Mat 24

Yesũ Ayathana Kwanangwa kwa Ĩkalũ

(Mk 13.1-2; Lk 21.5-6)

1Yesũ nĩwaumie Ĩkalũnĩ, na aendete, amanyĩw'a make nĩmaendie vala ũĩ mamwĩa atĩĩ, “Kwa sisya myako ĩno ya Ĩkalũ!” 2Yesũ nake amea atĩĩ, “Nĩmũkwona myako ĩno yonthe? Nĩmũtavya w'o, vai ĩvia yĩmwe yĩkatiwa yĩ ĩũlũ wa yĩngĩ; onthe makaomboangwa vyũ.”

Mathĩna na Monyamao ala Mokĩte

(Mk 13.3-13; Lk 21.7-19)

3Yesũ ailyĩ nthĩ Kĩĩmanĩ kya Mĩthata, amanyĩw'a nĩmookie vala ũĩ vate andũ angĩ mamũkũlya atĩĩ, “Kwa tũtavye, maũndũ aa makeethĩwa ĩndĩĩ, na nĩ kyaũ kĩkonany'a kana ĩvinda nĩ ĩviku ya kũka kwaku na ya kũthela kwa nthĩ?”

4Yesũ amasũngĩa amea atĩĩ, “Ĩkalai mwĩsũvĩĩte na mũiketĩkĩle mũndũ o na wĩva amũkenge. 5Andũ aingĩ makooka na ĩsyĩtwa yakwa mayasya, ‘Ninyie Klĩsto,’ na makakenga andũ aingĩ. 6Mũkeew'a ituu sya makaũ na ngewa sya makaũ mokĩte, ĩndĩ kĩu kĩikaamũmakye. Maũndũ asu no nginya mekĩke, ĩndĩ maikethĩwa mayonany'a kana ĩvinda ya mũminũkĩlyo nĩ ĩviku. 7Nthĩ ĩkakwatya kaũ na ĩngĩ, na ũsumbĩ ũkavithũkĩa ũngĩ. Kũkeethĩwa mayũa na itetemo sya nthĩ kũũ na kũũ. 8Maũndũ asu onthe nĩmo makethĩwa wambĩlĩĩlyo wa thĩna, ta woo ũla wambaa kũkwata mũndũ mũka ĩvindanĩ ya kũsyaa.

9 # Mat 10.22 “Nĩvo ĩndĩ mũkakwatwa na mũinenganwe mũthĩnw'e na kũawa. Mbaĩ syonthe ikamũmena nũndũ wakwa. 10Ĩvindanĩ yĩu andũ aingĩ makekya ngoo matie mũĩkĩĩo woo, na makathooany'a kwa amaitha na kũmenana ũmwe kwa ũla ũngĩ. 11O ta ũu, athani aingĩ ma ũvũngũ makaumĩla na makakenga andũ aingĩ. 12Nũndũ wa kwongeleka kwa mothũku, andũ aingĩ makaeka kũmenda andũ ala angĩ. 13#Mat 10.22 Ĩndĩ mũndũ ũla wĩũmĩĩsya kũvika mũminũkĩlyo akatangĩĩwa. 14Ũvoo Mũseo ĩũlũ wa ũsumbĩ wa Ngai ũkamba kũtavanw'a kĩla vandũ ĩũlũ wa nthĩ wĩthĩwe ũkũsĩ kwa mbaĩ syonthe, na ĩndĩ mũminũkĩlyo ũyũka.

Kĩndũ kya Kũvukya

(Mk 13.14-23; Lk 21.20-24)

15 # Nda 9.27; 11.31; 12.11 “Ĩvinda yĩla mũkona, ‘Kĩndũ kya kũvukya kĩetae wanangĩko,’ kĩũngyĩ vala Vandũ Vatheu, kĩla kyawetiwe nĩ mwathani Ndanieli, (mũndũ ũla ũkũsoma vaa nĩatate kũelewa nĩ kĩla kĩũwetwa), 16andũ ala me Yutia mekĩa mathi ĩimanĩ. 17#Lk 17.31 Mũndũ ũla ũkethĩwa e kĩalanĩ kya nyũmba yake ĩũlũ, ndakaatinde ayuma ose mĩio kuma nyũmbanĩ yake. 18O ta ũu, mũndũ ũla ũkethĩwa e mũũndanĩ ndakaasyoke nyũmba kwake akose ngũa yake ya ĩũlũ. 19Ĩvinda yĩu yĩkeethĩwa yĩ ya thĩna mũnene kwa aka ala aito, na ala makethĩwa me na twana tũnini tũkwonga! 20Voyai Ngai nĩ kana maũndũ asu maikaaĩthĩwe ĩvindanĩ ya mbevo na mbua, kana kwĩ mũthenya wa Savato!#24.20 Ĩvinda ya mbevo na mbua syalo syĩthĩawa syĩ vinya, naw'o mũthenyanĩ wa Savato Ayuti mayeetĩkĩlĩtw'e kũthi mũendo mũasa 21#Nda 12.1; Ũvu 7.14 Nũndũ mathĩna ma ĩvinda yĩu makeethĩwa me mathũku mũno kũvĩtũka thĩna o na wĩva ũla waaĩthĩwa kuma nthĩ yoombwa kũvika yu; o na kũikethĩwa thĩna ũngĩ wĩana ta ũsu. 22Ta kethĩwa matukũ asu ti maole, vai mũndũ ũvĩta; ĩndĩ kwondũ wa anyuve ma Ngai, matukũ asu makaolwa.

23“Kwoou ĩvindanĩ yĩu, ethĩwa mũndũ o na wĩva akamwĩa, ‘Sisyai, Klĩsto e vaa,’ kana, ‘E vaya,’ mũikaaĩtĩkĩle ndeto syake. 24Nũndũ kũkaumĩla andũ aingĩ mekwĩyĩta Klĩsto, na athani aingĩ ma ũvũngũ. Makeeka syama nene na maũndũ ma kũseng'ya nĩ kana masye andũ, o na ala anyuve ma Ngai ethĩwa ũu nũtonyeka. 25Ĩthukĩĩsyei, namũtavya maũndũ asu ĩvinda yĩu yĩtanamba kũvika.

26 # Lk 17.23-24 “Kwoou ethĩwa mũndũ o na wĩva akamwĩa, ‘Mwana wa Mũndũ e weũnĩ,’ mũikathi kw'o; kana amwĩa, ‘Evithĩte vaa,’ mũiketĩkĩle ndeto syake. 27Nũndũ Mwana wa Mũndũ akaumĩla ta ũtisi ũla ũtisaa ũkathesya ĩtu kuma wumĩlonĩ wa syũa kũvika ũthũĩlonĩ wayo. 28#Lk 17.37 Vandũ vala ve kimba nĩvo ndei syũmbanĩlĩĩlaa.

Kũka ĩngĩ kwa Mwana wa Mũndũ

(Mk 13.24-27; Lk 21.25-28)

29 # Ĩsa 13.10; 34.4; Esek 32.7; Yoe 2.10; 3.4; 3.15; Ũvu 6.12-13 “Mathĩna ma ĩvinda yĩu mathela oou, syũa yĩkaya kĩvindu na mwei ndũkaumya kyeni. Ndata ikavalũkanga kuma matunĩ, na mavinya ma syĩndũ ila syĩ yayayanĩ makathingithangw'a. 30#Nda 7.13; Nzek 12.10-14; Ũvu 1.7 Nĩvo ĩndĩ wonany'o ũkaumĩla matunĩ wa kwonany'a kana Mwana wa Mũndũ nĩwũkĩte. Mbaĩ syonthe sya nthĩ ikaĩa syamwona Mwana wa Mũndũ okĩte e mathweonĩ ma ĩtunĩ, e na ũtonyi na ndaĩa nene. 31Nake akatũma alaĩka make na wasya mũnene wa soo, namo makoombany'a anyuve make kuma kĩla vandũ ĩũlũ wa nthĩ.

Kwĩmanyĩsya kuma Mũkũyũnĩ

(Mk 13.28-31; Lk 21.29-33)

32“Ĩmanyĩsyei ũndũ kuma mũkũyũnĩ. Yĩla mbonge syaw'o syoololoa na syamesya matũ, nĩmũmanyaa kana ĩvinda ya mbua yĩ vakuvĩ. 33No ta ũu, mwoona maũndũ asu onthe mayĩkĩka, manyai kana Mwana wa Mũndũ e vakuvĩ vyũ, o vaa mũomonĩ. 34Nĩmũtavya w'o, maũndũ aa makeekĩka andũ ala me thayũ yu tũĩ matanakw'a onthe makathela. 35Ĩtu na nthĩ ikathela, ĩndĩ ndeto syakwa ikekala tene na tene.

Vai Mũndũ wĩsĩ yĩla Mũthenya kana saa wa Mũminũkĩlyo Wĩvika

(Mk 13.32-37; Lk 17.26-30,34-36)

36“Vai mũndũ o na ũmwe wĩsĩ mũthenya kana saa wa mũminũkĩlyo. O na alaĩka ma ĩtunĩ vamwe na Mwana#24.36 vamwe na Mwana: Maandĩko amwe ma tene ma Ndeto ya Ngai nĩmatiĩte ndeto ii mayĩsĩ; no Asa e weka wĩsĩ mũthenya ũsu. 37#Mwa 6.5-8 O ũndũ kwailyĩ ĩvindanĩ ya Noa, now'o kwĩĩthĩwa kũilyĩ Mwana wa Mũndũ ayũka. 38Ĩvindanĩ yĩu, nthĩ ĩtanamba kũvw'ĩkwa nĩ kĩw'ũ, andũ nĩmaĩsaa na kũnyw'a, na nĩmatwaanaa na kũtwawa, kũvika mũthenya ũla Noa walikile ngalawanĩ. 39#Mwa 7.6-24 Mayamanyaa kĩla kyaendee kũvika kĩla kĩw'ũ kingĩ kyooka, kyamavw'ĩka onthe. Ũu now'o kũkethĩwa ĩvindanĩ yĩla Mwana wa Mũndũ wĩũka. 40Ĩvindanĩ yĩu aũme elĩ makeethĩwa mũũndanĩ; ũmwe nũkoswa na ũla ũngĩ aitiwa. 41Aka elĩ nĩmakethĩwa maithiĩa ĩvianĩ yĩmwe; ũmwe nũkoswa na ũla ũngĩ aitiwa.

42“Kwoou ĩkalai mwĩyũmbanĩtye, nũndũ mũyĩsĩ nĩ mũthenya wĩva ũla Mwĩai wenyu ũkoka. 43#Lk 12.39-40 Ĩndĩ manyai ũũ: Kethĩwa mwene wa nyũmba nĩwĩthĩawa esĩ saa ũla kĩng'ei kĩkũka, ekala asalukĩtye na ndakĩeka kĩtũle nyũmba yake. 44Kwoou o nenyu ĩkalai mwĩyũmbanĩtye, nũndũ Mwana wa Mũndũ akooka saa ũla mũteũtalĩthasya.”

Mũthũkũmi wa Kwĩkwatw'a na Ũngĩ ũte wa Kwĩkwatw'a

(Lk 12.41-48)

45Yesũ nĩwaendeeie na kwasya atĩĩ, “Mũthũkũmi ũla wa kwĩkwatw'a na mũĩ nĩ wĩva? Nĩ ũla waiiwe nĩ mũnene wake aũngamĩe athũkũmi ala angĩ me nyũmbanĩ yake, na kũmaaĩaa lĩu ĩvinda yĩla yaĩlĩte. 46Nĩ mũathime mũthũkũmi ũsu ũkethĩwa nĩ mũnene wake aendee na kũtethya wĩa ũla watiĩwe. 47Nĩmũtavya w'o, mũnene wake akamũnenga kũũngamĩa syĩndũ syake syonthe. 48Ĩndĩ ethĩwa nĩ mũthũkũmi ũte wa kwĩkwatw'a, no asye ngoonĩ yake, ‘Mũnene wakwa nũkwĩkalanga ayĩsa kũka,’ 49na ĩndĩ ayambĩlĩĩlya kũvũa athũkũmi ala angĩ, na kũĩsaa na kũnyw'a na athengi. 50Mũnene wa mũthũkũmi ũsu akooka mũthenya ũla we ũteũtalĩthasya na saa ũla ũtesĩ. 51Nĩvo ĩndĩ mũnene ũsu wĩmũthĩny'a mũno,#24.51 wĩmũthĩny'a mũno: Maandĩko amwe maĩtye wĩmũtilanga ilungu na aimwĩkya kũla kwĩkalaa andũ ma mĩseũvyo; vala andũ makaĩa na kũvevetany'a maeo.

Currently Selected:

Mat 24: KAMBA

Highlight

Copy