Mwa 31

Yakovo e na Andũ make na Indo Mayuma kwa Lavani Mevithĩte

1Yakovo nĩweewie kana ana ma Lavani maasyaa atĩĩ, “Yakovo nĩwosete syĩndũ syonthe sya ĩthe waitũ, na akwatĩte ũthwii ũũ w'onthe kumana na syĩndũ isu.” 2O ta ũu Yakovo nĩwoonie kana Lavani ndamwĩw'ĩaa mũyo ũndũ wamwĩw'ĩaa vau mbeenĩ. 3Nĩvo ĩndĩ Mwĩai Ngai weeie Yakovo atĩĩ, “Syoka nthĩ ya aaĩthe maku na kwa andũ maku na ngeethĩwa vamwe naku.”

4Kwoou Yakovo nĩwatũmanie Laeli na Lea moke kĩsesinĩ vala waĩthĩasya indo syake. 5Nĩwameie atĩĩ, “Nĩnĩmanyĩte kana ĩthe wenyu ndeũmbĩw'ĩa mũyo ũndũ wambĩw'ĩaa vau mbeenĩ, ĩndĩ Ngai wa ĩthe wakwa ethĩĩtwe vamwe nakwa. 6Inyw'ĩ nĩmwĩsĩ kana nĩnthũkũmĩte kwa ĩthe wenyu na vinya wakwa w'onthe, 7ĩndĩ ũu wĩ o vo nũngengete na akaola ndĩvi yakwa mavinda ĩkũmi, ĩndĩ Ngai ndaamũeka ambĩke naĩ. 8Yĩla waisye, ‘Indo ila syĩ malavata ĩkeethĩwa ĩtuvi yaku’, indo syonthe syasyaie tũtena twĩ malavata, na yĩla waisye, ‘Ila syĩ nzoa ikeethĩwa ĩtuvi yaku;’ indo syonthe syasyaie tũtena twĩ nzoa. 9Ũu nĩw'o Ngai woosie indo sya ĩthe wenyu na anenga syĩthĩwe syakwa.

10“Ĩvindanĩ yĩla indo ikuaa ĩvu nĩnaotie ndoto, na ndotonĩ yakwa noona nthenge ila syatũlaa ila nga syaĩ na nzoa, ndonatoni na malavata. 11Nĩvo ĩndĩ mũlaĩka wa Ngai waneenie nakwa ndotonĩ ĩsu na ambĩta, ‘Yakovo!’ Nakwa nasũngĩa, ‘Ĩĩ ninyioo.’ 12Nake ambĩa, ‘Sisya wone kana nthenge syonthe ila iendee kũtũla mbũi ila nga nĩ ila syĩ nzoa, ndonatoni, na malavata. Nĩekete ũu wĩkĩke nũndũ nĩnonete ũndũ Lavani ũendee na ũkwĩka. 13#Mwa 28.18-22 Nyie ninyie Ngai ũla wakumĩlĩĩle yĩla waĩ Mbethi-eli, vala wetĩkĩisye ĩvia mauta wayĩvatha yĩthĩwe ta ũlilikany'o, na vala weevĩtie mbee wakwa. Yu uma nthĩ ĩno ũsyoke nthĩ ĩla wasyaĩwe.’ ”

14Laeli na Lea nĩmasũngĩie Yakovo mamwĩa atĩĩ, “Vai kĩndũ o na kĩmwe kĩtialĩte ta ũtiĩwa witũ kwa ĩthe waitũ. 15Atũtalaa ta twĩ aeni, nĩwatũthooisye, nayu nũtũmĩĩte mbesa syonthe ila waĩviwe kwondũ witũ. 16Ũthwii w'onthe ũla Ngai woosie kuma kwa ĩthe waitũ nĩ witũ na syana sitũ. Kwoou ĩka kwĩanana na ũndũ Ngai ũkwĩĩte.”

17Kwoou Yakovo nĩweeyũmbanisye na atũlya syana na iveti syake ngamĩlenĩ. 18Nĩwaingie indo syake syonthe, na akua syĩndũ syake syonthe ila woombanĩtye e kũu Mesovotamia, nĩ kana asyoke kwa ĩthe wake Isaka nthĩ ya Kanaani. 19Yĩla Lavani waendie kũtila malondu make w'ĩa, Laeli nĩwooyie ngai sya mĩvw'anano sya mũsyĩ wa ĩthe wake. 20Yakovo nĩwamwĩvithie Lavani kwa kũlea kũmũtavya kana we nĩwavangĩte kũthi. 21Kwoou nĩwoosie syĩndũ syonthe ila waĩ nasyo, na akĩa athi. Nĩwaingie Ũsĩ wa Euvalati na athi elekele nthĩ yĩ ngalĩko ya nthĩ yĩ iĩma yĩtawa Ngileati.

Lavani Aimũatĩĩa Yakovo

22Ĩtina wa mĩthenya ĩtatũ Lavani nĩwataviw'e kana Yakovo nũnakĩie athi. 23Lavani nĩwaendanisye na ana-a-ĩthe make mamũatĩĩa Yakovo vandũ va mĩthenya mũonza, na mamwĩthĩĩla nthĩ yĩ iĩma ya Ngileati. 24Ĩndĩ Ngai nĩwamũkĩie Lavani ndotonĩ ũtukũ ũsu na amwĩa, “Ĩsũvĩe kũneena ũndũ o na wĩva ũtelemye Yakovo.” 25Yakovo ambĩte maeema make nthĩ yĩ iĩma ya Ngileati yĩla Lavani wavikie vala waĩ. Lavani na ana-a-ĩthe make o namo nĩmambie maeema moo vau.

26Lavani nĩwakũlilye Yakovo atĩĩ, “Ũnangengie nĩkĩ, na wakua eĩtu makwa ta aka matavĩtwe kuma kaũnĩ? 27Ũnangengie nĩkĩ na weevitha wathi ũtandavĩtye? Kethĩwa nũnandavĩtye nĩthĩwa nĩnakumaaisye na ũtanu, mbathi, ndambulĩnĩ na ngitaa ikũnĩtwe. 28O na ndũnaĩ ũeka ngakethya esũkũũa na eĩtu makwa na ngethi ya wendo ya kũtaanĩsya? Ũu ũneekie nĩ ũndũ wa ũtumanu! 29Nĩna ũtonyi wa ũkwĩka naĩ, ĩndĩ ũtukũ wa ĩyoo Ngai wa ĩthe waku nũnanganisye ndotonĩ ambĩa, ‘Ĩsũvĩe kũneena ũndũ o na wĩva ũtelemye Yakovo.’ 30Nĩnĩsĩ kana ũnaendie nũndũ nũnendaa mũno kũsyoka mũsyĩ, ĩndĩ ũu wĩ o vo ũnooyie ngai sya mĩvw'anano sya mũsyĩ wakwa nĩkĩ?”

31Nake Yakovo amũsũngĩa, “Nĩnĩnakĩaa nũndũ nĩneesilasya nũtonya kũmbena eĩtu maku. 32Ĩndĩ weethĩa mũndũ o na wĩva e na ngai isu syaku, ũsu nĩoawe. Andũ ma mũsyĩ wakwa na ma mũsyĩ waku masyaĩĩsye, mantha kana ve kĩndũ kyaku nĩ nakyo, na wakĩthĩa ũikyosa.” Yakovo ndeesĩ kana Laeli nĩwe wooyĩte ngai isu.

33Kwoou Lavani nĩwalikile amantha ĩeemanĩ ya Yakovo, ya Lea, na ya ala aka elĩ athũkũmi, ĩndĩ ndaaona ngai syake. Auma ĩeemanĩ ya Lea nĩwaendie alika yĩla ya Laeli. 34Laeli oosete ngai isu akasyĩkĩa matandĩkonĩ ma ngamĩle na akasyĩkalĩla. Lavani nĩwaimanthie kĩla vandũ ĩeemanĩ yĩu, ĩndĩ ndaasyona. 35Laeli nĩweeie ĩthe wake atĩĩ, “Nau, ndũkathate nũndũ wa kwona ndekũũngama mbee waku, nũndũ nĩ mweinĩ wakwa.” Kwoou Lavani nĩwaendeeie na kũmantha ngai isu, ĩndĩ ndaasyona.

36Yakovo nĩwathatie na athũkĩa Lavani aimwĩa, “Nĩkĩte ĩvĩtyo yĩva? Nĩ naĩ myaũ nĩkĩte nĩ kana ũngatĩĩe mũno wĩana ũu? 37O na kau wavavata mĩionĩ yakwa yonthe, weethĩa kyaũ kya mũsyĩ waku? Ia kĩndũ kĩu vaa mbee wa andũ ma mũsyĩ wakwa na ma mũsyĩ waku, nĩ kana matũsilany'e twĩ elĩ ũla wĩ mavĩtyo nũũ. 38Nĩkalanĩtye naku vandũ va myaka mĩongo ĩlĩ. Vai ĩmwe ya mbũi kana malondu maku yaavuna, o na ndyaaya ndũũme kuma malondunĩ maku. 39Ndyaakũetee ĩmwe ya indo syaku yũaĩtwe nĩ nyamũ mbai; wasyo ũsu weethĩawa ĩũlũ wakwa. Nĩwanandũaa na ndikũĩva indo ila syooywa ũtukũ kana mũthenya. 40Nĩnavĩvaw'a nĩ syũa mũthenya, na ũtukũ ndyĩw'a mbevo mbingĩ, o na ndyaĩ ndonya kũkoma. 41Ũu nĩw'o nekalaa vandũ va myaka mĩongo ĩlĩ ĩla nekalile kwaku. Nathũkũmie kwaku vandũ va myaka ĩkũmi na ĩna nĩ kana ũnenge eĩtu maku elĩ, na nathũkũma myaka thanthatũ nĩ kana ũnenge indo, na ũu wĩ o vo nĩwavĩndũie ĩtuvi yakwa mavinda ĩkũmi. 42Kethĩwa Ngai wa aaĩthe makwa, Ngai wa Avalaamu na wa Isaka ndaĩ vamwe nakwa, wĩthĩwa wandũngilye ngathi nde na kĩndũ. Ĩndĩ Ngai nĩwonete thĩna wakwa, na wĩa ũla nĩthũkũmĩte na kwoou ũtukũ wa ĩyoo nũkũtavisye mavĩtyo maku.”

Ũtianĩo katĩ wa Yakovo na Lavani

43Lavani nĩwasũngĩie Yakovo amwĩa atĩĩ, “Eĩtu aa nĩ makwa, na syana syoo nĩ syakwa, indo ii nĩ syakwa, na syĩndũ ii ũkwona nĩ syakwa. Ĩndĩ nũndũ vai ũndũ ndonya kwĩka nĩ kana nĩkalany'e na eĩtu aa makwa na syana syoo, 44ũka tũseũvye ũtianĩo, wĩthĩwe ũkũsĩ katĩ waku nakwa.”

45Kwoou Yakovo nĩwoosie ĩvia na ayĩnzĩla ta ĩvia ya ũlilikany'o. 46Yakovo nĩweeie andũ ma mũsyĩ wake atĩĩ, “Ũmbany'ai mavia.” Nĩmoosie mavia na mamomba mbumbu, na onthe maĩsanĩa lĩu me vakuvĩ na mavia asu. 47Lavani nĩweetie mbumbu ĩsu Yekali-saatutha, ĩndĩ nake Yakovo amĩta Ngaleeti. 48Lavani nĩweeie Yakovo atĩĩ, “Mbumbu ĩno ya mavia ĩkeethĩawa ta ũlilikany'o kwitũ twĩ elĩ.” Kĩu nĩkyo kyatumie vandũ vau vetwa Ngaleeti. 49O ta ũu Lavani nĩwasyokie asya atĩĩ, “Mwĩai Ngai nĩasyaĩĩsye maũndũ ala nyie naku tũkwĩka yĩla tũkwĩkala kĩla ũmwe e vaasa na ũla ũngĩ;” kwoou vandũ vau nĩvasyokie veetwa Misiva. 50Lavani nĩwaendeeie na kũneena ayasya, “Ethĩwa ũkathĩny'a eĩtu makwa, kana ũtwae aka angĩ, o na vala nĩndonya kũlea kũmanya, lilikana kana Ngai nũtwene. 51Aa nĩmo mavia ala noombany'a katĩ wakwa naku, na yĩĩ nĩyo ĩvia ya ũlilikany'o. 52Mbumbu ĩno ya mavia, na ĩvia yĩĩ ya ũlilikany'o nĩ ũkũsĩ kana nyie ndikakĩla mbumbu ĩno nũke kũla ũĩ ngwĩke naĩ, naku ndũkamĩkĩla wũke kũla nĩĩ ũmbĩke naĩ. 53Ngai wa Avalaamu, na Ngai wa Naoli, ũla nĩwe Ngai wa aaĩthe moo nĩatũsilanasye.” Nĩvo ĩndĩ Yakovo weevĩtie na ĩsyĩtwa ya Ngai ũla wathaithawa nĩ ĩthe wake Isaka kana akeanĩasya ũtianĩo ũsu. 54Yakovo nĩwathembeie nthembo ya kũvĩvya kĩĩmanĩ kĩu, na eeta andũ ma mũsyĩ wake maye lĩu vamwe. Ĩtina wa kũya nĩmekalile kĩĩmanĩ kĩu nginya kwakya. 55Ũnĩ ũsu kwakya tene Lavani nĩwakethisye esũkũũe na eĩtu make na ngethi ya wendo na amaathima. Nĩvo ĩndĩ wamatiie enũka.

Currently Selected:

Mwa 31: KAMBA

Highlight

Copy