MARIKO 6

Yeso okwangwa Nazareti

(Mat 13:53–58; Luk 4:16–30)

1Akarua agwo, agaika ase ense yaye omonyene; aborokigwa baye bakamotunyana. 2Na ekero gi’Esabato agachaka kworokereria ase esinagogi; abange abamoigwete bagakumia, bagatebania, “Oyo ng’ai anyorire aya? Mbong’aini ki obo aeirwe oyo? Ogokora gwe chinguru ki oko okonene kogokoreka ase amaboko aye? 3Oyo tari oria omobaachi, omwana o Mariamu, momura omwabo Yakobo, na Yose, na Yuda, na Simion, na basubati bamwabo tibari aiga seito?” Bakagechigwa nere. 4Yeso akabatebia, “Omobani takomocha gosikwa, otatiga ase ense yaye, na ase eamate yaye, na ase enyomba yaye.” 5Gose tanyara gokora ogokora gwe chinguru aroro, otatiga abegete amaboko aye igoro ase abarwaire bake, akabagwenia. 6Agakumia ase engencho y’ogotegena kwabo.

Obotomwa bw’abatomwa ikomi na babere

(Mat 10:5–15; Luk 9:1–6)

Agaetanana ase ebichie biaetanaineo okworokereria. 7Akarangeria baria ikomi na babere, agachaka kobatoma babere babere, akabaa okobua igoro ase ebirecha bi’eubi; 8akabakania tibaira gento ase orogendo rwabo, otatiga cnyimbo yoka. Tibaira nonya nomogati, nonya nesaro, nonya nechibesa ase ebimoya biabo. 9Korende babeke ebikoroto, go tibeboyia chianga ibere. 10Akabatebia, “Enyomba ende yonsi ase morasoe, mobeere aroro goika ekero moraimoke korwa aase aria. 11Na kera aase abanto batabaroiseti inwe, gose kobaigwa, komokorua aroro, mokong’onte orotu rore inse ase amagoro aino, robe kirori asebare.” 12Bagasoka, bakarandia ng’a abanto baonchoke. 13Bagaseria ebirecha ebinge, bagaaka abanto abange amaguta, abwo barenge abarwaire, bakabagwenia.

Ogokwa kwa Yohana Omobatisi

(Mat 14:1–12; Luk 9:7–9)

14Omoruoti Herode akaigwa amang’ana, ekiagera erieta ria Yeso konya riakumire, akabora, “Yohana Omobatisi obokire korwa ase abakure, nakio gekogera chinguru echi chigokora emeremo ime asare.” 15Korende abande bakabora, “N’Elija.” Na abande bakabora, “Oyo nomobani, gose nigo anga buna oyomo bw’ababani.”

16Korende Herode agachia koyaigwa, akabora, “Oyo nere Yohana oria nanachete omotwe, obokire.” 17Naki Herode omonyene nigo atomete abanto kobwata Yohana, akamosiba echela ase engencho ya Herodia moka Filipo momura omwabo, oria Herode amotwarete, 18ekiagera Yohana amokanetie Herode, “Tai boronge asore komenyana na moka momura omino.” 19Nabo oria Herodia akaba nokogecha asare, akarigia komoita, korende tanyara, 20ekiagera Herode nairogete Yohana, konya omanyire ng’a nomonto omoronge, omochenu, akamorenda. Gachia komoigwa, agaichana mono; nonya nabo nigo arenge komoigwa nomogoko. 21Rituko rigwenerete rigachia goika ekero Herode ase rituko ri’okoinyora okoiborwa kwaye agachia gokora omoyega ase abatang’ani bare inse yaye, na abatang’ani b’esegi, na abanto abanene ba Galili. 22Ekero omoiseke bwe Herodia asoa gotenga, akagokia Herode amo nabwo baikaransete nere ase omoyega. Omoruoti agatebia omoiseke oria, “Nsabe kende gionsi ekio origetie, na inche ninkoe.” 23Akamoriera eira, “Kende gionsi ekiorarigie korwa asende ninkoe, nonya nekeng’ese ki’oboruoti bwane.” 24Omoiseke oria agasoka, akaboria ng’ina, “Inki ndasabe?” Ng’ina akamoiraneria, “Omotwe o Yohana Omobatisi.” 25Erio kegima agasoa nomoayerero ase obosio bw’omoruoti, agasaba, akabora, “Nindigetie ong’e omotwe o Yohana Omobatisi bono iga ase esani.” 26Omoruoti akaba nomoichano mono, korende ase engencho ye chiira chiaye, na ase engencho y’abwo baikaransete ase omoyega, tarigetie kwanga. 27Erio kegima omoruoti agatoma omorwani oyomo, agachika ng’a omotwe o Yohana orentwe. Omorwani oria akagenda akamonacha omotwe aria echela ime, 28akayorenta ore ase esani, akayoa omoiseke oria, na omoiseke oria akayoa ng’ina. 29Aborokigwa baye bagachia koigwa amang’ana aya, bakagenda bakabogoria egetondo, bakagetindeka.

Okoirana kw’abatomwa

(Mat 14:13–14; Luk 9:10)

30Abatomwa bakairana ase Yeso, bakamotebia onsi ayabakorete, na amang’ana onsi ayaborokereretie. 31Akabatebia, “Inchuo inwe mweka, togende aase abanto batari, motimoke ake.” Naki abanto abange mbarengeo, bagocha na bakogenda; nonya neribaga tiriarenge ri’okoria. 32Bakagenda ase obwato, aase abobisi, atari nabanto. 33Abanto bakabarora bakogenda, abange ase abwo bakabamanya, bakaminyoka bwango korwa ase emechie yonsi, batang’ane goika asare. 34Yeso agachia goika korwa ase obwato, akarora omoganda omonene, akabarorera amabera, ekiagera barenge buna ching’ondi chitari nomorisia: agachaka koborokereria amang’ana amange.

Okoragerigwa kw’abanto chilifu isano

(Mat 14:15–21; Luk 9:11–17; Yoh 6:1–13)

35Goika chinsa chinyinge chi’omobaso chigaeta, aborokigwa baye bakamochiera, bakabora, “Aase aa negesomo, na bono riagorobire. 36Kae abanto aba ribaga, erinde bagende emechie na ebichie, aria na aaria, begorere endagera.” 37Akabairaneria, “Inwe bae endagera.” Bakamoboria “Inee! Togende togore emegati ye chidinari amagana abere, tobae barie?” 38Akababoria, “Emegati nerenga mobwate? Genda morore!” Bagachia komanya bakabora, “Netano, ne chinswe ibere.” 39Akabachika babaikaransie bonsi, ebiombe, ebiombe, ase obonyansi obobese. 40Bagaikaransa ase chindwaro, echinde rigana erimo na echinde emerongo etano. 41Akabogoria emegati eria etano ne chinswe chiria ibere, akarigereria igoro, akabisesenia, agasamunyora emegati eria, akaa aborokigwa baye babiterekere abanto, ne chinswe chiria ibere, akabagabera bonsi. 42Bonsi bakaria, bakaigota. 43Bagasangereria ebisamunye biasamunyogete, na ebio bigaichoria ebitonga ikomi na bibere, naboigo nebisamunye bie chinswe. 44Na abasacha abariete emegati eria nigo barenge chilifu isano.

Yeso ogotaara ase enyancha igoro

(Mat 14:22–27; Yoh 6:16–21)

45Erio Yeso akabetereria aborokigwa baye bariine obwato, bamotang’anere kogenda ng’umbu goika Bethisaida ekero are koa omoganda ribaga ogende. 46Goika agachia gokoora gokwana nabarabwo, akagenda egetunwa gosaba. 47Riachia koba mogoroba, obwato bokaba enyancha gati, na ere bweka ase ense enyomo. 48Akabarora bagwechanda bagoata amache nemegango, ekiagera omwaga nigo obatangete. Koreng’ana ekero ki’oborendi bwa kane bwa botuko agacha asebare, ogotaara igoro ase enyancha, akarigia kobaetania. 49Barabwo bagachia komorora ogotaara ase enyancha igoro, bagakaga ng’a nerirengari, bagaaka eriogi, 50ekiagera bonsi abamoroche mbaondogete. Bwango agakwana nabarabwo, akabatebia, “Remia chinkoro! Ninche. Timoiroka!” 51Akariina ime ase obwato asebare; omwaga ogakira. Bagaichana mono, 52ekiagera tibamanyete amang’ana ’emegati eria, korende chinkoro chiabo nigo chiarenge chinkong’u.

Abanto ba Genesareti bakogwenigwa

(Mat 14:34–36)

53Ekero bambokire bagaika ense ya Genesareti, bakabeka ekerochi. 54Bagachia gosoka korwa ase obwato, abanto bakamomanya bwango, 55bakaminyoka, bagaetanana ense eria yonsi, bagachaka kobogoria abarwaire bare ase amarere abo, bakagenda kera aase baigwete ng’a nao are. 56Kera aase are kogenda ase ebichie, gose emechie, gose emegondo, bakabeka abarwaire ase chichiiro, bakamosorora ng’a abae ribaga bakune nonya nomokoba bw’eanga yaye; na abwo bonsi abamokunete bakagwena.

Currently Selected:

MARIKO 6: EKEGUSIIBBLE

Highlight

Copy