Luka 3
3
Yoana Mũvatisi na ũtũmane wake
(MATHAYO 3.1–12; MALIKO 1.1–8; YOANA 1.19–28)
1Mwaka wa ĩkũmi na katano wa kũsumbĩka kwa Tivelio Kaisali, yĩla Vondio Vilato waĩ ngavana wa Yutia, na Elote waĩ mũsumbĩ wa Kalilii, na mwana‐a‐inyia wake Vilivu mũsumbĩ wa nthĩ ya Itulea na Takakoniti, na Lisania mũsumbĩ wa Avilene, 2na yĩla Anasi na Kaiava maĩ athembi anene, ndeto ya Ngai yamũkie Yoana mwana wa Nzakalia e weũnĩ. 3Nake athi nthĩ yonthe ĩla yĩ ũtee wa ũsĩ wa Yolotani, akĩtavan’ya ũvatiso wa ũalyũlo wa ngoo ũetae ũekeo wa naĩ; 4#Isa 40.3–5.o tondũ kũandĩkĩtwe ĩvukunĩ ya ndeto sya mwathani Isaia,
Wasya wa mũndũ akĩneena mũno weũnĩ,
Seũvyai nzĩa ya Mwĩaĩi,
Lũngalyai moendelo make.
5Syanda syonthe ikalindwa,
Na iĩma na tũlĩma tw’onthe ikeananw’a na nthi;
Na ila nthyoeku ikalũngalw’a,
Na nzĩa ila nthũku ikatindimalw’a;
6 #
Meko 28.28. Na mĩĩ yonthe ĩkoona ũtangĩĩo wa Ngai.
7 #
Mt 23.33; Yoa 3.36. Na ĩndĩ amea makomano ala mookaa kũvatiswa nĩwe, Inyw’ĩ ũsyao wa nzoka mbai, nũũ ũla ũmwonetye kũkĩa ũthatu ũla wũkĩte? 8Syaai ĩndĩ ũsyao ũla waĩle ũalyũlo wa ngoo, na mũtikambĩlĩlye kwasya nthĩnĩ wenyu, Twĩ na asa waitũ Avalaamu: nũndũ nĩngũmwĩa, kana Ngai nũtonya kũmũkĩlĩlya Avalaamu syana mavianĩ aa. 9O na yu ĩthoka nĩyiĩtwe matinanĩ ma mĩtĩ: kwondũ wa ũu kĩla mũtĩ ũtasyaaa ũsyao mũseo nũtemawa, na kwĩkw’a mwakinĩ. 10Na makomano mamũkũlya makyasya, Twaĩlwe nĩ kwĩka ata ĩndĩ? 11Amasũngĩa, amea, Ũla wĩ na itonyeo ilĩ, namũaĩe ũla ũtaĩ; na ũla wĩ na lĩu, eke o ũu. 12Na aumya ma koti mooka kũvatiswa, nao mamũkũlya atĩĩ, Mũmanyĩsya, naitũ twaĩlwe nĩ kwĩka ata? 13Nake amea, Mũĩkaumĩthye mbee wa ũndũ mwĩaĩwe. 14Na asikalĩ namo mamũkũlya, makyasya, Naitũ twaĩlwe nĩ kwĩka ata? Na amasũngĩa, Manyai kũmũvena mũndũ kĩndũ na vinya, kana kũmũvinganĩsya ũndũ ũte wa w’o; na ĩanĩwai nĩ ĩtuvi yenyu.
15 #
Yoa 1.19–28. Na yĩla andũ mekalĩte makĩsyaĩĩsya, na andũ onthe makĩsũanĩa ngoonĩ syoo ũvoo wa Yoana, kana nokwĩthĩwa nĩwe Klĩsto; 16#Meko 13.25.Yoana asũngĩa, na amea onthe, Nĩ w’o nyie nĩmũvatisaa na manzĩ; ĩndĩ nĩkũkĩte ũla wĩ vinya kũte nyie, nakwa ndyĩanĩwe nĩ kũthasya tũmĩkwa twa iatũ syake: ũsu akamũvatisaa na Veva Mũtheu na mwaki: 17na kĩũlũkya kyake kĩ kw’okoni kwake, nake akathesya vyũ kĩvũĩo kyake, na akoomban’ya nganũ yake ĩkũmbĩnĩ yake; ĩndĩ wewa akavĩvya na mwaki ũtavoeka.
18Nake nĩwamatavasya andũ ũla ũvoo mũseo vamwe na matao angĩ maingĩ; 19#Mt 14.3,4; Mko 6.17,18.ĩndĩ mũsumbĩ Elote, akĩkanw’a nĩwe ũndũ wa Elotia mũka wa mwana‐a‐inyia, na ũndũ wa maũndũ onthe mathũku ala Elote wekĩte, 20ongela ũthũku ũngĩ ĩũlũ wa ala wekĩte, amũvingĩa Yoana kolokolonĩ.
Ũvatiso wa Yesũ
(MATHAYO 3.13–17; MALIKO 1.9–11)
21Na kweethĩwa andũ onthe mavatiswa, nake Yesũ avatiswa, na akĩvoya, ĩtu yavingũka, 22#Lk 9.35; Sav 2.7; Isa 42.1.na Veva Mũtheu amũtheea e na mwĩĩ ũvw’ana ta wa ĩvũĩ, amũvũĩla, na wasya wauma ĩtunĩ, We nue Mwana wakwa mwendwa; nendeaaw’a nue.
Mosyaanĩo ma Yesũ
(MATHAYO 1.1–17)
23 #
Lk 4.22. Na Yesũ mwene, akyambĩlĩlya kũmanyĩsya, aĩ ta myaka mĩongo ĩtatũ, nake atalĩthaw’a kwĩthĩwa mwana wa Yosevu wa Eli, 24wa Mathati, wa Livai, wa Meliki, wa Yanai, wa Yosevu, 25wa Matathia, wa Amosi, wa Naumu, wa Esili, wa Nakai, 26wa Maathi, wa Matathia, wa Semei, wa Yoseki, wa Yota, 27#1 Mav 3.17; Esa 3.2.wa Yoanani, wa Lesa, wa Nzeluvaveli, wa Sealitieli, wa Neli, 28wa Meliki, wa Ati, wa Kosamu, wa Elimatamu, wa Eeli, 29wa Yesua, wa Elieseli, wa Yolimu, wa Mathati, wa Livai, 30wa Simeoni, wa Yutasi, wa Yosevu, wa Yonamu, wa Eliakimu, 31#1 Sam 16.1,13; 2 Sam 5.14.wa Melea, wa Mena, wa Matatha, wa Nathani, wa Ndaviti, 32#Lu 4.22.wa Yese, wa Oveti, wa Mboasi, wa Salumoni, wa Nasoni, 33#1 Mav 2.1–5; Mwa 29.35.wa Aminatavu, wa Alamu, wa Esiloni, wa Velesi, wa Yuta, 34#Mwa 21.2,3; 11.10–26; 1 Mav 1.24–27.wa Yakovo, wa Isaka, wa Avalaamu, wa Tela, wa Naoli, 35wa Seluki, wa Leu, wa Veleki, wa Eveli, wa Siela, 36#Mwa 5.3–32; 1 Mav 1.1–4; Mwa 4.25; 11.10.wa Kenani, wa Alivakasati, wa Semu, wa Noa, wa Lameki, 37wa Methusela, wa Enoko, wa Yaleti, wa Maalaleli, wa Kenani, 38#Mwa 5.1–3.wa Enosi, wa Sethi, wa Atamu, wa Ngai.
Currently Selected:
Luka 3: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
