Mwa 16

Kũsyawa Kwa Ĩsumaeli

1Salai mũka wa Avalamu ndaĩ aamũsyaĩa syana. Ĩndĩ Salai aĩ na mũthũkũmi wa mwĩĩtu kuma nthĩ ya Misili weetawa Akali. 2Kwoou Salai nĩweeie Avalamu atĩĩ, “Mwĩai Ngai nũmbatĩte kwĩthĩwa na syana. Enda ũmanyane kĩ-mwĩĩ na mũthũkũmi wakwa wa mwĩĩtu; no kwĩthĩwa atonya kũnzyaĩa syana.” Avalamu nĩweetĩkĩlile ũndũ Salai wamwĩie. 3Ĩtina wa Avalamu kwĩkala nthĩ ya Kanaani vandũ va myaka ĩkũmi, Salai mũka wake nĩwoosie Akali mũthũkũmi wake wa mwĩĩtu kuma nthĩ ya Misili amũnengane kũla kwĩ Avalamu mũũme wake ethĩwe ta mũka wake. 4Avalamu nĩwamanyanie kĩ-mwĩĩ na Akali nake aitava. Yĩla Akali wamanyie kana nĩ mũito, nĩwambĩĩie kũvũthya Salai mũnene wake.

5Nĩvo ĩndĩ Salai weeie Avalamu atĩĩ, “Akali embũthya nũndũ waku. No inyie namũnenganie kwaku na ĩtina wa kũmanya kana nĩ mũito ambĩĩa kũmbũthya. Mwĩai Ngai nĩasilany'e ũla katĩ wakwa naku wĩ na ĩvĩtyo!”

6Avalamu asũngĩa, “Mũthũkũmi waku wa mwĩĩtu e ungu wa ũkũmũ waku; ĩkana nake ũndũ ũkwenda.” Salai nĩwathĩnisye Akali mũno nginya Akali akĩa athi.

7Mũlaĩka wa Mwĩai Ngai nĩwakomanĩie na Akali kĩthimanĩ kyaĩ weũnĩ nzĩanĩ ya kũthi Suli. 8Nĩwamũkũlilye atĩĩ, “Akali mũthũkũmi wa Salai, wumĩte va na ũendete va?”

Akali asũngĩa, “Nĩkĩĩte mũnene wakwa Salai.”

9Mũlaĩka amwĩa atĩĩ, “Syoka kũla kwĩ mũnene waku na ũimwĩnyivĩsya.” 10Na ĩngĩ mũlaĩka amwĩa Akali, “Ngaingĩvya nzyawa syaku mũno wĩthĩe o na vai mũndũ ũtonya kwitala. 11Yu wĩ mũito na ũkasyaa kavĩsĩ; ũkaketa Ĩsumaeli#16.11 Ĩsumaeli: Ũalyũlo wa ĩsyĩtwa yĩĩ nĩ Ngai nĩwĩw'aa nũndũ Mwĩai Ngai nĩweew'a kĩĩo kyaku kya thĩna. 12Mwana ũsu waku akeethĩwa ailyĩ ta ĩng'oi ya kĩthekanĩ, na akokitaa kĩla mũndũ na o ta ũu kĩla mũndũ akeethĩawa aimũkita. Akekala atekwĩw'ana na andũ ma mũsyĩ wake.” 13Akali nĩwasũanĩie na eekũlya, “Nyie nĩnoona Ngai na kwĩkala thayũ ĩtina wa kũmwona?” Nĩvo ĩndĩ wanengie Mwĩai Ngai ũsu waneenete nake ĩsyĩtwa amwĩta, “Ngai ũla Wonaa.” 14Kĩu nĩkyo kĩtumaa meta kĩthima kĩu kĩ katĩ wa Katesi na Mbeleti, “Kĩthima kya Ũla wĩ Thayũ Ũmbonaa.”

15 # Aka 4.22 Akali nĩwamũsyaĩie Avalamu kavĩsĩ, nake Avalamu eeta kana kau Ĩsumaeli. 16Ĩsumaeli aisyawa Avalamu aĩ na ũkũũ wa myaka mĩongo nyanya na thanthatũ.

Currently Selected:

Mwa 16: KAMBA

Highlight

Copy