Lk 8

Aka Maendanasya na Yesũ

1Ĩtina wa ũu, Yesũ nĩwathyũũkie kũu ndũanĩ na motũinĩ, aitavany'a Ũvoo Mũseo ĩũlũ wa ũsumbĩ wa Ngai. Ala amanyĩw'a ĩkũmi na elĩ maĩ vamwe nake, 2#Mat 27.55-56; Mk 15.40-41; Lk 23.49 o vamwe na aka amwe Yesũ wamaumĩtye maveva mavuku na wamavoetye mowau. Aka asu nĩ Meli ũla weetawa Makitalene, ũla waumĩtw'e maimũ mũonza, 3na Yoana, mũka wa Kusa ũla waĩ mũũngamĩi wa syĩndũ sya Elote, Susana na aka angĩ aingĩ ala matũmĩaa syĩndũ syoo kũtetheesya Yesũ na amanyĩw'a make.

Ngelekany'o ya Mũĩmi

(Mat 13.1-9; Mk 4.1-9)

4Andũ nĩmaendeeie na kũka vala ve Yesũ maumĩte ndũanĩ syĩ kĩvathũkany'o. Yĩla ĩkomano ĩnene yoombanie, Yesũ nĩwamatavisye ngelekany'o amea:

5“Mũĩmi ũmwe nĩwaendie kũvuĩa mbeũ. Akĩvuĩa, mbeke imwe nĩsyavalũkile nzĩanĩ, syakinyangwa nĩ andũ, na syaĩwa nĩ nyũnyi. 6Ingĩ nĩsyavalũkile mavianĩ, na yĩla syameie syooma nũndũ vayaĩ kĩmeu. 7Mbeke ingĩ nĩsyavalũkile mĩw'anĩ, na mĩw'a ĩsu yeana vamwe nasyo na yainyita. 8Ĩndĩ ingĩ nĩsyavalũkile mũthanganĩ mũseo na syeana, na syasyaa mbeke kũndũ ĩana.” Yesũ aiminũkĩlya nĩwamatavisye na wasya mũnene amea atĩĩ, “Ũla wĩ kũtũ nĩew'e!”

Kĩtumi kya Yesũ Kũtũmĩa Ngelekany'o

(Mat 13.10-17; Mk 4.10-12)

9Nĩvo ĩndĩ amanyĩw'a ma Yesũ mamũkũlilye kĩla ngelekany'o ĩsu ĩkũneena ĩũlũ wakyo. 10#Ĩsa 6.9-10 Nake amea atĩĩ, “Inyw'ĩ nĩmũnengetwe kũmanya syĩmbithĩ sya ũsumbĩ wa Ngai, ĩndĩ andũ ala angĩ matavaw'a na ngelekany'o nĩ kana o na maketeea maikone na o na meethukĩĩsya maikew'e.

Yesũ Aielesya Amanyĩw'a Ngelekany'o ya Mũĩmi

(Mat 13.18-23; Mk 4.13-20)

11“Ũũ ĩndĩ nĩw'o ũelesyo wa ngelekany'o ĩsu: Mbeũ nĩ ndeto ya Ngai. 12Mbeke ila syavalũkile nzĩanĩ nĩ andũ ala mew'aa ndeto ya Ngai, ĩndĩ Satani ayũka na aimĩvulya kuma ngoonĩ syoo, nĩ kana maikaĩkĩĩe na kũtangĩĩwa. 13Nasyo mbeke ila syavalũkile mavianĩ nĩ andũ ala mew'aa ĩla ndeto na maimyosa na ũtanu. Ĩndĩ ti ndiku mathayũnĩ moo. Maĩkĩĩaa o kwa kavinda kanini, na malika matatwanĩ mayĩkya ngoo. 14Mbeke ila syavalũkile mĩw'anĩ nasyo nĩ andũ ala mew'aa ĩla ndeto, ĩndĩ maendee mainyitwa nĩ kwĩmakĩa na kwenda ũthwii na motanu ma nthĩ ĩno, ũyĩthĩa mayumya ũsyao o na ũmwe. 15Ĩndĩ nasyo mbeke ila syavalũkile mũthanganĩ mũseo, asu nĩ andũ ala mamina kwĩw'a ĩla ndeto na ngoo nzeo na yĩna ũw'o, mamĩlũmasya na kwa kũmĩĩsya mayĩthĩwa na ũsyao.

Taa nĩ wa Kũtũmulĩkĩla

(Mk 4.21-25)

16 # Mat 5.15; Lk 11.33 “Vai mũndũ ũkwatasya taa na aiũkunĩkĩlya mbisũ, kana aiwia ungu wa kĩtanda. Ĩndĩ awiaa vandũ vatũlu nĩ kana ũmulĩkĩle andũ ala meũlika nyũmbanĩ ĩsu.

17 # Mat 10.26; Lk 12.2 “Maũndũ onthe ala mavithe makaumĩlw'a ũtheinĩ, na syĩmbithĩ syonthe ikamanyĩka na kumbũanw'a.

18 # Mat 25.29; Lk 19.26 “Kwoou ĩthukĩĩasyei nesa maũndũ ala mũkwĩw'a. Mũndũ ũla wĩ na kĩndũ akongeleelwa, nake ũla ũte na kĩndũ, o na kala kanini ũkwona ta wĩ nako akavenwa.”

Inyia na Ana-a-inyia ma Yesũ

(Mat 12.46-50; Mk 3.31-35)

19Nĩvo ĩndĩ inyia na ana-a-inyia ma Yesũ mookie kũmwona, ĩndĩ maemwa nĩ kũvika vala ũĩ nũndũ wa wingĩ wa andũ. 20Mũndũ ũmwe nĩweeie Yesũ atĩĩ, “Inyia waku na ana-a-inyia maku me vaya nza na nĩmekwenda ũkũtumũsya.”

21Yesũ nĩwatavisye andũ onthe amea atĩĩ, “Inyia wakwa na ana-a-inyia makwa nĩ andũ ala mew'aa ndeto ya Ngai na kwĩka ũndũ ĩkwasya.”

Yesũ Aivindĩthya Kĩuutani

(Mat 8.23-27; Mk 4.35-41)

22Mũthenya ũmwe Yesũ nĩwalikile ĩsiwanĩ e na amanyĩw'a make, na amea atĩĩ, “Tũendei mũinganĩsyo ũya ũngĩ wa ĩia.” Kwoou nĩmambĩĩie kyalo 23na maendete, Yesũ akwatwa nĩ too na akoma. Kĩuutani nĩkyookĩlanilye ĩianĩ na kĩw'ũ kyambĩĩa kũlika ĩsiwanĩ weethĩa me mũisyonĩ. 24Amanyĩw'a nĩmaendie vala ve Yesũ na mamũamũkya mamwĩĩte atĩĩ, “Mwĩai, Mwĩai, twĩ vakuvĩ kũkw'a!”

Yesũ nĩwookĩlile eeaĩa kĩuutani na itulumo na syausya kwavindya ki. 25Nĩvo ĩndĩ Yesũ wakũlilye amanyĩw'a make atĩĩ, “Inyw'ĩ mũviĩte mũĩkĩĩo wenyu va?”

Ĩndĩ mo me na w'ĩa mwingĩ na maseng'ete nĩmakũlanilye atĩĩ, “Mũndũ ũũ nĩ wa mũthemba mwaũ ũkwĩaĩa o na iuutani na itulumo na iimwĩw'a?”

Yesũ Aivosya Mũndũ Walikĩtwe nĩ Maimũ

(Mat 8.28-34; Mk 5.1-20)

26Yesũ na amanyĩw'a make nĩmaendeeie na kyalo mavika nthĩ ya Akelasinĩ ĩla yĩ ngalĩko ya wumĩlonĩ wa syũa wa Ĩia ya Kalilii. 27Yesũ aikinya nthĩ oou, nĩwakomanie na mũndũ kuma ndũanĩ walikĩtwe nĩ maimũ. Vandũ va ĩvinda ĩasa mũndũ ũsu atũĩte atekwĩkĩa ngũa na atekwĩkala mũsyĩ, ĩndĩ ekalaa vala vathikawa andũ. 28Yĩla wamwonie Yesũ nĩwakayie na wasya mũnene na eevalũkya nthĩ maũũnĩ make, na aneena na wasya mũnene ayasya atĩĩ, “We Yesũ Mwana wa Ngai Ũla wĩ Ĩũlũ Mũno, wĩenda kyaũ vala nĩĩ? Nĩngũkwĩsũva, ndũkanthĩny'e!” 29Aneenie ũu nũndũ Yesũ aĩ aneea ĩimũ yĩla yalikĩte mũndũ ũsu nĩyume. Ĩimũ yĩu nĩyakwataa mũndũ ũsu mavinda maingĩ, na o na kau atindaa aisungwa emwĩkĩe mbĩngũ moko na akovwa maũũ na nyololo, nĩwaitusangaa na aitwawa nĩ ĩimũ yĩu weũnĩ.

30Yesũ nĩwamũkũlilye atĩĩ, “Wĩtawa ata we?”

Nake amwĩa, “Nĩtawa Nguthu,” nũndũ alikĩtwe nĩ maimũ maingĩ.

31Maimũ asu nĩmatindĩie kũmwĩsũva Yesũ ndakameaĩe mathi ĩimanĩ yĩte kĩtulu.

32Vau ũkuvĩnĩ vaĩ ndĩthya nene ya ngũlũe yaĩsaa nguumo wa kĩĩma, kwoou maimũ asu mamwĩsũva Yesũ ametĩkĩlye mathi makailike, nake ametĩkĩlya. 33Maimũ asu nĩmaumie ũla mũndũnĩ na malika ĩla ndĩthyanĩ ya ngũlũe, na ngũlũe isu syonthe syatheea kĩvaũũkonĩ isembete na syeeyĩkya kĩw'ũnĩ syakw'ĩĩa vo. 34Andũ ala maĩthasya ngũlũe isu nĩmoonie kĩla kyeekĩka, na masemba mathi matavany'a ũvoo ũsu kũu ndũanĩ na motũinĩ.

35Andũ nĩmookie mone ũndũ kweekĩka. Yĩla mavikie vala ve Yesũ, nĩmeethĩie ũla mũndũ waumĩtw'e maimũ ailyĩ nthĩ vakuvĩ na Yesũ, ekĩĩte ngũa nesa na e na kĩlĩko kĩseo. Onthe nĩmakwatiwe nĩ w'ĩa mwingĩ. 36Andũ ala moonete ũndũ ũsu, nĩmatavisye andũ ũndũ mũndũ ũsu walikĩtwe nĩ maimũ wavow'a. 37Andũ onthe ma kĩsio kĩu kya Akelasinĩ nĩmamũkũlilye Yesũ aume kũu kwoo athi, nĩkwĩthĩwa nĩmakwatiwe nĩ w'ĩa mwingĩ. Kwoou Yesũ alika ĩsiwanĩ na athi. 38Nĩvo ĩndĩ mũndũ ũla waumiw'e maimũ wamwĩsũvie Yesũ maendany'e, ĩndĩ Yesũ amũtũngĩthya aimwĩa atĩĩ, 39“Syoka mũsyĩ kwenyu ũkatavany'e maũndũ onthe ala Ngai wakwĩka.” Kwoou mũndũ ũsu nĩwaendie na atavany'a ndũanĩ yonthe maũndũ manene ala Yesũ wamwĩkĩte.

Mwĩĩtu wa Yailasi na Mũndũ Mũka ũla Wakwatie Yesũ Ngũa

(Mat 9.18-26; Mk 5.21-43)

40Yĩla Yesũ wasyokie mũinganĩsyo ũla ũngĩ wa ĩia, ĩkomano ĩnene ya andũ nĩyamũthokisye, nĩkwĩthĩwa andũ onthe nĩmamweteelete. 41Nĩvo ĩndĩ mũndũ ũmwe weetawa Yailasi, ũla waĩ mũtongoi wa nyũmba ya Ayuti ya kũthaithĩa na kũmbanĩa, wookie na atulya ndu mbee wa Yesũ. Nĩwamwĩsũvie Yesũ athi mũsyĩ kwake, 42nĩkwĩthĩwa kelĩtu kake ka ũkũũ wa myaka ĩkũmi na ĩlĩ, na kasyaĩtwe ke koka kaĩ vakuvĩ kũkw'a.

Yesũ e nzĩanĩ aendete, andũ nĩmamũvivinyaa mũno kuma kĩla ngalĩko. 43Katĩ woo vaĩ mũndũ mũka ũmwe wekalĩte ayumwa nĩ nthakame vandũ va myaka ĩkũmi na ĩlĩ.

Nĩwatũmĩĩte syĩndũ syake syonthe ikathela aithi kwona matakĩtalĩ,#8.43 Nĩwatũmĩĩte syĩndũ syake syonthe ikathela aithi kwona matakĩtalĩ: Maandĩko amwe ma tene ma Ndeto ya Ngai nĩmatiĩte ndeto ii ĩndĩ vai ũmwe waatonya kũmũvosya. 44Mũndũ mũka ũsu nĩwaumie Yesũ ĩtina athi akwata mũthya wa ngũa yake, na o vau kwa vau aeka kumwa nĩ nthakame. 45Yesũ nĩwakũlilye atĩĩ, “Nũũ ũla wangwata?”

Yĩla andũ onthe maisye kana mainamũkwata, Vetelo nĩwamwĩie atĩĩ, “Mwĩai, andũ nĩmakũthyũlũlũkĩte na onthe mevivinyanĩa vala ũĩ.”

46Ĩndĩ Yesũ asya atĩĩ, “Ve mũndũ wangwata, nũndũ nĩneew'a vinya wauma nthĩnĩ wakwa.” 47Yĩla ũla mũndũ mũka wamanyie kana ndatonya kwĩvithĩkya, nĩweeyumĩlilye athĩlĩĩte atulya ndu mbee wa Yesũ. Vau mbee wa andũ onthe nĩwatavanisye kĩla kyatuma amũkwata, na ũndũ wavow'a o vau kwa vau. 48Yesũ nĩwamwĩie atĩĩ, “Mwĩĩtu wakwa, nĩwavow'a nũndũ wa mũĩkĩĩo waku; enda na mũuo.”

49Yesũ o aendee kũneena, mũndũ ũmwe nĩwookie aumĩte mũsyĩ kwa ũla mũtongoi wa nyũmba ya Ayuti ya kũthaithĩa na kũmbanĩa, na eea mũtongoi ũsu atĩĩ, “Kelĩtu kaku nĩkakw'a; eka kũtinda ũinyamasya Mũmanyĩsya.”

50Yĩla Yesũ weewie ũu, nĩweeie Yailasi atĩĩ, “Ndũkethĩwe na w'ĩa! Ĩkĩĩa tũ na kelĩtu kaku nĩkeũseũva.”

51Yĩla Yesũ wavikie mũsyĩ ũsu, ndaaĩtĩkĩlya mũndũ alike nyũmba vamwe nake ate o Vetelo, Yoana, Yakovo, na ĩthe na inyia wa kelĩtu kau. 52Andũ onthe kũu nĩmaĩaa na kua mbu nũndũ wa kelĩtu kau. Yesũ nĩwameie atĩĩ, “Ekai kũĩa, kelĩtu ti kakw'ũ, kekĩte kũkoma!”

53Nĩmamũthekeeie mũno nũndũ nĩmeesĩ kana kelĩtu kau nĩ kakw'ũ. 54Ĩndĩ Yesũ akakwata kw'oko na eetana, “Kana, amũka!” 55Nĩkasyũkie na kookĩla o vau kwa vau. Nĩvo ĩndĩ Yesũ wameie nĩmakanenge kĩndũ kaye. 56Asyai mako nĩmaseng'ie mũno, ĩndĩ Yesũ ameaĩa maikatavye mũndũ ũndũ kweekĩka.

Currently Selected:

Lk 8: KAMBA

Highlight

Copy