MATAYO 16

Yeso okwanga koorokia egekone

(Mar 8:11–13; Luk 12:54–56; 11:29)

1Abafarisai na Abasadukai bagacha ase ogoteema Yeso, bakamosaba aborokie egekone buna ekemanyererio korwa igoro. 2Akabairaneria, “Rikoba mogoroba, mwabora: Rero nerakeere, ekiagera igoro abariirire. 3Na mambia mwabora: Rero netwe ey’omwaga, ekiagera amare abariirire na gosung’unana. Inwe imomanyete obosio bw’erioba, korende timomanyeti ebimanyererio bi’ebiro. 4Ekegori ekebe ki’obotomani kerigetie egekone, korende tigekoegwa egekone otatiga ekia Yona.” Erio akabatiga, akagenda.

Yeso ogotogonyera obouko bw’aborokigwa

(Mar 8:14–21)

5Ekero aborokigwa baika ng’umbu, konya beebire koirana emegati. 6Yeso akabatebia, “Rigereria, mwerende nememera y’Abafarisai na Abasadukai.” 7Bakaborania, bagoteba, “Titwarentete emegati.” 8Korende Yeso, konya omanyire aya, akabora, “Inwe abamore nokwegena ogoke, inki gekogera mokona‐koborania ng’a timori nemegati? 9Timokomanya gose koinyora emegati eria etano ase baria chilifu isano, na ebitonga mbirenga mwasangereretie? 10Nonya nemegati eria etano na ebere ase baria chilifu inye, na ebitonga mbirenga mwasangereretie? 11Naki inwe motari komanya ng’a tindi gokwana igoro y’emegati? Mwerende nememera y’Abafarisai na Abasadukai.” 12Erio bakamanya ng’a tare kobatebia okwerenda nememera y’emegati, korende nokworokereria kw’Abafarisai na Abasadukai.

Okoorokia gwa Petero ng’a Yeso nere Kristo

(Mar 8:27–30; Luk 9:18–21)

13Bono ekero Yeso acha ensemo ya Kaisaria Filipi, akaboria aborokigwa baye, “Inee! Abanto nigo bakobora ng’a Omwana‐o‐mwanyabanto nere ng’o?” 14Bakamoiraneria, “Abande nig’o bagoteba: Yohana Omobatisi; na abande: Elija; na abande: Yeremia gose oyomo bw’ababani.” 15Akababoria, “Nainwe mokobora ng’a ninche ng’o?” 16Simion Petero akamoiraneria, “Aye naye Kristo, Omwana o Nyasae ore moyo.” 17Yeso akamoiraneria, “Nosesenirie aye Simion, mosinto o Yona, ekiagera eri tomaanoreiri nomobere na amanyinga, korende na Tata one ore igoro. 18Na inche nagotebirie, ng’a aye naye Petero, na ase egetare eke ning’agache ekanisa yane, ne chinguru chi’amakweri tichikoyebua. 19Inche ninkoe ebigorero bi’oboruoti bwa igoro, na ande onsi orasibe ase ense nabe asibirwe na igoro, na ande onsi orasibore ase ense nabe asiboirwe na igoro.” 20Erio agachika aborokigwa baye bokong’u tibatebia onde ng’a nere Kristo.

Yeso okobana ogokwa na okoboka kwaye

(Mar 8:31–33; Luk 9:22)

21Korwa ekero ekio Yeso agachaka kworokereria aborokigwa baye ng’a nemogwenerete kogenda Yerusalemu, anyare gochandwa nabagaaka, na abakuani abanene, na aborokia b’amariko, ase chinchera chinyinge, na goitwa; ase rituko ria gatato naboke. 22Petero akamoira ensemo, agachaka komokania, akabora, “Omonene, ayio tabaisa gokonyora! Takoba asore buna ayio.” 23Korende Yeso akeonchora, agatebia Petero, “Irana nyuma yane, Saitani! Aye nigo origetie gontanga, ekiagera aye tori ase ensemo ya Nyasae, korende nase mwanyabanto.”

Okorangerigwa kw’ogwekeyia omonyene

(Mar 8:34; 9:1; Luk 9:23–27)

24Erio Yeso agatebia aborokigwa baye, “Oyorigetie gontunyana, tiga ekaane ere omonyene, etweke omosalaba oye, antunyane. 25Naki onde bwensi orarigie koegera obogima bwaye, oyio nabosirie; na oyorasirie obogima bwaye ase engencho yane, oyio naboegere. 26Ninki eragwenere omonto konyora ense yonsi, ko asirie omoyo oye? Gose omonto inki ararue ase ribaga ri’omoyo oye? 27Ekiagera Omwana‐o‐mwanyabanto naoroke nabamalaika baye ore nobonene bwa Ise, na ekero ekio ng’ae kera omonto koreng’ana buna are gokora. 28Nekeene nabatebirie: Abanto mbare aiga ase aba bateneine, barabwo bataigwe amakweri nonya ng’ake goika barore Omwana‐o‐mwanyabanto ogocha ase oboruoti bwaye.”

Currently Selected:

MATAYO 16: EKEGUSIIBBLE

Highlight

Copy