Mwa 17
17
Nzaĩko ta Wonany'o wa Ũtianĩo
1Yĩla Avalamu wavikisye ũkũũ wa myaka mĩongo kenda na kenda, Mwĩai Ngai nĩwamumĩlĩĩle na amwĩa atĩĩ, “Ninyie Ngai Mwene Ũtonyi W'onthe. Ĩkalaa wĩna kĩkĩo kyakwa na ũyĩkaa ũla waĩlu. 2Nĩngũseũvya ũtianĩo wakwa naku na ngaingĩvya nzyawa syaku mũno.” 3Avalamu nĩwakumanie atina nthĩ na ũthyũ nake Ngai amwĩa atĩĩ, 4“Nĩngũseũvya ũtianĩo ũũ wakwa naku: Ũkeethĩwa ĩthe wa mbaĩ mbingĩ sya andũ. 5#Alo 4.17 Ndũkambĩla kwĩtwa Avalamu#17.5 Avalamu: Ũalyũlo wa ĩsyĩtwa yĩĩ nĩ Ĩthe wĩ nguma. ĩndĩ ũkeetawa Avalaamu#17.5 Avalaamu: Ũalyũlo wa ĩsyĩtwa yĩĩ nĩ Ĩthe wa andũ aingĩ. nũndũ nĩnakũtw'ĩkĩthya ĩthe wa mbaĩ mbingĩ sya andũ. 6Ngakũnenga nzyawa mbingĩ mũno na ikatw'ĩka mbaĩ mbingĩ sya andũ; andũ amwe katĩ wa nzyawa syaku makatw'ĩka asumbĩ.
7 #
Lk 1.55
“Ngeanĩasya ũtianĩo wakwa naku na nzyawa syaku ĩvinda yonthe yĩla yũkĩte ta ũtianĩo wa tene na tene. Ngeethĩawa Ngai waku na Ngai wa nzyawa syaku. 8#Meko 7.5 Ngakũnenga we na nzyawa syaku nthĩ ĩno wĩkalaa ta mũeni. Nthĩ yonthe ya Kanaani ĩkeethĩwa ya nzyawa syaku tene na tene nakwa ngeethĩwa Ngai woo.”
9Ngai nĩweeie Avalaamu atĩĩ, “We o naku na nzyawa syaku no nginya mwĩtĩkĩle kwĩanĩsya ũtianĩo wakwa ĩvindanĩ yonthe yĩla yũkĩte. 10#Meko 7.8; Alo 4.11 Ũũ nĩw'o ũtianĩo katĩ wakwa naku na nzyawa syaku syonthe ũla mũkeanĩasya: Aũme onthe nzyawanĩ syaku no nginya maĩkwe. 11No nginya mwaĩkwe, na ũu ũkeethĩawa wonany'o wa ũtianĩo katĩ wakwa nenyu. 12Ĩvindanĩ yonthe yĩla yũkĩte kĩla kana ka kavĩsĩ ke na ũkũũ wa mĩthenya nyanya no nginya kaĩkwe. Syana ila syaĩlĩte kwaĩkwa nĩ vamwe na ila isyaĩwe mĩsyĩnĩ kwenyu kana ila mũthooete na mbesa kuma kwa aeni ala mũte ũndũ mũileny'e namo. 13Kwoou syana isu syonthe no nginya syaĩkwe na ũndũ ũsu ũkeethĩawa ũvano wĩ mĩĩnĩ yenyu wa kwonany'a kana ũtianĩo wakwa nenyu nĩ wa tene na tene. 14Mũndũ-ũme o na wĩva ũla wĩlea kwaĩkwa, ndakatalwa ta ũmwe wa andũ makwa nũndũ nũleanĩte na ũtianĩo wakwa.”
15Ngai nĩwaneenie na Avalaamu ĩngĩ amwĩa atĩĩ, “Ndũkambĩle kwĩta mũka waku Salai, ĩndĩ mwĩtae Sala. 16Nĩngũmũathima na akakũsyaĩa kavĩsĩ. Nĩngũmũathima na kũmũtw'ĩkĩthya inyia wa mbaĩ mbingĩ sya andũ; amwe ma andũ asu makatw'ĩka asumbĩ.”
17Avalaamu nĩwakumanie ĩngĩ atina nthĩ na ũthyũ na ambĩĩa kũtheka yĩla wasũanĩie ayĩkũlya, “Mũndũ wĩ na myaka ĩana nũtonya kũkwata kana? Sala e na myaka mĩongo kenda nũtonya kũsyaa?” 18Nĩvo ĩndĩ Avalaamu wamwĩie Ngai atĩĩ, “Nenda kethĩwa no ũathime Ĩsumaeli ethĩwe mũtiĩwa wa syĩndũ syakwa.”
19Nĩvo ĩndĩ Ngai wamwĩie atĩĩ, “Ĩĩ now'o, ĩndĩ mũka waku Sala akakũsyaĩa kavĩsĩ, naku ũkaketa Isaka#17.19 Isaka: Ũalyũlo wa ĩsyĩtwa yĩĩ nĩ Ũla ũthekaa. Ngalũlũmĩĩlya ũtianĩo wakwa nake ta ũtianĩo wa tene na tene kwondũ wa nzyawa syake ila ikoka ĩtina wake. 20Nĩneew'a ũndũ ũkwenda ĩũlũ wa Ĩsumaeli, na kwoou nĩngũmũathima na kũmũnenga syana mbingĩ na nzyawa mbingĩ. Akeethĩwa ĩthe wa asumbĩ ĩkũmi na elĩ na nzyawa syake ikeethĩwa mbaĩ nene. 21Ĩndĩ ngalũlũmĩĩlya ũtianĩo wakwa na Isaka, mwana ũla Sala wĩkũsyaĩa mwaka ũla wũkĩte ĩvindanĩ ta yĩĩ.” 22Ngai amina kũneena na Avalaamu nĩwaendie amũtia.
23Mũthenyanĩ ũsu Avalaamu nĩweekie ũndũ Ngai wamwĩie na aĩka Ĩsumaeli mwana wake na aũme ala angĩ onthe mekalaa mũsyĩ kwake o vamwe na ala masyaĩwe mũsyĩ kwake na ala wathooete na mbesa. 24Avalaamu aĩkiwe e na ũkũũ wa myaka mĩongo kenda na kenda, 25na Ĩsumaeli mwana wake aĩkwa e na ũkũũ wa myaka ĩkũmi na ĩtatũ. 26Avalaamu na Ĩsumaeli maĩkiwe mũthenya ũmwe. 27O ta ũu aũme onthe ala mekalaa mũsyĩ kwake, ala masyaĩwe vo na ala wathooete na mbesa kuma kwa aeni nĩmaĩkiwe vamwe nake.
Currently Selected:
Mwa 17: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
