Mat 25

Ngelekany'o ya Eĩtu Ĩkũmi

1 # Lk 12.35 “Ũsumbĩ wa ĩtu ũkeethĩwa ũtonya kũvw'ananw'a na eĩtu ĩkũmi, ala moosie mataa moo na maumaala mathi kũthaũa mũtwaani. 2Atano moo maĩ atumamu na ala angĩ atano maĩ oĩ. 3Ala atumanu makuie taa syoo, ĩndĩ malea kũkua mauta ma taa ma kwongela; 4ĩndĩ ala oĩ nĩmakuie mauta ma taa me sũvanĩ, o vamwe na kũkua taa syoo. 5Mũtwaani nĩwatindie mũno atoka, na kwoou eĩtu asu onthe mambĩĩa kwombosya na makoma.

6“Ũtukũ katĩ mũndũ ũmwe nĩwaneenie na wasya mũnene asya atĩĩ, ‘Aaya! Mũtwaani yu nĩwũkĩte, umaalai mũmũthaũe.’ 7Ala eĩtu me ĩkũmi nĩmaamũkie na mambĩĩa kũseũvya taa syoo. 8Nĩvo ĩndĩ ala atumanu meeie ala oĩ atĩĩ, ‘Tũolelei mauta, nũndũ taa sitũ ikilĩlye kũvoa.’ 9Ĩndĩ eĩtu ala oĩ mamasũngĩa mamea atĩĩ, ‘Aiee! Mauta ala twĩ namo maitwĩanĩa ithyĩ vamwe nenyu. Kavaa mũthi ndukanĩ mũkethooee menyu.’

10“Yĩla maumaalile mathi kũthooa mauta, mũtwaani nĩwavikie, na eĩtu ala meeyũmbanĩtye malika vamwe nake mbokanĩ ya mũtwaano na mũomo wavingwa. 11#Lk 13.25 Ĩtina, eĩtu ala angĩ nĩmasyokie na mambĩĩa kwĩtana, ‘Mwĩai, mwĩai! Tũvingũĩe!’ 12Ĩndĩ mũtwaani amasũngĩa amea atĩĩ, ‘Aiee, nyie ndimwĩsĩ ninyw'ĩ aaũ!’ ”

13Nĩvo ĩndĩ Yesũ waminũkĩlĩĩlye na kwasya atĩĩ, “Ĩkalai ĩndĩ mwĩyũmbanĩtye, nũndũ mũyĩsĩ mũthenya kana saa ũla Mwana wa Mũndũ wĩũka.

Ngelekany'o ya Athũkũmi Atatũ ala Manengiwe Talendi Matandĩthye

(Lk 19.11-27)

14 # Lk 19.11-27 “Ũsumbĩ wa ĩtu ũkeethĩwa ũtonya kũvw'ananw'a na mũndũ ũmwe ũla wavangie kũthi kyalo nthĩ ĩngĩ. Nĩweetie athũkũmi make na amanenga kũũngamĩa syĩndũ syake. 15Nĩwamaaĩie mbesa kwĩanana na ũndũ kĩla ũmwe waĩ atonya kũithũkũmĩthya. Nĩwanengie ũmwe mbesa sya talendi#25.15 talendi: Sisya ũelesyo ũla wĩ 18.24 itano, na ũngĩ sya talendi ilĩ na ũla ũngĩ sya talendi ĩmwe. Amina kũmanenga nĩwaendie kyalo. 16O kwa mĩtũkĩ, mũthũkũmi ũla wanengiwe mbesa sya talendi itano nĩwaendie ambĩĩa kũitandĩthya, na akwata talendi ingĩ itano. 17O ta ũu, nake ũla wanengiwe ilĩ nĩwatandĩthisye akwata ingĩ ilĩ. 18Ĩndĩ mũthũkũmi ũla wanengiwe talendi ĩmwe aendie enza ĩima nthĩ, na avitha mbesa sya mũnene wake vo.

19“Ĩtina wa ĩvinda ĩasa, mũnene wa athũkũmi asu nĩwasyokie mũsyĩ, na enda kũmanya ũndũ kĩla mũthũkũmi weekanie na mbesa ila wamũnengete. 20Mũthũkũmi ũla wanengetwe mbesa sya talendi itano nĩwaietanĩisye na talendi ingĩ itano. Nĩwamwĩie mũnene wake atĩĩ, ‘Mũnene, wanengie mbesa sya talendi itano, nakwa nĩnitandĩthĩtye ngakwata ingĩ itano.’ 21Mũnene wake amwĩa atĩĩ, ‘Nĩwĩkĩte nesa mũno, we mũthũkũmi mũseo na wa kwĩkwatw'a. Ũneethĩiwe wĩ wa kwĩkwatw'a ũndũnĩ mũnini; yu nĩkũnenga kũũngamĩa maũndũ manene. Lika mbokanĩ ũtane vamwe nakwa!’ 22O ta ũu, mũthũkũmi ũla wanengetwe mbesa sya talendi ilĩ nĩwookie amwĩa mũnene wake atĩĩ, ‘Mũnene, wanengie mbesa sya talendi ilĩ, nakwa nĩnitandĩthĩtye ngakwata ingĩ ilĩ!’ 23Mũnene wake amwĩa atĩĩ, ‘Nĩwĩkĩte nesa mũno, we mũthũkũmi mũseo na wa kwĩkwatw'a. Ũneethĩiwe wĩ wa kwĩkwatw'a ũndũnĩ mũnini; yu nĩkũnenga kũũngamĩa maũndũ manene. Lika mbokanĩ ũtane vamwe nakwa!’

24“Mũthũkũmi ũla wanengetwe mbesa sya talendi ĩmwe nake nĩwookie na asya atĩĩ, ‘Mũnene, we nĩnĩsĩ kana wĩ mũndũ mwetu mũno; ũkethaa vala ũtaavanda na ũyũmbany'a ngetha vala ũtaavuĩa mbeũ. 25Nyie nĩnakĩie, na kwoou nathi nenzĩa mbesa syaku nthĩ; kwa sisya, mbesa ila wanengie nii’ 26Nĩvo ĩndĩ nake mũnene wake wamwĩie atĩĩ, ‘We wĩ mũthũkũmi mũthũku mũno na mũtulu! Kwoou nĩwĩsĩ kana ngethaa vala ndaavanda na kũmbany'a ngetha vala ndaavuĩa mbeũ? 27Waaĩlĩte kwĩthĩwa watwaie mbesa syakwa vengi, na nĩthĩwa nĩnasyosie nasyoka syĩ na ũsyao.’ 28Nĩvo ĩndĩ mũnene ũsu waisye atĩĩ, ‘Mũvenei mbesa isu mũnenge mũthũkũmi ũla wĩ na talendi ĩkũmi. 29#Mat 13.12; Mk 4.25; Lk 8.18 Mũndũ ũla wĩ na kĩndũ akongeleelwa ingĩ mbingĩ na akaingĩvĩw'a mũno, ĩndĩ mũndũ ũla ũte kĩndũ, o na kala kanini ũkethĩwa e nako akavenwa. 30#Mat 8.12; 22.13; Lk 13.28 Na nũndũ mũthũkũmi ũũ nĩ wa mana vyũ, mũkwatei mũmwĩkye nza kĩvindunĩ, vala andũ makaĩa na kũvevetany'a maeo.’

Ũsilĩlo Mũthenyanĩ wa Mũminũkĩlyo

31 # Mat 16.27; 19.28 “Yĩla Mwana wa Mũndũ ũkoka e mũsumbĩ na e na alaĩka onthe, nĩvo ĩndĩ ũkekalĩla kĩvĩla kyake kya kĩ-ũsumbĩ, 32na andũ ma mbaĩ syonthe makaetwe mbee wake. Vau akamavathany'a ikundi ilĩ o tondũ mũĩthi ũvathanasya mbũi na malondu. 33Akaia andũ ala aseo ngalĩko ya kw'oko kwake kwa aũme, na ala athũku ngalĩko ya kw'oko kwake kwa aka.

34“Nĩvo ĩndĩ mũsumbĩ ũkamea andũ ala me ngalĩko ya kw'oko kwake kwa aume atĩĩ, ‘Ũkai inyw'ĩ mũathimĩtwe nĩ Asa wakwa! Osai ũtiĩwa wenyu, ũsumbĩ ũla mwaseũvĩw'e kuma mwambĩlĩĩlyonĩ wa nthĩ. 35Nũndũ naĩ na nzaa, na mwambĩkĩa lĩu; naĩ na waũni, na mwambĩkĩa kĩw'ũ kya kũnyw'a; naĩ mũeni, na mwanthokya kwenyu; 36naĩ mũthei, na mwanenga ngũa sya kwĩkĩa; naĩ mũwau, na mwooka kũnzisya; naĩ yela, na mwooka kũmbona.’

37“Nĩvo ĩndĩ namo andũ asu aseo makamũsũngĩa mamwĩe atĩĩ, ‘Mwĩai, nĩ ĩndĩĩ twakwonie wĩ na nzaa na twakwĩkĩa lĩu, kana wĩ na waũni na twakwĩkĩa kĩw'ũ kya kũnyw'a? 38Na nĩ ĩndĩĩ twakwonie wĩ mũeni, na twakũthokya kwitũ, kana wĩ mũthei, na twakũnenga ngũa sya kwĩkĩa? 39O ta ũu, nĩ ĩndĩĩ twakwonie wĩ mũwau kana wĩ yela na twooka ũkũsisya?’ 40Nake Mũsumbĩ akamasũngĩa amee atĩĩ, ‘Nyie nĩmũtavya w'o kana ũndũ o na wĩva ũla mwamwĩkie ũmwe wa ana-a-asa aa makwa, o na ethĩwa nĩ ũmwe wa ala mate nguma, ninyie mweekie ũu.’

41“Nĩvo ĩndĩ ũkamea namo andũ ala me ngalĩko ya kw'oko kwake kwa aka atĩĩ, ‘Umai vaa nĩĩ inyw'ĩ andũ aumanĩe! Endai nakũu mwakinĩ wa tene na tene ũla waseũvĩw'e Satani na alaĩka make! 42Naĩ na nzaa, na mwalea kũmbĩkĩa lĩu; naĩ na waũni, na mwalea ũmbĩkĩa kĩw'ũ kya kũnyw'a; 43naĩ mũeni, na mwalea kũnthokya kwenyu; naĩ mũthei, na mwalea kũnenga ngũa sya kwĩkĩa; naĩ mũwau, na mwalea kũka kũnzisya; naĩ yela, na mwalea kũka kũmbona.’

44“Nĩvo ĩndĩ namo makamũkũlya atĩĩ, ‘Mwĩai, nĩ ĩndĩĩ twakwonie wĩ na nzaa kana wĩ na waũni, kana wĩ mũeni, kana wĩ mũthei, kana wĩ mũwau, kana wĩ yela na twalea ũkũtethya?’ 45Nake Mũsumbĩ akamasũngĩa amee atĩĩ, ‘Nĩmũtavya w'o, o yĩla mwaleile kũmũtethya ũmwe wa aa, o na ethĩwa nĩ ũmwe wa ala mate nguma, ninyie mwaleile kũtethya.’ 46#Nda 12.2 Asu makathi kũthĩnw'a tene na tene, ĩndĩ ala aseo makalika thayũnĩ ũtathela.”

Currently Selected:

Mat 25: KAMBA

Highlight

Copy