Joh 16

1“Namwîra maûndû mama nîguo mûtigatiganîrie wîtîkio wenyu. 2Mue nîmûkaarutûrûrwa mavoerorî. Nako kavinda nîgagaakinya karîa mûndû wa wonthe ûrîa ûkûmûraga ageeciria atî agîka ûguo nî Ngai aratungatîra. 3Andû nîmakaamwîka maûndû mama nîûndû matiîcî Vava na matimbicî. 4Nwatî namwîra maûndû mama nîguo îvinda rîakinya rîa maûndû mama gwîkîka, mûkaaririkana atî nînamwîrîte ûvoro ûmegiî.

Wîra wa Roho Mûtheru

“Nie ndiamwîra maûndû mama kuuma Kîammbîrîria nîûndû nîrethagîrwa nîrî vamwe namue. 5Nwatî rîu nîngûcoka kûrî ûrîa wandûmire na gûtirî mûndû wana ûmwe gatagatîrî kenyu ûrambûria kûrîa nîrathiî. 6Na rîu ngoro cienyu nîmbîcûre nî kîeva nîûndû nînamwîra maûndû mama. 7Nwatî nîramwîra na ma atî: nie nathiî nîmûkûgîa umithio nîûndû nîngîrega kûthiî mûtigaatûmîrwa Mûtethia. Nwatî nathiî nîngaamûtûma kûrî mue. 8Rîrîa agaaûka nîakoonia andû a gûkû nthî ûrîa mavîtîtie îgûrû rîa maûndû megiî wîvia, ûthingu na ûvoro wîgiî gûtuîrwa ciira. 9Mavîtîtie ûvororî wîgiî mevia nîûndû matimbîtîkîtie; 10nîmavîtîtie ûvororî wîgiî ûthingu nîûndû nîngûthiî kûrî Vava na mûtigûcoka kûmona. 11Mavîtîtie ûvororî wîgiî gûtuîra ciira nîûndû mûnene wa gûkû nthî nîarîkîtie gûtuîrwa.

12“Nîrî na maûndû mengî meengî ma kûmwîra, nwatî rîu mûtingîvota kûmaûmîrîria. 13Rîrîa Roho ûrîa wonanagia ûvoro wa ma wa Ngai agaaûka, nîakaamûtongoria maûndûrî monthe ma ma. Ke ndakaaria maûndû na wathani, nwatî akaaria marîa egucaga na amwîre ûvoro wîgiî maûndû marîa magaaûka. 14Ke nîakaangoocithia, nîûndû nîagooca maûndû marîa mbarîtie na amwîre mo. 15Kîrîa kîonthe Vava arî nakîo nî gîakwa. Na kîu nîkîo gîatûma mbuga atî Roho nîagooca maûndû marîa mbugîte na amwîre mo.

Kîeva na gîkeno

16“Vandû va kavinda kanini mûtigûcoka kûmona, nwatî vuva wa kavinda kanini mûkaamona.”

17Arutwa amwe ake nîmaambîrîrie kûrania atîrî, “Rîu nîkwa aratwîra atîa? Atî aratwîra vandû va kavinda kanini tûtigûcoka kûmwona, nwatî vuva wa kavinda kanini tûkaamwona. Wana rîngî akauga atî, tûtigûcoka kûmwona nîûndû nîarathiî kûrî Îthe. 18Rîrîa Jesû auga ‘Kavinda kanini’ nîendaga kuga atîa? Tue tûtiîcî ûrîa akwendaga kuga.”

19Jesû nîwamenyaga atî arutwa nîmeendaga kûmûria ûvoro wîgiî ûndû ûcio. Kwoguo nîwamerire atîrî, “Angwa nîkwa mûraûrania ûrîa ngwendaga kuga rîrîa namwîra atî, ‘Vandû va kavinda kanini mûtigûcoka kûmona, nwatî vuva wa kavinda kanini mûkaamona?’ 20Nie nîramwîra na ma atî: nîmûkaarîra mûrî na kîeva kîîngî mûno ngororî cienyu, nwatî andû a gûkû nthî nîmagaakena. Nîmûkaagîa na kîeva, nwatî kîeva kîenyu nîgîgaacoka gîtuîke gîkeno. 21Rîrîa mûndûmûka ageerie kûgîa na mwana nîagîcaga na kîeva nîûndû îvinda rîake rîa kwîgua ûrûrû nîrîkinyu, nwatî agîa na mwana nîakenaga na akariganagîrûa nî ûrûrû nîûndû mwana nî mûciare gûkû nthî. 22Kwoguo mue rîu mûrî na kîeva, nwatî nîngaamwona rîngî na vîndî îo nîmûkaagîa na gîkeno, gîkeno kîrîa gûtarî mûndû ûngîmûcuna.

23“Rîrîa mûthenya ûcio ûgaakinya mûtikaambûria wanarî atîa. Nie nîramwîra na ma atî, Vava nîakaamûva kîndû wa kîonthe kîrîa mûkaamûvoya na rîîtwa rîakwa. 24Nginya rîu gûtirî ûndû mwanavoya na rîîtwa rîakwa. Voyani namue nîmûkûvewa na mûcoke mûgîe na gîkeno gîkî gîcûru.

Nîmûvootu nthî

25“Namwîra maûndû mama monthe na ngerekano. Nwatî kavinda nîgagaakinya rîrîa ndakaamwîra maûndû na ngerekano, nwatî ngaamwîra cararûkû ûvoro wîgiî Vava. 26Rîrîa mûthenya ûcio ûgaakinya, nîmûkaamûvoya na rîîtwa rîakwa. Nie ndiramwîra atî nîngaamûvoera kûrî Vava. 27Vava ke mwene nîamwendete. Amwendete nîûndû nîmûmendete na nîmwîtîkîtie atî naumire kûrî Ngai. 28Nie naumire kûrî Vava na ngîûka gûkû nthî na rîu nînguuma gûkû nthî njoke kûrî Vava.”

29Nao arutwa ake nîmaamwîrire atîrî, “Aia, rîu watwîra maûndû cararûkû ûtagûtûmîra ngerekano. 30Rîu nîtwamenya atî we nîwîcî maûndû monthe. We nîûvotaga gûcokeria mûndû kîûria wana mbere ya akûrie. Ûndû ûyû nîguo ûratûma twîtîkie atî we waumire kûrî Ngai.”

31Nake Jesû nîwamacokerie atîrî, “Kwoguo rîu nîmwetîkia? 32Kavinda nîgagûkinya, na rîu nîgakinyu, kavinda karîa muonthe mûkaanyagarûkana wa mûndû enûke gwake mûciî na mûndige nîrî nienga. Nwatî ndirî nienga nîûndû Vava arî vamwe nanie. 33Namwîra maûndû mama nîguo mûgîe na thayû mûrî na ngwatanîro nanie. Nîmûkûthînîka mûrî gûkû nthî, nwatî ûmîrîriani! Nie nîrîmûvootu nthî!”

Currently Selected:

Joh 16: KKB

Highlight

Copy