MWAMBĨLĨLYO 20
20
Avalaamu na Avimeleki
1Na Avalaamu athi kyalo kuma vo aende nthĩ ya ngalĩ ya Ĩtheo, na ekala katĩ wa Katesi na Suli; na ekala ũeni kũu Ngelali. #Mwa 12.10–20; 26.6–11. 2Na Avalaamu asya ũndũ wa Sala mũka wake, Nĩwe mwĩĩtuwa‐ia: na Avimeleki mũsumbĩ wa Ngelali atũmana, na amwosa Sala. 3Ĩndĩ Ngai amũkĩa Avimeleki ndotonĩ ya ũtukũ, na amwĩa, Sisya, we wĩ o mũndũ mũkw’ũ, kwondũ wa mũndũ mũka ũla wosete; nĩkwĩthĩwa nĩ mũka wa mũndũ. #Yovu 33.15,16; Sav 105.14. 4O na Avimeleki ndaĩ anamũthengeea: nake asya, Mwĩaĩi, ũkooaa o na mbaĩ ndũ-ngalu? #Mwa 18.23. 5We mwene ndanambĩa, Nĩwe mwĩĩtu‐a‐ia? O nake, we mwene asya, We nĩ mwana‐a‐ia: nĩneeka ũu na ũlũngalu wa ngoo yakwa na ũtheu wa moko makwa. 6Na Ngai amwĩa ndotonĩ, Ĩĩ, nĩnĩsĩ kana nĩweeka ũu na ũlũngalu wa ngoo yaku, o nakwa nĩnakũsiĩĩa ndũkambĩtanĩsye; kwondũ wa ũu ndinakũeka ũmũkiite. #Mwa 39.9. 7Na yu ĩndĩ mũtũngĩe mũũme mũka wake; nũndũ nĩ mwathani, nake akakũvoyea, na ũkekala thayũ: na ethĩwa ndwĩmũtũngĩa, we, manya atĩĩ, ndwĩtĩa ũkw’a, we, na onthe ala maku. #1 Sam 7.5; Yovu 42.8.
8Na Avimeleki ookĩla kĩoko tene, na ameta athũkũmi make onthe, na amatavya maũndũ asu onthe matũnĩ moo: na andũ makĩa mũno. 9Na ĩndĩ Avimeleki amwĩta Avalaamu, na amũkũlya, Ũtwĩkie ata? Nakwa ngũvĩtanĩsye ũndũnĩ wĩva, kana ũndetee nyie na ũsumbĩ wakwa naĩ nene? Nũmbĩkie meko mataĩle kwĩkwa. 10Na Avimeleki akũlya Avalaamu, Wonie kyaũ, ũkĩka ũndũ ũũ? 11Na Avalaamu asũngĩa, Nũndũ naisye, Nĩ w’o kũkĩa Ngai kũi vandũ vaa; nao makambũaa kwondũ wa mũka wakwa. #Mwa 12.12; 26.7; 42.18; Nth 16.6. 12Na ĩngĩ nĩ w’o nĩ mwĩĩtu‐a‐ia, mwĩĩtu wa nau, ĩndĩ ti mwĩĩtu wa mwaitũ; na atw’ĩka mũka wakwa: #Mwa 11.29. 13na kweethĩwa, yĩla Ngai watumie nĩthi kyalo kuma nyũmbanĩ ya nau, namwĩa, Ũseo waku ũla wĩmbĩkaa nĩ ũũ: kĩla vandũ vala twĩvikaa, ũndũ wakwa aasya, Nĩ mwana‐a‐ia. #Mwa 12.1,13. 14Na Avimeleki oosa malondu na ng’ombe, na athũkũmi aũme na eĩtu, amũnenga Avalaamu, na amũtũngĩa Sala mũka wake. 15Na Avimeleki amwĩa, Sisya, nthĩ yakwa yĩ mbee waku: ĩkala vala ũkwenda. #Mwa 13.9. 16Nake amwĩa Sala, Sisya, nĩnanenga mwana‐a‐au ilungu ngili sya vetha: sisya, kwaku nĩ sya ũkũvw’ĩka metho kwa onthe ala me vamwe naku; na ĩngĩ nũlũngalĩtw’e kwa onthe. 17Na Avalaamu avoya Ngai: na Ngai avosya Avĩmeleki, na mũka wake, na athũkũmi make eĩtu; na masyaa syana. #1 Sam 12.23; Yovu 42.8. 18Nũndũ Yeova nĩwavingĩte vyũ mavu ma onthe ma nyũmba ya Avimeleki, kwondũ wa Sala, mũka wa Avalaamu.
Currently Selected:
MWAMBĨLĨLYO 20: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
