Lk 19

Yesũ na Sakayo

1Yesũ nĩwalikile ndũanĩ ya Yeliko ĩndĩ o avĩtĩte. 2Vaĩ mũndũ ũmwe ndũanĩ ĩsu weetawa Sakayo waĩ mumĩthya mũnene wa koti na waĩ mũthwii mũno. 3Nĩwendaa kwona Yesũ amanye nĩwe ũũ, ĩndĩ ndaatonya kũmwona nũndũ wa wingĩ wa andũ, na kwongela aĩ mũkuvĩ mũno. 4Kwoou nĩwasembie aendaa mbee na alĩsa mũkũyũnĩ nĩ kana atonye kũmwona Yesũ, nũndũ aĩ esĩle nzĩanĩ ĩsu. 5Yĩla Yesũ wavikie vau, nĩwasyaisye ĩũlũ na amwĩa atĩĩ, “Sakayo, Uma mĩtũkĩ; ũmũnthĩ no nginya ndinde mũsyĩ kwaku.”

6Sakayo nĩwaumie mũtĩnĩ mĩtũkĩ, athi amũthokya Yesũ e na ũtanu mwingĩ. 7Yĩla andũ onthe moonie ũu, nĩmanyungunyĩisye mayasya atĩĩ, “Mũndũ ũũ athi kwĩthĩwa mũeni wa mũndũ mũvĩtany'a!”

8Ĩndĩ Sakayo nĩwaũngamie na eea Mwĩai atĩĩ, “Ĩthukĩĩsye Mwĩai, nyie nĩngũnenga ngya nyusu ya ũthwii wakwa, na ethĩwa ve mũndũ naavena kĩndũ, nĩngũmũtũngĩa mavinda ana ma kĩndũ kĩu.”

9Yesũ nĩwaisye atĩĩ, “Ũmũnthĩ ũtangĩĩo nĩwalika mũsyĩnĩ ũũ, nũndũ mũndũ ũũ o nake nĩ nzyawa ya Avalaamu. 10#Mat 18.11 Nĩkwĩthĩwa Mwana wa Mũndũ ookie kũmantha na kũtangĩĩa andũ ala au.”

Ngelekany'o ya Athũkũmi Manengiwe Mbesa sya Thaavu Matandĩthye

(Mat 25.14-30)

11 # Mat 25.14-30 Andũ o maendee na kwĩthukĩĩsya maũndũ asu, Yesũ nĩwamatavisye ngelekany'o. Aĩ vakuvĩ kũvika Yelũsalemu na andũ masũanĩaa kana ũsumbĩ wa Ngai nũkwambĩĩa o mĩtũkĩ. 12Nĩwameie atĩĩ, “Kwaĩ mũndũ ũmwe wa nyũmba ya kĩ-ũsumbĩ waendaa kyalo nthĩ yĩ kũasa, akatw'ĩkĩthw'e mũsumbĩ na aisyoka. 13Atanamba kũthi, nĩweetie athũkũmi make ĩkũmi amanenga kĩla ũmwe mbesa sya thaavu na amea atĩĩ, ‘Tandĩthyai mbesa ii kũvika yĩla nĩũka.’ 14Mũndũ ũsu nĩwamenetwe nĩ andũ, na kwoou matũma andũ mamume ĩtina mathi makasye, ‘Tũikwenda mũndũ ũũ atw'ĩke mũsumbĩ waitũ.’

15“Yĩla wasyokie mũsyĩ amina kũtw'ĩkĩthw'a mũsumbĩ, nĩwatũmanie ala athũkũmi moke, nĩ kana amanye ũndũ matandĩthĩtye mbesa syake.

16“Ũla wa mbee nĩwookie na amwĩa atĩĩ, ‘Mũnene, mbesa syaku nĩnĩnaitandĩthisye nakwata ingĩ ĩkũmi.’ 17Nake amwĩa, ‘Wĩkĩte nesa; we wĩ mũthũkũmi mũseo! Nũndũ ũneethĩiwe wĩ wa kwĩkwatw'a ũndũnĩ mũnini, nĩkũnenga kũũngamĩa ndũa ĩkũmi.’ 18Wa kelĩ nake nĩwookie na amwĩa atĩĩ, ‘Mũnene, mbesa syaku nĩnaitandĩthisye nakwata ingĩ itano.’ 19Nĩwamwĩie ũsu nake, ‘Naku nĩkũnenga kũũngamĩa ndũa itano.’

20“Nĩvo ĩndĩ mũthũkũmi ũngĩ wookie amwĩa atĩĩ, ‘Mũnene, mbesa syaku nii vaa; nasyoveeie kĩtambaanĩ naivitha vo. 21Nyie nĩnĩnaũkĩaa nũndũ we wĩ mũndũ mũmũ mũno; wosaa syĩndũ ite syaku na ũkethaa kĩla ũtaavanda.’ 22Mũnene ũsu amwĩa, ‘Nĩkũsilĩla o na ndeto syaku we mũthũkũmi ũũ. Nĩwĩsĩ nĩ mũndũ mũmũ mũno na nosaa syĩndũ ite syakwa, na kũkethaa kĩla ndaavanda! 23Waleaa ĩndĩ kũtwaa mbesa syakwa vengi nĩkĩ, na nasyoka nĩthĩwa nĩnasyosie syĩ na ũsyao?’

24“Nĩvo ĩndĩ wameie ala maũngyĩ nake vau atĩĩ, ‘Mũvenei mbesa isu mũnenge ũla mũthũkũmi wĩ na ĩkũmi.’ 25Ĩndĩ andũ asu mamwĩa, ‘Mũnene, mbona ũsu e na ĩkũmi!’ 26#Mat 13.12; Mk 4.25; Lk 8.18 Nake amasũngĩa amea, ‘Ekai nĩmũtavye, mũndũ ũla wĩ na kĩndũ akongeleelwa ingĩ mbingĩ, ĩndĩ ũla ũte na kĩndũ o na kala kanini wĩthĩwa e nako akavenwa. 27Yu ĩndĩ ala amaitha makwa matendaa ngĩtw'ĩka mũsumbĩ woo, maetei vaa mũmoaĩe mbee wakwa!’ ”

Yesũ Ailika Yelũsalemu ta Mũsumbĩ

(Mat 21.1-11; Mk 11.1-11; Yoa 12.12-19)

28Yesũ amina kũneena ndeto isu, nĩwatongoeisye andũ elekele Yelũsalemu. 29Yĩla wathengeeie ndũa yĩtawa Mbethivake na ĩngĩ yĩtawa Mbethani, vakuvĩ na Kĩĩma kya Mĩthata, nĩwatũmie amanyĩw'a make elĩ, 30amea atĩĩ, “Endai ndũanĩ ĩya yĩ mbee wenyu, na mũilika nĩmũkwona ndena ya ĩng'oi ĩtaakua mũndũ yĩ mbove. Mĩthasyei na mũimĩete vaa. 31Mwakũlw'a nĩ mũndũ, ‘Mwĩmĩthasya yakĩ?’ Mũtavyei, ‘Mwĩai e na vata nayo.’ ”

32Kwoou nĩmaendie na mamyona o ũndũ wamatavĩtye. 33Maendee na kũthasya ndena ĩsu, ene mayo nĩmamakũlilye atĩĩ, “Mwĩmĩthasya yakĩ?”

34Namo masũngĩa masya, “Mwĩai e na vata nayo.” 35Nĩmatwaĩie Yesũ ndena ĩsu. Nĩvo ĩndĩ mailĩĩile ngũa syoo mũongo kwayo, na mamũtetheesya kũtũla ĩũlũ. 36Yesũ aendete akuĩtwe nĩ ndena ĩsu, andũ nĩmalanilye ngũa syoo kũu nzĩanĩ.

37Athengee mũsyĩ wa Yelũsalemu e kĩtheeonĩ kya Kĩĩma kya Mĩthata, ĩkomano yonthe ya amanyĩw'a make nĩyambĩĩie kũtũngĩa Ngai mũvea, na kũmũkatha nũndũ wa maũndũ manene onthe ala moonete. 38#Sav 118.26 Nĩmaasya atĩĩ, “Nĩ mũathime mũsumbĩ ũla wũkĩte ĩsyĩtwanĩ ya Mwĩai! Mũuo wĩthĩwe ĩtunĩ, na ũkumyo kwa Ngai ĩũlũ ĩtunĩ!”

39Nĩvo ĩndĩ Avalisi amwe maĩ ĩkomanonĩ yĩu mamwĩie Yesũ atĩĩ, “Mũmanyĩsya, kany'a amanyĩw'a aa maku mavindye.”

40Nake Yesũ amasũngĩa amea atĩĩ, “Aa makavindya, mavia nĩkũneena na wasya mũnene.”

Yesũ Ayĩĩa nũndũ wa Yelũsalemu

41Yĩla Yesũ wathengeeie mũsyĩ wa Yelũsalemu na awona, nĩwaĩie nũndũ waw'o 42ayasya atĩĩ, “Kethĩwa ũmũnthĩ nũmanya kĩla kĩtonya ũkũetee mũuo! Ĩndĩ nĩ kĩvithe ndũkyona. 43Ĩvinda nĩyũkĩte yĩla amaitha maku makomba ivumbu ikũthyũlũlũkĩte. Makakũthyũlũlũka na maikũvinganĩsya kuma ngalĩko syonthe. 44Makakwananga vyũ vamwe na andũ ala matũaa nthĩnĩ waku. Vai ĩvia makatia mataomboete. Makeeka ũu nũndũ ndwaaenda kũmanya ĩvinda yĩla Ngai wookie akwovosye.”

Yesũ Ailũngya Andũ Mathooeasya Syĩndũ Ĩkalũnĩ

(Mat 21.12-17; Mk 11.15-19; Yoa 2.13-22)

45Nĩvo ĩndĩ Yesũ waendie alika Ĩkalũnĩ, na ambĩĩa kũlũngya andũ ala mathooeasya syĩndũ vo 46#Ĩsa 56.7; Yel 7.11 akĩmea atĩĩ, “Maandĩko Matheu maĩtye, ‘Nyũmba yakwa nĩ nyũmba ya kũvoyea,’ nayu kwa sisyai, mũmĩtw'ĩkĩthĩtye vandũ va kwĩvithaa avutani.”

47 # Lk 21.37 Yesũ nĩwamanyĩasya Ĩkalũnĩ kĩla mũthenya. Athembi anene na amanyĩsya ma Mĩao na atongoi ma andũ nĩmamanthaa ũndũ matonya kũmũaa, 48ĩndĩ mayaaona nzĩa meka ũu, nĩkwĩthĩwa andũ onthe matindaa mamwĩthukĩĩsye matekwenda kũvĩtũkwa nĩ kateto.

Currently Selected:

Lk 19: KAMBA

Highlight

Copy