Luka 6:27-49

“Namue andû arîa mûnthikîrîrîtie nîramwîra atîrî: Endagani nthû cienyu. Nao andû arîa mamûmenete mekageni waro. Arîa mamwimagîra irî, metagîrieni kîrathimo kuuma kûrî Ngai, na mûvoyagîre arîa mamwîkaga naaî. Mûndû angîgûcamûra rûvî rûthîa rwa mwena ûmwe, mûvûgûrîre wana rûu rwîngî arûcamûre. Na mûndû angîgûcuna îgooti rîaku, mwîtîkîrie oce nginya cati yaku. Mûndû wa wonthe angîkûvoya kîndû mûve, na mûndû wa wonthe angîgûcuna kîndû gîaku, ndûkamwîtie. Îkaga andû arîa engî wata ûrîa ûngîenda o magwîke.” “Mûngîrathimwa atîa, angîthîrwa mûkendaga tu wa andû arîa mamwendete? Wana nginya evia nîmendaga andû arîa mamendete! Kûngîtuîka atî andû arîa mamwîkaga waro nwao mûgeekaga waro, mûngîrathimwa atîa? Wana nginya evia nîmekaga wa guo! Na kûngîtuîka atî andû arîa mamûrîvaga nwao mûgaakombithagia, mûngîrathimwa atîa? Wana nginya evia nîmakombithagia evia arîa engî nîguo makaarîva na kîthimi wata kîu! Vandû va ûguo, endagani nthû cienyu na mûciîkage waro na mûkombithanagie mûtakûgîa na mwîvoko wa gûkaarîvwa. Namue nîmûkaagîa na îgai rînene na mûtuîke ciana cia Ngai ûrîa ûrî Îgûrû Mûno. Nîûndû Ngai arî ntha kûrî andû arîa matarî ngatho na arîa methagîrwa marî na mîtugo mîcûku. Kwoguo îgucanagîrani ntha wata ûrîa îthe wenyu amwîgucagîra ntha. “Mûtigatucanîre ciira, na wanamue mûtigaatuîrwa. Mûtigekûûe andû arîa engî na wanamue mûtigeekûûîrwa. Ovanagîrani na wanamue nî mûkooverwa. Vecanagani namue nîmûkaavewa iveo nî Ngai, mwîcûrîrîtue, igakindîrwa, ikainainua na ikathûmbwa. Nîûndû kîthimi kîrîa mûthimanagîra nakîo nîkîo Ngai akaamûthimîra nakîo.” Nake Jesû nîwacokire akîva arutwa ake ngerekano akîmeera atîrî, “Angwa ngaûria! Mûtumumu nwa onie mûtumumu ûrîa wîngî njîra? Na kinthî wa oîrî tîkwa mangîvarûka îrimarî? Gûtirî mûrutwa ûngîneneva gûkîra mwarimû wake, nwatî mûrutwa wa wonthe angîthomithua viû atuîkaga ta mwarimû wake. “Nîndûî gîtûmaga wone kîvuti kîrîa kîrî riithorî rîa mûrûanyûkwe, nwatî ûkaremwa nî kwona gîting'û kîrîa kîrî riithorî rîaku? Ûngîvota kwîra mûrûanyûkwe atî nîûkûmûruta kîvuti kîrîa kîrî riithorî rîake atîa, wa rîrîa we ûtangîvota kwona gîting'û kîrîa kîrî riithorî rîaku? We mvinga îno! Amba ûrute gîting'û kîrîa kîrî riithorî rîaku, nîguo ûvote kwona waro ûkîruta kîvuti kîrîa kîrî riithorî rîa mûrûanyûkwe! “Gûtirî mûtî mwaro ûngîciara maciaro macûku kana mûtî mûcûku ûciare maciaro maro. Wa mûtî ûmenyekaga na maciaro ma guo. Nîûndû ngûyû ititucagwa mîtîrî ya mîgua kana thavibu ituuwe kaiavarî. Mûndû mwaro aragia maûndû maro marîa maumîte ngororî yake. Nake mûndû mûcûku aragia maûndû macûku marîa maumîte ngororî yake. Mûndû aragia maûndû marîa mecûrîte ngororî yake. “Nîndûî gîtûmaga mûmbîte, ‘Mwathani, Mwathani,’ na mûtiîkaga maûndû marîa nîmwîraga mwîke? Mûndû wa wonthe ûkaga kûrî nie, akegua ciugo ciakwa na agaciathîkîra, nîngûmwonia ûrîa ke ekariî. Ekariî ta mûtumi wa nyomba ûrîa wambire kwînja mûcingi mûrikîru na akîûthondeka rûciararî. Vîndî îrîa rûnjî rwaunire manjî maruo nîmaaringire nyomba îo na vinya, nwatî matiaminainia nîûndû yarî ndume waro. Nwatî mûndû wa wonthe ûrîa wîgucaga ciugo ciakwa na akarega gûciathîkîra ekariî ta mûndû ûrîa watumire nyomba atambîte kûthondeka mûcingi. Vîndî îrîa rûnjî rwaunire na manjî maruo makîringa nyomba îo na vinya, nyomba îo nîyomomokire wa rîmwe. Nyomba îo nîyomomokire na vinya îkîvaragana.”