ZABURI 145
145
Ogotogia obonene na obuya bwa Nyasae
(Ogotera gwa Daudi)
1Aye Nyasae one na omoruoti one, ninkobake,
nimbe ngotogia erieta riao goika kare na kare.
2Kera rituko nimbe nkogotogia,
nintogie erieta riao goika kare na kare.
3Omonene nigo are omonene, nagwenerete atogigwe mono;
obonene bwaye tibokomanyekana buna bore.
4Emeremo yao netogigwe ebiaare ase ebiaare.
Mbirarie ogokora kwao kore okonene.
5Nimbe nkorengereria mono igoro y’obonene bwao bw’ogosikwa okonene,
na igoro y’emeremo yao y’ogokumia.
6Abanto mbabe bakoraria ogokora kwao okonene gw’okoirokia,
nainche nimbe nkoraria obonene bwao.
7Mbararie chinkuma chi’obuya bwao obonge,
babe bagotera namariogi amanene gotogia oboronge bwao.
8Omonene nigo are nobwanchani obonge, na amabera amange;
tari omwango ase okoba nendamwamu,
nigo aichire nobwanchani bogendererete botambe.
9Omonene nigo are omuya ase abanto bonsi,
naende nigo are namabera ase ebitongwa biaye bionsi.
10Aye Omonene, ebitongwa biao bionsi nigo bikogoakere ng’a mbuya mono,
na abachenu bao bonsi mbagotogie.
11Mbabe bakoraria obonene bw’oboruoti bwao,
naende babe bagokwana igoro y’okobua kwao,
12bamanyie mwanyabanto ogokora kwao okonene,
na obonene bw’ogosikwa kw’oboruoti bwao.
13Oboruoti bwao nobwa kare na kare,
na okogambera kwao nigo kogendererete ase ebiaare bionsi.
Omonene nigo are omwegenwa ase amang’ana aye onsi,
na oichire nobuya ase ogokora kwaye gwonsi.
14Omonene nigo akobwata bonsi abakogwa,
nigo akogororokia abwo bakumbirwe gochia inse.
15Amaiso ’ebitongwa bionsi nigo akorigereretie nogosemeria,
naye nigo okobia chindagera chiabo ase chingaki chigwenerete.
16Aye nigo okomaanora okoboko kwao,
kwarua amaya na goisanekia kera egetongwa kere moyo.
17Omonene nigo are omonyene oboronge ase chinchera chiaye chionsi,
na omuya ase ogokora kwaye gwonsi.
18Omonene nigo are ang’e ase abanto abwo bakomorangeria;
abwo bonsi bakomorangeria ase ekeene.
19Omonene nigo agoikeraneria abamoirogete okogania kwabo;
boigo nigo akoigwa ekerero kiabo na kobatooria.
20Omonene nigo arendete bonsi abamwanchete;
korende nasirie abakori amabe bonsi.
21Omonwa one nobe ogokwana ogotogigwa kw’Omonene;
tiga ebitongwa bionsi bitogie erieta riaye richenu
bono na goika kare na kare.
Currently Selected:
ZABURI 145: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
