Luka 2
2
Ĩsyawa ya Yesũ
(MATHAYO 1.18–25)
1Na kweethĩwa matukũ asu mwĩao waumie kwa Kaisali Aukusito, nĩ kana andũ onthe maandĩkwe. 2Na kũandĩka kũu kwaĩ kwa mbee yĩla Kwilinio waĩ ngavana wa Silia. 3Na onthe mathi kũandĩkwa, kĩla mũndũ ndũanĩ yoo. 4Na Yosevu nake ambata kuma Nasaleti, ndũa ĩmwe ya Kalilii, athi Yutia, avika ndũanĩ ya Ndaviti, ĩla yĩtawa Mbethelemu, nũndũ we aĩ wa nyũmba ya mũvĩa wa Ndaviti; 5ni kana aandĩkwe vamwe na Meli, ũla wevaĩtye, nake aĩ mũito. 6Na kweethĩwa, yĩla maĩ kw’o, matukũ make mavika ma ũsyaa. 7Na asyaa kana kavĩsĩ ka mbee; na akavw’ĩka ngũa sya ũkenge, na akakomya mũvalatĩnĩ, nũndũ nyũmbanĩ ya aeni vaiaĩ ũthei woo.
8Na nthĩ ĩsu kwaĩ aĩthi mekalaa weũnĩ, maisyaĩĩsya indo syoo ũtukũ. 9Nao maumĩlĩlwa nĩ mũlaĩka wa Mwĩaĩi, na ũtheu mũtisu wa Mwĩaĩi wamamulĩka; nao makĩa mũno. 10Na mũlaĩka amea, Ekai ũkĩa; nũndũ sisyai, nyie nĩnamũetee ũvoo mũseo wa ũtanu mũnene ũla ũkethĩwa wa andũ onthe: 11nũndũ ũmũnthĩ, ndũanĩ ya Ndaviti, nĩmũsyaĩwe Mũtangĩĩi, nake nĩ Klĩsto ũla Mwĩaĩi. 12Na wonan’yo kwenyu nĩ atĩĩ: Mũkoona kana kavw’ĩkĩtwe ngũa sya ũkenge, kamamĩtw’e mũvalatĩnĩ. 13#Nda 7.10. Na o kavinda kau, kwethĩwa vamwe na ũla mũlaĩka aingĩ ma nguthu ya ĩtunĩ, makĩmũkumya Ngai, makyasya,
14 #
Lk 19.38; Isa 57.19; Aev 2.14,17. Ngai nataĩwe ku ĩũĩũ mũno,
Na mũuo wĩthĩwe kũũ nthĩ andũnĩ ala wendeeaw’a nĩmo.
15Na kweethĩwa, yĩla alaĩka mamatiie makĩthi ĩtuni, aĩthi maneenan’ya ene kwa ene, Tũendei yu Mbethelemu, tũsisye ũndũ ũũ ũla weekĩka, ũla Mwĩaĩi watũmanyĩthya. 16Na mathi mĩtũkĩ, na meethĩa Meli na Yosevu, na kala kaũkenge kamamĩtw’e mũvalatĩnĩ. 17#Lk 2.10–12.Na makona, matavan’ya ndeto ila mataviw’e ũndũ wa kala kana. 18Na onthe ala meewie maseng’a kwondũ wa maũndũ ala mataviw’e nĩ aĩthi. 19#Lk 2.51.Ĩndĩ Meli ekalya ndeto isu syonthe ngoonĩ yake, akĩsũanĩa. 20Na aĩthi masyoka, maimũtaĩa na maimũkumya Ngai ũndũ wa maũndũ onthe ala meewie na moonie, o tondũ mataviw’e.
21 #
Lk 1.31,59; Ali 12.3. Na matukũ nyanya mavika ma kũkaĩka, syĩtwa yako keetwa Yesũ, o tondũ keetiwe nĩ mũlaĩka katanamba kũitavwa.
Kũnenganwe kwa Yesũ ĩkalũnĩ
22 #
Ali 12.1–8. Na matukũ meanĩa ma kwĩthesya kwoo kwĩanana na mĩao ya Mose, mambata nako Yelusaleme, kakanenganwe kwa Mwĩaĩi 23#Kuma 13.2,12,15.(o tondũ kũandĩkĩtwe mĩaonĩ ya Mwĩaĩi, Kala kaũme kakasyawa mbee kaketawa katheu ka Mwĩaĩi), 24#Ali 5.11; 12.8.na nĩ kana maumye nthembo o tondũ kwaĩtw’e mĩaonĩ ya Mwĩaĩi, Ndumbũ ilĩ, kana maswii elĩ ma mavũĩ.
Simeoni: Wathi wake
25 #
Isa 40.1; 49.13. Na ĩndĩ Yelusaleme kwaĩ mũndũ wetawa Simeoni; nake aĩ mũlũngalu na aĩ mũkĩi wa Ngai, akyeteela ũkiakisyo wa Isilaeli: na Veva Mũtheu aĩ ĩũlũ wake. 26Nake nĩwonetw’e nĩ Veva Mũtheu, kana ndakona kĩkw’ũ, atanona ũla Klĩsto wa Mwĩaĩi. 27Nake ooka ĩkalũnĩ atongoew’e nĩ Veva: na ĩthe na inyia mavota na kala kana Yesũ, nĩ kana meke nako tondũ wĩaĩtwe mĩaonĩ, 28nake ĩndĩ akosa kana mokonĩ make, na amũkatha Ngai, akyasya,
29 #
Mwa 46.30. Yu ĩndĩ, Mwĩaĩi, ngombo yaku nĩthi na mũuo,
Tondũ waneenie;
30 #
Isa 40.5; 52.10. Nĩkwĩthĩwa metho makwa nĩmoona ũtangĩĩo waku,
31Ũla ũseũvĩtye mbee wa andũ onthe;
32 #
Isa 42.6; 49.6. Kyeni kya kũmavuanĩsya Andũ‐ma‐mbaĩ‐ingĩ,
Na ũtaĩo wa andũ maku Isilaeli.
33Na ĩthe na inyia wako maseng’a ũndũ wa maũndũ ala maneeniwe ũndũ wako; 34#Isa 8.14; Mt 21.42; 1 Ako 1.23; 1 Vet 2.8.na Simeoni amaathima, na amwĩa Meli inyia wako, Nĩwene, kana kaa kaiĩtwe kethĩwe ũvalũko na wũkĩlo wa aingĩ ma Isilaeli; na wonan’yo ũla ũkakananĩw’a mũno; 35ĩĩ, na ũvyũ ũkatonya ngoo yaku; nĩ kana mosũanĩo ma ngoo nyingĩ mavuanw’e.
Ana
36Na vo vaĩ mwathani mũndũ mũka, ũla wetawa Ana, mwĩĩtu wa Vanueli, wa mbaĩ ya Aseli (nake aĩ mũkũu mũno, na nĩwekalĩte myaka mũonza na mũũme wake ĩtina wa wĩĩtu wake, 37#1 Tim 5.5.nake aĩ ndiwa myaka mĩongo nyanya na ĩna), o na ndaumaa ĩkalũnĩ, akĩthaitha na kũtĩĩa kũya na kwĩsũvana ũtukũ na mũthenya. 38#Isa 52.9.Nake ooka kavinda kau amũtũngĩa Ngai mũvea, na amatavya onthe ala meteele wovosyo wa Yelusaleme ũvoo wako. 39Na mamina kwĩanĩsya maũndũ onthe ala meeaĩtwe mĩaonĩ ya Mwĩaĩi, masyoka Kalilii, na mathi ndũanĩ yoo Nasaleti.
Wana wa Yesũ
40 #
Lk 1.80; 2.52. Na kana kaneneva, na keethĩwa na vinya, na kausũwa nĩ ũĩ: na mumo wa Ngai waĩ ĩũlũ wako.
41 #
Kuma 23.14–17. Na kĩla mwaka ĩthe na inyia wako maendaa Yelusaleme ĩvinda ya mboka ya vasaka. 42Na kavikya myaka ĩkũmi na ĩlĩ, mambata o tondũ kweekawa ĩvinda ya mboka ĩsu; 43#Kuma 12.18.na matukũ meanĩa, masyoka, na kĩvĩsĩ Yesũ kyatiwa Yelusaleme; ĩndĩ ĩthe na inyia wakyo maiaamanya ũu; 44ĩndĩ matalĩthasya kĩ o vamwe namo nguthunĩ, na mathi mũendo wa syũa ĩima; na mambĩlĩlya ũkĩmantha andũnĩ ma mbaĩ yoo na andũnĩ ala meesene namo; 45na malea ũkyona, masyoka Yelusaleme, maikĩmantha. 46Na kweethĩwa, matukũ atatũ mathela makyona ĩkalũnĩ, kĩilyĩ katĩ wa amanyĩsya ma mĩao, kĩimethukĩĩsya, na kĩimakũlya mokũlyo: 47na onthe ala makĩwie maseng’a ũndũ wa ũmnayi wakyo na mosũngĩo makyo. 48Nao makyona, maseng’a; na inyia wakyo akĩkũlya, Mwana wakwa, ũtwĩkie ũu nĩkĩ? Nĩwene, au waku nakwa tũkũmanthie na kyeva. 49#Yoa 2.16.Nakyo kyamea, Mwĩmanthĩaa kĩ? Mũiĩsĩ kana nĩnaĩlwe kwithĩwa wĩanĩ wa Asa wakwa? 50Nao maiaamanya kĩtina kya ndeto ila kyamatavya. 51#Lk 2.19.Nakyo kyatheea nao, kũvika Nasaleti: na kyamenyivĩsya; na inyia wakyo aia maũndũ asu onthe ngoonĩ yake.
52 #
1 Sam 2.26; Nth 3.4. Na Yesũ aendeea akyũĩva na akĩana, e mwaĩlu kwa Ngai na kwa andũ.
Currently Selected:
Luka 2: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
