प्रेरित 9

शाऊला रौ मन बौदल़िणौ

1शाऊल ज़ुण इबी झ़ांऊ प्रभु यीशु रै च़ेलेऊ धमकाउंदै और तिऊं झ़ांगणै री कोशिषा दी थौ लागौ औन्दौ, सेऊ परधान याजका काऐ डैऔ, 2और तेसकु दमिश्क इलाकै दी आराधनालय रै नाऊं और तिऊं सताउणै रै हक्‍का री औरज़ी मांगी, ताकी अगर तेसकै तिऐ कुण यीशु पिछ़ु हांडणै वाल़ौ मिला लौ ता सेऊ च़ाऊ छ़ेउड़ी औली च़ाऊ मौरद तिऊं बानिऔ यरुशलेमा दी आणा। 3पर ज़ेबी शाऊल और तेसरै लोग हांडदै-हांडदै दमिश्क इलाकै रै नज़दीक पौउंच़ौ ता एकदम सौरगा कु तेस फिदीआलै तेज़ प्याशौ च़ौमकौ, 4ता सेऊ धौनी माटै माथै पौड़ौ और प्रभु री हाक शुणुई, “ओ शाऊल, ओ शाऊल तू मुं कैलै सतावा ई?” 5शाऊलै पुछ़ौ, “ओ प्रभु तू कुण ई?” तिणीऐ बोलौ, “हाऊं यीशु ऊ, ज़ास तू सतावा ई। 6पर आबै तू उठीयौ इलाकै दी डेऊ, और ज़ो कुछ़ ताऐं कौरणौ आ तेस ताउंकै तिऐ बोलाई कि हाऊं का च़ाहा ऊ।” 7ज़ो आदमी तेस आइलै थै सै हौकै-बौकै खौड़ै रौऐ। कैलैकि तिंउऐ हाक ता शुणी, पर देखौ नाईं कोई। 8शाऊल ज़मीना माथै कु उठौ, पर ज़ेबी तिणीऐ आखी खोली ता तेसकै कुछ़ा ना दिशौ, तैबै तिंउऐ सेऊ हाथा पाकड़ियौ दमिश्क इलाकै दी निऔं। 9तेसकै चिया दिना झ़ांऊ कुछ़ ना दिशौ। ना तिणीऐ कुछ़ खाऔ-पिऔ।

10दमिश्क इलाकै दी हनन्याह नावां रौ एक च़ेलौ थौ, प्रभु यीशुऐ तेसकै दर्शण देइऔ बोलौ, “ओ हनन्याह!” तिणीऐ बोलौ, “ओ प्रभु।” 11तैबै प्रभु यीशुऐ तेसलै बोलौ, “उठीयौ तिऐं गल़ी दी डेऊ ज़ेथलै ‘सिधी’ बोलाई। तिऐ यहुदा रै घौरा दी शाऊल नावां रै बारै दी पूछ़ ज़ो तरसुसा रौ रौइणै वाल़ौ आ। कैलैकि देख, सेऊ प्राथना कौरदै आ लागौ औन्दौ। 12तिणीऐ दर्शण देखौ आ कि, हनन्याह नावां रौ एक आदमी भितरै आशौ और तेस माथै हाथ छ़ाड़ौ, ताकी सेऊ तौंइऐ देखदै लागा।” 13हनन्याहै ज़वाब दैऔ, “ओ प्रभु मुंइऐ एस आदमी रै बारै दी भौरी लोगु कु शुणौ आ, कि इणीऐ यरुशलेमा दी तैरै पवित्र लोगु माथै भौरी ज़ुलम किऐ ई। 14और इदरा लै भी एसकै बौड़ै याजकु कु हक्क आ मिलौ औन्दौ, कि ज़ुण ताऊं माथै विश्वास कौरा आ, तेस बानियौ यरुशलेमा लै निआं।” 15पर प्रभु यीशुऐ तेसलै बोलौ, “तू डेऊ। कैलैकि सेऊ ता मुंइऐ दुजी ज़ातीऊ, राज़ेऊ, और इस्राइली लोगु काऐ मैरौ परचार कौरना लै आ छ़ांटौ औन्दौ। 16और हाऊं तेसलै बोलाऊ कि मेरी ताईं तिणीऐ किणै-किणै दुःख जा ई उठाउणै।” 17तैबै हनन्याह उठौ ओर तेस घौरा दी डैऔ ज़िऐ शाऊल थौ रौ औन्दौ। तिऐ तिणीऐ शाऊला माथै आपणै हाथ छ़ाड़ै और बोलौ, “ओ भाई शाऊल, प्रभु यीशु, ज़ो सेज़ी बाटा दी ताउंकै दिशौ थौ, ज़ेथदी तू आशो ई, तिणीऐ ई हाऊं भेज़ौ ऊ, कि तू देखदै लागा और पवित्र आत्मा कौरीऐ भौरी आ।” 18और फेटी शाऊला री आखी कु छ़िलकै ज़ेई उतरै और सेऊ देखदै लागौ, और उठीयौ तेबी बपतिस्मौ निऔं। 19तैबै रोटी खाइऔ तागत पाई। और सेऊ कई दिना झ़ांऊ तिऊं च़ेलेऊ आइलै रौऔ, ज़ो दमिश्क इलाकै दी रौआ थै।

दमिश्का दी शाऊला रौ परचार

20शाऊल तेबी ई दमिश्क इलाकै रै आराधनालय दी डेइऔ यीशु रौ परचार कौरदै लागौ कि, यीशु ई परमेश्‍वरा रौ छ़ोहरु आ। 21भौरी सारै शुणनै वाल़ै लोग हैरान हुइयौ बोलदै लागै, “का एऊ सेऊ नाईं ज़ुण यरुशलेमा दी यीशु माथै विश्वास कौरणै वाल़ेऊ, झ़ांगा थौ। और इदै भी थौ एथीलै आशौ औन्दौ कि तिऊं बानिऔ बौड़ै याजकु काऐ निआं?” 22पर शाऊल औज़ौ भी ज़ादौ परचार कौरदै लागौ और शक्ति वाल़ौ बौणौ, और एज़ी बुशा रौ सबूत देई-देइयौ कि यीशु ई मसीह आ, दमिश्क इलाकै रै यहुदिऊ रै मूंह बन्द किऐ।

23ज़ैबै भौरी दीन बिती गौऐ, तैबै यहुदी मिलियौ शाऊला झ़ांगणै रै बारै दी चौपड़िंदै लागै। 24पर तिऊंरौ चौपड़िणौ शाऊला कै पौतौ लागौ। कि सै तेस झ़ांगणा लै राच दीन बाटा दी ज़ागदै औआ ई लागै औन्दै। 25पर एकी राचीऐ तेसरै च़ेलेउऐ सेऊ छ़ाबड़ै दी बोशाल़ीऔ रौशेऊ दी लटकाइयौ तेस इलाकै री उंच़ी दवाली बाटीऐ इलाकै कु बाइरै गाड़ौ।

यरुशलेमा दी शाऊल

26यरुशलेमा दी पौउंच़िऔ शाऊलै च़ेलेऊ आइलै मिलणै री कोशिश की। पर सै सारै तेसकु डौरा थै। तिउंकै विश्वास नाईं औआ थौ, कि एऊ भी यीशु रौ च़ेलौ बौणी गौ आ। 27पर बरनबासै सेऊ आपु आइलै च़ेलेऊ काऐ निऔं, और तिउंलै बोलौ कि शाऊलै किणै कौरी बाटा दी प्रभु देखौ और प्रभुऐ एस आइलै बुशै लाई आ। तैबै दमिश्क इलाकै दी किणी हिम्मत्ती कौरीऐ यीशु रै नावां रौ परचार किऔ आ। 28शाऊल तिऊं आइलै यरुशलेमा दी आज़ादी कौरीऐ आशदै-हाण्डदै लागौ। 29और निडर हुइयौ प्रभु रै नावां रौ परचार कौरा थौ। युनानी बोली बोलणै वाल़ै यहुदिऊ आइलै बुशै और वाद-विवाद कौरा थौ। पर सै कौरा थै तेस झ़ांगणै री कोशिश। 30पर ज़ेबी विश्वासी भाईऊ कै पौतौ लागौ, ता तिंउऐ सेऊ कैसरिया इलाकै दी आणौ और तिदरु भेज़ौ तरसुसा गांवा लै।

31तैबै पुरै यहुदा परदेश, गलील परदेश और सामरीया इलाकै री कलिसिया कै च़ैन मिलौ और सै विश्वासा दी बौड़दै लागी। सै विश्वासी लोग प्रभु रै डौरा दी और पवित्र आत्मा हौसलै री वज़ाह कु बौड़दै लागै।

लुद्दा और याफा दी पतरस

32तैबै इणौ हुऔ कि पतरस एकी ज़ागाह कु दुजी ज़ागाह दी हांडियौ परचार कौरदै-कौरदै तिऊं पवित्र लोगु काऐ भी पौउंच़ौ ज़ुण लुद्दा गांवा दी रौआ थै। 33तिऐ पतरसा कै एनियास नावां रौ बिमार आदमी भी मिलौ ज़ेथदी लकवै री बिमारी थी और आठ साला ओउलै बिस्तरै दी थौ पौड़ौ औन्दौ। 34पतरसै तेसलै बोलौ, “ओ एनियास! यीशु मसीह ताऊं च़ांगौ कौरा आ। ‘उठ आपणौ बिस्तरौ चुंगिऔ ठीक कर।’ तैबै सेऊ फेटी खौड़ौ हुऔ। 35लुद्दा गांवा और शारोन गांवा रै भौरी सारै रौइणै वाल़ै लोग तेस देखीयौ प्रभु यीशु माथै विश्वास कियौ।”

36याफा गांवा दी तबीता मतलब दोरकास नावां री एक विश्वासी छ़ेउड़ी रौआ थी। सै भौरी भौलै-भौलै काम कौरा और गरीबु री मज़द कौरा थी। 37सेज़ै बौगता दी ज़ेबी पतरस लुद्दा गांवा दी थौ, विश्वासी छ़ेउड़ी सै बिमार हुई और पोरु मौरी। तिंउऐ सै धोआइऔ माथलै कौमरै छ़ाड़ी।

38लुद्दा गांउ याफा रै नज़दीक थौ च़ेलेउऐ शुणौ कि पतरस तिऐ आ, दुई आदमी छ़ाड़ियौ तेसकु औरज़ की, “कि आमु काऐ आशणा लै बेर नाईं पा।” 39तैबै पतरस उठीयौ तिऊं आइलै च़ाल पौड़ौ, ज़ेबी सेऊ पौउंच़ौ ता तिंउऐ सेऊ तिऐ माथलै कौमरै दी निऔं। तैबै विधवा छ़ेउड़ी लेरीयौ पतरसा काऐ आशीयौ खौड़ी हुई और ज़ो जुड़कै दोरकासै तिऊं आइलै रौइऔ चाणै थै, तिऊं देखाउंदै लागी। 40तैबै पतरसै सारै तिदरु बाइरै गाड़ै, और घुंडै टेकीऔ प्राथना कौरी, और मौड़ै भिलै देखीयौ बोलौ, “ओ तबीता उठ।” तैबै तिंआऐ आपणी आखी खोली। और पतरसा देखीयौ उठीयौ बोशी। 41पतरसै हाथा पाकड़ीऔ सै उठाई, और पवित्र लोग और विधवा छ़ेउड़ीऊ औटाइयौ तिउंकै ज़िउंदी हुइयौ सौंभाल़ी। 42इऐ बूश सारै याफा गांवा दी फौइली गोई। और भौरी लोगुऐ प्रभु यीशु माथै विश्वास किऔ। 43और पतरस याफा गांवा दी च़ामड़ै रै कामा कौरणै वाल़ै शमौना रै घौरा दी भौरी दिना झ़ांऊ रौऔ।

Currently Selected:

प्रेरित 9: BFZ-NT

Highlight

Copy