MWAMBĨLĨLYO 19
19
Kwanangwa kwa Sotomo na Ngomola
1Na ala alaĩka elĩ mooka Sotomo wĩoo; na Loto ekalĩte mbingĩlonĩ ya Sotomo: na Loto amona, na ookĩla amathaũe; na eekunamya na ũthyũ wake kũvika nthĩ, #Mwa 18.2,22. 2na amea, Na yu ĩndĩ, eaĩi makwa, nĩngũmũvoya, elelũkai mũlike nyũmbanĩ ya mũthũkũmi wenyu, na kwĩkala ũtukũ w’onthe, na mũithambya maũũ menyu, na mũkookĩla kĩoko tene, mũkwate nzĩa yenyu mũthi. Nao masũngĩa, Aiee, ĩndĩ tũkekala nzĩanĩ ũtukũ w’onthe. #Mwa 18.4; Lk 24.28; Aevl 13.2. 3Na amathetheesya mũno; na maathũkĩĩa kwake, malika nyũmbanĩ yake; na amavokea mboka na aua kĩmũtũ kĩte ĩlawa, nao maya. 4Ĩndĩ matanakoma, andũ ma ndũa, o andũ ma Sotomo, mathyũlũlũka nyũmba, ala anini o na ala akũũ, andũ onthe kuma ngalĩ syonthe; 5na meeta Loto, na mamũkũlya, Maĩva andũ ala mooka kwaku wĩoo ũũ? Tumaalĩlye mo, tũmamanye. #Asi 19.22; Isa 3.9; Alo 1.24,27; Yuta 7. 6Na Loto aumaala mũomonĩ vala maĩ, na avinga mũomo ĩtina wake. #Asi 19.23. 7Na amea, Nĩngũmwĩsũva, ana‐a‐asa, mũikeke ũthũku ta ũu. 8Sisya yu, nĩ na eĩtu elĩ mataamanya mũndũ mũũme; nĩngũmwĩsũva, nĩmumĩsye mo, mũmeke ũla mwĩona wĩ ũseo: ĩndĩ andũ aa mũikameke ũndũ, nĩkwĩthĩwa nĩmooka muunyĩnĩ wa kĩala kyakwa. #Asi 19.24. 9Na mamwĩa, Ĩvete. Na masya, Mũndũ ũũ ũmwe alikile kwitũ kwĩkala ũeni, na kaĩ akeethĩwa mũsili: na yu ĩndĩ nĩtũũkwĩka naĩ, kwĩ aa. Na mamũvivinya mũndũ ũsu Loto mũno, na mathengeea matũle mũomo. #Mwa 13.12; Kuma 2.14; Meko 7.26–28. 10Ĩndĩ ala andũ matambũũkya moko moo, malikya Loto vala maĩ nyũmbanĩ, na mavinga mũomo. 11Na mamekĩa metho mbindu andũ ala maĩ mũomonĩ wa nyũmba, anini o na anene, na ĩndĩ meenosya makĩmantha mũomo. #2 Asu 6.18.
12Na andũ asu mamũkũlya Loto, Vaa wĩ na ũngĩ ate o aa? Mũthonuu, na ana maku, na eĩtu maku, na o ũla wĩ nake nthĩnĩ wa ndũa, ũmaumye vandũ vaa: #2 Vet 2.9. 13nũndũ tũkaananga vandũ vaa nũndũ ũkayo woo nĩwingĩvĩte mbee wa Yeova; na Yeova nũtũtũmĩte tũvanange. #Mwa 18.20. 14Na Loto aumaala, na aneena na athoni make, ala matwaĩte eĩtu make, amea, Ũkĩlai, mume vandũ vaa; nũndũ Yeova akaananga ndũa. Ĩndĩ kwa athoni make ethĩwa ta ũmwe ũla ũnũũmavũĩa ngũĩ. #Mot 16.21,26; Ũvu 18.4. 15Na kũikya, nĩvo alaĩka makalaatile Loto, makĩmwĩa, Ũkĩla, wose mũka waku, na eĩtu maku elĩ ala me vaa, ndũkese kwanangĩkĩa kũsilĩlwanĩ kwa ndũa. #Yel 51.6. 16Ĩndĩ ekalanga; na ala andũ mamũkwata kw’oko, na kw’oko kwa mũka wake, na kw’oko kwa eĩtu make elĩ, kwondũ wa Yeova kũmwĩw’ĩa tei: na mamumaalya, mamwia ũtee wa ndũa. #Sav 32.10; 34.22; 2 Vet 2.7,8. 17Na kweethĩwa, mamaumaalya ũtee, asya, Vonokya thayũ waku; ndũkasisye na ĩtina, o na ndũkekale Ũiĩnĩ w’onthe; ĩthae ũvike kĩĩmanĩ, ndũkese kwanangĩka. #Mwa 19.26; Mt 24.16–18. 18Na Loto amea, Ai, ndũkasye ũu, mwĩaĩi wakwa: 19sisya yu, mũthũkũmi waku nĩwona ĩnee methonĩ maku, na nĩwaingĩvya ũseo waku wĩ wendo, ũla ũmbonisye ũitangĩĩa thayũ wakwa; na nditonya kwĩthaa kũvika kĩĩmanĩ, ũthũku ndũkese kũngwata, na ngĩkw’a: 20sisya yu, ndũa ĩno yĩ vakuvĩ nĩindũkĩĩe vo, nayo nĩ nini. Ame nĩvonokesye vo (tĩ nini?), Na kyuu kyakwa kĩkekala. 21Na amwĩa, Sisya, nĩnakwĩtĩkĩla o na ũndũnĩ ũũ, kana ndikang’uthũla ndũa ĩla waweta. 22Ĩkalaate, wĩvonokesye vo; nũndũ nditonya kwĩka ũndũ o na wĩva mũvaka yĩla wĩlika vo. Kwondũ wa ũu syĩtwa ya ndũa ĩsu yeetwa Nzoali.
23Syũa yaĩ yĩnambata ĩũlũ wa nthĩ yĩla Loto walikile Nzoali. 24Nĩvo Yeova wauisye ĩũlũ wa Sotomo na ĩũlũ wa Ngomola mũvĩlĩtĩ na mwaki kuma ĩtunĩ kwa Yeova; #Kũt 29.23; Isa 13.19; Yel 50.40; Nzek 2.9; Lk 17.29; 2 Vet 2.6; Yuta 7. 25na ang’uthũlanga ndũa isu, na Ũiĩ w’onthe, na andũ onthe ala matwĩe ndũanĩ, na kĩla kyameete ĩũlũ wa nthĩ. 26Ĩndĩ mũka wake asisya na ĩtina e ĩtina wake, na atw’ĩka kĩtuĩ kya mũnyũ. #Mwa 19.17. 27Na Avalaamu ambata kĩoko tene kũvika vandũ vala ũnaũngamĩte mbee wa Yeova: #Mwa 18.22. 28nake asisya ngalĩ ya Sotomo na Ngomola na ngalĩ ya nthĩ yonthe ya Ũiĩ, na oona, na, sisya, syũki ya nthĩ yambatĩte ta syũki ya iko ĩnene.
29Na kweethĩwa, Ngai akyananga ndũa sya Ũiĩ, Ngai alilikana Avalaamu, na amumya Loto katĩ wa wanangĩko, yĩla wang’uthũlile ndũa vala Loto watwĩe. #Mwa 8.1.
Mwambĩĩo wa Amoavi na Aamimoni
30Na Loto ambata kuma Nzoali, na ekala kĩĩmanĩ, na eĩtu make elĩ vamwe nake; nũndũ nĩwakĩie kwĩkalaa Nzoali: na ekala ngunganĩ, we na eĩtu make elĩ. #Mwa 19.17,19. 31Na ũla mũkũũ amwĩa ũla mũnini, Nau nĩ mũkũũ, na kũti mũndũ kũũ nthĩ wa kũlika kwitũ kũatĩĩa ũndũ kwĩkawa nthĩ yonthe: 32ũka, tũnyw’ĩthye nau mbinyu, tũkome nake, tũmwiĩe nau ũsyao. 33Na mamũnyw’ĩthya ĩthe mbinyu ũtukũ ũsu: na ũla mũkũũ alika, na akoma na ĩthe wake; na ndaamanya yĩla wakomie, kana yĩla wokĩlile. 34Na kweethĩwa ũnĩ ũsu, ũla mũkũũ amwĩa ũla mũnini, Sisya, nĩnĩnakomie ũtukũ wa ĩoo na nau: tũmũ-nyw’ĩthye mbinyu ĩngĩ ũtukũ ũũ naw’o; ũlike, ũkome nake, twiĩe nau ũsyao. 35Na mamũnyw’ĩthya ĩthe mbinyu ĩngĩ ũtukũ ũsu naw’o; na ũla mũnini ookĩla, akoma nake; o na ndaamanya yĩla wakomie, o na yĩla wokĩlile. 36Na ĩndĩ eĩtu asu elĩ ma Loto maitava ũndũ wa ĩthe woo. 37Na ũla mũkũũ asyaa mwana, na amwĩta syĩtwa yake Moavi: nĩwe ĩthe wa Amoavi kũvika mũnthĩ ũũ. #Kũt 2.9. 38Na ũla mũnini, nake asyaa mwana, na amwĩta syĩtwa yake Mbeni‐ami: nĩwe ĩthe wa ana ma Amimoni kũvika mũnthĩ ũũ. #Kũt 2.19.
Currently Selected:
MWAMBĨLĨLYO 19: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
