MARIKO 5

Okogwenigwa kw’Omogeraseni obwatire nebirecha

(Mat 8:28–34; Luk 8:26–39)

1Bagaika ng’umbu y’enyancha, goika ense y’Abageraseni. 2Yeso agachia goika korwa obwato; agwo akaumerana nomonto okorwa ase chimbeera obwatire nekerecha ki’eubi. 3Obomenyo bwaye nigo bwarenge aria ase chimbeera. Monto onde tarenge ore konyara komosiba nonya nase ebinyuri, 4ekiagera nigo arenge konya osibirwe ara aange ne chingataare na ebinyuri, abutora ebinyuri biria, na kobuna‐buna chingataare chiria, na onde tarenge ore ne chinguru chi’okomobua. 5Na botambe, botuko na mobaso, nao arenge ase chimbeera na ebitunwa, okona‐korera na gwekeba‐keba namagena. 6Agachia korora Yeso korwa are, akaminyoka chimbero, akamosasima; 7agaaka eriogi, okobora, “Inaki inde naye Yeso, Omwana o Nyasae ore Igoro Mono? Nagotianirie ase Nyasae ng’a tonchanda”, 8ekiagera Yeso konya ogetebirie, “Aye ekerecha ki’eubi, karwe ase omonto oyo!” 9Yeso akamoboria, “Erieta riao naki okorokwa?” Akairaneria, “Erieta riane n’Elegioni, ekiagera nabange tore.” 10Akamosorora mono tabiira isiko y’ense eria. 11Aria ase egetunwa ndiarengeo riicho rinene rie chimbeche riare korisia. 12Ebirecha bionsi bikamosorora, bikabora, “Toire ase chimbeche, tonyare gosoa chirochio.” 13Akabia ribaga. Ebirecha biria bi’eubi bigasoka, bigasoa ase chimbeche chiria; riicho riria rigatirimboka bwango gochia ase egeturunkano, goika chikagwa enyancha ime. Igo chiarenge koreng’ana chilifu ibere, chikarimera nyancha ime.

14Abarisia bagatama, bakararia amang’ana aya ase omochie na ebichie. Abanto bagasoka barore amang’ana aorokire. 15Bagachiera Yeso, bakarora omonto oria obwatire nomoganda bw’ebirecha oikaransete, bweboyetie chianga, ore nebirengererio ebironge bakairoka. 16Na baria abayaroche bakaorokia amang’ana amonyorire oria obwatire nebirecha, na amang’ana e chimbeche. 17Bagachaka gosorora Yeso arue ase chimbebe chiabo. 18Agachia koriina obwato ime, oria obwatire nebirecha akamosorora ng’a abe amo nere. 19Yeso tamwanchera, korende akamotebia, “Genda nka bwoo ase abamino, obatebie amang’ana amanene aya Omonene agokoreire, naende buna akororeire amabera.” 20Akagenda bwoye, agachaka koraria ase Dekapoli amang’ana aya Yeso amokoreire. Abanto bonsi bagakumia.

Omoiseke o Yairo na omokungu ore noborwaire bw’okorua amanyinga

(Mat 9:18–26; Luk 8:40–56)

21Yeso kambokire naende koirana ng’umbu nobwato boria, omoganda omonene okamosangererekanera; ere nigo arenge ensemo y’enyancha. 22Omonto oyomo bw’abanene b’esinagogi agacha, erieta riaye Yairo. Agachia komorora, akagwa ase amagoro aye, 23akamosorora mono, akabora, “Omonene, omoiseke one omoke oisire gokwa. Nagosabire, oche obeke okoboko kwao igoro yaye, anyare kogwena, abe moyo.” 24Akagenda amo nere.

Omoganda omonene okamotunyana, okamomiga‐miga. 25Narengeo omokungu oyomo orenge noborwaire bw’okorua amanyinga ase engaki y’emiaka ikomi na ebere. 26Ere nigo achandegete mono ase amaboko ’abarwaria abange. Ere konya osiareire ebinto bionsi arenge nabio, tagwenigwa nonya ng’ake, korende obogima bwaye bokamentekana koba obobe kobua. 27Erio agachia koigwa amang’ana igoro ya Yeso, agaeta ase omoganda korwa nyuma, agakuna eanga yaye, 28ekiagera nigo atebete, “Kondakune chianga chiaye chioka, ningwene.” 29Erio kegima ensoko y’amanyinga aye egakama: akaigwa omobere oye ng’a ogwenire korwa ase oborwaire bwaye. 30Erio agwo Yeso akamanya ase omoyo oye ng’a chinguru chiarure asare, akeonchora gati ase omoganda, akabora, “Ning’o okuna chianga chiane?” 31Aborokigwa baye bakamotebia, “Kwarorire omoganda buna okomigete, na aye gokoboria: Ning’o onkuna?” 32Akarigereria chinsemo chionsi, erinde arore oria okora ring’ana erio. 33Na omokungu oria agasogwa nomoondoko na okoiguswa, akamanya eriamonyorire, agacha akamogwera, akamoorokeria ekeene gionsi. 34Yeso akamotebia, “Omoiseke one, okwegena kwao gwakogwenirie, genda nomorembe, ogwene korwa ase oborwaire bwao.”

35Ekero arenge gokwana, abanto korwa ase enyomba y’omotang’ani bw’esinagogi bagacha, bakabora, “Enyaroka yao yakure. Inki okona‐koroseria Omworokia rende?” 36Korende Yeso tancha gotegerera ring’ana riria rigotebwa, agatebia omotang’ani oria bw’esinagogi, “Toiroka, egene rioka.” 37Gose tanchete monto onde amotunyane, otatiga Petero, na Yakobo, na Yohana momura omwabo Yakobo. 38Bagaika enyomba y’omonene oria bw’esinagogi; akarora riroroche, na abanto bakorera nokweumia okonge. 39Agachia gosoa, akabatebia, “Naki mogokora riroroche na korera? Omwana takweti, korende nigo araire.” 40Bakamosekerera. Korende gaikire kobasokia isiko bonsi, akaira ise omwana, na ng’ina, na baria barenge amo nere, agasoa ime ase omwana oria arenge. 41Akamobwata okoboko omoiseke oria omoke, akamotebia, “Talitha kumi”, okoonchorwa kwaye, “Omoiseke, nagotebirie, imoka.” 42Erio agwo omoiseke oria omoke agatenena akagenda, ere konya okoorire emiaka ikomi na ebere. Erio bagakumia ogokumia okonene. 43Yeso akabakurera ng’a monto onde tamanya amang’ana ayio, akabachika bae omoiseke oria endagera arie.

Currently Selected:

MARIKO 5: EKEGUSIIBBLE

Highlight

Copy