Lk 9
9
Yesũ Aitũma ala Atũmwa Ĩkũmi na Elĩ
(Mat 10.5-15; Mk 6.7-13)
1Yesũ nĩwoombanisye ala atũmwa ĩkũmi na elĩ vamwe, na amanenga ũtonyi na ũkũmũ wa kũlũngya maimũ onthe na kũvosya awau. 2Nĩvo ĩndĩ wamatũmie mathi makatavany'e ĩũlũ wa ũsumbĩ wa Ngai, na maivosya andũ ala awau. 3#Lk 10.4-11; Meko 13.51 Nĩwameaĩie amea atĩĩ, “Mũikakue kĩndũ kyalonĩ kyenyu: Ndata, mũvuko, lĩu, mbesa, kana ngũa ya ũkũany'a. 4Nyũmba ĩla mwĩthokw'a, ĩkalaai vo kũvika yĩla mwĩuma ndũanĩ ĩsu. 5Vala andũ matakamũthokya, mwĩuma ndũanĩ ĩsu na mũitia mwatuanga kĩtoo kĩla kĩ maũũnĩ menyu. Ũu ũkamony'a kana makasilĩlwa.”
6Amanyĩw'a asu nĩmaumie vau na mathi kũu motũinĩ maitavany'a Ũvoo Mũseo na kũvosya andũ ala maĩ awau.
Kũsaanĩw'a kwa Elote
(Mat 14.1-12; Mk 6.14-29)
7 #
Mat 16.14; Mk 8.28; Lk 9.19 Elote nĩweewie maũndũ ala maendee kwĩkĩka na asaanĩw'a mũno, nũndũ andũ amwe maasya kana Yoana Mũvatisi nũsyũkĩte. 8O na angĩ maasya kana Eliya nĩwũkie, na angĩ mayasya ve mwathani ũmwe wa ala ma tene ũsyũkĩte. 9Elote nĩwaisye atĩĩ, “Ninyie naisye Yoana atilwe mũtwe, yu nũũ ũsu ngwĩw'a maũndũ aa ĩũlũ wake?” Kwoou ekala aimantha ũndũ ũtonya kũmwona Yesũ.
Yesũ Aivũnĩthya Ĩkomano ĩnene ya Andũ
(Mat 14.13-21; Mk 6.30-44; Yoa 6.1-14)
10Atũmwa nĩmasyokie na mamũtavya Yesũ maũndũ onthe ala mekie. Yesũ nĩwamosie mathi me oka ndũanĩ yĩtawa Mbethisaita. 11Andũ aingĩ nĩmamanyie kũla wathi na mamũatĩĩa. Nĩwamathokisye na amatavya ĩũlũ wa ũsumbĩ wa Ngai, o vamwe na kũvosya ala maĩ na vata wa kũvow'a.
12Kũkilĩlye kũtuka ala amanyĩw'a ĩkũmi na elĩ nĩmaendie vala ve Yesũ na mamwĩa atĩĩ, “Ekana na andũ aa mathi motũinĩ na mĩsyĩnĩ ĩla yĩ ũkuvĩnĩ makemanthĩe lĩu na vandũ makoma, nũndũ vaa tũĩ vaitwĩe andũ.”
13Yesũ amasũngĩa amea atĩĩ, “Inyw'ĩ ene manengei kĩndũ maye.”
Namo mamwĩa, “Twĩ na mĩkate o ĩtano na makũyũ elĩ, ate o tũithi tũkathoee andũ aa onthe lĩu.” 14Ũtalo wa aũme waĩ ta ngili itano. Nĩvo ĩndĩ Yesũ weeie amanyĩw'a atĩĩ, “Ĩkalyai andũ nthĩ mũmaanĩtye ikundi sya andũ ta mĩongo ĩtano.”
15Amanyĩw'a nĩmeekie ũu, andũ onthe mekala nthĩ. 16Nĩvo ĩndĩ Yesũ woosie ĩla mĩkate ĩtano na makũyũ elĩ, na asyaĩtye ĩũlũ ĩtunĩ atũngĩa Ngai mũvea. Nĩwaitilangile na anenga amanyĩw'a maaĩe andũ. 17Andũ onthe nĩmaĩe mavũna, na amanyĩw'a moombany'a ilungu ila syatialile sya lĩu ũsu syausũa ikavũ ĩkũmi na ilĩ.
Vetelo Aikũsĩĩa kana Yesũ nĩwe Klĩsto
(Mat 16.13-19; Mk 8.27-29)
18Mũthenya ũmwe Yesũ aivoyea vandũ e weka, amanyĩw'a make nĩmookie vo nake amakũlya atĩĩ, “Kwa ndavyei, mo andũ measya ninyie ũũ?”
19 #
Mat 14.1-2; Mk 6.14-15; Lk 9.7-8 Namo mamwĩa, “Andũ amwe measya nue Yoana Mũvatisi, na angĩ mayasya nue Eliya, o na angĩ measya mwathani ũmwe wa ala ma tene nũsyũkĩte.”
20 #
Yoa 6.68-69
Nake Yesũ amakũlya atĩĩ, “Inyw'ĩ nenyu, mwĩasya ninyie ũũ?”
Vetelo asũngĩa asya, “We nue Klĩsto ũla ũtũmĩtwe nĩ Ngai.”
Yesũ Aineena ĩũlũ wa Kũthĩna, Kũkw'a na Kũthayũũka Kwake
(Mat 16.20-28; Mk 8.30—9.1)
21Nĩvo ĩndĩ Yesũ wameaĩe maikatavye mũndũ o na ũmwe ũndũ ũsu. 22O ta ũu nĩwameie atĩĩ, “Mwana wa Mũndũ ndatĩa kũthĩnw'a mũno, na kũlewa nĩ atumĩa vamwe na athembi anene na amanyĩsya ma Mĩao. Akooawa, na ĩtina wa mĩthenya ĩtatũ aithayũũka kuma kwa akw'ũ.”
23 #
Mat 10.38; Lk 14.27 Nĩweeie andũ onthe atĩĩ, “Ethĩwa mũndũ nũkwenda kũtw'ĩka mũatĩĩi wakwa, no nginya elee mwene na aikua ngelany'o yake kĩla mũthenya na aingatĩĩa. 24#Mat 10.39; Lk 7.33; Yoa 12.25 Nũndũ ũla wendaa kũsũvĩa thayũ wake akawasya, ĩndĩ ũla wĩasya thayũ wake nũndũ wakwa akawona ĩngĩ. 25Ve ũtethyo mwaũ mũndũ akamesya nthĩ yonthe, na ayĩyasya na kwĩyananga we mwene? 26Ethĩwa mũndũ akeew'a nthoni kũwetanĩw'a nakwa kana momanyĩsyo makwa, o nake Mwana wa Mũndũ yĩla wĩũka kũũ nthĩ vinyanĩ wake na wa ĩthe wake na wa alaĩka ma Ngai, akeew'a nthoni kwĩta mũndũ ũsu mũatĩĩi wake. 27Nĩmũtavya w'o, andũ amwe maũngyĩ o vaa maikakw'a matonete ũsumbĩ ũsu wa Ngai.”
Kũalyũka kwa Mũvw'ano wa Yesũ
(Mat 17.1-8; Mk 9.2-8)
28 #
2Vet 1.17-18
Ĩtina wa mĩthenya ta nyanya Yesũ amina kũneena maũndũ asu, nĩwoosie Vetelo, Yoana na Yakovo, ambata namo kĩĩmanĩ kũvoya. 29Yesũ aendee na kũvoya, mũvw'ano wa ũthyũ wake nĩwaalyũkile, na ngũa syake syeeũva kw'ũ syakengakenga. 30Andũ elĩ nĩmoonekie maineena nake, namo nĩ Mwose na Eliya. 31Maĩ na mũvw'ano ũũtisatisa, na maneenaa ĩũlũ wa kĩkw'ũ kyake kĩla kyaĩ vakuvĩ kwĩanĩĩw'a Yelũsalemu. 32Vetelo na ala angĩ waĩ namo nĩmakwatĩtwe nĩ too mwingĩ na makakoma, ĩndĩ nĩmaamũkie na moona Yesũ aitisatisa, na ala andũ elĩ maũngyĩ nake. 33Andũ asu mayuma vau, Vetelo nĩwamwĩie Yesũ atĩĩ, “Mwĩai, nĩ ũndũ ũseo kwitũ ithyĩ kwĩthĩwa twĩ vaa. Eka twake tũsũmba tũtatũ: Kamwe kaku, kangĩ ka Mwose na kangĩ ka Eliya.” Vetelo kwa w'o ndamanyaa kĩla ũkũneena.
34O aendee na kũneena, ĩtu nĩyesĩlile ĩũlũ woo na yamavw'ĩka. Amanyĩw'a asu nĩmakwatiwe nĩ w'ĩa moona ĩtu yĩimavw'ĩka. 35#Ĩsa 42.1; Mat 3.17; 12.18; Mk 1.11; Lk 3.22 Wasya nĩweew'ĩkie wumĩte ĩtunĩ yĩu ũkwasya atĩĩ, “Ũũ nĩwe Mwana wakwa ũla nĩnyuvĩte; mwĩthukĩĩsyei!”
36Wasya ũsu wamina kwĩw'ĩka, Yesũ oonekie e o weka. Amanyĩw'a nĩmavindisye ĩũlũ wa ũndũ ũsu na mayaatavya mũndũ ĩvindanĩ yĩu kĩla moonie.
Yesũ Aivosya Kamwana Kalikĩtwe nĩ Ĩimũ
(Mat 17.14-18; Mk 9.14-27)
37Ũnĩ ũsu, Yesũ na ala amanyĩw'a atatũ mamina kũtheea kuma kĩĩmanĩ, ĩkomano ĩnene ya andũ nĩyamũkomanie. 38Nthĩnĩ wa ĩkomano yĩu mũndũ ũmwe nĩwaneenie na wasya mũnene asya atĩĩ, “Mũmanyĩsya nĩngũkwĩsũva ũnzyaĩsye kamwana kakwa; noko kakwa ke koka! 39Kakwatawa nĩ ĩimũ o kwa mĩtũkĩ na kaikaya na wasya mũnene, na nĩyĩtumaa kang'ang'athũka na kayambĩĩa kumya ĩvũyũ na kanyw'a. 40Nĩmesũvie amanyĩw'a maku mayĩlũngye, ĩndĩ maemwa.”
41Yesũ asũngĩa, “Andũ aa mũte na mũĩkĩĩo na aemu! Naĩlĩte kwĩkala nenyu ĩvinda yĩana ata? Nĩũmĩanĩsya nenyu nginya ĩndĩĩ?” Nĩvo ĩndĩ weeie ũla mũndũ atĩĩ, “Ete kamwana kaku vaa.”
42Kamwana kau kokĩte vala ve Yesũ, yĩla ĩimũ nĩya kakimanisye na nthĩ. Ĩndĩ Yesũ eeaĩa ĩimũ yĩu yume, avosya kamwana kau na akatũngĩa ĩthe. 43Andũ onthe nĩmaseng'iw'e nĩkwona ũtonyi mũnene wa Ngai.
Yesũ Aineena ĩngĩ ĩũlũ wa Kĩkw'ũ Kyake
(Mat 17.22-23; Mk 9.30-32)
Andũ maendee na kũseng'wa nĩ maũndũ asu Yesũ weeka, nĩwameie amanyĩw'a make atĩĩ, 44“Ndeto ii nilike matũnĩ menyu! Mwana wa Mũndũ nũkũthi kũnenganwe ũtonyinĩ wa andũ.” 45Ĩndĩ amanyĩw'a make mayaaelewa nĩ kĩla waweta. Nĩkyavithanĩtw'e nĩ kana maikakĩmanye, namo makĩa kũmũkũlya eweta ĩũlũ wa kyaũ.
Amanyĩw'a Maikũlany'a nũũ ũla Mũnene katĩ Woo
(Mat 18.1-5; Mk 9.33-37)
46 #
Lk 22.24
Ngananĩo nĩyookĩlile katĩ wa amanyĩw'a ma Yesũ maikũlany'a nũũ ũla mũnene katĩ woo. 47Yesũ nĩwamanyie kĩla meũsũanĩa na kwoou oosa kana akaũngamya vakuvĩ nake, 48#Mat 10.40; Lk 10.16; Yoa 13.20 na amea atĩĩ, “Ũla ũthokasya kana kaa kwondũ wakwa ethĩawa anthokya, na ũla ũnthokasya ethĩawa athokya ũla ũndũmĩte. Nũndũ ũla mũnini kwenyu inyw'onthe, nĩwe mũnene vyũ.”
Ũla Ũteũmũneenea Naĩ e Ngalĩko ĩla Yenyu
(Mk 9.38-40)
49Yoana nĩwaisye atĩĩ, “Mũmanyĩsya, ve mũndũ twonie ailũngya maimũ aitũmĩa ĩsyĩtwa yaku na twamwĩa nĩaeke, nũndũ ti wa nguthu ĩno yaitũ.”
50Ĩndĩ Yesũ amwĩa atĩĩ, “Mũikamwĩe nĩaeke, nũndũ ũla ũteũleana nenyu e ngalĩko ĩla yenyu.”
Asamalia Mailea Kũmũthokya Yesũ
51Yĩla ĩvinda yathengeeie ya Yesũ kwambata ĩtunĩ, nĩwatwie athi Yelũsalemu na ambĩĩa kyalo. 52Nĩwatũmie andũ amwe maendae mbee wake, namo mathi malika ndũanĩ ya Samalia mamũseũvĩsye vandũ va kũthũmũa. 53Ĩndĩ Asamalia mayaaĩtĩkĩla kũmũthokya Yesũ nũndũ aendete Yelũsalemu. 54#2Asu 1.9-16 Yĩla amanyĩw'a make, Yakovo na Yoana moonie ũu, Nĩmamũkũlilye atĩĩ, “Mwĩai, nũkwenda twĩtye mwaki wume ĩtunĩ wũke ũmanange?”#9.54 Maandĩko amwe ma tene ma Ndeto ya Ngai nĩmongelete o tondũ Eliya weekie
55Ĩndĩ Yesũ amavĩndũkĩa amakany'a.#9.55 Maandĩko amwe ma tene ma Ndeto ya Ngai nĩmongelete Na amea, “Inyw'ĩ mũyĩsĩ mwĩ ma Veva wa mũthemba mwaũ, nũndũ Mwana wa Mũndũ ndaaũka kwananga mathayũ ma andũ ĩndĩ ookie kũmatangĩĩa” 56Nĩvo ĩndĩ maumie vau mathi ndũanĩ ĩngĩ.
Ũito wa Kwĩthĩwa Mũatĩĩi wa Yesũ
(Mat 8.19-22)
57Me nzĩanĩ maendete, mũndũ ũmwe nĩwamwĩie Yesũ atĩĩ, “Nyie ngaendanasya naku kw'onthe kũla wĩendaa.”
58Yesũ amwĩa, “Mbĩwa syĩ na maima ma kwĩkalaa na nyũnyi nasyo syĩ na ndala, ĩndĩ Mwana wa Mũndũ nde na wĩkalo.”
59Nĩweeie mũndũ ũngĩ atĩĩ, “Ngatĩĩa.”
Ĩndĩ mũndũ ũsu amwĩa, “Mwĩai, eka nambe kũsyoka mũsyĩ ngathike ĩthe wakwa.”
60Nake Yesũ amwĩa atĩĩ, “Ekana na akw'ũ mathike akw'ũ moo. Ĩndĩ we, enda ũkatavany'e ĩũlũ wa ũsumbĩ wa Ngai.”
61Mũndũ ũngĩ nĩweeie Yesũ atĩĩ, “Mwĩai nĩngũkũatĩĩa, ĩndĩ eka nambe kũthi ngatianĩe ũvoo na andũ ma mũsyĩ wakwa.”
62Yesũ nake amwĩa atĩĩ, “Mũndũ ũla ũkwete mũlaũ aĩme na aitindĩa kũsisya ĩtina, ndaĩlĩte ũsumbĩnĩ wa Ngai.”
Currently Selected:
Lk 9: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
