MALIKO 14
14
Kũsaman’ya kũmũaa Yesũ
(MATHAYO 26.1–5; Luka 22.1–2; YOANA 11.45–53)
1Na ĩtina wa mĩthenya ĩlĩ kwaĩ mboka ya vasaka na kĩmũtũ kĩte ĩlawa: na athembi anene na aandĩki mamantha ũndũ matonya kũmũkwata na ũseleke na kũmũaa: 2nũndũ maasya, Tũikaamũkwate ĩvinda ya mboka, kũikese kwĩthĩwa kĩtuu andũnĩ.
Yesũ akyĩtĩkĩw’a mauta Vethania
(MATHAYO 26.6–13; YOANA 12.1–8)
3 #
Lk 7.36. Na yĩla waĩ Vethania nyũmbanĩ ya Simoni ũla ũwaĩte mangũ, ailyĩ lĩunĩ, kwooka mũndũ mũka e na sũva wa mauta matheu, me thooa mũnene mũno; na ooaa sũva amwĩtĩkĩsye mũtwenĩ wake. 4Ĩndĩ kwaĩ amwe mathatie ngoonĩ syoo, makyasya, Wanango ũũ wa mauta nĩ wa kĩ? 5Nũndũ mauta aa meĩ matonya kũtewa mbee wa silingi maana atatũ, ikanengwa ngya. Na mamũnyungunyĩĩsya ũla mũndũ mũka. 6Ĩndĩ Yesũ asya, Ekanai nake; nĩkĩ mũũmũthĩn’ya? Ambĩka wĩa mũseo. 7#Kũt 15.11.Nĩkwĩthĩwa ngya mwĩ nasyo mavinda onthe, na yĩla mũkwenda nĩmũtonya kũmeka nesa; ĩndĩ nyie mũi nakwa mavinda onthe. 8Nĩweka ũla ũtonya; amba ũmbĩtĩkĩsya mwĩĩ wakwa mauta kwondũ wa kũthikwa kwakwa. 9Na nĩ w’o nĩngũmwĩa, O kũla kũkatavanw’a ũvoo mũseo nthĩ yonthe ũndũ ũũ naw’o weekwa nĩ mũndũ mũka ũũ ũkawetwa wĩthĩwe wa kũmũlilikana we.
Yesũ aivũnyanĩwa nĩ Yutasi
(MATHAYO 26.14–16; Luka 22.3–6)
10Na Yutasi Isikalioti, ũmwe wa ala ĩkũmi na elĩ, athi kwa athembi anene, ni kana amũnengane kwoo. 11Nao, meew’a ũu, matana, na mamwatha kũmũnenga mbesa. Na amantha ũndũ ũtonya na ũvũthũ kũmũnengane kwoo.
Mboka ya vasaka ya mũminũkĩlyo
(MATHAYO 26.17–30; Luka 22.7–23; YOANA 13.21–30; 1 AKOLINTHO 11.23–25)
12Na mũthenya wa mbee wa kĩmũtũ kĩte ĩlawa, yĩla mooaie katena ka vasaka, amanyĩw’a make mamũkũlya, Wĩenda tũende tũkaũseũvisye va ũye vasaka? 13Na atũma elĩ ma amanyĩw’a make, amea, Endai ndũanĩ, na mũndũ ũkuĩte kĩkuu kya manzĩ ekomana nenyu: mũvikĩlei ũsu; 14#Mko 11.3.na o vala wĩlika, tavyai mwene wa nyũmba, Mũmanyĩsya akũlya, Ĩĩva nyũmba yakwa ya aeni, vala ngũĩa vasaka vamwe na amanyĩw’a makwa? 15Nake mwene akamwon’ya nyũmba nene ya ĩũlũ, nzeũvye yĩ na mĩio: mũtũseũvĩsye vo. 16Na amanyĩw’a maũmaala, mathi ndũanĩ, na moona o ũndũ ũmatavisye: na maseũvya vasaka.
17Na kwavika wĩoo ooka vamwe na ala ĩkũmi na elĩ. 18#Sav 41.9.Na mailyĩ makĩya, Yesũ asya, Nĩ w’o nĩngũmwĩa, Ũmwe wenyu akambũnyanĩa, nake nũnũũya vamwe nakwa. 19Mambĩlĩlya kwĩw’a woo na kũmũkũlya ũmwe na ũmwe, Ninyie? 20Na amea, Nĩ ũmwe wa ala ĩkũmi na elĩ, ũla ũnũkwĩkĩanĩa kw’oko ĩsaaninĩ vamwe nakwa. 21Nũndũ Mwana wa mũndũ ethi, o ũndũ waandĩkĩwe: ĩndĩ woo nĩ wa mũndũ ũsu ũla wĩmũvũnyanĩa Mwana wa mũndũ! Wĩthĩwa wi ũseo kwa mũndũ ũsu kethĩwa ndaasyawa.
22 #
1 Ako 11.23–25. Na makĩya, oosa kĩmũtũ, na akĩathima, akĩtilanga, na amanenga, amea, Osai: kĩĩ nĩkyo mwĩĩ wakwa. 23Na oosa kĩkombe, na atũnga mũvea, amanenga: na onthe manyw’a yakyo. 24#Kuma 24.8; Nzek 9.11.Na amea, Ĩno nĩyo nthakame yakwa ya ũtianĩo mweũ, ĩla ĩĩtĩkwa kwondũ wa andũ aingĩ. 25Nĩw’o nĩngũmwĩa, Ndikanyw’a ĩngĩ ya ũsayo wa mũsavivũ, mũvaka mũthenya ũla ngamĩnyw’a yĩ nzaũ ũsumbĩnĩ wa Ngai.
26Na maina wathi, maumaala mathi kĩĩmanĩ kya Mĩthata.
Yesũ akyathana kũlulutĩka kwa amanyĩw’a
(MATHAYO 26.31–35; Luka 22.31–34; YOANA 13.36–38)
27 #
Nzek 13.7. Na Yesũ amea, Inyw’onthe nĩmũũlulutĩkw’a nũndũ wakwa: nũndũ nĩkũandikĩtwe, Ngakũna mũĩthi na malondũ makanyaĩĩkw’a. 28#Mko 16.7.Ĩndĩ ĩtina wa kũthayũũka kwakwa, ngaenda mbee wenyu kũvika Kalilii. 29Ĩndĩ Vetelo amwĩa, O na ethĩwa onthe makalulutĩkw’a, nyie ndilulutĩkw’a nongi. 30#Yoa 13.38.Na Yesũ amwĩa, Nĩ w’o nĩngũkwĩa, kana we ũtukũ ũũ wa ũmũnthĩ, mbee wa nzamba ĩtanasya kelĩ, ũkangaĩa katatũ. 31#Yoa 11.16.Ĩndĩ ongeleka kũneena na vinya, O na ethĩwa no mũvaka nĩkw’e naku ndikakũkaĩa. Na onthe masya o ta ũu.
Yesũ e Ngesemanii
(MATHAYO 26.36–46; Luka 22.39–46)
32 #
Yoa 18.1. Na mavika vandũ vetawa Ngesemanii: na amea amanyĩw’a make, Ĩkalai vaa ĩvinda yĩla ngũvoya. 33Na athi e na Vetelo na Yakovo na Yoana, na ambĩlĩlya kũmaka na kũũũya mũno. 34#Yoa 12.27; Sav 43.5.Na amea, Ngoo yakwa nĩkũũũya mũno o na kũvika kĩkw’ũ: ĩkalai vaa, mũsyaĩĩsye. 35Nake aendanga mbee vanini, na eevalũkya nthĩ, na avoya kana ethĩwa ũũ nũtonyeka, saa ũsu ũmũthonoke. 36#Mko 10.38.Na asya, Nau, Asa, maũndũ onthe nĩmatonyeka kwaku; mbĩtĩthya kĩkombe kĩĩ: ĩndĩ ti ũndũ ngwenda nyie, ĩndĩ ũndũ ũkwenda we. 37Na ooka amethĩa makomete, na amũkũlya Vetelo, Simoni, kaĩ nũkomete? Ndũnatonya kũsyaĩĩsya o na saa ũmwe? 38Syaĩĩsyai na voyai, nĩ kana mũikalike ũtatwanĩ: veva nĩ w’o ũkwenda, ĩndĩ mwĩĩ ndwĩ na vinya. 39Na athi ĩngĩ, avoya, akyasya o ila ndeto. 40Na ooka ĩngĩ na amethĩa makomete, nũndũ metho moo maĩ na too mũno; na maiaamanya ũndũ wa ũmũsũngĩa. 41Na ooka ya katatũ na amea, Komai yu, mũthũmũe: nũu; ũla saa nĩ mũviku; sisyai, Mwana wa mũndũ nũnũũnenganwe mokonĩ ma andũ athe. 42#Yoa 14.31.Ũkĩlai, tũthi: sisyai, ũla ũnũũmbũnyanĩa nũthengee.
Kũkwatwa kwa Yesũ
(MATHAYO 26.47–56; Luka 22.47–53; YOANA 18.3–11)
43Na oyu akĩneena, Yutasi, ũmwe wa ala ĩkũmi na elĩ, ooka, vamwe na ĩkomano yĩ na mbyũ na mathimbũ, maumĩte kwa athembi anene na aandĩki na atumĩa. 44Na ũla ũmũvũnyanĩe amanengete wonan’yo, akyasya, O ũla nĩmũmumunya, nĩwe ũsu; mũkwatei, mũmũtwae mũmũsũvĩe. 45Nake ooka, oyu athi vala ũĩ, na amwĩa, Lavai; na amũmumunya. 46Na matambũũkya moko moo, na mamũkwata. 47Ĩndĩ ũmwe wa ala maũngeme vo akũa ũvyũ wake, na amĩtema ngombo ya mũthembi mũnene, amĩtila kũtũ. 48Na Yesũ asũngĩa, amea, Nĩmwaumĩla mwĩ na mbyũ na mathimbũ, na mwoka kũngwata ta nĩ mũvutani? 49Kĩla mũthenya naĩ nenyu ĩkalũnĩ ngĩmanyĩsya, na mũiaangwata: ĩndũ ũu nĩwĩkiwe nĩ kana maandĩko meanĩw’e. 50Na onthe mamũtia, makĩa.
51Na mwanake ũmwe amũatĩĩa, evw’ĩkĩte ngũa ya katane mwĩĩ wake: na mamũkwata; 52ĩndĩ atia ngũa ya katane, akĩa e mũthei
Kũsilĩthw’a kwa Yesũ mbee wa mũthembi mũnene
(MATHAYO 26.57–68; Luka 22.54–55,63–71; YOANA 18.12–14,19–24)
53Na mamũtwaa Yesũ kwa mũthembi ũla mũnene: na mamũmbanĩa vo athembi onthe anene, na atumĩa, na aandĩki. 54Na Vetelo amũatĩĩa e kũasa, o na nthĩnĩ, ku nza kwa mũthembi mũnene; na ekala nthĩ vamwe na makanga, makyota mwaki. 55Na ĩndĩ athembĩ anene na nzama yonthe mamũmanthĩa Yesũ ũkũsĩ nĩ kana mamũae; na maiaawona. 56Nũndũ aingĩ mamũkũsĩĩa ũvũngũ, na ũkũsĩ woo ndwaosana. 57Na amwe maũngama mamũkũsĩĩa ũvũngũ, makyasya, 58#Yoa 2.19; 4.21,23.Ithyĩ nĩtũneewie akyasya, Ngaananga ĩkalũ yĩĩ yĩla yaakiwe na moko, na matukũ atatũ ngaaka yĩngĩ yĩtekwakwa na moko. 59O na ũu, ũkũsĩ woo ndwaosana. 60Na ũla mũthembi mũnene aũngama katĩ, amũkũlya Yesũ, akyasya, Ndũsũngĩa ũndũ? Aa makũkũsĩĩa ata? 61#Mko 15.5; Isa 53.7.Ĩndĩ avindya, o na ndaasũngĩa ũndũ. Na mũthembi mũnene amũkũlya ĩngĩ, amwĩa, We nue Klĩsto Mwana wa Mũtaĩwa? 62#Nda 7.13; Sav 110.1.Na Yesũ asya, Ninyie we: na mũkamwona Mwana wa mũndũ ailyĩ ngalĩ ya kw’oko kwa aũme kwa Vinya, akyũka na mathweo ma ĩtu. 63Na mũthembi mũnene atembũanga ngũa syake, akyasya, Twĩ na vata ũngĩ mwaũ wa ngũsĩ? 64#Yoa 19.7.Nĩmweew’a kũumana kwake; mwĩona ata? Na onthe matw’a kana aĩlwe nĩ kĩkw’ũ. 65Na amwe mambĩlĩlya kũmũtw’ĩla mata, na kũmũvw’ĩka ũthyũ, na kũmũlumangya, na kũmwĩa, Athana: na ala makanga mamũmandũla.
Vetelo aimũkaĩa Yesũ
(MATHAYO 26.69–75; Luka 22.56–62; YOANA 18.15–18,25–27)
66Na Vetelo e ĩtheo ku nza, kwooka ũmwe wa eĩtu athũkũmi ma mũthembi mũnene; 67na oona Vetelo akyota mwaki, amũsisya, na asya, We naku wĩĩ vamwe na ũla Mũnasaleti, Yesũ. 68Ĩndĩ akaĩa, akyasya, Ndyĩsĩ, o na ndiũmanya ũndũ ũkwasya; na aumaala nza valasyanĩ, na nzamba yasya. 69Na ũla mwĩĩtu mũthũkũmi amwona ĩngĩ, na ambĩlĩlya kũmea ala maũngeme vakuvĩ, Ũũ nĩ ũmwe woo. 70Ĩndĩ akaĩa ĩngĩ. Na ĩtina vandũ vanini, ala maũngeme vakuvĩ mamwĩa Vetelo, Nĩw’o wĩ ũmwe woo; nĩkwĩthĩwa wĩ Mũkalilii. 71Ĩndĩ ambĩlĩlya kũumana, na kwĩvĩta, Ndimwĩsĩ mũndũ ũsu mũũweta. 72#Mko 14.30.Na oyu, nzamba yasya ya kelĩ. Na Vetelo alilikana ndeto ila ũtaviw’e nĩ Yesũ, Nzamba ĩtanasya kelĩ, ũkangaĩa katatũ. Na aililikana, aĩa.
Currently Selected:
MALIKO 14: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
