Mwa 30

1Yĩla Laeli woonie kana ndaamũsyaĩa Yakovo syana, nĩweew'ĩie mwĩĩtu-a-inyia kĩwĩu na eea Yakovo atĩĩ, “Nenga syana, na ethĩwa ti ũu nĩngũkw'a”

2Yakovo nĩwathatĩie Laeli mũno na amwĩa, “Nyie nditonya kwosa mwanya wa Ngai. Ngai nĩwe ũkũsiĩĩe kũsyaa.”

3Nake Laeli amwĩa, “Osa Mbila mũthũkũmi wakwa ũmanyane kĩ-mwĩĩ nake nĩ kana anzyaĩe kana. Kwa nzĩa ĩsu nĩngũkwata syana kwĩsĩla kwake.” 4Kwoou nĩwanenganie Mbila kũla kwĩ Yakovo, nake amanyana kĩ-mwĩĩ na Mbila. 5Mbila nĩwaitavie na asyaĩa Yakovo kavĩsĩ. 6Nĩvo ĩndĩ Laeli waisye atĩĩ, “Ngai nũndalĩle kwĩthĩwa ndena ĩvĩtyo. Nĩwĩw'ĩte mboya syakwa na akanenga kavĩsĩ;” kwoou nĩweetie kana kau Ndani. 7Mbila nĩwaitavie ĩngĩ na asyaĩa Yakovo kavĩsĩ kangĩ. 8Nake Laeli asya atĩĩ, “Nĩnĩsindanĩte mũno na mwĩĩtu-a-ia, ĩndĩ nĩnzindĩte;” Kwoou nĩweetie kana kau Navutalĩ.

9Yĩla Lea wamanyie kana nũekete kũsyaa, nĩwanenganie Nziliva mũthũkũmi wake wa mũndũ mũka kũla kwĩ Yakovo ethĩwe mũka wake. 10Nziliva nĩwasyaĩie Yakovo kavĩsĩ, 11nake Lea asya atĩĩ, “Nĩna vaati nzeo;” kwoou nĩweetie kana kau Ngandi. 12Nziliva nĩwasyaĩie Yakovo kavĩsĩ kangĩ. 13Nake Lea asya atĩĩ, “Nĩna ũtanu mũnene! Yu iveti ikambĩtaa mũtanu;” kwoou nĩweetie kana kau Aseli.

14Ĩvinda ya ngetha ya nganũ yĩendee, Lũveni nĩwaendie mũũndanĩ na eethĩa mũtĩ wa kũtetheesya iveti kũitava, na amũetee inyia wake Lea. Nĩvo Laeli weeie Lea, “Mwa nenga yĩmwe ya matunda ala mwana waku waete.”

15Nake Lea amũkũlya, “Ndwĩmwĩanĩe nĩ kwosa mũũme wakwa? Yu wĩenda kwosa matunda ma mwana wakwa?”

Laeli amwĩa atĩĩ, “Wanenga matunda asu, ũtukũ wa ũmũnthĩ Yakovo nũkũkomela kwaku.”

16Yĩla Yakovo waumie mũũndanĩ ĩa wĩoo, Lea nĩwamũthaũie na amwĩa, “No nginya ũtukũ wa ũmũnthĩ ũkomele kwakwa, nũndũ nĩngũthooie na matunda ma mũtĩ wa kũtetheesya iveti kũitava ma mwana wakwa.” Kwoou ũtukũ ũsu Yakovo nĩwamanyanie kĩ-mwĩĩ na Lea.

17Ngai nĩweewie mboya sya Lea, na Lea aitava na asyaĩa Yakovo kavĩsĩ ka katano. 18Nĩvo ĩndĩ Lea waisye atĩĩ, “Ngai nĩwanenga ĩtuvi yakwa nũndũ nĩnanenganie mũthũkũmi wakwa wa mũndũ mũka kũla kwĩ mũũme wakwa;” kwoou nĩweetie kana kau Isakali. 19Lea nĩwaitavie ĩngĩ na asyaĩa Yakovo kavĩsĩ ka thanthatũ. 20Nake Lea asya atĩĩ, “Ngai nĩwanenga mũthĩnzĩo mũseo. Yu mũũme wakwa nũkũmbĩtĩkĩla, nũndũ nĩnĩmũsyaĩe syana thanthatũ;” kwoou nĩweetie kana kau Nzevuluni. 21Ĩtina Lea nĩwasyaie kelĩtu, na aketa Ndina.

22Nĩvo ĩndĩ Ngai walilikanile Laeli. Nĩweewie mboya syake, na amũnenga ũtonyi wa kũsyaa. 23Laeli nĩwaitavie na asyaa kavĩsĩ. Nake asya, “Ngai nĩwambetangĩa nthoni syakwa. 24Mwĩai Ngai nĩanenge kana kangĩ ka kavĩsĩ;” kwoou nĩweetie kana kau Yosevu.

Yakovo na Lavani mayĩw'ana ĩũlũ wa Ĩtuvi

25Ĩtina wa Laeli asyaa Yosevu, Yakovo nĩweeie Lavani, “Eka nĩthi nĩsyoke mũsyĩ kwitũ. 26Nenge iveti syakwa na syana syakwa ila nĩkwatĩte kwa kũthũkũma vaa kwaku na ũindeka nĩthi. We nĩwĩsĩ ũndũ nĩthũkũmĩte vaa kwaku nesa wĩana.”

27Lavani nĩweeie Yakovo atĩĩ, “Nĩngũkwĩsũva ũendee kwĩkala vaa kwakwa. Nĩnĩmanyĩte kana Mwĩai Ngai nũngathimĩte nũndũ waku. 28Weta kĩla ũkwenda ngũĩve, nakwa nĩngũkũĩva.”

29Yakovo amwĩa, “We nĩwĩsĩ ũndũ nĩthũkũmĩte vaa kwaku, na ũndũ indo syaku ĩendee nesa nũndũ wakwa. 30Waĩ na indo nini nyie ndanamba kũka, ĩndĩ nĩsyongelekete mũno. Mwĩai Ngai nĩwongelaa ndĩthya yaku kũndũ kw'onthe kũla nĩendaa kũmĩĩthya. Ĩndĩ nakwa ngamanthĩa andũ ma mũsyĩ wakwa ĩndĩĩ?”

31Lavani amũkũlya, “Wĩenda ngũĩve kyaũ?”

Nake Yakovo amũsũngĩa, “Ndikwenda ĩtuvi o na yĩmwe, nĩngũendeea kũĩthya indo syaku ethĩwa nũĩtĩkĩla woni ũũ: 32Eka nĩvĩtĩle ndĩthyanĩ yaku yonthe ũmũnthĩ na ngĩvatha malondu onthe ala me na ndonatoni na malavata, na tũtena twamo tũla twiũ na o ta ũu ngĩvatha mbũi ila syĩ ndonatoni na malavata. Yĩu nĩyo ĩtuvi yĩla ngwenda. 33Ĩvindanĩ yũkĩte ũkamanya kana nĩnĩthĩĩtwe nĩ mũĩkĩĩku kwaku yĩla wĩũka na kũsisya kĩla wanduvie. Ethĩwa ũkeethĩa katĩ wa mbũi na malondu makwa imwe ite na ndonatoni kana malavata, kana tũtena twa malondu tũte twiũ, wĩmanya kana isu nĩnũyĩte.”

34Lavani asũngĩa, “Nĩneetĩkĩla. Twĩke kwĩanana na woni waku.” 35Ĩndĩ mũthenyanĩ o ũsu Lavani nĩwavetangie nthenge syonthe ila syaĩ na nzoa na ndonatoni, na mbũi nga syonthe ila syaĩ na malavata na ndonatoni, kana syaĩ na kũndũ kweũ. O ta ũu nĩwavetangie tũtena twa malondu tũla twaĩ twiũ. Nĩwanengie ana make indo isu syonthe maisũvĩe. 36Nĩwaendie kyalo kya matukũ atatũ atwaa indo isu vaasa na Yakovo, nake Yakovo atiwa aiĩthya indo ila ingĩ sya Lavani.

37Yakovo nĩwatũlile mĩtĩ mĩũ ya mũlivina, ya mũlosi, na ya mũalamoni, na amĩsyũlya nĩ kana nzoa nzaũ syumĩle mĩtĩnĩ ĩsu. 38Nĩwaiie mĩtĩ ĩsu wasyũlĩtye syĩndũnĩ sya kwĩkĩĩa indo kĩw'ũ nĩ kana yĩthĩwe yĩ mbee wa indo isu yĩla iũnyw'a kĩw'ũ, na nũndũ indo syakuaa mavu yĩla syooka kũnyw'a kĩw'ũ, 39nĩsyatũlanaa isyaĩtye mĩtĩ ĩsu, na kwoou iisyaa tũtena twĩ na nzoa, kana malavata, kana ndonatoni.

40Yakovo nĩwavathie malondu make ala meeteelete kũkua ĩvu, na amanenga kĩw'ũ manyw'e masyaĩtye malondu ala maĩ na nzoa na ala maiũ ma ndĩthya ya Lavani. Kwa kwĩka ũu nĩwakwatie ndĩthya yake mwene, na amĩvathany'a na ĩla ya Lavani.

41Ĩvinda ya kũkua ĩvu yavika ya malondu ala me mwĩĩ mũseo, Yakovo nĩwaiaa mĩtĩ ĩsu mbee wamo, nthĩnĩ wa syĩndũ sya kũnyw'ĩĩa kĩw'ũ nĩ kana malondu asu makue ĩvu me vau ve mĩtĩ ĩsu. 42Ĩndĩ ndaiaa mĩtĩ ĩsu mbee wa mbũi na malondu ala monzu. Kwoou Lavani nĩweethĩiwe na mbũi na malondu ala monzu, nake Yakovo eethĩwa na ala me mwĩĩ mũseo. 43Kwa nzĩa ĩsu Yakovo nĩwathuie mũno. Aĩ na indo mbingĩ, athũkũmi ma aũme na ma aka, ngamĩle na mang'oi.

Currently Selected:

Mwa 30: KAMBA

Highlight

Copy