Mat 9
9
Yesũ Aivosya Mũndũ waĩ na Mamutha Monzu
(Mk 2.1-12; Lk 5.17-26)
1Yesũ nĩwalikile ĩsiwanĩ ĩngĩ, asyoka ndũanĩ ĩla wekalaa. 2Vau andũ amwe nĩmamũeteie mũndũ e ũkomonĩ; mũndũ ũsu aĩ na mamutha monzu. Yesũ oona ũndũ me na mũĩkĩĩo ũnenevete, nĩweeie mũndũ ũsu waĩ na mamutha monzu atĩĩ, “Ndũkethĩwe na w'ĩa mwana wakwa, nĩwaekewa naĩ syaku.”
3Nĩvo ĩndĩ amanyĩsya amwe ma Mĩao mambĩĩie kwasya na ngoo, “Mũndũ ũũ nũkũuma Ngai!”
4Yesũ nĩwamanyie ũndũ meũsũanĩa na kwoou amakũlya atĩĩ, “Nĩkĩ mwĩ na mosũanĩo mathũkĩte ũu? 5Nĩ ũndũ wĩva ũla wĩ laisi: Nĩ kwasya, ‘Nĩwaekewa naĩ syaku,’ kana nĩ kwasya, ‘Ũkĩla ũthi?’ 6Nĩngũmwony'a yu kana Mwana wa Mũndũ e na ũtonyi wa kũekea andũ naĩ syoo kũũ nthĩ.” Kwoou nĩweeie mũndũ ũsu waĩ na mamutha monzu atĩĩ, “Ũkĩla! Osa ũkomo waku na ũyĩnũka!”
7Mũndũ ũsu nĩwookĩlile na enũka. 8Yĩla andũ moonie ũu nĩmaseng'ie mũno na mamũkumya Ngai, nũndũ wa kũnenga andũ ũtonyi wa mũthemba ũsu.
Yesũ Aimwĩta Mathayo Amũatĩĩe
(Mk 2.13-17; Lk 5.27-32)
9Yesũ nĩwaumie vau, na atembeangĩte nĩwoonie mũndũ weetawa Mathayo ailyĩ ovisinĩ wa kumĩthĩsya koti. Yesũ nĩwamwĩie atĩĩ, “Ngatĩĩa.”
Nake ookĩla na amũatĩĩa.
10 #
Lk 15.1-2
Masaa angĩ Yesũ akĩathĩw'a mũsyĩ kwa Mathayo, aumĩthya aingĩ ma koti na andũ angĩ eki ma naĩ nĩmookie na maathĩw'a vamwe nake na amanyĩw'a make. 11Yĩla Avalisi moonie ũu, nĩmakũlilye amanyĩw'a make atĩĩ, “Mũmanyĩsya wenyu eĩsanĩa na andũ ma mũthemba ũũ nĩkĩ?”
12Yesũ nĩweewie maikũlya, nake amasũngĩa amea atĩĩ, “Andũ mate awau mai na vata wa ndakĩtalĩ; ala me na vata wake no ala awau. 13#Mat 12.7; Osea 6.6 Endai mũkamanthe kĩla kĩũwetwa nĩ Maandĩko Matheu ala maĩtye, ‘Kĩla ngwenda nĩ andũ mew'anĩae tei, ĩndĩ ti kũmbumĩasya nthembo.’ Nyie ndyaaũka kwĩta andũ ala alũngalu, ĩndĩ nookie kwĩta avĩtany'a.”
Ĩkũlyo ĩũlũ wa Kũtĩĩa Kũya
(Mk 2.18-22; Lk 5.33-39)
14Amanyĩw'a ma Yoana Mũvatisi nĩmaendie vala ve Yesũ mamũkũlya atĩĩ, “Mbona ithyĩ na Avalisi nĩtũtĩĩa kũya mavinda kwa mavinda; nĩkĩ mo amanyĩw'a maku matatĩĩaa kũya?”
15Yesũ nĩwamakũlilye atĩĩ, “Anyanyae ma mũtwaani nĩmatonya kwĩthĩwa na kyeva mũtwaani eo vamwe namo? Aiee, vaitonyeka. Ĩndĩ ĩvinda nĩyũkĩte yĩla mũtwaani wĩvetangwa vala maĩ; ĩvindanĩ yĩu makatĩĩa kũya.
16“Vai mũndũ ũtumĩĩaa kĩlaka kyeũ ngũanĩ ngũũ. Akakĩtumĩĩa, no kĩtembũe ngũa ĩsu na vayĩthĩwa na ũtembũku mũnenange. 17O ta ũu, vai mũndũ wĩkĩaa ndivai nzaũ ikuunĩ ngũũ nũndũ ikuu isu ikaatũka, ndivai ĩsu yĩtĩke na ikuu iyanangĩka. Kwoou ndivai nzaũ yĩkĩawa ikuunĩ nzaũ, nĩ kana syelĩ isũvĩĩke.”
Mwĩĩtu wa Mũtongoi na Mũndũ Mũka ũla Wakwatie Ngũa ya Yesũ
(Mk 5.21-43; Lk 8.40-56)
18Yesũ aendee kũneena maũndũ asu, mũtongoi ũmwe Mũyuti nĩwookie, atulya ndu mbee wake na amwĩa atĩĩ, “Mwĩĩtu wakwa nĩwakw'a o mĩtũkĩ; ĩndĩ ũka ũkamwilĩĩle kw'oko na nũkũsyũka.”
19Yesũ nĩwookĩlile na aendany'a nake vamwe na amanyĩw'a make. 20Mũndũ mũka ũmwe wekalĩte ayumwa nĩ nthakame vandũ va myaka ĩkũmi na ĩlĩ nĩwaumie Yesũ ĩtina, athi akwata mũthya wa ngũa yake. 21Mũndũ mũka ũsu nĩwaneenete na ngoo akasya, “O na ethĩwa nĩkwata ngũa yake, nĩngũvoa.”
22Yesũ nĩwathyũũkie oona mũndũ mũka ũsu na amwĩa atĩĩ, “Ndũkethĩwe na w'ĩa mwĩĩtu wakwa; nĩwavow'a nũndũ wa mũĩkĩĩo waku.” O vau kwa vau nĩwavoie vyũ.
23Yĩla Yesũ wavikie mũsyĩ kwa ũla mũtongoi, na oona andũ ala mavuvaa mĩtũlilũ na andũ angĩ aingĩ mailonzany'a nĩ kyeva, 24nĩwameie atĩĩ, “Umai vaa inyw'onthe! Kelĩtu ti kakw'ũ kekĩte kũkoma!” Namo mamũthekeea mũno. 25Ĩndĩ andũ mamina kumaalũkw'a nza oou, Yesũ nĩwalikile nyũmba vala vaĩ kelĩtu kau, akakwata kw'oko, nako kookĩla. 26Ũvoo ũsu nĩwanyaĩĩkiw'e kĩla vandũ kĩsionĩ kĩu.
Yesũ Aivosya Ilalinda Ilĩ
27Yesũ nĩwaumie vau na aendete, ilalinda ilĩ nĩsyamũatĩĩie imwĩtĩte na wasya mũnene iyasya atĩĩ, “Mwana wa Ndeviti, twĩw'ĩe tei!”
28Yĩla Yesũ walikile nyũmba, ilalinda isu nĩsyookie vala ũĩ, nake aikũlya atĩĩ, “Inyw'ĩ nĩmũkũĩkĩĩa kana nĩndonya kũmũvosya?”
Nasyo syamũsũngĩa atĩĩ, “Ĩĩ, nĩtũkũĩkĩĩa Mwĩai.”
29Nĩvo ĩndĩ waikwatie metho na asya atĩĩ, “Nĩkwĩkĩke kwenyu kwĩanana na mũĩkĩĩo wenyu!” 30Nĩmambĩĩie kwona nthĩ, na Yesũ amakany'a amea atĩĩ, “Mũikatavye mũndũ o na ũmwe ũndũ ũũ!” 31Ĩndĩ mo mathi na manyaĩĩkya nguma ya Yesũ kĩsionĩ kĩu kyonthe.
Yesũ Aivosya Mũndũ Ũtaneenaa
32Andũ asu mayuma vau oou, mũndũ ũmwe ũtaĩ aneena nũndũ nĩwalikĩtwe nĩ ĩimũ, nĩwaetiwe vala ve Yesũ. 33Ĩndĩ Yesũ amina kũlũngya ĩimũ yĩu, mũndũ ũsu ambĩĩa kũneena. Andũ onthe ala maĩ vo nĩmaseng'ie mũno na masya atĩĩ, “Tũyaaona ũndũ ta ũũ nthĩnĩ wa Ĩsilaeli!”
34 #
Mat 10.25; 12.24; Mk 3.22; Lk 11.15 Ĩndĩ Avalisi namo mambĩĩa kwasya atĩĩ, “Anengetwe vinya wa kũlũngya maimũ nĩ mũnene wa maimũ.”
Yesũ Ayĩw'ĩa Andũ Tei
35 #
Mat 4.23; Mk 1.39; Lk 4.44 Yesũ nĩwathyũũkie kũu mĩsyĩnĩ na ndũanĩ akĩmanyĩsya andũ nyũmbanĩ sya Ayuti sya kũthaithĩa na kũmbanĩa, na kũmatavya Ũvoo Mũseo ĩũlũ wa ũsumbĩ wa ĩtu. O ta ũu, nĩwavoisye andũ mowau ma kĩla mũthemba, o vamwe na iema ila maĩ nasyo. 36#Mot 27.17; 1Asu 22.17; 2Mav 18.16; Esek 34.5; Mk 6.34 Yĩla Yesũ woonie ikundi mbingĩ sya andũ, nĩwamew'ĩie tei nũndũ maĩ avũavũanu na makanyaĩĩka ta malondu mate na mũĩthi. 37#Lk 10.2 Nĩvo ĩndĩ wameie amanyĩw'a make atĩĩ, “Ngetha nĩ mbingĩ, ĩndĩ akethi nĩ anini. 38Kwoou voyai Mwĩai atũme athũkũmi makombany'e ngetha yake.”
Currently Selected:
Mat 9: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
