प्रेरित 2

पवित्र आत्मा रौ उतुरणौ

1ज़ेबी यहुदी लोगु रौ पिन्तेकुस्त साज़ै रौ दीन आशौ, ता सै सारै एकी ज़ागाह दी कौट्ठै थै। 2एकदम सौरगा कु तेज़ बागुरा ज़िणौ च़गराअ हुऔ, और तेथ कौरी सारौ घौर ज़िऐ सै बोशै औन्दै थै, हिली गौ। 3और तिउंकै आगी री लपटै दिशी ज़िभा बाशीऐ और सै तिऊं मांझ़िऐ सारेऊ माथै बौसी। 4सै सारै पवित्र आत्मा कौरी भौरुऐ, और ज़िणौ पवित्र आत्मै तिउंकै बोलणै री शक्ति देई, सै अलग-अलग बोली बोलदै लागै।

5और तेबी तिऐ रै परमेश्‍वरा कु डौरणै वाल़ै भौरी थै ज़ुण सण्सारा रै हर देशा कु आशीयौ तेस साज़ै मनाउणा लै यरुशलेम शहरा दी रौआ थै। 6ज़ेबी इऐ बागुरा ज़िणौ च़ौगराव हुऔ ता भीड़ कौठै हुई गोई और लोग घबराई गौऐ, कैलैकि हरेक आदमी कै शुणींया थौ कि इऐ मेरी ई बोली दी बोलदै लागै औन्दै। 7सै सारै हैरान हुऐ और हैरानी कौरी बोलदै लागै, “देखौ, इऐ ज़ो बोलदै ई लागै औन्दै का इऐ सब गलीला रै नाईं? 8तैबै कैलै शुणींया आमुकै आपणी-आपणी ज़नमभुमी री बोली? 9आमै ज़ो पारथी, मेदी, एलानी और मेसोपोटामिया, यहुदिया, कप्पदूकिया, पुनतुस और आसिया, 10और फ्रूगिया पंफूलिया, मिस्र और लीबिया देश ज़ो कुरेना रै आस-पास ई, इऊं सभी देशा रै रौइणै वाल़ै और रोमी वासी, 11यहुदी और यहुदी ज़ाती मानणै वाल़ै, क्रेती और अरबी रै भौरी लोग भी ई, पर आपणी-आपणी बोली दी तिऊंकु परमेश्‍वरा रै बौड़ै-बौड़ै कामा री बुशै शुणी ई।” 12सै सारै हैरान हुऐ और घबराइयौ एकी दुजै कु बोलदै लागै, “इयौ का हुंदै लागौ औन्दौ?” 13पर ओरीउऐ मज़ाक कौरीयौ बोलौ, “इऐ ता नौईं सुरी रै नौशै दी मगन ई।”

पतरसा रौ भाषण

14तैबै पतरस तिऊं ग्याराह आइलै खौड़ौ हुऔ और हाकै मारीयौ बोलदै लागौ, “ओ यहुदिया और यरुशलेम शहरा रै सारै रौइणै वाल़ेउओ, इणौ ज़ाणौ। और कौन्थु लाइयौ मेरी बुशै शुणौ। 15ज़िणौ कि तुमै सौमुझ़देई लागै औन्दै, इऐ लोग नौशै दी नाईं ई, कैलैकि इबी ता दोतकौ बौगत आ। 16पर इऐ सेज़ी बूश आ, ज़ो योएल भविष्यवक्तुऐ बोली थी, 17परमेश्‍वर बोला आ, कि ‘आखरी दिना दी इणौ हुणौ कि हाऊं आपणी आत्मा सारै लोगु कै दिआऊ और तुमारै छ़ोहरु और छ़ोटुड़ी भविष्यवाणी कौरा ई, और तुमारै ज़वान देखा ई दर्शण, और तुमारै स्याणै देखा ई सुइणै।’ 18बल्कि हाऊं आपणै नुकुर और आपणी नुकराणी माथै भी, सेज़ै दीनु दी आपणी आत्मा मांझ़िऐ कु आत्मा दिआऊ, और सै भविष्यवाणी कौरा ई। 19और हाऊं माथै सौरगा दी नोखै काम और धौतरी माथै निशाण, मतलब लोऊ, आग और धुंऐ रै बादल़ देखाउआ ऊ। 20प्रभु रै फैसलै वाल़ै दिना रै आशणै कु पैहलै सुरज न्यारौ और ज़ून लोऊ। ज़िणी हुणी आ। 21और ज़ुण कुण प्रभु रौ नाऊं निंआ लौ सेऊ छ़ुटकारौ पा आ।”

22“ओ इस्राइली लोगुओ, इऊं बुशै शुणौ, यीशु नासरी एक आदमी थौ। ज़ासरौ परमेश्‍वरा री तौरफा कु हुणै रौ सबूत तिऊं शक्ति वाल़ै काम, हैरानी वाल़ै कामा और निशाणा कु पौगड़ौ ई। 23सेज़ौ यीशु ज़ुण परमेश्‍वरा री मौरज़ी और पुराणै ज्ञाना कौरीऐ पाकड़ुऔ। तुमुऐ बुरै लोगु रै हाथा कौरी क्रुसा माथै च़ौड़ाइयौ पोरु झ़ांगौ। 24पर सेऊ परमेश्‍वरै मौउता रै बन्धना कु छ़ुड़ाइयौ ज़िउंदौ कियौ। कैलैकि एऊ हुणौ मुश्कल़ थौ कि सेऊ तेथरै वंशा दी रौआ। 25कैलैकि दाऊद यीशु मसीहा रै बारै दी बोला कि, ‘हाऊं प्रभु रोज़ आपु काऐ थाका थौ देखदै लागी कैलैकि सेऊ मुं आइलै आ, ताकी हाऊं लोटु नाईं।’ 26एथीलै मैरौ मन खुश हुऔ, और मेरी ज़ीभ मगन हुई। बल्कि मैरौ शरीर भी आशी दी रौआ। 27कैलैकि तू मैरै प्राण पौइताल़ा दी नाईं छ़ाड़दौ। और ना आपणौ पवित्र ज़ौणै रौ मौड़ौ शौड़णै दैंदौ। 28ताऐं मुकै ज़िन्दगी री बाट देखाल़ी आ। तू मुं दर्शण देखाल़ीऔ खुशी कौरी भौराई।”

29“ओ भाईउओ, हाऊं आमारै स्याणै दाऊदा रै बारै दी तुमुकै हिम्मत्ती कौरीऐ बोली सौका ऊ कि सेऊ ता मौरी गौ और दबाऔ भी आ और तेसरी कब्र आज़ झ़ांऊ इदै आमु मांझ़िऐ ज़िउंदमान आ। 30सेऊ भविष्यवक्ता थौ, सेऊ ज़ाणा थौ कि परमेश्‍वरै मुं आइलै कसम खाइयौ वायदौ कियौ आ कि हाऊं तैरै वंशा कु एक आदमी तेरी राज़गादी माथै बोशाल़ा ऊ। 31तिणीऐ भविष्यवाणी कौरीयौ पैहलै कु देखीयौ मसीहा रै ज़िउंदै हुणै रै बारै दी भविष्यवाणी की, कि ना ता तेसरै प्राण अधोलोका दी छ़ाड़ै और ना तेसरौ शरीर शौड़ौ। 32एज़ौ यीशु परमेश्‍वरै ज़िउंदौ कियौ, ज़ेथरै आमै सारै शाजत ई। 33इणै कौरी परमेश्‍वरा रै सुल़टै हाथा कु सारेऊ कु आच़्छ़ौ इनाम पाइयौ, और बाबा कु सै पवित्र आत्मा पाइयौ ज़ेथरौ परमेश्‍वरै वायदौ कियौ थौ, तिणीऐ सेऊ देई गौ ज़ो आज़ तुमै देखा और शुणाई। 34कैलैकि दाऊद ता सौरगा दी नाईं च़ौड़ौ। पर सेऊ आपु बोला आ, ‘प्रभु परमेश्‍वरै मैरै प्रभु कै बोलौ, मेरी सुल़टी भिलै बोश, 35ज़ेबी झ़ांऊ हाऊं तैरै दुश्मनु तैरै सामनै धौनी ना कौरुलै।’ ”

36और आबै इस्राइला रै सारै लोगु कै पौतौ लागा लौ कि परमेश्‍वरै एज़ौ यीशु ज़ेज़ौ यीशु तुमुऐ क्रुसा माथै च़ड़ाऔ, “प्रभु भी और मसीहा भी चाणौ।”

37तैबै एज़ी बूश शुणनै वाल़ै लोगु रै ज़िवा दी च़ुबी गोई, तैबै सै पतरस और ओरी च़ेलेऊ कु पुछ़दै लागै, “ओ भाईओ, आमै का कौरुलै?” 38पतरसै तिउंलै बोलौ, “मन बौदल़ौ, और तुमु मांझ़िया कु हरेक आपणै-आपणै पापा री माफी पाइणा लै यीशु मसीह रै नावां दी बपतिस्मौ निऔं, तैबै तुमै पवित्र आत्मा रौ दाण पा ई। 39कैलैकि एऊ वायदौ तुमु, तुमारी सन्ताना, और तिऊं सारै दूर-दुरा रै लोगु लै भी आ ज़ास प्रभु आमारौ परमेश्‍वर आपु काऐ औटावा।” 40पतरसै भौरी ओर बुशु कौरी भी गवाही देई-देइयौ सौमझ़ाऔ कि तुमै आपु इऊं दारखी ज़ाती कु बौच़ौ। 41ज़ुणी लोगुऐ भी पतरसा रै वचन शुणियौ अपणाऐ तिंउऐ बपतिस्मौ निऔं। और सेज़ै दिनै चीन हज़ार लोगु रै लगभग तिऊं विश्वासिऊ आइलै मिली गौऐ। 42और सै सारै प्रेरितु कु शिक्षा पाइणा लै, खुम्बल़ी छ़ाड़ना लै, रोटी चोड़दै, और प्राथना कौरणै दी मगन हुई गौऐ।

विश्वासिऊ री संगती

43यरुशलेमा रै सारै लोग घौबरा ई गौऐ, और भौरी नोखै काम और निशाण प्रेरितु कौरी पौगड़ौ हुआ थै। 44सारै विश्वासी कौठै रौआ थै, और तिउंरी सारी च़िज़ै साज़ै री हुआ थी। 45सै आपणी-आपणी ज़यदाद और समाना बेच़ी-बेच़ीयौ ज़िणी ज़ासकै ज़ुरत हुआ थी बांटीऔ कौरा थै। 46सै रोज़ एक मन हुइयौ परमेश्‍वरा रै घौरा दी कौठै हुआ थै, घौरा-घौरा कै रोटी चोड़ीऔ खुशी कौरीऐ निउलै हुइयौ रोटी खा थै, 47और परमेश्‍वरा री बड़ाई कौरा थै, सारै लोग तिऊंकु खुश थै: और ज़ुण छ़ुटकारौ पा थौ, तिऊं प्रभु रोज़ तिऊं मांझ़िऐ मिलावा थौ।

Currently Selected:

प्रेरित 2: BFZ-NT

Highlight

Copy