऊं तुमुलै सौच़्च़ बोलाऊ कि, मालिक आपणै तेस दासा कै आपणी सारी धन-ज़यदादा सौम्भाल़णै रौ हक्क दिआ सा। 45अगर सेऊ दास सुंच़ा लौ मैरौ मालिक ता कुछ़ दिना झ़ांऊ वापिस ना आशदौ और दुजै नुकरा लै दुःख दैणौ शुरु कौरालौ, और आपुलै खाणै पिणै रौ इन्तज़ाम कौरालौ और सूर पिआ लौ। 46ता तेसरौ मालिक बिण बोली तेबी आशा ज़ेबी तेसरै सुंच़ौ औन्दौ भी ना औलौ, और सेऊ मालिक तेस नुकरा लै सौज़ा दिआ और अविश्वासिऊ मांझ़िऐ भेज़ा। 47तिऊं नुकरु लै काठी सौज़ा दिआई, कैलैकि ज़ैबै सेऊ आपणै मालिका री इच़्छ़ा ज़ाणा थौ, तैबै भी तिणीऐ आपणी ज़िमैबारी पुरी नाईं की। 48पर सै लोग, ज़ुण नाईं ज़ाणा थै अगर सै गलत काम कौरा ई, तिउंलै थोड़ी सौज़ा मिला आ। ज़ासकै ज़ादौ दैऔ औन्दौ तेसकु ज़ादौ हिसाब मांगा ई और ज़ासकै ज़ादौ सम्भाल़ौ औन्दौ तेसकु भी तेती हिसाब मांगा ई ज़ेती तेसकै सम्भाल़ौ औन्दौ आ।”
यीशु रै आशणै रौ नतीज़ौ
(मत्ती 10:34-36)
49“हाऊं धौतरी माथै आगी लाइंदै ऊ आशौ औन्दौ, और हाऊं च़ाहा ऊ कि मैरौ एऊ काम इबी लै पुरौ च़ांई थौ हुऔ। 50पर मुंइऐ ता तौंइऐ एक बपतिस्मौ निणौ आ, और ज़ेबी झ़ांऊ मुंइऐ सेऊ निऔं नाईं तेबी झ़ांऊ हाऊं परेशान रौआऊ। 51तुमै का सुंच़ाई कि हाऊं धौतरी दी मेल मिलाप कौरदै ऊ आशौ औन्दौ? हाऊं तुमुलै बोलाऊ कि, नाईं बल्कि अलग कौरदै ऊ आशौ औन्दौ। 52कैलैकि इबी कु एकी घौरा दी पांज़ आदमी आपु मांझ़िऐ बिरोध छ़ाड़ाई, चीन दुई आइलै और दुई चिआ आइलै। 53बाब छ़ोहरु आइलै, छ़ोहरु बाबा आइलै बिरोध छ़ाड़ा, मां छ़ोटी आइलै, और छ़ोटी मां आइलै, शाशु बोऊ आइलै और बोऊ शाशु आइलै बिरोध छ़ाड़ाई।”
बौगता रौ लौछ़ण
54यीशुऐ भीड़ा रै लोगु आइलै भी बोलौ, “ज़ैबै तुमै बादल तिदै उड़दै देखा ई ज़ेज़ी भिलै सुरज छ़िपा सा, तैबै तुमै खरकच़ार बोलाई कि पाणी-बागुर लागणै वाल़ौ आ और तिणौ हुआ सा। 55और ज़ेबी सुल़टी भिलै बागुर फिरदै देखा लै ता तुमै फेटी बोलाई कि आबै गौरमी पौड़ा ई तैबै तिणौ हुआ सा। 56ओ कौपटी लोगुओ तुमै धौतरी और सौरगा रै भेद ज़ाणाई पर एज़ै जुगा रै बारै दी भेद कैलै ना ज़ाणदै?”
आपणै बिरोधिऊ आइलै सुलौ
(मत्ती 5:25-26)
57“तुमै आपु ऊ एज़ी बुशु रौ फैसलौ कैलै ना निंदै कि किणौ कौरणौ ठीक आ। 58अगर तुमु कोर्टा लै निंदै औलै लागै औन्दै और बाटा दी तुमुकै तुमारौ बिरोधी मिला लौ ज़ुणिऐ तुमु माथै केस कियौ थौ, तैबै तिऐ आपु मांझ़िऐ सुलौ कौरौ, नाईं ता तुमुलै सौज़ा भी हुई सौका और तुमु कास अधिकारी कै सम्भाल़ा और सेऊ पा तुमु ज़ेला दी। 59अगर इणौ हुई जा लौ, ता तुमै आज़ाद नाईं हुई बौल़दै ज़ेबी झ़ांऊ तुमै एक-एक पाई रौ हिसाब ना दिआ लै।”
Currently Selected:
लुका 12: BFZ-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
