MWAMBĨLĨLYO 17
17
Nzaĩko, ũvano wa ũla ũtianĩo
1Na yĩla Avalamu waĩ wa myaka mĩongo kenda na kenda, Yeova amumĩlĩla Avalamu, na amwĩa, Ninyie Ngai Mwene Vinya W’onthe; endaa mbee wakwa, na ĩthĩwa wĩ mwĩanĩu. #Mwa 24.40; Yovu 1.1; Mt 5.48. 2Nakwa ngatianĩa ũtianĩo wakwa katĩ wakwa naku, na ngakwingĩvya mũno. #Mwa 13.16. 3Na Avalamu avalũka na ũthyũ wake: na Ngai aneena nake, akĩmwĩa, #Mwa 17.17; Mot 16.22; 20.6. 4Nyie, sisya, ũtianĩo wakwa wĩ naku, na ũkeethĩwa ĩthe wa mbaĩ mbingĩ mũno. #Alo 4.11,12. 5O na ndũketwa ĩngĩ syĩtwa yaku Avalamu, ĩndĩ syĩtwa yaku yĩkeethĩwa Avalaamu; nũndũ nĩnakũtw’ĩkĩthya ĩthe wa mbaĩ mbingĩ mũno. #Nee 9.7; Alo 4.17. 6Na ngakwingĩvya mũno mũnene, na ngakũtw’ĩkĩthya mbaĩ, na asumbĩ makauma kwaku. #Mwa 35.11. 7Na ngalũlũmĩlya ũtianĩo wakwa katĩ wakwa naku na ũsyao waku ĩtina waku mosyaanĩonĩ moo wĩthĩwe wĩ ũtianĩo wa tene na tene, nĩthĩwe nĩ Ngai kwaku na kwa ũsyao waku ĩtina waku. #Aka 3.17; Aevl 11.16. 8Na ngakũnenga we, na ũsyao waku ĩtina waku, nthĩ ĩla wĩkalaa wĩ mũeni, nthĩ yonthe ya Kanaani, yĩthĩwe ng’ũndũ yenyu tene na tene; nakwa ngeethĩwa Ngai woo. #Mwa 13.15; Kuma 6.7; 29.45; Ali 26.12; Sav 48.14; 105.11; Ũvu 21.7.
9Na Ngai amwĩa Avalaamu, Naku, lũmya ũtianĩo wakwa, we, na ũsyao waku ĩtina waku mosyaanĩonĩ moo. 10Ũũ nĩ ũtianĩo wakwa, ũla mwĩkwata, katĩ wakwa naku na ũsyao waku ĩtina waku: kĩla mũndũ mũũme katĩ wenyu akaĩkwa. 11Mũkaĩkwa nyama ya ikonde sya mbinũ: nayo ĩkeethĩwa ũvano wa ũtianĩo katĩ wakwa naku. #Meko 7.8; Alo 4.11. 12Na ũla wa matukũ nyanya katĩ wenyu akaĩkwa, kĩla mũndũ mũũme mosyaanĩonĩ menyu, ũla ũsyaĩtwe nyũmbanĩ, kana ũla ũthooetwe na mbesa kwa mũeni o na wĩva w’onthe ũte wa ũsyao waku. #Kuma 12.48; Ali 12.3; Lk 1.59; 2.21. 13Ũla ũsyaĩtwe nyũmbanĩ kwaku, na ũla ũthooetwe na mbesa syaku, ndakatĩa kwaĩkwa: na ũtianĩo wakwa ũkeethĩwa mwĩĩnĩ wenyu wĩthĩwe ũtianĩo wa tene na tene. 14Na mũndũ mũũme ũte mwaĩke ũtanaĩkwa nyama ya kĩkonde kya mbinũ yake, mũndũ ũsu akavetwa kuma andũnĩ make: nũtũlĩte ũtianĩo wakwa.
15Na Ngai amwĩa Avalaamu, Nake Salai mũka waku, ndũkamwĩte Salai, ĩndĩ syĩtwa yake yĩkeethĩwa Sala. 16Nakwa ngamũathima, na ĩngĩ ngakũnenga mwana kuma kwake: ĩĩ, ngamũathima, nake akeethĩwa inyia wa mbaĩ; asumbĩ ma andũ makauma kwake. #Mwa 18.10; 35.11. 17Na ĩndĩ Avalaamu avalũka na ũthyũ wake, na atheka, na akũlya ngoonĩ yake, Ũla wĩ myaka ĩana akasyaĩwa mwana? Na Sala, ũla wĩ myaka mĩongo kenda, akasyaa? #Mwa 17.3; 18.12. 18Na Avalaamu amwĩa Ngai, Ame, kethĩwa Isumaeli nĩwĩkalaa thayũ mbee waku! 19Na Ngai asũngĩa, Aiee, ĩndĩ Sala mũka waku akakũsyaĩa mwana; naku ũkeeta syĩtwa yake Isaka: na ngalũlũmĩlya ũtianĩo wakwa nake wĩthĩwe ũtianĩo wa tene na tene kwondũ wa ũsyao wake ĩtina wake. #Mwa 18.10; 21.2. 20Na Isumaeli ũndũ wake, nĩnakwĩw’a: sisya, nĩnamũathima, na ngamwongeleela, na kũmwingĩvya mũno mũnene; akasyaa anene ĩkũmi na elĩ, nakwa ngamũtw’ĩkĩthya mbai nene. #Mwa 16.10; 21.13,18. 21Ĩndĩ ngalũlũmĩlya ũtianĩo wakwa na Isaka, ũla Sala ũkakũsyaĩa ĩvinda ta yĩĩ mwaka ũla ũngĩ. #Mwa 21.2; 26.2–5.
22Na Ngai amina ũneena nake, na ambata kuma kwa Avalaamu. #Mwa 35.13. 23Na Avalaamu oosa Isumaeli mwana wake, na onthe ala masyaĩwe nyũmbanĩ kwake, na onthe mathooiwe na mbesa syake, kĩla mũndũ mũũme katĩ wa nyũmba ya Avalaamu, na amaĩka nyama ya ikonde sya mbinũ syoo mũthenya ũsu, o tondũ Ngai wamũtavisye. 24Nake Avalaamu aĩ wa myaka mĩongo kenda na kenda, yĩla waĩkiwe nyama ya kĩkonde kya mbinũ yake. 25Na Isumaeli mwana wake aĩ wa myaka ĩkũmi na ĩtatũ, yĩla waĩkiwe nyama ya kĩkonde kya mbinũ yake. 26Mũthenya o ũsu ũmwe Avalaamu aĩkwa, na Isumaeli mwana wake. 27Na aũme onthe ma nyũmba yake, ala masyaĩwe nyũmbanĩ yake, na ala mathooiwe na mbesa kwa mũeni, nĩmaĩkiwe vamwe nake.
Currently Selected:
MWAMBĨLĨLYO 17: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
