Luka 4
4
Kũtatwa kwa Yesũ weũnĩ
(MATHAYO 4.1–11; MALIKO 1.12–13)
1Na Yesũ, ausũĩtwe nĩ Veva Mũtheu, asyoka auma Yolotani, na atongoew’a nĩ Veva weũnĩ. 2Akĩtatwa nĩ ndevili ĩvinda ya matukũ mĩongo ĩna. Na matukũ asu ndaĩsaa kĩndũ: na mathela, eew’a nzaa. 3Na ndevili amwĩa atĩĩ, Ethĩwa nue Mwana wa Ngai, ĩaĩe ĩvia yĩĩ yĩtw’ĩke kĩmũtũ. 4#Kũt 8.3.Na Yesũ amũsũngĩa, Nĩkũandĩkĩtwe, Mũndũ ndekalaa thayũ kwondũ na kĩmũtũ kyoka. 5Na amũtongoesya kĩĩmanĩ ĩũlũ, na amwon’ya mosumbĩ onthe ma nthĩ kwa kaven’ya. 6Na ndevili amwĩa atĩĩ, Nĩngũũnenga ũkũmũ ũũ w’onthe, na ndaĩa syamo: nũndũ nĩnanengiwe; nakwa nĩngũmũnenga o ũla ngwenda. 7Ĩndĩ we ethĩwa nũũnthaitha, ũũ w’onthe ũkeethĩwa waku. 8#Kũt 6.13,14.Yesũ amũsũngĩa, amwĩa, Nĩkũandĩkĩtwe, Mũthaithae Mwĩaĩi Ngai waku, na mũthũkũmae we, e weka. 9Na amũtwaa Yelusaleme, amwĩkalya mũthyanĩ wa ĩkalũ, na amwĩa, Ethĩwa nue Mwana wa Ngai, ĩyĩkye nthĩ: 10nũndũ nĩkũandĩkĩtwe,
#
Sav 91.11,12. Akeeaĩa alaĩka make ũndũ waku, makũsũvĩe:
11na ĩngĩ, Makakũkĩlya mokonĩ moo, Ndũkese kũtũlwa kũũ kwaku nĩ ĩvia.
12 #
Kũt 6.16. Na Yesũ amũsũngia, amwĩa, Nĩkũneenetwe, Ndũkamũtate Mwĩaĩi Ngai waku.
13 #
Aevl 4.15. Na ndevili amina matatwa onthe, athi amũtia ĩvinda.
Yesũ akyambĩlĩlya kũtavan’ya
(MATHAYO 4.12–17; MALIKO 1.14–15)
14Na Yesũ asyoka Kalilii vinyanĩ wa Veva: na nguma yake yausũa ndee syonthe sya nthĩ ĩsu. 15Nake amanyĩsya masinakokenĩ moo, aikathwa nĩ andũ onthe.
Yesũ ailewa Nasaleti
(MATHAYO 13.53–58; MALIKO 6.1–6)
16Nake athi Nasaleti, vala waeewe: na alika ĩsinakokenĩ mũthenya wa savato, tondũ wekaa, na aũngama asome. 17#Isa 61.1,2; 58.6.Anengwa ĩvuku ya mwathani Isaia. Na avuũa ĩvuku, oona vala vaandĩkĩtwe atĩĩ,
18Veva wa Ngai e ĩũlũ wakwa,
Nũndũ nĩwambĩtĩkĩsye mauta nĩtavye ngya ũvoo mũseo:
Nũndũmĩte kũtavan’ya ũthasyo kwa ala atave,
Na kũsalukw’a ililinda,
Na kũthasya ala mavivinyĩtwe,
19 #
Ali 25.10. Na kũtavan’ya mwaka wa Mwĩaĩi ũla wĩtĩkĩlawa.
20Na akũnza yĩla ĩvuku, anenga ũla mũthũkũmi, na ekala nthĩ: na onthe ala maĩ vo ĩsinakokenĩ mamũketeea. 21Na ambĩlĩlya kũmea atĩĩ, Ũmũnthĩ ũandĩko ũũ nĩweanĩw’a matũnĩ menyu. 22#Yoa 6.42.Na onthe mamũkũsĩaa, na maseng’a nũndũ wa ndeto sya mumo ila syaumie kanyw’anĩ wake: nao masya, Ũũ ti mwana wa Yosevu? 23#Mt 4.13.Nake amea atĩĩ, Vate ngananĩo mũkandavya nthimo ĩno, Mũiiti, ĩvosye mwene: ũndũ o na wĩva ũla tũneewie wĩkĩte Kavelinaumi, ĩka vaa nthĩ ĩ yaku. 24#Yoa 4.44.Nake asya, Nĩ w’o nĩngũmwĩa, Vati mwathani ũla wĩtĩkĩlawa nthĩ ĩ yake. 25#1 Asu 17.1,9; 18.1; Yak 5.17.Ĩndĩ nĩngũmũtavya w’o, Nthĩ ya Aisilaeli kwaĩ aka aingĩ ndiwa matukũ ma Eliya, yĩla ĩtu yavingĩtwe myaka ĩtatũ na myei thanthatũ, yĩla kwaĩ yũa ĩnene nthĩ ĩsu yonthe; 26na Eliya ndaatũmwa kwa ũmwe wamo, ĩndĩ atũmiwe kwa ndiwa ĩmwe ya ndũa ya Nzalevathi, ya nthĩ ya Sitoni. 27#2 Asu 5.14.Na nthĩ ya Aisilaeli kwaĩ andũ aingĩ ala maĩ na mangũ ĩvinda ya mwathani Elisa; na vai ũmwe wamo waathew’a ate o Naamani, ũla Mũsilia. 28Na onthe ala maĩ ĩsinakokenĩ, meew’a maũndũ asu mausũwa nĩ ũthilĩku; 29na mookĩla, mamumya ndũanĩ, na mamũtwaa kũvika ĩũlũ wa kĩĩma kĩla kyakĩtwe ndũa yoo, nĩ kana makamwĩkĩlye vo akulumene. 30Ĩndĩ avĩtĩla katĩ wamo, athi.
Kũvow’a kwa mũndũ ũla waĩ na ndaimoni
(MALIKO 1.21–28)
31 #
Mt 4.13; Yoa 2.12. Na atheea athi Kavelinaumi, ndũa ĩmwe ya Kalilii. Nake amamanyĩsya mũthenya wa savato: 32#Mt 7.28,29; Yoa 7.46.nao maseng’a ũndũ wa ũmanyĩsyo wake; nĩkwĩthĩwa ndeto syake syaĩ na ũkũmũ. 33Na vau ĩsinakokenĩ vaĩ mũndũ ũla wakwetwe nĩ veva wa ndaimoni mbuku; nake aneena na wasya mũnene, akyasya, 34Iĩ! Twĩ ũndũ naku wa kyaũ, Yesũ Mũnasaleti? Nĩwooka kũtwananga? Nĩngwĩsĩ we, wĩ Ũla Mũtheu wa Ngai. 35Na Yesũ amĩkan’ya, akyasya, Tumya kanyw’a, noimuma. Na ĩla ndaimoni yamũvalũkya katĩ woo, yamuma, ĩtamwĩkĩte ũndũ. 36Na onthe maseng’a, na maneenan’ya ene kwa ene, makyasya, Ndeto ĩno ĩtilyĩ ata? Nũndũ nũkwĩaĩa maveva mavuku na ũkũmũ na vinya, nao makyuma. 37Na ũvoo wake wanyaĩĩka ndee syonthe, kĩla vandũ.
Yesũ aivosya inyia wa mũka wa Simoni na angĩ aingĩ
(MATHAYO 8.14–17; MALIKO 1.29–39)
38Nake aumaala ĩsinakokenĩ, avota nyũmbanĩ ya Simoni. Na inyia wa mũka wa Simoni aĩ na ndetema nyingĩ; na mamũvoya ũndũ wake. 39Nake aũngama vakuvĩ nake, na akan’ya ndetema; nayo yamũtia: na o ĩvinda yĩu ookĩla amathũkũma.
40Na syũa yĩkĩthũa, ala mawaĩtye andũ mowau ma mĩthemba mingĩ mamũetee; nake amailĩĩla kĩla mũndũ moko, na amavosya. 41#Mt 8.29; Mko 3.11,12.Na andũ aingĩ maumiw’e ndaimoni, iikaya, ikyasya, We wĩ Mwana wa Ngai. Nake aikan’ya, na aivata kũneena, nĩkwĩthĩwa nasyo nĩsyeesĩ nĩwe Klĩsto.
42Na kwakya, auma vo athi vandũ vate andũ: na makomano mamũmantha, na mooka vala ũĩ, na menda kũmũsiĩĩa ndakamatie. 43#Lk 8.1.Ĩndĩ amea atĩĩ, Mũvaka nĩtavan’ye ũvoo mũseo wa ũsumbĩ wa Ngai ndũanĩ ila ingĩ nasyo: nũndũ natũmiwe nũndũ wa ũu.
44 #
Mt 4.23. Nake atavanasya masinakokenĩ ma Kalilii.
Currently Selected:
Luka 4: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
