ZABURI 144
144
Okomotogia Nyasae ase obobui
(Ogotera gwa Daudi)
1Atogigwe Omonene, oyore egetare kiane;
bworokereirie amaboko aane amanye korwana esegi,
ne ebiara bimanye korwana.
2Ere nigo are nobwanchani asende, naende orwaki rwane,
obwebiso bwane obokong’u na Omobooria one.
Ere nenguba yane, nere ngotamera,
ekiagera nabeke abanto baane inse yane banyigwere.
3Aye Omonene, omonto ninki aisaine goika okomwechandera,
gose mwanyabanto ninki are, aye okomorengereria?
4Omonto nigo are buna omooki,
amatuko aye nigo anga buna omorengari ogoeta.
5Omonene, kumba igoro chiao ochiche inse aa!
Kuna ebitunwa, erinde bisokie erioki.
6Mesia chinkoba chiao oserebanie ababisa,
ruta chinsara chiao obasirie kegima!
7Rambora okoboko kwao korwa agwo igoro,
ondusie na ontoorie korwa ase amache aya amange,
na korwa ase amaboko ’abanto be chinse chingeni,
8abwo bagokwana oborimo nemenwa yabo,
na amaboko abo a borio agokora ay’obong’ainereria.
9Aye Nyasae, ningoterere ogotera okoyia,
ninkobugerie obokano bore ne chinga ikomi.
10Aye nigo okoa abaruoti obobui,
naye gwatooretie Daudi, omosomba oo, korwa ase omoro bw’obobe.
11Ondusie na ontoorie korwa ase amaboko ’abanto be chinse chingeni,
abwo bagokwana oborimo nemenwa yabo,
na amaboko abo a borio agokora ay’obong’ainereria.
12Tiga abamura baito ase oboke bwabo
babe buna ebimeri biakinire bire ne chinguru,
na abaiseke baito babe buna ebisigisa bie chikoona
bibaachire buya bikogwenera chinyomba chi’oboruoti.
13Tiga ebiage biaito biichore chindagera, bigaache chindagera ao ao,
ne ching’ondi chiaito chire ase ebitii chibiare chilifu ne chilifu.
14Tiga chiombe chiaito chibe ne chinguru,
ende tebaisa korekera, gose gochia bogima.
Ekerero kende gionsi tikeba ase chinchera chiaito.
15Mbasesenirie abanto bakonyora ogosesenigwa okwo.
Ee, mbasesenirie abanto abwo Nyasae are Omonene obo.
Currently Selected:
ZABURI 144: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
