प्रेरित 10
10
कुरनेलियुसा रौ पतरस औटाउणौ
1कैसरिया इलाकै दी कुरनेलियुस नावां रौ एक आदमी थौ, ज़ुण इतालियानी नावां रै गुटा रौ आफसर थौ। 2सेऊ भौगत थौ और आपणै सारै टौबरा आइलै परमेश्वरा कु डौरा थौ, और गरीब लोगु लै दाण दिआ थौ, और रोज़ परमेश्वरा कु प्राथना कौरा थौ। 3एकी दिनै दुसकै चिजै पैहरै दी एक साफ दर्शण देखौ कि परमेश्वरा रौ एक दूत तेस काऐ भितै आशीयौ तेसलै बोलौ, “ओ कुरनेलियुस।” 4कुरनेलिउसै सेऊ बौड़ै ध्याना कौरी देखौ और डौरीऔ बोलौ, “ओ प्रभु का बोलाई?” दूतै तेसलै बोलौ, “तेरी प्राथना और तैरै दैऔ औन्दौ दाण याद कौरना लै परमेश्वरा काऐ पौउंच़ी गौऐ। 5आबै याफा गांवा दी आदमी भेज़ीयौ, शमौन ज़ासलै पतरस भी बोलाई आपु काऐ औटाऊ। 6सेऊ च़ामड़ै चाणनै वाल़ै शमौना, रै काऐ आ रौ औन्दौ ज़ासरौ घौर समुन्दरा रै डिका काऐ आ।” 7तैबै सेऊ दूत ज़ुणिऐ इऐ बुशै बोली थी तिदरु डैऔ तैबै कुरनेलियुसै आपणै दुई नुकुरु मांझ़िआ कु एक भौगत सिपाई आपु काऐ औटाऔ, 8और तेस काऐ सारी बुशै बोलीयौ सेऊ याफा गांवा लै भेज़ौ।
पतरसा रौ दर्शण
9दुजै दिनै ज़ेबी सै चीन आदमी ज़ो कुरनेलियुसै भेज़ै थै हांडदै-हांडदै इलाकै दी पौउंच़णै वाल़ै थै ता, सेज़ै बौगतै पतरस प्राथना कौरदै छ़ापरा माथै डैऔ। 10तेसकै भूख लागी और सेऊ कुछ़ खाणौ च़ाहा थौ, पर ज़ेबी तिऐ खाणै री त्यारी कौरदै थै लागै औन्दै, ता पतरस बैहोश हुऔ। 11तैबै तिणीऐ देखौ कि सौरग खुली गौ। और एक बौड़ी च़ादर च़ारिया कुणै कु लटकाइयौ धौतरी माथै आशदै लागी ऐन्दी। 12ज़ेथदी धौतरी माथा रै सारै जानवर और किड़ै-मकौड़ै, और च़िड़ु-च़िटकोरु थै। 13तेसकै एक इणी हाक शुणुई कि, “ओ पतरस उठ, झ़ांग और खा।” 14पर पतरसै बोलौ, “नाईं प्रभु बिलकुल नाईं, कैलैकि मुंइऐ इबी झ़ांऊ कोई भी गान्दी और अशुद्ध च़ीज़ नाईं खाई।” 15तैबै दुजी बारै तेसकै हाक शुणुई कि, “ज़ो कुछ़ परमेश्वरै शुद्ध कौरी गौ आ तेसलै तू अशुद्ध नाईं बोल।” 16चिआ बारै इणौ हुऔ। तैबै सै च़ादर तिदरु तेबी सौरगा भिलै वापिस डेई।
17ज़ेबी पतरस आपणै ज़िवा दी एज़ी बुशै सुंच़दै थौ लागौ औन्दौ, कि ज़ो दर्शण मुंइऐ देखौ आ तेसरौ मतलब का औलौ?, ता तेबी सै आदमी ज़ो कुरनेलियुसै थै भेज़ै औन्दै, शमौना रै घौरा लोड़ीयौ दारा काऐ खौड़ै हुऐ, 18और हाका देइऔ पुछ़दै लागै कि, “का शमौन ज़ासलै पतरस बोलाई इदै आ पाउणौ?” 19पतरस ता तेस दर्शणा रै बारै दी थौ सुंच़दै लागौ औन्दौ, तेबी पवित्र आत्मै तेसलै बोलौ, “देख चीन आदमी ताऊं लोड़दै ई लागै औन्दै। 20आबै उठीयौ तौल़ै डेऊ, और निडर हुइयौ तिऊं आइलै डेऊ कैलैकि मुंइऐ ई सै भेज़ै औन्दै।” 21तैबै पतरसै तिऊं काऐ डेइऔ बोलौ, “देखौ ज़ास लोड़दै तुमै लागै औन्दै ई, सेऊ हाऊं ऊ। तुमै कैलै ई आशै औन्दै?” 22तिंउऐ बोलौ, “कुरनेलियुस आफसर ज़ुण धौर्मी और परमेश्वरा कु डौरणै वाल़ौ, और ज़ासरौ सारी यहुदी ज़ाती दी नाऊं आ, तिणीऐ परमेश्वरा रै पवित्र दूता री बुशै शुणी कि तुमु आपणै घौरा कै औटाइयौ तुमु कु परमेश्वरा रै वचन शुणा।” 23तैबै तिणीऐ सै भितरै औटाऐ और तिउंरी सेवा की, दुजै दिनै पतरस तिऊं आइलै च़ाल पौड़ौ, और याफा इलाकै रै कुछ़ विश्वासी भाई भी तेस आइलै डेवे।
कुरनेलियुसा रै घौरा दी पतरस
24दुजै दिना बासिऐ सै कैसरिया इलाकै दी पौउंच़ै, और कुरनेलियुस आपणै रिश्तेदारु, और खानदानी रै लोगु ज़ागदै थौ लागौ औन्दौ। 25ज़ैबै पतरस भितरै आशौ ता, कुरनेलियुस तेसकु मिलौ और तेसरै बांगणै माथै पौड़ीयौ तेसकै ढाल की। 26पर पतरसै सेऊ खौड़ौ चुंगिऔ तेसलै बोलौ, “खौड़ौ ऊ। मुकै झुकियौ ढाल नाईं कर, हाऊं भी ता ताऊं ज़िणी आदमी ऊ।” 27और तेस आइलै बुशै लाइंदै-लाइंदै भितरै डैऔ, और भौरी लोगु कौठै देखीयौ, 28पतरसै तिउंलै बोलौ, “तुमै ज़ाणाई की दुजी ज़ाती दी मिलणौ और तिऊं रै काऐ डेउणौ आमु यहुदिऊ लै बुरौ आ, पर परमेश्वरै मुकै बोलौ आ, कि केज़ै भी आदमी लै गान्दौ या अशुद्ध नाईं बोलु। 29एथीलै हाऊं ज़ेबी तुमुऐ औटाऔ ऊ तेबी ई बिण बोलै आशो ऊ। आबै हाऊं पुछ़ाऊ कि तुमुऐ हाऊं केज़ै कामा लै औटाऔ ऊ?”
30कुरनेलियुसै बोलौ, “एज़ै बौगता दी च़ार दीन पैहलै हाऊं आपणै घौरा दी प्राथना कौरदै थौ लागौ औन्दौ। ता देखौ एक आदमी च़ौमकिलौ जुड़कै भिड़ीयौ, मुकाऐ आशीयौ खौड़ौ हुऔ 31और बोलदै लागौ कि, ‘ओ कुरनेलियुस तेरी प्राथना शुणी गोई आ, और तेरी भेंट परमेश्वरा काऐ याद किऐ ई। 32एथीलै याफा इलाकै दी कुछ़ आदमी भेज़ीयौ शमौन ज़ासलै पतरस बोलाई ओरु औटाऊ। सेऊ समुन्दरा रै डिका काऐ शमौना रै घौरा दी आ रौऔ औन्दौ, ज़ुण च़ामड़ै रौ काम कौरा आ, सेऊ तुमुकै परमेश्वरा री तौरफा कु खौबर शुणावा आ।’ 33तैबै मुंइऐ तेबी ई ताऊं काऐ आदमी भेज़ै ई और ताऐं आच़्छ़ौ किऔ कि तू आशो ई। आबै आमै सारै इदै परमेश्वरा काऐ ई, ज़ो कुछ़ परमेश्वरै ताउंकै बोलौ आ तेस शुणु।”
पतरसा री शिक्षा
34तैबै पतरसै बोलौ, “आबै मुकै पौतौ लागी गौ आ कि परमेश्वर कासी भी ऊंच़-नीच़ नाईं मानदौ। 35बल्कि हर ज़ाती कु ज़ुण आदमी परमेश्वरा कु डौरा और भौलै काम कौरा, सेऊ तेसकै आच़्छ़ौ लागा। 36ज़ेज़ौ वचन परमेश्वरै इस्राइलिऊ कै दैऔ आ, ज़ेबी तिणीऐ यीशु मसीह रै ज़ौरिऐ (ज़ुण सारेऊ रौ प्रभु आ) शान्ति री खौबर शुणाई, 37सेज़ौ वचन तुमै ज़ाणाई, ज़ो यहुन्ना बपतिस्मौ रै परचारा बासिऐ गलील परदेशा कु शुरु हुइयौ यहुदिया परदेशा री भौरी ज़ागाह दी फैअली गौ आ। 38परमेश्वरै किणै कौरीऐ यीशु मसीह रौ पवित्र आत्मा और शक्ति कौरीऐ अभिषेक कियौ आ। सेऊ भौलाई कौरा थौ और भौरी बिमार लोगु शैताना रै हाथा कु बौच़ावा थौ, कैलैकि परमेश्वर तेस आइलै थौ। 39आमै तिऊं सारै कामा रै शाजत ई। ज़ो यीशुऐ यहुदिया रै परदेश और सारै यरुशलेम शहरा दी किऐ ई, पर यहुदी मुख्येउऐ सेऊ क्रुसा माथै टांगीऔ पोरु झ़ांगौ आ। 40पर सेऊ परमेश्वरै चिजै दिनै ज़िउंदौ किऔ, और पौगड़ौ भी किऔ आ। 41सारेऊ लोगुऐ सेऊ नाईं देखौ बल्कि तिऊं मांझ़िऐ ज़ुण परमेश्वरै पैहलै कु थै छ़ांटै औन्दै, मतलब आमु मांझ़िऐ ज़ुणिऐ तेसरै ज़िउंदै हुणै बासिऐ तेस आइलै रोटी खाई-पीई आ। 42और तिणीऐ आमुलै हुकम दैऔ कि सारै लोगु लै परचार कौरौ और गवाही दैऔ, कि यीशु ई सेऊ आ ज़ो परमेश्वरै मौरै औन्दै और ज़िउंदै ऊ रौ फैसलै कौरणै वाल़ौ चाणौ आ। 43तेसरी गवाही सारै पुराणै भविष्यवक्ता दिआई, कि ज़ुण भी तेस माथै विश्वास कौरालौ तेसलै यीशु रै नावां कौरी पापा री माफी मिला आ।”
दुजी ज़ाती माथै पवित्र आत्मा उतुरणौ
44पतरस इणी बुशै बोलदै थौ लागौ औन्दौ कि पवित्र आत्मा सारै वचन शुणनै वाल़ेऊ माथै आशौ। 45और ज़ेती यहुदी विश्वासी लोग पतरसा आइलै थै आशै औन्दै सै सारै हैरान हुऐ कि दुजी ज़ाती रै लोगु माथै भी पवित्र आत्मा रौ दाण मिली गौ आ। 46कैलैकि तिंउऐ सै ओरी-ओरी बोली बोलदै और परमेश्वरा री बौड़ाई कौरदै शुणै। 47एथ माथै पतरसै बोलौ, “का कुण पाणी रोकी सौका आ कि तिउंलै बपतिस्मौ ना मिला ज़ासकै आमु ज़िणौ परमेश्वरा कु पवित्र आत्मा मिलौ आ?” 48और पतरसै हुकम दैऔ कि तुमै यीशु मसीह रै नावां कौरी बपतिस्मौ निऔं। तैबै तिंउऐ तेसकु औरज़ कौरी कि आमु आइलै कुछ़ दिना झ़ांऊ औज़ौ रौऊ।
Currently Selected:
प्रेरित 10: BFZ-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.