MATAYO 25

Omoreng’anio bw’abaiseke ikomi abaganyete omonyuomi

1“Oboruoti bwa igoro nigo bogwekanirie nabaiseke ikomi ababogoretie chitaya chiabo, bagasoka gochia korotota omonyuomi. 2Batano ase barabwo nigo barenge abariri, na batano abang’aini. 3Na ekero baria abariri baimogetie chitaya chiabo, tibachiimokia namaguta; 4korende baria abang’aini bakaimokia amaguta ase ebinto biabo amo ne chitaya chiabo. 5Ekero omonyuomi atebana gocha, bagasundoka bonsi, bakarara. 6Korende botuko gati gekaba egeturi: Rigereria, omonyuomi oyo! Soka momorotote! 7Erio abaiseke baria bonsi bakaimoka koroisia chitaya chiabo. 8Baria abariri bagatebia baria abang’aini: Twatanere amaguta aino, ekiagera chitaya chiaito chiarimire. 9Korende baria abang’aini bakabairaneria: Taibo. Takonyara gotoisana intwe nainwe twensi, mbuya mogende mwegorere ase abakoonia. 10Na ekero bachia kogenda kogora, omonyuomi agacha, na baria bebegete ang’e bagasoa amo nere ase omoyega bw’enyangi; na egesieri kegasiekwa. 11Naende nyuma yaye abaiseke baria bande bagacha, bakabora: Omonene, Omonene, toigorere! 12Korende akabairaneria: Nekeene nabatebirie: Timbamanyeti inwe. 13Ase igo renda, ekiagera timomanyeti rituko, nonya nensa.

Omoreng’anio bwe chitalanta

14“Igo enga buna omonto ore kogenda orogendo, akarangeria abasomba baye, akabeka enibo yaye asebare. 15Akaa oyomo chitalanta isano, na oyonde ibere, na oyonde eyemo, kera omonto koreng’ana nokonyara kwaye. Erio akagenda. 16Oria oetwe chitalanta isano akagenda ara rimo, agachionchoreria, akanyora ebitoki, chitalanta chinde isano. 17Naboigo noria oetwe chitalanta ibere akanyora ebitoki, chitalanta chinde ibere. 18Korende oria oetwe etalanta eyemo akagenda, agakunya inse, akabisa ebesa y’omonene oye. 19Nyuma y’amatuko amange omonene bw’abasomba baria agacha, akarigia gokora omobaro nabarabwo. 20Oria oetwe chitalanta isano agacha ne chitalanta chinde isano, akabora: Omonene, nkwang’ete chitalanta isano, rora nanyorire ebitoki, chitalanta chinde isano. 21Omonene oye akamotebia: Gwakorire buya aye, omosomba omuya naende omwegenwa; kwabeire omwegenwa ase ebire ebike, ninkobeke igoro ase ebire ebinge. Soa ase omogoko bw’omonene oo. 22Naende oria oetwe chitalanta ibere agacha, akabora: Omonene, nkwang’ete chitalanta ibere, rora, nanyorire ebitoki, chitalanta chinde ibere. 23Omonene oye akamotebia: Gwakorire buya aye, omosomba omuya naende omwegenwa; kwabeire omwegenwa ase ebire ebike, ninkobeke igoro ase ebire ebinge. Soa ase omogoko bw’omonene oo. 24Na oria oetwe etalanta eyemo agacha, akabora: Omonene, nakomanyete ng’a nigo ore omonto omokong’u, okogesa aase otasimegete, na gosangereria aase otabusurete; 25erio nkoboa, nkagenda nkabisa etalanta yao inse. Nero eye. 26Korende omonene oye akamoiraneria: Aye omosomba omobe naende omworo! Nkwamanyete ng’a nigo nkogesa aase ntasimegete, naende nigo ngosangereria aase ntabusurete? 27Gaki nkwagwenerete kobeka chibesa chiane ase abakorua ebitoki, na inche ngocha, anga nanyora echiane amo nebitoki biane. 28Gaki, moure etalanta yaye, moe oria obwate chitalanta ikomi. 29Naki kera oyore negento naegwe, naende amenteranigwe; korende ere oyotari negento, nonya nkeria abwate naurwe. 30Na omosomba oria otagwenereti, motugute isiko ase omosunte. Aroro abanto inababe nekerero na okoriania amaino.

Rituko ri’ekina

31“Ekero Omwana‐o‐mwanyabanto agochi‐gocha ase obonene bwaye, na abamalaika bonsi amo nere, erio naikaranse ase ekerogo kiaye ki’obonene. 32Ebisaku bionsi nabisangererie ase obosio bwaye; ere naatanane abaiga na aba buna omorisia agwatanana ching’ondi ne chimbori. 33Ching’ondi nachibeke ensemo y’okoboko kwaye gw’okorio, korende chimbori ensemo y’okoboko kwaye gw’okobee. 34Erio Omoruoti natebie abare ensemo y’okoboko kwaye gw’okorio: Inchuo inwe abamwasesenetigwe na Tata one, soa ase omwando bw’oboruoti mwaroiseretigwe korwa ogotongwa gw’ense, 35ekiagera inarenge nenchara, mokang’a endagera; inarenge nerang’o, mokang’a nkanywa; inarenge omogeni, mokandoisia; 36inarenge getirianda, mokamboyia; inarwarete, mogacha kondora; inasibetwe echela, moanchichera. 37Erio abanyene oboronge nabamoiranerie: A! Omonene, indi twakoroche kore nenchara, togakorageria? Gose indi twakoroche kore nerang’o, togakoa okanywa? 38Indi twakoroche kore omogeni, togakoroisia, gose getirianda, togakoboyia? 39Naende indi twakoroche kore omorwaire, gose gosibire echela, togacha gokorora? 40Na Omoruoti nabairanerie: Nekeene nabatebirie: Koreng’ana buna mware gokorera oyomo bw’aba abaminto abare abake, ninche mwakorerete. 41Erio natebie abare ensemo y’okoboko kwaye gw’okobee: Karue asende inwe abamwaragereretigwe, mogende ase omorero o kare na kare, oyoroiseretigwe Saitani na abamalaika baye, 42ekiagera inarenge nenchara, timwang’a endagera; inarenge nerang’o, timwang’a inywe. 43Inarenge omogeni, timwandoisia; inarenge getirianda, timwamboyia; inarwarete, narenge echela ime, timwacha kondora. 44Erio barabwo nabamoiranerie: Omonene, indi twakoroche aye kore nenchara, gose kore nerang’o, gose kore omogeni, gose kore getirianda, gose kore omorwaire, gose kore echela ime, na titwagokorera? 45Erio nabairanerie: Nekeene nabatebirie: Koreng’ana buna motare gokorera oyomo bw’aba abare abake, timwankorerete inche. 46Na abanto aba nabagende ase egesusuro gia kare na kare, korende abanyene oboronge nabagende ase obogima bwa kare na kare.”

Currently Selected:

MATAYO 25: EKEGUSIIBBLE

Highlight

Copy