ZABURI 148
148
Ense yonsi ekorangerigwa gocha gotogia Nyasae
1Motogie Omonene!
Motogie Omonene korwa agwo igoro!
Momotogie agwo igoro mono!
2Inwe abamalaika baye mwensi, motogie,
nainwe emeganda yaye yonsi, motogie!
3Aye erioba, na aye omotienyi, motogie,
nainwe ching’enang’eni chionsi chikobara, motogie.
4Inwe igoro ya igoro chionsi, motogie
Nainwe amache are igoro ya igoro, motogie!
5Ebinto ebio bionsi tiga bitogie erieta ri’Omonene,
ekiagera nere ochigete, na ebio bigatongwa,
6Omonene obibekire bigenderere kobao goika kare na kare;
nigo abibekerete ogochika okwo gotaetanigwe.
7Motogie Omonene korwa ase ense,
nainwe ebitongwa bie chinyancha ne chindiba chionsi!
8Motogie, inwe omorero na amagena ’embura, na obokeng’entu, na amare,
na aye omwaga omotindi ogoikerania aya achigete!
9Motogie Omonene, inwe ebitunwa na ebigoro bionsi,
nainwe emete ekwama amatunda, na emecharake yonsi,
10nainwe ching’iti chi’orosana na echitugire chionsi,
nainwe echikwagura amo ne chinyoni chionsi!
11Motogie inwe abaruoti b’ense na abanto bonsi,
nainwe abagambi na abanachi ebina mwensi,
12nainwe abamura na abaiseke mwensi,
nainwe abanto abagotu na abana.
13Inwe mwensi, togia erieta ri’Omonene,
ekiagera erieta riaye nario rioka rire rinene rikobakwa;
obonene bwaye nigo boetanaine ense na igoro.
14Omonene omeririe abanto baye chingunchara,
erinde abachenu baye bonsi bamotogie;
ee, Abaisraeli abwo bare ang’e nere bamotogie!
Motogie Omonene!
Currently Selected:
ZABURI 148: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
