MWAMBĨLĨLYO 16
16
Akali na Isumaeli
1Na ĩndĩ Salai, mũka wa Avalamu, ndaamũsyaĩa syana: nake aĩ na mũthũkũmi mwĩĩtu, Mũmisili, syĩtwa yake eetawa Akali. 2Na Salai amwĩa Avalamu, Sisya yu, Yeova nũnziĩĩe ndikasyae; nĩngũkwĩsũva ĩndĩ, lika kwa mũthũkũmi wakwa, mwĩĩtu; nokwĩthĩwa ngosa syana kwake. Na Avalamu eethukĩĩsya wasya wa Salai. #Mwa 30.3. 3Na Salai, mũka wa Avalamu, oosa Akali, Mũmisili, mũthũkũmi wake, mwĩĩtu, ĩtina wa Avalamu ekala myaka ĩkũmi nthĩ ya Kanaani, na amũnenga Avalamu, mũũme wake, atw’ĩke mũka. 4Na alika kwa Akali, nake aya ĩvu: na yĩla wonie kana e ĩvu, avũthya vivi wake methonĩ make. #1 Sam 1.6,7. 5Na Salai amwĩa Avalamu, Ũthũku wakwa wĩthĩwe kwaku: nĩngũnengete mũthũkũmi wakwa, mwĩĩtu, kĩthũinĩ kyaku; na yĩla wonie kana e ĩvu, ambũthya methonĩ make: Yeova nasile katĩ wakwa naku. #Mwa 31.53; 1 Sam 24.12. 6Ĩndĩ Avalamu amwĩa Salai, Sisya, mũthũkũmi waku, mwĩĩtu, e kw’okonĩ kwaku; mwĩke ũndũ ũkwona wĩ ũseo methonĩ maku. Na Salai amũthĩn’ya, nake akĩa auma mbee wa ũthyũ wake.
7Na mũlaĩka wa Yeova amwĩthĩa nthongonĩ ya manzĩ weũnĩ, ĩla nthongo yĩ nzĩanĩ ya Suli. 8Nake akũlya, Akali, mũthũkũmi mwĩĩtu wa Salai, wauma va? Na wĩthi kũ? Na asũngĩa, Nĩngĩĩte nume mbee wa ũthyũ wa vivi wakwa Salai. 9Na mũlaĩka wa Yeova amwĩa, Mũsyokee vivi waku, na ũyĩnyivya mokonĩ make. 10Na mũlaĩka wa Yeova amwĩa, Ngaingĩvya mũno ũsyao waku, ũndũ ũtakatalĩka nũndũ wa kwingĩva. #Mwa 17.20; 25.12–16. 11Na mũlaĩka wa Yeova amwĩa, Sisya, wĩ ĩvu, na ũkasyaa mwana; na ũkamwĩta syĩtwa yake Isumaeli, nũndũ Yeova nĩwew’a thĩna waku. #Mwa 29.32. 12Nake akeethĩwa ta ĩng’oi ya kĩthekanĩ katĩ wa andũ; kw’oko kwake kũkeethĩwa ĩũlũ wa kĩla mũndũ, na kw’oko kwa kĩla mũndũ ĩũlũ wake; nake akatũa elekanĩle na ana‐a‐ĩthe make onthe. #Mwa 25.18; Yovu 39.5–8. 13Na eeta syĩtwa ya Yeova ũla waneenie nake, Nue Ngai ũla wonaa: nũndũ aisye, O na vaa nĩnamwonea ũla ũnziasya? 14Kwondũ wa ũu kĩthima kyeetwa Mbeeli‐laai‐loi; sisya, kĩ katĩ wa Katesi na Mbeleti.
15Na Akalĩ amũsyaĩa Avalamu mwana: na Avalamu amwĩta mwana wake Isumaeli, ũla Akali wasyaie. #Mwa 16.11. 16Na Avalamu aĩ wa myaka mĩongo nyanya na thanthatũ, yĩla Akali wamũsyaĩe Avalamu Isumaeli.
Currently Selected:
MWAMBĨLĨLYO 16: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
