MALIKO 12
12
Ngelekan’yo ya mũũnda wa mĩsavivũ
(MATHAYO 21.33–46; Luka 20.9–19)
1 #
Isa 5.1,2. Na ambĩlĩlya kũneena nao na ngelekan’yo. Mũndũ avandie mũũnda wa mĩsavivũ, na oothyũlũlũkya wiio, na enza ĩima ya ũangĩa nzavivũ, na aaka mwako mũtũlu wa mũnyoolo, na oonenga aĩmi mamũĩmĩe, nake athi ũenĩ nthĩ ĩngĩ. 2Na ĩvinda yavĩka atũma ngombo kwa ala aĩmi nĩ kana yose kwa aĩmi mosyao amwe ma mũũnda wa mĩsavivũ. 3Na mamĩkwata, na mamĩkũna, na mamĩlũngya ĩte na kĩndũ. 4Na ĩngĩ atũma ngombo ĩngĩ kwoo; na ĩsũ mamĩuauĩkya mũtwe na mamĩsonokya. 5Na amĩtũma ĩngĩ; na ĩsu mamyũaa: na atũma ingĩ mbingĩ; na makĩkũna imwe, na makyũaa ingĩ. 6Na eethĩwa atialĩte na ũmwe, nake nĩ mwana ũla wendete: ũsu amũtũma kwamo ĩtina, akyasya, Makamũtaĩa mwana wakwa. 7Indĩ aĩmi asu masya ene kwa ene, Ũũ nĩwe mũtiĩwa; ũkai, tũmũae, na ũtiĩwa ũkeethĩwa witũ. 8#Aevl 13.12.Na mamũkwata, mamũaa, na mamwĩkya ũtee wa mũũnda wa mĩsavivũ. 9Na yu ĩndĩ ũla mwene wa mũũnda ũsu wa mĩsavivũ akeeka ata? Akooka na akaananga ala aĩmi, na akanenga angĩ mũũnda ũsu wa mĩsavivũ. 10#Sav 118.22,23.O na mũtyaamba ũsoma ũandĩko ũũ:
Ĩvia yĩla yaleilwe nĩ aki,
Yĩu yatw’ikie yĩla ĩnene ya kĩkotonĩ;
11Ũu nĩwaumie kwa Mwĩaĩi,
Naw’o nĩ ũseng’yo methonĩ maitũ?
12Na mamantha kũmũkwata; na makĩa ĩkomano; nũndũ nĩmamanyie kana ngelekan’yo ĩsu aneena ũndũ woo: na mamũeka, na mathi.
Ũkũlyo ũndũ wa kumĩsya Kaisali koti
(MATHAYO 22.15–22; Luka 20.20–26)
13 #
Mko 3.6. Na matũma amwe ma Avalisi na ma Elote vala ũĩ, nĩ kana mamũtee ndetonĩ syake. 14Na mooka, mamwĩa, Mũmanyĩsya, nĩtwĩsĩ wĩ wa w’o, na ndũkĩaa mũndũ o na wĩva; nũndũ ndũsiasya ũthyũ wa mũndũ, ĩndĩ nũmanyĩasya w’o nzĩa ya Ngai: Nĩkwosana na ĩla mĩao kũnenga Kaisali koti, kana ti w’o? 15Tũmũnenge, kana tũikamũnenge? Ĩndĩ we, esĩ wangangan’yo woo, amea, Nĩkĩ mũũndata? Ndeteei silingi none. 16Na mamũetee. Na amakũlya, Mũvw’ano ũũ na ũandĩko ũũ nĩ waũ? Na mamwĩa, Nĩ wa Kaisali. 17#Alo 13.7.Na Yesũ amea, Mũnengei Kaisali syĩndũ sya Kaisali, na Ngai syĩndũ sya Ngai. Na maseng’ie mũno nĩwe.
Ũkũlyo ũndũ wa ũthayũũkyo
(MATHAYO 22.23–33; Luka 20.27–40)
18Na Asatukai mooka vala ũĩ, ala maasya kana kũi ũthayũũkyo; na mamũkũlya, makyasya, 19#Kũt 25.5,6; Mwa 38.8.Mũmanyĩsya, Mose nĩwatũandĩkĩe, atĩ ethĩwa mwana‐a‐inyia wa mũndũ nĩwakw’a, na atia mũka wake, na ndaatia kana, mwana‐a‐inyia wake namwose ũ mũndũ mũka, amũũngamĩsye mwana‐a‐inyia mbeũ. 20Kwaĩ aũme mũonza ma inyia ũmwe: na ũla wa mbee atwaa mũka, na akw’a atatiĩte mbeũ; 21na wa kelĩ nake amwosa, na akw’a atatiĩte mbeũ; na wa katatũ o ta ũu; 22na asu mũonza maiaatia mbeũ. Ĩtina wa onthe ũla mũndũ mũka nake akw’a. 23Ũthayũũkyonĩ ĩndĩ akethĩwa e mũka wa wĩva wa asu? Nũndũ onthe mũonza nĩmamũtwaĩte. 24Yesũ amea, Kĩla kĩũtuma mũvĩtya, tĩ kwĩthĩwa mũtyĩsĩ ala maandĩko, o na vinya wa Ngai? 25Nũndũ yĩla makathayũũka kuma akw’ũnĩ, maikatwaana, o na maikatwaawa; ĩndĩ makethĩwa mailyĩ ta alaĩka ala me ĩtunĩ. 26#Kuma 3.2,6; Mt 8.11; Lk 16.22.Ĩndĩ ũndũ wa akw’ũ, kana makathayũũkw’a; mũiaasoma ĩvukunĩ ya Mose, vala vaandĩkĩtwe ũvoo wa kala Kakuthu, ũndũ Ngai waneenie nake, akyasya, Nyie nĩ Ngai wa Avalaamu, na Ngai wa Isaka, na Ngai wa Yakovo? 27We ti Ngai wa ala akw’ũ, indĩ nĩ wa ala me thayũ: nĩmũũvĩtya mũno.
Ũkũlyo ũndũ wa mwĩao ũla mũnene mbee
(MATHAYO 22.34–40; Luka 10.25–28)
28 #
Lk 10.25–28. Na ũmwe wa aandĩki ooka, na eew’a maineenan’ya nake, na esĩ kana amasũngĩa nesa, amũkũlya, Nĩ mwĩao wĩva ũla wĩ mbee wa yonthe? 29#Kũt 6.4,5.Yesũ amũsũngĩa, Wa mbee nĩ ũũ, Ĩw’a Isilaeli; Mwĩaĩi Ngai waitũ nĩ Mwĩaĩi ũmwe: 30#Yoa 15.12.mwende Mwĩaĩi Ngai waku na ngoo yaku yonthe, na thayũ waku w’onthe, na kĩlĩko kyaku kyonthe, na vinya waku w’onthe. 31#Ali 19.18.Na wa kelĩ nĩw’o ũũ, Mwende mũtũĩ waku o tondũ wĩyendete mwene. Vai mwĩao ũngĩ mũnene kwĩ ĩsu. 32#Kũt 4.35; 6.4.Na ũla mũandĩki amwĩa, Nĩ w’o, Mũmanyĩsya, nĩwaneena w’o kana Ngai nĩ ũmwe; na vai ũngĩ ate o we: 33#1 Sam 15.22.na kũmwenda na ngoo yonthe, na ũmanyi w’onthe, na vinya w’onthe, na kũmwenda mũndũ ũngĩ o tondũ wĩyendete mwene, nĩkũthonokete mũno nthembo nima syonthe sya ũvĩvw’a, o na nthembo sya kũtonywa. 34#Meko 26.27–29.Na Yesũ oona kana asũngĩa na ũmanyi, amwĩa, We ndwĩ kũasa na ũsumbĩ wa Ngai. Na ĩtina wa ũu vai mũndũ waatata kũmũkũlya ũndũ ĩngĩ.
Ũkũlyo ũndũ wa Masia
(MATHAYO 22.41–46; Luka 20.41–44)
35Na Yesũ akĩmanyĩsya ĩkalũnĩ asũngĩa, asya, Aandĩki measya ata kana Klĩsto nĩ mwana wa Ndaviti? 36#Sav 110.1; 2 Sam 23.2; Yoa 7.42.Ndaviti mwene e nthĩnĩ wa Veva Mũtheu aisye,
Mwĩaĩi amwĩie Mwĩaĩi wakwa,
Ĩkala nthĩ ngalĩ ya kw’oko kwakwa kwa aũme,
Mũvaka nat’wa amaitha maku kavĩla ka nyaĩĩ syaku.
37Ndaviti mwene emwĩta Mwĩaĩi; na ĩndĩ nĩ mwana wake ata? Na yĩla ĩkomano ĩnene yamwĩthukĩĩsya na ũtanu.
Kwĩsũvĩa aandĩki
(MATHAYO 23.1–36; Luka 11.37–54; 20.45–47)
38Na ũmanyĩsyonĩ wake asya, Ĩsũvĩei aandĩki, ala mendaa kũtambũka mekĩe ngũa ndasa, na kũkethw’a ing’ang’anĩ, 39na ivĩla sya mbee masinakokenĩ, na kũndũ kwa mbee mbokanĩ: 40ala maĩsaa nyũmba sya aka ndiwa, na nũndũ wa ũkengani nĩmaasavasya mboya; asu nĩmo ala makona ũsilĩlo mũnene mbee.
Nthembo ya ndiwa
(Luka 21.1–4)
41 #
2 Asu 12.9. Na ekala nthĩ elekele vala valekelaw’a nthembo, na oona ũndũ ĩkomano yĩũlekya mbesa vala valekelaw’a: na aingĩ ala maĩ athwii meekĩa nyingĩ. 42Na kwooka mũndũ mũka ndiwa ngya, eekĩa tũwela twĩlĩ, nat’wo nĩ ĩsendi yĩmwe. 43Na ameta amanyĩw’a make, amea, Nĩ w’o nĩngũmwĩa, Ndiwa ĩno ngya nĩyekĩa nyingĩ kwĩ onthe ala mekwĩkĩa vala valekelaw’a: 44#2 Ako 8.12.nũndũ aa onthe meekĩa nũndũ wa kwingĩvĩwa kwoo; ĩndĩ ũũ kuma ũkyanĩ wake eekĩa syonthe ila wĩ nasyo, nĩsyo wĩkwatyo wake w’onthe wa thayũ.
Currently Selected:
MALIKO 12: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
